SAMBILO 4
Ko Yesu Khilisitu Niŵani?
1. Kansi moyo wa Yesu wetatika tyani?
Ko ni minkhalidwe yotyani yepangisha Yesu kuŵa munthu wofwikilika?—MATEYU 11:29; MALIKO 10:13-16.
Kusiyana na munthu aliyense, Yesu akaliyovyalika pa calo enzonkhala kululu n’nga munthu wamzimu. (Yohane 8:23) Yove enze colengewa cotatika ca Mulungu, soti emuyavya pa nchito yolenga vinthu viyambine vonse. Ni yove yeka tyala elengewa mwacindunji na Mulungu. Mwa ici, owamila kuitiwa kuti “mwana wovyalika yeka” wa Mulungu. (Yohane 1:14) Enze soti wolaŵilila Mulungu, tetyo oitiwa soti kuti “Lizu.”—Ŵelengani Miyambo 8:22, 23, 30; Akolose 1:15, 16.
2. Kansi Yesu ecizocitanji pa calo?
Mulungu etumizhya Mwana wake pa calo, pokusha moyo wake kufuma kululu nouika m’mala mwa ndola yaciyuda zina yake Mariya. Tetyo Yesu aliyevyalike kwa awisi aumunthu. (Luka 1:30-35) Yesu ewela pano pa calo kuti (1) azesambizhye vyendi va Mulungu, (2) azetioneshe mwatingacitile cakupangwa Mulungu nangu kuti titamane, nakuti (3) azetwale moyo wake wangwilyo kuŵa “cinunulo.”—Ŵelengani Mateyu 20:28.
3. Ko tuwamila cinunulo pa cikomo canji?
Cinunulo ni malipilo otwaliwa kuti munthu apuzumushiwe ku imfwa. (Ekisodo 21:29, 30) Potatika pene-pene, Mulungu enzeve lingo yakuti ŵanthu aokulukazhya na kufwa. Ko tuziŵa tyani zamene izi? Mulungu euzhya munthu wotatika Adamu kuti keno acite cimo akafwe. Kuti Adamu aliyecimwe sembe aliyeufwe. (Genesis 2:16, 17; 5:5) Baibolo yutiuzhya kuti imfwa yewela pa calo kupitila mwa Adamu. Tetyo, ŵana onse ŵa Adamu etolelako cimo na cilango ca imfwa. Tuwamila cinunulo kuti timasuliwe ku cilango ca imfwa itetolela kuli Adamu.—Ŵelengani Aroma 5:12; 6:23.
Ko niŵani ekwanisha kulipila cinunulo kuti timasuliwe ku cilango ca imfwa? Tikafwa tulipilila tyala cilango ca macimo yasu. Kuliye munthu aliyense wocimwa angalipilile macimo ya ŵanthu ayakine.—Ŵelengani Salimo 49:7-9.
4. Ko Yesu ecifwa pa cikomo canji?
Kusiyana na seo,Yesu enze lini wocimwa. Tetyo, enzowamila lini kufwa, cikomo cakuti aliyocitepo cimo. M’malo mwake, Yesu efwila macimo ya ŵanthu ayambine. Mulungu eonesha cinthemwa cikuleni pa mtundu wa ŵanthu. Ecita ivi potuma mwana wake kuzotifwila. Yesu naye eonesha cinthemwa kuli seo pomvwila awisi notwala moyo wake cikomo ca macimo ŵasu.—Ŵelengani Yohane 3:16; Aroma 5:18, 19.
Onelelani vidyo yakuti Ko Yesu Ecifwa pa Cikomo Canji?
5. Ko Yesu ocitanji pali lomba?
Yesu peenze pa calo epozhya olwala, eusha akufwa na kuyavya ŵanthu enzotamana. Izi zeonesha vati akacitile ŵanthu onse omumvwila kunthangu. (Mateyu 15:30, 31; Yohane 5:28) Pecifwa Yesu, Mulungu emuusha n’nga munthu wamzimu. (1 Petulo 3:18) Pavuli pake eciyolindilila ku kwanja kwendi kwa Mulungu mpakila Yehova emupa mphamvu zakuŵa mfumu pa calo conse. (Aheberi 10:12, 13) Lomba Yesu olamulila n’nga Mfumu kululu. Soti, akonkheleli ŵake oŵilizhya uthenga uweme wamene uyo pa calo conse.—Ŵelengani Danieli 7:13, 14; Mateyu 24:14.
Yesu lombapano akuzoseŵenzesha mphamvu zake n’nga Mfumu kuzofumyapo matamano yonse na ŵala oŵacitisha. Onse ocetekela Yesu nomumvwila akaŵe na moyo uweme m’paladaiso pa calo.—Ŵelengani Salimo 37:9-11.