SAMBILO 8
Ko Mulungu Walolelanji Viipa na Matamano?
1. Kansi viipa vetatika tyani?
Nsita yamene Mulungu walola ŵanthu kuti alamulile yaoneshelatu kuti angakwanishe lini kusilizhya matamano
Viipa vetatika pa calo Satana pecitala wenye wotatika. Satana potatika enze mngelo muweme. Nangu n’tetyo, “yove aliyonkhazikike m’vyendi.” (Yohane 8:44) Etatika kukumbwa kuti ŵanthu akolambila yove m’malo molambila Mulungu. Satana etala wenye kuli mwanakazi wotatika Eva, na kumunyengelela kuti amvwile yove m’malo mwa Mulungu. Adamu naye ekatizhyana na Eva pa kusamvwila Mulungu. Zecisalula kucita Adamu zeleta matamano na imfwa.—Ŵelengani Genesis 3:1-6, 19.
Satana peuzhya Eva kuti asamvwile Mulungu, etatika umba yopondokela ulamulilo wa Mulungu. Ŵanthu anyinji akatizhya na Satana pa kukana Mulungu n’nga Oŵalamulila. Umu niye mweŵela “wolamulila wa calo” Satana.—Ŵelengani Yohane 14:30; 1 Yohane 5:19.
2. Ko vecilenga Mulungu venze na cilema ciliconse?
Nchito zonse za Mulungu ni zangwilyo. Ŵanthu pamo na angelo enzeve cilema ciliconse peciŵalenga Mulungu. Tetyo sembe ekwanisha kumvwila Mulungu osaluvyako ciliconse. (Deuteronomo 32:4, 5) Mulungu etipa ufulu wosalulapo kucita vinthu viweme keno viipa. Ufulu wamene uyu utipa shuko yoonesha kuti tumutemwa Mulungu.—Ŵelengani Yakobo 1:13-15; 1 Yohane 5:3.
3. Ko Mulungu walolelanji matamano mpaka lomba?
Kwa nsita yoikika, Yehova walola ŵanthu kuti apondokele ulamulilo wake. Pa cikomo canji? Kuti aoneshe kuti ulamulilo wa ŵanthu ungapindulishe lini aliyense keno ocetekela lini Mulungu. (Mlaliki 7:29; 8:9) Vocitika va ŵanthu pa vyaka 6,000 vapita, vaoneshelatu mfundo yamene iyi. Ŵanthu akangiwa kufumyapo nkhondo, vicito vosamvwila malamulo, kusoŵa cilungamo na matenda.—Ŵelengani Yelemiya 10:23; Aroma 9:17.
Kusiyana na ulamulilo wa ŵanthu, ulamulilo wa Mulungu upindulisha ŵala ouvomela. (Yesaya 48:17, 18) Lombapano, Yehova akuzofumyapo maboma yonse ya ŵanthu. Koma ŵala tyala osalula ulamulilo wa Mulungu, niye ati akankhale pano pa calo.—Yesaya 11:9.—Ŵelengani Danieli 2:44.
Onelelani vidyo yakuti Ko Mulungu Walolelanji Matamano Mpaka Lomba?
4. Ko Kudekha kwa Mulungu kwatipa shuko yotyani?
Satana elaŵila kuti ŵanthu otumikila Mulungu pa cikomo ca dyela tyala. Ko muziŵa kuti mungaoneshe kuti uyu ni wenye? Kudekha kwa Mulungu kutipa shuko yakuti tioneshe keno tusalula ulamulilo wake keno wa ŵanthu. Vatucita vingaoneshe mbali yatasalula.—Ŵelengani Yobu 1:8-12; Miyambo 27:11.
5. Tingasalule tyani Mulungu kuŵa Wotilamulila?
Vocita vasu niye vuonesha keno tasankha Mulungu kuŵa wotilamulila
Tingasalule Mulungu kuŵa Wotilamulila mwa kusambila cendi m‘Malizu ŵake Baibolo, na kucita vinthu vukatizhyana na kulambila kwacendi. (Yohane 4:23) Koma Satana tingamukane kuŵa wotilamulila keno tutolamo lini mbali m’ndale na m’nkhondo, n’nga ni mwecicitila Yesu.—Ŵelengani Yohane 17:14.
Satana mwa mphamvu zake otunthuvyila minkhalidwe iipa na yuceneka. Keno tucitako lini vinthu viipa, ayasu ayakine na a m’banja angatatike kutinena nangu kutisusha. (1 Petulo 4:3, 4) Tetyo tuwamila kusalulapo, kuti ko tikatizhyane na ŵanthu ŵala otemwa Mulungu? Ko timvwile malamulo ŵake anzelu na acinthemwa? Tikacita zamene izi, tioneshe kuti Satana etala wenye peciti kuliye munthu angamvwile Mulungu akaŵa na matamano.—Ŵelengani 1 Akorinto 6:9, 10; 15:33.
Cinthemwa ca Mulungu pa ŵanthu cuŵasimikizhyila kuti matamano na viipa vikasile. Ŵala ocetekela zamene izi akaŵe na moyo wosasila wotemwesha pano pa calo.—Ŵelengani Yohane 3:16.
