Uthenga uweme wakuti ŵanthu akankhale kosasila pa calo welembewa m’Baibolo. (Salimo 37:29) M’Baibolo muli mabuku atontho-atontho 66. Mulungu eseŵenzesha ŵanthu ocetekeleka cifupi-fupi 40 kulemba Baibolo. Mabuku otatika asano elembewa na Mose cifupi-fupi vyaka 3,500 vakuvuli. Buku yosilizhyila yelembewa na nthumwi Yohane kupitilila pa vyaka 1,900 vakuvuli. Kansi elemba Baibolo enzolemba maganizo yaŵani? Mulungu eseŵenzesha mzimu utuŵa kuuzhyila ŵala elemba Baibolo. (2 Samueli 23:2) Ove elemba maganizo ya Mulungu osati yao. Teti, Yehova niye elemba Baibolo ngaye-ngaye.​—Ŵelengani 2 Timoteyo 3:16; 2 Petulo 1:20, 21.

Onelelani vidyo yakuti Ko Elemba Baibolo Ngaye-ngaye Niŵani?

Tuziŵa kuti Baibolo yefumila kuli Mulungu cikomo cakuti vyonse vayulaŵila vakunthangu vucitika cendi. Paliye munthu angacite teti. (Yoswa 23:14) Mulungu yeka wamphamvu zonse niye okwanisha kuziŵilatu vati vikacitike kunthangu.​—Ŵelengani Yesaya 42:9; 46:10.

Mosapenekela, buku yufumila kwa Mulungu yuwamila kuŵa yosiyana na buku iyambine iliyonse. Umu niye mwailili Baibolo. Mabaibolo okwana mabiliyoni ayaŵiliwa mu vilaŵilo vufwiika m’mahandiledi anyinji. Nangu kuti ni kale peilembewa Baibolo, yukatizhyana na sayansi yosimikizhyilika. Soti ŵanthu 40 elemba Baibolo aliyolembe zosushana. * Vayulaŵila va cinthemwa vufumila cendi kuli Mulungu. Baibolo ili soti na mphamvu yoyaluzhya ŵanthu kuti aŵe na minkhalidwe iweme. Ivi vucitisha kuti ŵanthu mamiliyoni anyinji asimikizhye kuti Baibolo ni Malizu ya Mulungu.​—Ŵelengani 1 Atesalonika 2:13.

Onelelani vidyo yakuti Ko Tingasimikizhye Tyani Kuti Baibolo Yulaŵila Vyendi?

Baibolo yulaŵila ngako-ngako pa uthenga uweme wakuti Mulungu ali na lingo iweme ku ŵanthu. Malembo yolaŵila mwamene ŵanthu etaila shuko yakuŵa m’paladaiso ca kotatikila kwa mbili ya ŵanthu. Yotiuzhya soti mwamene paladaiso ikawezhyelewe.​—Ŵelengani Chivumbulutso 21:4, 5.

Malizu ya Mulungu yali soti na malamulo, mfundo na malango. M’Baibolo muli nkhani za mwamene Mulungu ecitila na ŵanthu. Tikaŵelenga nkhani zamene izo tuziŵa za minkhalidwe ya Mulungu. Teti Baibolo ingakuyavyeni kuziŵa Mulungu. Yufotokoza mwamungaŵele shamwali wake.​—Ŵelengani Salimo 19:7, 11; Yakobo 2:23; 4:8.

Kabuku kano kakuyavyeni kuimvwishisha Baibolo cikomo cakuti koseŵenzesha njila yeciseŵenzesha Yesu. Yove enzotemwa kuŵelenga Malembo ya m’Baibolo nofotokoza“ tanthauzo” ya Lembo iliyonse.​—Ŵelengani Luka 24:27, 45.

Ni vinthu vitontho tyala vutemwesha n’nga ni uthenga uweme ufumila kuli Mulungu. Nangu n’tetyo, ŵanthu ayambine aliye nao cidwi. Soti ayakine ocitokalipa nao. Koma ivi visakulefuleni. Kuziŵa Mulungu niye njila imo tyala ingakuyavyeni kuti mukaŵe na moyo wosasila.​—Ŵelengani Yohane 17:3.