Yesu pecifwika ku Betaniya kufupi na ku Yerusalemu, pepita nsiku zinai kufumila peecifwa muyake, Lazaro. Yesu pamo na Malita na Mariya, azilongosi a Lazaro ula ecifwa, eciya ku manda. Pakaliyopita nsita ikuleni, ŵanthu anyinji eunjikana kwamene uko. Lingililani tyala mwecitemwela Malita na Mariya, Yesu peusha Lazaro!​—Ŵelengani Yohane 11:21-24, 38-44.

Malita enzoziŵa kale uthenga uweme ulaŵila za akufwa. Eziŵa kuti Yehova akaushe ŵanthu ecifwa kuti akaŵe soti na moyo pa calo.​—Ŵelengani Yobu 14:14, 15.

Ŵanthu epangiwa kufumila ku lito. (Genesis 2:7; 3:19) Tiliyelengewe na muŵili uli na mzimu usafwa, tetyo paliye ciliconse cupitilizhya kuŵa na moyo tikafwa. Tikafwa tonfwe ulekelatu kuseŵenza, soti malingililo yasu osililatu. Pa cikomo ici, Lazalo aliyolaŵilepo kuti ku imfwa kweenze kwecitika vinthu vakuti-vakuti.​—Ŵelengani Masalimo 146:4; Mlaliki 9:5, 6, 10.

Ko Mulungu ozunza ŵanthu mu mulilo ku helo akafwa? Baibolo yuonesha kuti akufwa oziŵa lini kanthu. Tetyo, kusambizhya kuti Mulungu ozunza ŵanthu mu mulilo ni kumtalizhyila wenye. Mulungu onyansiwa na cisambizhyo camene ici.​—Ŵelengani Yeremiya 7:31.

Onelelani vidyo yakuti Ko Akufwa Ali mu M’nkhalidwe Wotyani?

Akufwa angalaŵile lini nase keno kutimvwa. (Salimo 115:17) Koma angelo aipa, angalaŵile na ŵanthu kuyezhyelela n’nga ni ŵanthu ecifwa. (2 Petulo 2:4) Yehova olesha kukonshela kuli akufwa.​—Ŵelengani Deuteronomo 18:10, 11.

Ŵanthu mamiliyoni anyinji ali kumanda akaŵe soti na moyo pa calo. Ŵala enzocita viipa, ecifwa akaliyoziŵa Mulungu, nao akaushiwe.​—Ŵelengani Luka 23:43; Machitidwe 24:15.

Ŵanthu oushiwa akasambile cendi ca Mulungu, soti akacetekele Yesu nomumvwila. (Chivumbulutso 20:11-13) Ŵala ati akacite viweme pavuli poushiwa, akaŵe na moyo wosasila pa calo. Welengni Yohane 5:28, 29.

Mulungu etipa cilolelo cakuti akufwa akauke pecitumizhya Mwana wake kuzotifwila. Tetyo kuushiwa kutiuzhya za cinthemwa na wanzi wa cisomo ca Yehova. Ni ŵani ngako-ngako wamupangwa kuti mukaone ŵanthu akayoushiwa?​—Ŵelengani Yohane 3:16; Aroma 6:23.