Mosapenekela, visambizhyo votatikila va m’Baibolo vamwasambila, vakosesha cinthemwa canu pa Yehova. Muwamila kutwalilila kukulisha cinthemwa camene ici. (1 Petulo 2:2) Kuti muŵe na cilolelo ca moyo wosasila, muwamila kutwalilila kuvwendela pafupi na Mulungu posambila Malizu ŵake.​—Ŵelengani Yohane 17:3; Yuda 21.

Mukamuziŵa luweme Mulungu, cicetekelo canu ciŵe cotan’ga, soti cikuyavyeni kum’temwesha. (Aheberi 11:1, 6) Cikulimbikisheni kulapa na kuyaluzhya moyo wanu kuti uŵe wopindulisha.​—Ŵelengani Machitidwe 3:19.

Mwacivyalikilo, tonse tutemwa kuuzhyako ayambine uthenga uweme. N’coziŵikilatu kuti namwe muuzhyeko ayakine vamwasambila. Keno mutwalilila kusambila Baibolo, muziŵe kuiseŵenzesha pofotokoza za cicetekelo canu pa Yehova, na pouzhya ayambine uthenga uweme.​—Ŵelengani Aroma 10:13-15.

Ŵanthu anyinji potatika kuuzhyako ayambine uthenga uweme, otatika mwa kuuzhyako a m’banja mwao nangu ayao. Koma mokuŵa osamala pocita zamene izi. M’malo moŵauzhya kuti cipembezo cao n’cawenye, auzhyeni za vipango va Mulungu. Soti, tokumbuka kuti nsita zinyinji ŵanthu ocita cidwi na nkhalidwe yasu kupula vatulaŵila.​—Ŵelengani 2 Timoteyo 2:24, 25.

Kusambila Malizu ya Mulungu kukuyavyeni kukula mwauzimu. M’kuluta kwa nsita, mungaŵe pa unansi uweme ngako na Yehova. Mungaŵe m’banja yake.​—Ŵelengani 2 Akorinto 6:18.

Mungakule mwauzimu keno mutwalilila kusambila Malizu ya Mulungu.. (Aheberi 5:13, 14) Sengani wa Mboni za Yehova kuti atatike kusambila namwe m’buku yakuti, Kansi Baibolo Ingatiphunzise Cinji? Mukasambila zinyinji m’Malizu ya Mulungu, muŵe na umoyo wopindulisha.​—Ŵelengani Salimo 1:1-3; 73:27, 28.

Uthenga uweme ufumila kwa Yehova, Mulungu wanseko. Mungavwendele pafupi na Mulungu povwendela kuli ŵanthu ŵake. (Aheberi 10:24, 25) Keno mutwalilile kumutemwesha Yehova, mukafwange moyo wendi, moyo wosasila. Kuvwendela kuli Mulungu niye cinthu ciweme ngako camungacite.​—Ŵelengani 1 Timoteyo 1:11; 6:19.