Uthenga uweme ufumila kuli Yehova, Mulungu wotemwa. Yove opangwa soti kuti mabanja yaokuŵa yotemwa. (1 Timoteyo 1:11) Mulungu niye eyambisha cikwati. Cikwati calamulo cupangisha banja kuŵa yotemwa, cikomo cakuti ŵana olelewa m’banja yotetyo akuŵa ocingililiwa.

Ko Mulungu ociwona tyani cikwati? Yove opangwa kuti cikwati ciŵe mkatizhyano wosasila pakati pa mwanalume na mwanakazi. Akhilisitu owamila kumvwila malamulo a boma olaŵila za kulembesha cikwati. (Luka 2:1, 4, 5) Yehova opangwa kuti mulume aocetekelana na mkazi wake. (Aheberi 13:4) Yove ozonda kusilizhya cikwati. (Malaki 2:16) Koma umo akacita ucende, Mulungu olola kusilizhya cikwati nolungula soti.​—Ŵelengani Mateyu 19:3-6, 9.

Yehova elenga mwanalume na mwanakazi kuti aoyavyana m’cikwati (Genesis 2:18) N’nga mutu wa banja, mulume owamila kufwangila banja yake vinthu vopangwika pa moyo, noisambizhya za Mulungu. Owamila soti kulitwala mwacinthemwa kwa mkazi wake. Mulume na mkazi wake owamila kutemwana nocinzikana. Pakuŵa kuti onse ni ocimwa, kukhululukilana niye kungayavye kuti cikwati cao ciŵe cotemwesha.​—Ŵelengani Aefeso 4:31, 32; 5:22-25, 33; 1 Petulo 3:7.

Keno mwakumana na matamano m’cikwati canu, monse mwaaŵili muwamila kuyezhya ngako kucitilana vinthu mwa cinthemwa. (1 Akorinto  13:4, 5) Malizu ya Mulungu yolimbikisha lini kupatukana kunkhala njila yosilizhyila matamano yatontho-yatontho ya m’vikwati.​—Ŵelengani 1 Akorinto 7:10-13.

Yehova opangwa kuti mwakuŵa otemwa. Okupani malango aweme okuyavyani kuti motemwa na moyo pausaza wanu. Yove opangwa kuti mupindule na nzelu za avyazi ŵanu, koma soti na vinthu vakuziŵa. (Akolose 3:20) Yehova opangwa soti kuti mokuŵa otemwa potumikila yove Nyamalenga, na Mwana wake.​—Ŵelengani Mlaliki 11:9–12:1; Mateyu 19:13-15; 21:15, 16.

Muwamila kuseŵenza na mphamvu kuti mufwangile ŵana ŵanu vakulya, poyona na vovwala. (1 Timoteyo 5:8) Koma kuti ŵana ŵanu aŵe otemwa, muwamila kuŵasambizhya kuti aotemwa Mulungu nosambila kuli yove. (Aefeso 6:4) Keno ŵana ŵanu oona kuti mutemwa Mulungu, nao angatatike kumutemwa. Keno malango ŵanu ofumila m‘Malizu ya Mulungu, ŵana ŵanu aolingilila luweme.​—Ŵelengani Deuteronomo 6:4-7; Miyambo 22:6.

Ŵana otemwa kuŵalimbikisha noŵalumba. Muwamila soti kuŵasambizhya noŵalanga. Kulangiza koteti, kungaŵacingilile ku minkhalidwe iipa ingaŵalonde nseko yao. (Miyambo 22:15) Nangu n’tetyo, cilango cuwamila lini kuŵa conyanya keno cankhaza.​—Ŵelengani Akolose 3:21.

Mboni za Yehova zulemba mabuku yosiyana-siyana yakuti yayavye ngako-ngako avyazi na ŵana. Nkhani zake zukatizhyana na Baibolo.​—Ŵelengani Salimo 19:7, 11.