Yehova ecipa ŵanthu calo. Niye munzi wasu. Tetyo banja yotatika, Adamu na Eva, aliyeŵalenge kuti akankhale kululu. Mulungu enze elenga kale angelo kuti aonkhala kululu. (Yobu 38:4, 7) M’malo mwake, etola munthu wotatika nomuika m’munda wotemwesha wa Edeni. (Genesis 2:15-17) Yehova ecipa Adamu na ŵana ŵake akunthangu, shuko yakuŵa na moyo wotemwesha, soti wosasila pa calo.​—Ŵelengani Salimo 37:29; 115:16.

Potatika, paladaiso enze tyala pa munda wa Edeni. Banja yotatika yenzowamila kuzuzhya calo conse na ŵana ŵao. M’kuluta kwa nsita, enzowamila kulamulila calo conse nociwamya kuti ciŵe paladaiso. (Genesis 1:28) Calo cipitililzhye kuŵa munzi wa ŵanthu, cikacenekewe lini.​—Ŵelengani Salimo 104:5.

Onelelani vidyo yakuti Ko Mulungu Elenga Calo pa Cikomo Canji?

Adamu na Eva aliyomvwile Mulungu, tetyo Yehova eŵafumya m’munda wa Edeni. Paladaiso etaika, soti paliye munthu angatweshe kuiwezhyelapo. Baibolo yuteti: “Calo catwaliwa m’manja mwa munthu muipa.”—Yobu 9:24.​—Ŵelengani Genesis 3:23, 24.

Ko Yehova ekangiwa kukwanilisha lingo yake yapotatika pa ŵanthu? Yayi! Yove ni wampamvu zonse, angakangiwe lini. (Yesaya 45:18) Akacitishe kuti mtundu wa ŵanthu ukankhale soti mwenzopangwila.​—Ŵelengani Salimo 37:11, 34.

Paladaiso akawezhyewe pa calo Yesu pati aolamulila n’nga Mfumu yoikiwa na Mulungu. Pa nkhondo yoitiwa  kuti Alamagedo, Yesu akatangulile angelo a Mulungu noceneka onse ocita vasapangwa Mulungu. Yesu akamange Satana nomuvalila vyaka 1,000. Koma ŵanthu a Mulungu akapuzumuke, cikomo cakuti Yesu akaŵatangulile na kuŵacingilila. Ŵeve akatemwe kuŵa na moyo m’Paladaiso pa calo.​—Ŵelengani Chivumbulutso 20:1-3; 21:3,4.

Ni lini Mulungu pati akafumyepo viipa pa calo? Yesu elaŵila za “ciziŵisho” cuonesha kuti tili kumasilizhyilo a calo. Vucitika lomba pa calo vupangisha moyo wa ŵanthu kuŵa pa ngozi, soti vuonesha kuti tili ku “masilizhyilo a nsita ino.”​—Ŵelengani Mateyu 24:3, 7-14, 21, 22.

Yesu ali kululu, akalamulile calo vyaka 1,000. Pa nsita yamene iyo yove akafumyepo kutamana konse. (Yesaya 9:6, 7; 11:9) Yesu n’nga mfumu, koma soti mkulu wa ansembe, akuzofufuta macimo ya ŵala otemwa Mulungu. Tetyo, kupitila mwa Yesu, Mulungu akafumyepo kulwala, kukulukazhya na imfwa. ​—Ŵelengani Yesaya 25:8; 33:24.

Ŵanthu omvwila Mulungu niye ati akankhale m’Paladaiso. (1 Yohane 2:17) Yesu etuma okonkheleli ŵake kuti akasakile ŵanthu osisikanya noŵasambizhya mwangaŵele olondelewa kwa Mulungu. Yehova okonzekelesha ŵanthu mamiliyoni kuti akaŵe na moyo m’Paladaiso ikuza pa calo. (Zefaniya 2:3) Pa Ng’anda ya Ufumu ya Mboni za Yehova, ŵanthu osambila kuti aŵe mulume na wisi muweme, mkazi na nyina muweme. Ŵana na avyazi olambila nosambilila pamo mwangapindulile na uthenga uweme.​—Ŵelengani Mika 4:1-4.