SAMBILO 7
Ko Ufumu wa Mulungu Ni Cinji?
1. Mwa Ufumu wa Mulungu ni cinji?
Ko m’mwake Yesu kuŵa Mfumu pa vikomo vini?—MALIKO 1:40-42.
Ufumu wa Mulungu ni boma ya kululu. Ukuzoloŵa m’malo mwa maufumu onse nokwanilisha copangwa ca Mulungu pa calo n’nga mwacucitikila kululu. N’cotemwesha kuti Mulungu akaseŵenzeshe Ufumu wake m’njila yamene iyi. Lombapano, Ufumu wamene uyu ukuzokwanilisha cakupangwa ŵanthu, cakuŵa na boma iweme. Soti ukuzokatanisha ŵanthu onse onkhala pa calo.—Ŵelengani Danieli 2:44; Mateyu 6:9, 10; 24:14.
Boma iliyonse yuwamila kuŵa na mfumu yake. Naye Yehova eika Yesu Khilisitu Mwana wake kuŵa Mfumu ya boma yake.—Ŵelengani Chivumbulutso 11:15.
Onelelani vidyo yakuti Mwa Ufumu wa Mulungu ni Cinji?
2. Ndaŵa yanji Yesu M’mwake kuŵa Mfumu?
Yesu mwana wa Mulungu m’mwake kuŵa Mfumu, cikomo cakuti yove ni muweme mtima, soti ni wotang’a pa cilungamo. (Mateyu 11:28-30) Kuyangizhyila apo, yove akaŵe na mphamvu zoyavya ŵanthu cikomo cakuti akalamulile calo ali kululu. Yesu peciushiwa eluta kululu nakuyolindilila ku kwanja kwendi kwa Mulungu kuti amupe mphamvu zakuti aolamulila. (Aheberi 10:12, 13) Posilizhyila pake, Mulungu emupa mphamvu zakuti atatike kulamulila.—Ŵelengani Danieli 7:13, 14.
3. Niŵani ati akalamulile pamo na Yesu?
Kaumba koitiwa kuti “atuŵa,” niye kati kakalamulile pamo na Yesu kululu. (Danieli 7:27) Otatika kusaluliwa mwa atuŵa, enze nthumwi za Yesu zocetekeleka. Mpaka lomba, Yehova akalupitilizhya kusalula analume na anakazi ocetekeleka kuŵa atuŵa. N’nga ni mweciushiwila Yesu, nao oushiwa na miŵili yamzimu.—Ŵelengani Yohane 14:1-3; 1 Akorinto 15:42-44.
Mwa ni ŵanthu angani akuya kululu? Yesu eŵatomola kuti “kaumba ka mbelele.” (Luka 12:32) Posilizhyila pake, onse pamo akaŵe 144,000. Ŵeve pamo na Yesu, akuzolamulila calo conse.—Ŵelengani Chivumbulutso 14:1.
4. Ko Yesu ecitanji pecitatika kulamulila?
Ufumu wa Mulungu wetatika kulamulila mu caka ca 1914. * Cinthu cotatika cecicita Yesu pecinkhala Mfumu, cenze kungundumusha Satana na viŵanda vake noŵaponeshela pa calo. Ici cemukalipisha ngako Satana. Tetyo, yove ecitisha kuti vinthu viipa vipakile –pakile pa calo conse. (Chivumbulutso 12:7-10, 12) Kufumila pamene apo, matamano ya ŵanthu yakungopakila-pakila. Nkhondo, njala, matenda na visunguzhyi, vonse ni mbali ya “ciziŵishyo” cakuti lombapano Ufumu wamene uyo ukatatike kuyendesha vinthu vonse pa calo capansi.—Ŵelengani Luka 21:7, 10, 11, 31.
5. Ko Ufumu wa Mulungu ucitanji pali lomba?
Kupitila mu nchito yoŵilizhya pa calo conse, Ufumu wa Mulungu wetatika kale kuunganisha ŵanthu ofumila m’mitundu yonse kuŵa umba ikuleni. Ŵanthu osisikanya mamiliyoni anyinji, akuŵa akonkheleli a Yesu. Soti Ufumu wa Mulungu ukaŵacingilile pati ukafumyepo vinthu viipa vilipo lomba pa calo. Tetyo, onse opangwa kupindula na Ufumu wa Mulungu, owamila kuŵa akonkheleli a Yesu kumumvwila. Ŵelengani Chivumbulutso 7:9, 14, 16, 17.
M’vyaka 1,000, Ufumu wa Mulungu ukakwanilishe cilingo ca potatika pa ŵanthu. Calo conse cikaŵe paladaiso. Posilizhyila pake, Yesu akawezhye Ufumu kwa Ausu ŵake. (1 Akorinto 15:24-26) Ko pali aliyense wamuziŵa, wamungapangwe kuuzhyako za Ufumu wa Mulungu?—Ŵelengani Salimo 37:10, 11, 29.
^ par. 6 Kuti mumvwe zinyinji za maloshelo ya m’Baibolo yolaŵila za caka ca 1914, onani mapeji 217-220 m’buku yakuti, Kansi Baibolo Ingatiphunzise Cinji?
