Mulungu etola mvyalo za Abulahamu kuŵa mtundu wake, noupa malamulo. Mtundu uyu eutomola kuti “Israeli,” soti eikizhya kulambila kwacendi na malizu ŵake m’manja mwao. (Salimo 147:19, 20) Ecita zamene izi kuti ŵanthu a mitundu yonse azepindule kuli Aisraeli.​—Ŵelengani Genesis 22:18.

Mulungu esalula Aisraeli kuŵa mboni zake. Mbili yao yuonesha kuti ŵanthu opindula ngako akamvwila malamulo ya Mulungu. (Deuteronomo 4:6) Tetyo, kupitila mwa Aisraeli, ŵanthu ayambine enze kuzoziŵa Mulungu wendi.​—Ŵelengani Yesaya 43:10, 12.

M’kuluta kwa nsita, Yehova eukana mtundu wa Israeli. M’malo mwake, etola mpingo wacikhilisitu kuŵa ŵanthu ŵake. (Mateyu 21:43; 23:37, 38) Nsiku zino, Akhilisitu acendi niye mboni za Yehova, osati Aisraeli soti.​—Ŵelengani Machitidwe 15:14, 17.

Yesu ekonzekelesha akonkheleli ŵake kuti akaŵilizhye uthenga uweme nopanga asambili m’mitundu yonse. (Mateyu 10:7, 11; 24:14; 28:19, 20) Mu nsiku zino zosilizhyila, nchito iyi yafwika pacinyinawene. M’mbili yonse ya ŵanthu, ino yaŵa nsita yotatika kuti Yehova aunganishe ŵanthu mamiliyoni kuti aolambila pamo. (Chivumbulutso 7:9, 10) Akhilisitu acendi ounganishiwa pamo kuti akoseshane noyavyana umo na muyake. Pa calo conse, oseŵenzesha njila imo yosambilila malango a m’Baibolo pa maungano ŵao.​—Ŵelengani Aheberi 10:24, 25.

M’vyaka va m’ma 1870, kaumba ka asambili a Baibolo ketatika kufwanga vyendi va m’Baibolo venze vesoŵa kwa nsita ikuleni. Ŵeve eziŵa kuti Yesu epanga mpingo wacikhilisitu noupa nchito yoŵilizhya. Tetyo, etatika kampeni ya pa calo conse yoŵilizhya uthenga uweme. Mu 1931, etola zina yakuti Mboni za Yehova.​—Ŵelengani Machitidwe 1:8; 2:1,4; 5:42

Mu nsita ya Akhilisitu otatika, mipingo yacikhilisitu pa calo conse yenzotanguliliwa na umba yolamulila. Umba yamene iyo yenzocinzika Yesu Khilisitu n’nga Mutu wa mpingo. (Machitidwe 16:4, 5) Nsiku zino soti, Umba Yolamulila niye yutangulila Mboni za Yehova pa calo conse. Ali mu Umba yamene iyi ni akulu oziŵa moyendeshela vinthu. Yutangulila nchito zucitika ku maofesi ya msambo ya Mboni za Yehova. Nchito izi ni kutembenuzhya mabuku yosambilila Baibolo, kuŵasindikizhya, na kuŵayaŵila kwa ŵanthu m’vilaŵilo vopitilila 600. Tetyo, Umba Yolamulila yutang’isha mipingo yopitilila 100,000 pa calo conse, noyitangulila. Mpingo uliwonse, uli na analume ofwikapo otumikila n’nga akulu nangu otangulila. Analume aŵa oŵeta mbelele za Mulungu mwacinthemwa.​—Ŵelengani 1 Petulo 5:2, 3.

Mboni za Yehova zili na nchito yoŵilizhya uthenga uweme nopanga asambili. N’nga mwezenzocitila nthumwi, nase tuŵilizhya n’ganda na n’ganda. (Machitidwe 20:20) Soti, tusenga ŵanthu otemwa cendi kuti tosambila nao Baibolo. Mboni za Yehova ni umba lini tyala. Nise banja ya Atata ŵamo otitemwa. Tonse m’pokwasu, soti tusamalilana umo na muyake. (2 Atesalonika 1:3) Pofwanga kuti ŵanthu a Yehova ni okatizhyana kuti aomutemwesha noyavya ŵanthu ayambine, ŵeve ni banja yotemwa ngako pa calo conse.​—Ŵelengani Salimo 33:12; Machitidwe 20:35.