Mulungu opangwa kuti ŵanthu a mitundu yonse amuvwendelele mwa kulomba kwa yove. (Salimo 65:2). Nangu n’tetyo, ni malombelo yonse lini yakumvwa keno kuyankha. Coonelapo, keno mulume osausha mkazi wake, Mulungu angamvwe lini malombelo ŵake. (1 Petulo 3:7) Soti, cikomo cakuti Aisraeli etwalilila kucita viipa, Mulungu aliyoyankhe malombelo ŵao. Kulaŵila vyendi, lombelo ni shuko ikuleni ngako. Nangu n’tetyo, Mulungu akumvwa nangu malombelo ya ŵanthu ocita macimo yakuleni, akalapa.​—Ŵelengani Yesaya 1:15; 55:7.

Onelelani vidyo yakuti Mwa Mulungu Akumvwa Malombelo Yonse?

Lombelo ni mbali ya kulambila kwasu. Tetyo, tuwamila kulomba kuli Nyamalenga yeka, Yehova. (Mateyu 4:10; 6:9) Soti, pakuti nise ocimwa, tuwamila kulomba kupitila m’zina ya Yesu cikomo cakuti efwila macimo ŵasu. (Yohane 14:6) Yehova opangwa lini kuti tolaŵila naye kupitila m’malombelo yoloŵezhya pa mtima, keno yolembewa. Opangwa kuti tikolomba zofumila pansi pa mtima wasu.​—Ŵelengani Mateyu 6:7; Afilipi 4:6, 7.

Nyamalenga akumvwa nangu malombelo ya mumtima. (1 Samueli 1:12, 13) Opangwa kuti tikom’lomba nsita iliyonse, tikauka m’mawa, poyona usiku, pakulya na patukumana na matamano.​—Ŵelengani Salimo 55:22; Mateyu 15:36.

Kuvwendela pafupi na Mulungu ni cinthu lini cipepu. Cili tetyo cikomo cakuti tunkhala pamo na ŵanthu aliye cicetekelo mwa Mulungu, koma soti onyoza nopelula cipango cake coleta mtendele pa calo. (2 Timoteyo 3:1, 4; 2 Petulo 3:3, 13) Tetyo, tuwamila kuungana pamo na ocetekela ayasu kuti tokoseshana umo na muyake.​—Ŵelengani Aheberi 10:24, 25.

 Kutandala na ŵanthu otemwa Mulungu kungatiyavye kuŵa pafupi na Mulungu. Maungano ya Mboni za Yehova yotipa soti shuko iweme kuti tipindule kwa ocetekela ayasu.​—Ŵelengani Aroma 1:11, 12.

Mungavwendele pafupi na Yehova polingilila pa vamusambila m’malizu ŵake. Lingililani nchito zake, malango ŵake na vipango vake. Kulingilila koteti, pamo na Iombelo, kungatiyavye kutembezhya ngako cinthemwa na nzelu za Mulungu.​—Ŵelengani Yoswa 1:8; Salimo 1:1-3.

Kum’cetekela Mulungu niye tyala kungakuleteni pafupi na yove. Koma cicetekelo cili n’nga ni cinthu camoyo cuwamila kulya. Tetyo, muwamila kucilyesha cicetekelo canu nsita zonse, powelelamo m’vikomo vemwiŵela na cicetekelo canu.​—Ŵelengani Mateyu 4:4; Aheberi 11:1, 6.

Yehova osamalila ŵala om’temwa. Angaŵacingilile ku cinthu ciliconse cingaike pa ngozi cicetekelo cao, na cilolelo cao ca moyo wosasila. (Salimo 91:1, 2, 7-10) Oticenjezhya za vinthu vingaceneke umoyo wasu, na vingaticitishe kuŵa osatemwa. Yehova otisambizhya mwatingaŵele na moyo uweme ngako.​—Ŵelengani Salimo 73:27, 28; Yakobo 4:4, 8.