Mu vipembezo vonse muli ŵanthu oona mtima. Tetyo, n’cotemwesha ngako kuziŵa kuti Mulungu oŵaona ŵanthu otetyo noŵaganizila. Koma n’cacisoni kuti cipembezo caŵa covisamilamo pocita vinthu viipa. (2 Akorinto 4:3, 4; 11:13-15) Kulingana na nkhani zapanyuzi, vipembezo viyambine vacitofwika pa kutolako mbali mu vaucigaŵenga, nkhondo ya lingo yoziŵilizhya mtundu uyambine, nkhondo ziyake, nolala ŵana atontho-atontho. Ivi vukwinyililisha ŵanthu oona mtima ocetekela Mulungu.​—Ŵelengani Mateyu 24:3-5, 11, 12.

Cipembezo cacendi cucinzika Mulungu, koma vipembezo vawenye vucita vinthu vumukalifya. Vusambizhya malingililo yosafwangika m’Baibolo. Soti vusambizhya wenye polaŵila za Mulungu na mwalili akufwa. Koma Yehova opangwa kuti ŵanthu aziŵe cendi polaŵila za yove.​—Ŵelengani Ezekieli 18:4; 1 Timoteyo 2:3-5.

N’cotemwesha kuziŵa kuti vipembezo vawenye vingamusemphe lini Mulungu polaŵila kuti vum’temwa, koma ngako-ngako vutemwa calo ca Satana. (Yakobo 4:4) M’Malizu ya Mulungu, vipembezo vonse vawenye kuvipamikizhya pamo vuitiwa kuti “Babulo Mkuleni.” Zina iyi yetolewa ku mzinda wacomba kwetatikila vipembezo vawenye pavuli pa Cigumula ca m’nsiku za Nowa. Lombapano, Mulungu mozizimusha akafumyepo vipembezo vonse vusempha ŵanthu noŵakandikizhya.​—Ŵelengani Chivumbulutso 17:1, 2, 5, 16,17; 18:8.

Uthenga uyake uweme ni wakuti, Yehova oluŵa lini ŵanthu oona mtima alumwazhyikane m’vipembezo vawenye pa calo conse. Ŵanthu otetyo oŵaleta pamo mwa kuŵasambizhya vyendi.​—Ŵelengani Mika 4:2, 5.

Yehova osamala za ŵanthu otemwa vacendi na viweme. Oŵalimbikisha kuti afumemo m’cipembezo cawenye. Ŵanthu otemwa Mulungu opangwa ngako kuti ayaluke notatika kum’temwesha.​—Ŵelengani Chivumbulutso 18:4.

Mu nsita ya Akhilisitu otatikila, ŵanthu oona mtima pecimvwa uthenga uweme kwa nthumwi eulondela motemwa ngako. Yehova eŵasambizhya umoyo uyambine uweme, uli na lingo na cilolelo. Ove ni coonelapo ciweme kuli seo nsiku zino. Cili tetyo cikomo cakuti emvwila uthenga uweme poika Yehova panthangu pa umoyo wao.​—Ŵelengani 1 Atesalonika 1:8, 9; 2:13.

Ŵanthu ofuma m’cipembezo ca wenye noloŵa m’banja ya olambila acendi, Yehova oŵalondela. Keno muvomela wiite wa Yehova wacinthemwa, yove aŵe shamwali wanu. Soti muŵe m’banja yacinthemwa ya olambila Yehova na kuyofwanga moyo wosasila.​—Ŵelengani Maliko 10:29, 30; 2 Akorinto 6:17, 18.

Ni uthenga uweme kuziŵa kuti vipembezo vawenye vizepunguliwe. Ŵanthu pa calo conse akamasuke ku matamano ocitishiwa na vipembezo vawenye. Ŵanthu akaluvyishiwepo lini soti na vipembezo vawenye, keno kuyaŵanishiwa mitundu. Ŵanthu onse akakatizhyane pa kulambila Mulungu umo yeka wacendi.​—Ŵelengani Chivumbulutso 18:20, 21; 21:3, 4.