SAMBILO 11
Ko Malamulo ya m’Baibolo Yotipindulisha Tyani?
1. Ndaŵa cinji tuwamila kutanguliliwa?
Ko malamulo ya m’Baibolo yangatiyavye tyani kuŵa osamala pocita vinthu pa moyo wasu?—SALIMO 36:9.
Nyamalenga wasu ni wanzelu ngako kupula seo. Pakuŵa Atata otitemwa, osamala za seo. Soti aliyopangwe kuti toozitangulila seka mosacetekela yove. (Yeremiya 10:23) Tetyo, n’nga ni mwana mtontho owamila kutanguliliwa na avyazi ŵake, tonse tuwamila kutanguliliwa na Mulungu. (Yesaya 48:17, 18) Malamulo ya m’Baibolo yotitangulila, soti ni caupe cofumila kwa Mulungu.—Ŵelengani 2 Timoteyo 3:16.
Malamulo ya Yehova yotisambizhya mwatingaŵele na umoyo uweme ngako lomba. Yotisambizhya soti mwatingazofwangila madaliso osasila. Pofwana kuti Mulungu niye etilenga, tuwamila kumvwila malamulo ŵake na kuŵatembezhya.—Ŵelengani Salimo 19:7,11; Chivumbulutso 4:11.
2. Ko malizu ya Mulungu yotitangulila tyani?
Mfundo za cendi ca m’Baibolo zuonesha vakupangwa Mulungu kuti ticite pa nkhani zosiyana-siyana. (Deuteronomo 22:8) Tuwamila kuseŵenzesha nzelu zasu kuti tiziŵe mwatingacitile zamene izi. (Miyambo 2:10-12) Coonelapo, Baibolo yusambizhya kuti moyo ni caupe ca kwa Mulungu. Mfundo iyi ingatiyavye kuti ticinjilizhye moyo wasu pocita vinthu ku nchito, pa ng’anda, na paulwendo.—Ŵelengani Machitidwe 17:28.
3. Ko malamulo yaŵili yakuleni ngako ni yani?
Yesu elaŵila za malamulo yaŵili yofunika ngako. Yotatika yunena kuti tuwamila kuziŵa Mulungu, kumutemwa, nomutumikila mocetekeleka, cikomo cakuti yove etipa moyo. Kukumbukila lamulo iyi, kungatiyavye pa vonse vatusalula kuti ticite. (Miyambo 3:6) Ŵala ocita vinthu vukatizhyana na lamulo iyi okuŵa paushamwali na Mulungu. Kuyangizhyila apo, akafwange nseko yene-yene, na moyo wosasila.—Ŵelengani Mateyu 22:36-38.
Lamulo yaciŵili ingatiyavye kuti tonkhala pamtendele na ŵanthu ayambine. (1 Akorinto 13:4-7) Kuti tikonkhe lamulo yamene iyi, tuwamila kukonkhelezhya Mulungu mwakucitila na ŵantu.—Ŵelengani Mateyu 7:12; 22:39, 40.
4. Ko malamulo ya Mulungu yotipindulisha tyani?
Malamulo ya m’Baibolo yosambizhya mabanja kuŵa otemwana kuti aokatizhyana. (Akolose 3:12-14) Malizu ya Mulungu yosambizhya soti lamulo iyakine ingacinjilizhye mabanja. Yunena kuti ulunguzi, keno kuti cikwati, uwamila lini kusila.—Ŵelengani Genesis 2:24.
Kukonkha malamulo ya m’Baibolo kungatiyavye pa vinthu vakumuŵili na vauzimu. Coonelapo, ŵanthu anyinji otemwa kulemba nchito ŵanthu ocita vinthu moona mtima pokonkha malamulo ya m’Baibolo, koma soti olimbikila pa nchito. (Miyambo 10:4, 26; Aheberi 13:18) Malizu ya Mulungu yotisambizhya soti kuti tokuŵa okwanila na vinthu vofunika ngako-ngako pa moyo. Yotisambizhya soti kuona ushamwali wasu na Mulungu kuŵa wofunika ngako kupula vinthu vakumuŵili.—Ŵelengani Mateyu 6:24, 25, 33; 1 Timoteyo 6:8-10.
Kukonkha malamulo ya Mulungu kungatiyavye kuŵa na umoyo uweme. (Miyambo 14:30; 22:24, 25) Coonelapo, malamulo ya Mulungu yolesha ucakolwa angaticinjilizye ku matenda yopaya, na ku ngozi. (Miyambo 23:20) Yehova otilesha lini kumwa walwa, keno kuti lwalwa. Yove opangwa kuti tokumwa mosamala. (Salimo 104:15; 1 Akorinto 6:10) Malamulo a Mulungu otiyavya kulewa vicito viipa na malingililo atyalani. (Salimo 119:97-100) Nangu n’tetyo, Akhilisitu ŵendi ocinzika milingo ya Mulungu, osati tyala kuti alipindulishe, koma ngako-ngako kuti acinzike Yehova.—Ŵelengani Mateyu 5:14-16.
Ziyakine Zamungakonde
ZOKHUZA SEO
Sengani Phunzilo ya Baibo
Phunzilani yankho iliyonse yamungankhale nayo ya m’Baibo, olo phunzilani zokhuza Mboni za Yehova.
