MUTU 59
Pililani Cinzunzo
Nthawi iliyonse, Akhristu angakumane na cisuso, kapena cinzunzo. Kansi izi zufunika kuticitisha wowa?
1. Ndaŵa yanji tuyembekezela kunzunziwa?
Baibo yukamba mosapita m’mbali kuti: “Onse ofuna kunkhala na moyo wozipeleka kwa Mulungu mwa Khristu Yesu, nao anzunziwe.” (2 Timoteyo 3:12) Yesu enzunziwa cifukwa enze lini mbali ya calo ca Satana. Nase tili lini mbali ya cino calo. Tetyo, tudabwa lini ngati maboma kapena magulu a cipembezo otinzunza.—Yohane 15:18, 19.
2. Kansi tingakonzekele tyani cinzunzo?
Tufunika kutang’isha cidalilo casu pa Yehova pali lomba. Mukopatula nthawi yopemphela noŵelenga Mau ŵake, Baibo, siku iliyonse. Mukopezeka pa misonkhano ya mpingo nthawi zonse. Izi ni zinthu zamene zingakuyavyeni kunkhala otang’a mtima mukakumana na cinzunzo, kuyangizhyilapo cinzunzo cocokela kuli abanja ŵanu. Mtumwi Paulo, wamene enzonzunziwa nthawi zinyinji, elemba kuti: “Yehova ndiye mthandizi wangu. Ningayope lini.”—Aheberi 13:6.
Ciyakine camene cingatiyavye kunkhala otang’a mtima, ni kulalikila nthawi zonse. Kulalikila kutiyavya kudalila Yehova nopewa kuyopa ŵanthu. (Miyambo 29:25) Ngati mukonda kulalikila pali lomba, munkhale okonzekela bwino kuti mukapitilizhye kulalikila olo pa nthawi yakuti boma yalesha nchito yasu yolalikila.—1 Atesalonika 2:2.
3. Kansi tupindula tyani ngati tupitilizhya kutumikila Yehova mokhulupilika olo kuti tunzunziwa?
N’cendi kuti tukondwela lini ngati tunzunziwa. Koma ngati tupilila cinzunzo, cikhulupililo casu cunkhala cotang’a. Tunkhala pa ushamwali wotang’a ngako na Yehova tikaona kuti watithandiza pa nthawi yakuti tafooka. (Ŵelengani Yakobo 1:2-4.) Yehova okhumudwa ngati tuvutika. Koma osangalala ngati tupilila. Baibo yukamba kuti: “Koma ngati mupilila povutika cifukwa cocita zabwino, ndiye kuti ni zabwino kwa Mulungu.” (1 Petulo 2:20) Ngati tupitilizhya kumutumikila mokhulupilika, Yehova akatipase moyo wosasila m’calo calomba. Ŵanthu onse ati akankhale m’calo calomba akolambila tyala Yehova ndipo paliye ati akotinzunza.—Mateyu 24:13.
PHUNZILANI ZINYINJI
Onani cifukwa cake n’zokwanishika kupitilizhya kutumikila Yehova mokhulupilika olo kuti tunzunziwa. Onani soti mphoto yati tikapeze.
4. Mungakwanishe kupilila ngati abanja ŵanu okusushani
Yesu enzoiziŵa bwino mfundo yakuti nthawi ziyakine ŵanthu a m’banja mwasu angafune lini kuti tikotumikila Yehova. Ŵelengani Mateyu 10:34-36, nokambilana konsho iyi:
-
Ngati munthu wasankha kutumikila Yehova, kansi abanja ŵake angocita cinji kapena kulaŵila cinji?
Kuti muone cisanzo ca zinthu zaangacite, onelelani VIDYO, nokambilana konsho yokonkhapo.
-
Mungacitenji ngati wabanja wanu kapena muyanu okuleshani kutumikila Yehova?
Ŵelengani Salimo 27:10 na Maliko 10:29, 30. Mukaŵelenga lemba iliyonse, kambilanani konsho iyi:
-
Kansi lonjezo iyi ingakuyavyeni tyani ngati abanja ŵanu olo ayanu okuleshani kutumikila Yehova?
5. Pitilizhyani kutumikila Yehova olo kuti munzunziwa
Tufunikila kunkhala otang’a mtima kuti tipitilizhye kutumikila Yehova ngati ŵanthu ayakine otisusha olo kutinzunza. Onelelani VIDYO, nokambilana konsho yokonkhapo.
-
Kansi visanzo va m’vidyo iyi vakulimbikishani tyani kunkhala otang’a mtima?
Ŵelengani Machitidwe 5:27-29 na Aheberi 10:24, 25. Mukaŵelenga lemba iliyonse, kambilanani konsho iyi:
-
Ndaŵa yanji tufunika mphela kupitilizhya kulambila Yehova olo kuti boma yakamba kuti tileke kulalikila kapena kusonkhana?
6. Yehova akuyavyeni kuti mupilile
A Mboni za Yehova a misinkhu yosiyanasiyana koma soti a m’vyalo vosiyanasiyana apitilizhya kutumikila Yehova mokhulupilika olo kuti onzunziwa. Kuti muone caŵayavya, onelelani VIDYO, nokambilana konsho yokonkhapo.
-
M’vidyo iyi, n’cinji ceyavya Mboni izi kupilila?
Ŵelengani Aroma 8:35, 37-39 na Afilipi 4:13. Mukaŵelenga lemba iliyonse, kambilanani konsho iyi:
-
Kansi lemba iyi yukusimikizhyilani tyani kuti mungakwanishe kupilila mayeselo alionse?
Ŵelengani Mateyu 5:10-12, nokambilana konsho iyi:
-
Ndaŵa yanji mungankhale mphela acimwemwe olo kuti munzunziwa?
A Mboni za Yehova mamiliyoni apitilizhya kutumikila Yehova mokhulupilika olo kuti osushiwa. Namwe mungakwanishe!
ŴANTHU AYAKINE OKAMBA KUTI: “Ningakwanishe lini kupilila cinzunzo.”
-
Ni malemba otyani amene angaŵayavye kunkhala na cidalilo cakuti angakwanishe kupilila?
MFUNDO ZACIDULE
Yehova oyamikila ngako ngati tupitilizhya kumutumikila olo kuti tunzunziwa. Na thandizo yake, tingakwanishe kupilila!
Kuwelezhya mfundo zikulu-zikulu
-
Ndaŵa yanji Akhristu oyembekezela kunzunziwa?
-
Kansi mungakonzekele tyani cinzunzo?
-
N’cinji cingakuyavyeni kunkhala na cidalilo cakuti mungapitilizhye kutumikila Yehova olo kuti mukumana na mayeselo?
FUFUZANI
Onani zakufotokoza mkwasu muyakine wacilumbwana, zokhuza mwecimuyavyila Yehova kuti apilile peciikiwa m’jele cifukwa cokana kutolamo mbali m’nkhani zandale.
Onani zeyavya banja iyakine kupitilizhya kutumikila Yehova mokhulupilika kwa vyaka vinyinji olo kuti yenzosushiwa.
Onani zingakuyavyeni kunkhala otang’a mtima ngati munzunziwa.
“Konzekelani Cinzunzo Pali Lomba” (Nsanja ya Mlonda, July 2019)
Kansi tufunika kucitanji ngati abanja ŵasu otisusha? Nanga tingacitenji kuti tipitilizhye kunkhala nao pa mtendele nopitilizhya kutumikila Yehova mokhulupilika?
“Cendi Culeta Lini Mtendele Koma Cipula” (Nsanja ya Mlonda, October 2017)
