SAMBILO 10
Kansi Kulambila Kwacendi Mungakuziŵe Tyani?
1. Ko pali tyala cipembezo cimo cacendi?
“Cenjelani na oloshela awenye.”—MATEYU 7:15.
Yesu esambizhya akonkheleli ŵake cipembezo cimo tyala cacendi. Cili n’nga ni msewu utwala ku moyo wosasila. Yesu elaŵila kuti: “Natontho ofwanga” msewu wamene uyo. (Mateyu 7:14) Mulungu ozomezhya tyala kulambila kokatizhyana na Malizu ŵake, Baibolo. Olambila onse acendi ni okatizyana pa cicetekelo cimo.—Ŵelengani Yohane 4:23, 24; 14:6; Aefeso 4:4, 5.
Onelelani vidyo yakuti Ko Pali Tyala Cipembezo Cimo Cacendi?
2. Kansi Yesu elaŵila vinji za Akhilisitu awenye?
“Olaŵila pamenso pa ŵanthu kuti oziŵa Mulungu, koma omunyoza na nchito zao.”—TITO 1:16.
Yesu ecenjeza kuti oloshela awenye akaifye Cikhilisitu. M’maonekelo ŵawo ali n’nga ni olambila avyendi. Machalichi ŵao olaŵila kuti ni acikhilisitu. Koma mweo mungaŵaziŵe ŵanthu otetyo kuti ni Akhilisitu acendi lini. Motyani? Cipembezo cacendi cukuŵa na Akhilisitu a minkhalidwe iweme.—Ŵelengani Mateyu 7:13-23.
3. Mungaŵaziŵe tyani olambila acendi?
Onani vinthu visano ivi vamungaŵaziŵile:
-
Olambila acendi ocinzika Baibolo pakuŵa Malizu a Mulungu. Olimbikila kukonkha malango ŵake. Teti, cipembezo cacendi cusiyana na vipembezo vutolela malingililo ya ŵanthu. (Mateyu 15:7-9) Kusiyana na olambila awenye, olambila acendi ocita vakusambizhya.—Ŵelengani Yohane 17:17; 2 Timoteyo 3:16, 17.
-
Akonkheleli a Yesu acendi ocinzika zina ya Mulungu, Yehova. Yesu ecinzika zina ya Mulungu poiziŵisha ku ŵanthu. Eyavya ŵanthu kuziŵa Mulungu noŵasambizhya kulomba kuti zina ya Mulungu ituŵishiwe. (Mateyu 6:9) Ko kwamunkhala, ni cipembezo cini cuuzhyako ŵanthu za zina ya Mulungu?—Ŵelengani Yohane 17:26; Aroma 10:13, 14.
-
Akhilisitu acendi oŵilizhya za Ufumu wa Mulungu. Mulungu etuma Yesu kuzoŵilizhya uthenga uweme wa Ufumu. Ni Ufumu wa Mulungu tyala wati ukafumyepo matamano ya ŵanthu. Yesu etwalilila kulaŵila za Ufumu wamene uyo kufwikila nsiku yecifwa. (Luka 4:43; 8:1; 23:42, 43) Yeve elaŵila kuti, akonkheleli ŵake nao aoŵilizhya za Ufumu wamene uyo. Keno muyakine wakufwikilani noyamba kulaŵila za Ufumu wa Mulungu, ko mungaganize kuti owamila kuŵa wa cipembezo cini?—Ŵelengani Mateyu 24:14.
-
Akonkheleli a Yesu aliye mbali m’calo ici ciipa. Mungaŵaziŵe pa cikomo cakuti otolako lini mbali m’nkhani za ndale nangu m’mikangano ya ŵanthu. (Yohane 17:16; 18:36) Soti, otolelako lini minkhalidwe yuceneka ya calo na malingililo aipa.—Ŵelengani Yakobo 4:4.
-
Akhilisitu acendi owoneshana cinthemwa cikuleni yumo na muyake. Ove osambila m’Baibolo kucinzika ŵanthu a mitundu yonse. Vipembezo vawenye kanyinji vatunthuvyila nkhondo za pakati pa vyalo, koma olambila acendi okana kucita vamene ivo. (Mika 4:1-3) M’malo mwake, Akhilisitu acendi oseŵenzesha nsita yawo na vinthu vao kuyavya ŵanthu noŵalimbikisha.—Ŵelengani Yohane 13:34, 35; 1 Yohane 4:20.
4. Ko lomba mungaciziŵe cipembezo cacendi?
Ni cipembezo cini camene vonse vacusambizhya vukatizhyana na Malizu ya Mulungu, cucinzika zina ya Mulungu, koma soti cuŵilizhya kuti Ufumu wa Mulungu tyala niye wati ukafumyepo matamano yonse ya ŵanthu? Ni cipembezo cini camene ŵanthu ŵake ooneshana cinthemwa ngaco-ngaco, soti cucitako lini nkhondo? Kansi mungayankhe tyani?—Ŵelengani 1 Yohane 3:10-12.
