MUTU 57
Zatingacite Ngati Tacita Cimo Ikulu
Olo kuti mukonda Yehova ndipo muyesayesa kucita zinthu zolungama, nthawi ziyakine mungalakwise. Koma zolakwa ziyakine zunkhala zikulu kupambana ziyakine. (1 Akorinto 6:9, 10) Ngati mwacita cimo ikulu, zutanthauza lini kuti Yehova waleka kukukondani. Ni wofunishisha kukukhululukilani nokuyavyani.
1. Kansi tufunika kucita cinji kuti Yehova atikhululukile?
Ŵanthu okonda Yehova onkhala na cisoni ngati azindikila kuti acita cimo ikulu. Koma otonthozewa na zecilonjeza Yehova ku ŵanthu ŵake, kuti: “Olo kuti macimo ŵanu ankhale asweta ngako, akatuŵe ngako.” (Yesaya 1:18) Ngati talapa mocokela pansi pa mtima, Yehova okhululuka. Kansi tingaoneshe tyani kuti nise olapa? Tucita izi mwa kuzimvwila cisoni pa vinthu viipa vatacita, noleka kuvicita ndipo tusenga Yehova kuti atikhululukile. Tuyesayesa kupewa kuganizila vinthu volakwika olo kucita vinthu vamene vecitisha kuti ticite cimo yamene iyo. M’malomwake, tuyesayesa kukonkha malamulo a Yehova.—Ŵelengani Yesaya 55:6, 7.
2. Kansi Yehova oseŵenzesha tyani akulu kuti atiyavye ngati tacimwa?
Ngati tacita cimo ikulu, Yehova otiuzhya kuti tufunika ‘kuita akulu a mpingo.’ (Ŵelengani Yakobo 5:14, 15.) Akulu aŵa okonda Yehova na ŵanthu ŵake. Ni oyenelela kutiyavya kunkhala soti pa ushamwali wotang’a na Yehova.—Agalatiya 6:1.
Kansi akulu otiyavya tyani ngati tacita cimo ikulu? Akulu aŵili kapena atatu oseŵenzesha Malemba potiyavya kuona kuti zetecita n’zolakwika. Otilimbikisha notipasa malangizo amene angatiyavye kupewa kucita cimo imozimozi msogolo. Ngati munthu wamene wacita cimo ikulu ni wosalapa, akulu omucosa mu mpingo kuti ateteze mpingo.
PHUNZILANI ZINYINJI
Phunzilani zinyinji zokhuza njila yakuseŵenzesha Yehova kuti atiyavye tikacita cimo ikulu.
3. Tikaulula cimo, cunkhala cosavuta kuti tipeze thandizo mofulumila
Cimo iliyonse yatingacite, yumukhumudwisha Yehova. Tetyo, tufunika kuulula kuli yove. Ŵelengani Salimo 32:1-5, nokambilana konsho iyi:
-
Ndaŵa yanji tufunika kuulula macimo ŵasu kwa Yehova m’malo mobisa?
Kuyangizhyila pa kuulula macimo ŵasu kwa Yehova, tufunikila soti kuuzhya akulu. Akulu aŵa angatiyavye kunkhala soti pa ushamwali wotang’a na Yehova. Onelelani VIDYO, nokambilana konsho yokonkhapo.
-
Mu vidyo iyi, kansi akulu emuyavya tyani Canon kuti awelele kwa Yehova?
Tufunika kunkhala omasuka koma soti oona mtima kwa akulu, cifukwa alipo kuti atiyavye. Ŵelengani Yakobo 5:16, nokambilana konsho iyi:
-
Ndaŵa yanji cunkhala copepuka kuti akulu atiyavye ngati nise oona mtima?
Ululani macimo ŵanu, nkhalani oona mtima na akulu, ndipo landilani thandizo yacikondi yocokela kwa Yehova
4. Yehova oonesha cifundo ku ŵanthu amene acita macimo
Ngati munthu wamene wacita cimo ikulu ofuna lini soti kukonkha malamulo a Yehova, ocosewa mu mpingo, ndipo tuleka kukatizhyana naye. Ŵelengani 1 Akorinto 5:6, 11, nokambilana konsho iyi:
-
Monga ni mwazucitikila kuti yisiti yufufumisha fulawu, kansi kukatizhyana na munthu wocimwa wamene ni wosalapa kungakhuze tyani mpingo?
Potolela cifundo ca Yehova kuli ŵanthu ocimwa, akulu oyesayesa kuyavya ŵanthu amene ecosewa mu mpingo. Ŵanthu anyinji amene ecosewa, pavuli pake owelela soti mu mpingo. Ndaŵa yanji? N’cendi kuti zunkhala zoŵaŵa munthu akacosewa, koma kucita izi kumuthandiza kuzindikila kuti zecicita n’zolakwika.—Salimo 141:5.
Tikaona mwamene Yehova ocitila zinthu na ŵanthu amene acita cimo, kansi zuonesha kuti yove ni wololela, wacifundo na wacikondi?
5. Yehova otikhululukila tikalapa
Yesu eseŵenzesha fanizo kuti atiyavye kumvwisha mwaakumvwila Yehova ngati munthu walapa. Ŵelengani Luka 15:1-7, ndipo pavuli pake kambilanani konsho iyi:
-
Kansi izi zakuphunzisani cinji ponena za Yehova?
Ŵelengani Ezekieli 33:11, ndipo pavuli pake kambilanani konsho iyi:
-
Kansi tufunika kucita cinji kuti tioneshe kuti nise olapa?
Molingana na m’busa, Yehova osamalila mbelele zake
ŴANTHU AYAKINE OKAMBA KUTI: “Nuyopa kuti nikayoŵauzhya akulu kuti nacita cimo, akanicose mu mpingo.”
-
Mungamuyavye tyani munthu wamene oganiza teti?
MFUNDO ZACIDULE
Ngati tacita cimo ikulu, koma talapa mocokela pansi pa mtima nonkhala osimikizhya kuleka kucita vinthu viipa, Yehova otikhululukila.
Kuwelezhya mfundo zikulu-zikulu
-
Ndaŵa yanji tufunika kuulula macimo ŵasu kwa Yehova?
-
Kansi tufunika kucita cinji kuti Yehova atikhululukile?
-
Ngati tacita cimo ikulu, ndaŵa yanji tufunika kuuzhya akulu?
FUFUZANI
Onani mwamene munalume muyakine eonela cifundo ca Yehova camene cufotokozewa pa Yesaya 1:18.
Kansi akulu oyesayesa tyani kuyavya ŵala amene acita cimo ikulu?
“Mwamene Akulu Ooneshela Cikondi na Cifundo Kuli Ŵanthu Ocimwa” (Nsanja ya Mulonda, August 2024)
Ganizilani mwamene Yehova ooneshela cikondi na cifundo kuli ŵanthu ocimwa amene ni osalapa.
“Mwamene Akulu Angayavyile Ŵala Amene Ecosewa mu Mpingo” (Nsanja ya Mulonda, August 2024)
M’nkhani yakuti “Nenzofunika Kuwelela kwa Yehova,” onani mwamene munalume muyakine wamene enze esiya gulu ya Yehova, eonela kuti Yehova emuyavya kuti awelele.
“Baibo Yucinja Umoyo wa Ŵanthu” (Nsanja ya Olonda, April 1, 2012)
