SAMBILO 2
Ko Mulungu Ni Ŵani?
1. Ndaŵa yanji tuwamila kumulambila Mulungu?
Mulungu wacendi niye elenga vinthu vonse. Yove aliyenkhalepo na potatikila, soti akaŵe lini na posilizhyila. (Salimo 90:2) Soti uthenga uweme ufwangika m’Baibolo ufumila kuli yove. (1 Timoteyo 1:11) Pofwana kuti Mulungu niye etipa moyo, tuwamila kulambila yove yeka tyala.—Ŵelengani Chivumbulutso 4:11.
2. Kansi Mulungu ali na minkhalidwe yotyani?
Paliye munthu eonapo Mulungu cikomo cakuti yove ni mzimu. Ali na moyo wapalulu ngako kusiyana na volengewa vonse va pano pa calo. (Yohane 1:18; 4:24) Nangu n’tetyo, tingaziŵe minkhalidwe ya Mulungu pololesha vinthu vecipanga. Coonelapo, visepo na maluŵa, vutionesha cinthemwa na nzelu zake. Kukula kwa cilengedwe nako kutionesha kuti yove ni wamphamvu.—Ŵelengani Aroma 1:20.
Tingasambile soti zinyinji za minkhalidwe ya Mulungu poŵelenga Baibolo. Viyambine vayutiuzhya ni vakutemwa na vasatemwa, mwakucitila na ŵanthu, koma soti mwakucitila na minkhalidwe yosiyana-siyana.—Ŵelengani Salimo 103:7-10.
3. Ko Mulungu ali na zina?
Yesu elaŵila kuti: “Ausu wasu muli kululu, zina yanu ituŵishiwe.” (Mateyu 6:9) Mulungu ali na mazina anyinji yomucinzikila. Kuyangizhyila apo, ali na zina imo tyala yomutomolela. Mu cilaŵilo ciliconse oitomola mosiyana. Pa Cinsenga yutomolewa kuti “Yehova.” Koma ŵanthu ayakine oitomola kuti “Yawe.”—Ŵelengani Salimo 83:18.
Zina ya Mulungu aifumyamo m’mabaibolo anyinji. M’malo mwake, aikamo mazina omucinzikila tyala n’nga akuti Asukulu keno Mulungu. Koma peyelembewa Baibolo zina ya Mulungu yenzofwangikamo nsita 7,000. Yesu eziŵisha ŵanthu za zina yamene iyo penzoŵasambizhya za Mulungu.—Ŵelengani Yohane 17:26.
Onelelani vidyo yakuti Ko Mulungu Ali na Zina?
4. Mwa Yehova osamala za seo?
N’nga ni wisi uyu wacinthemwa, Mulungu naye ocitapo kanthu kuti tiŵe na umoyo uweme lomba na kunthangu
Ko kupaka kwa matamano kutanthauzhya kuti Yehova osamala lini za seo? Ŵanthu ayakine olaŵila kuti yove ocitisha matamano kuti atiyese. Koma ici n’cendi lini.—Ŵelengani Yakobo 1:13.
Mulungu waticinzika potipa ufulu wosalula zocita. Ko tutembezhya lini shuko yatili nayo yosalula kutumikila Mulungu? (Yoswa 24:15) Koma ŵanthu anyinji osalula kucitila ayao vinthu viipa. Vamene ivi vucitisha kuti ŵanthu anyinji aotamana. Yehova onyansiwa na kusoŵa cilungamo koteti.—Ŵelengani Genesis 6:5, 6.
Yehova ni Mulungu wosamala za seo. Yove opangwa kuti totemwa na moyo. Lombapano azefumyepo matamano pamo na ŵala oyacitisha. Koma pali lomba ali na cikomo ciweme cawalekelela matamano kwa kansita. Mu nkhani ya Sambilo 8 tizesambile cikomo camene ico kuti n’cotyani.—Ŵelengani 2 Petulo 2:9; 3:7, 13.
5. Kansi tingavwendele tyani pafupi na Mulungu?
Yehova otisenga kuti tivwendele pafupi na yove mwa kulaŵila naye m’lombelo. Yove ali na cidwi na aliyense wa seo. (Salimo 65:2; 145:18) Niwofunishisha kutikhululukila. Oona kuyezhya-yezhya kwasu kuti timutemweshe, nangu kuti nsita ziyambine tukangiwa. Nangu kuti nise ocimwa, tingaŵe paushamwali uweme ngako na Mulungu.—Ŵelengani Salimo 103:12-14; Yakobo 4:8.
Pofwana kuti Yehova etipa moyo, tuwamila kum’temwa ngako kupula munthu aliyense. (Maliko 12:30) Keno muonesha cinthemwa canu pa Mulungu posambila vinyinji va yove, nakucita vakumusengani, muvwendele naye pafupi ngako.—Ŵelengani 1 Timoteyo 2:4; 1 Yohane 5:3.
