1, 2. Ndaŵa yanji tumukonda Yehova Mulungu?

KO MUM’KONDA Mulungu? Pemwezitwala kuti mum’tumikile mweonesha kuti mum’konda. Ndipo mukumvwa kuti ni Muyanu wapamtima. Yove niye eyambila kukukondani. Baibolo yulaŵila kuti: “Seo tuonesha cikondi, cifukwa yove niye eyambila kutikonda.”​—1 Yohane 4:19.

² Yehova etionesha m’njila zinyinji kuti otikonda. Etipasa calo cokongola koma soti zonse zofunikila kuti tisangalale na moyo. (Mateyu 5:43-48; Chivumbulutso 4:11) Ofuna kuti tinkhale naye pa ushamwali uweme ndipo watipasa zinthu zofunikila kuti tiphunzile zokhuza yove. Tumvwishila kwa Yehova mwa kuŵelenga Baibolo, ndipo ngati tupemphela, yove otimvwishila. (Salimo 65:2) Yehova oseŵenzesha mzimu wake kuti atisogolele notilimbikisha. (Luka 11:13) Etuma mwana wake wokondeka pacalo kuti azetimasule ku ucimo na imfwa.​—Ŵelengani Yohane 3:16; Aroma 5:8.

3. Tingacite tyani kuti tipitilizhye kunkhala pa ushamwali na Yehova?

 ³ Ganizilani za muyanu wapamtima wamene mwankhala naye pa nthawi zovuta koma soti pa nthawi yamene zinthu zili luweme. Mungafunike kuyesayesa kuti ushamwali wanu upitilizhye kunkhala wotang’a. N’cimozimozi na ushamwali wasu na Yehova, wamene ni Shamwali wapamtima kupambana aliyense. Ushamwali wasu ungapitilizhye mpaka kale-kale. Tetyo Baibolo yutiuzhya kuti: ‘Pitilizhyani kunkhala m’cikondi ca Mulungu.” (Yuda 21) Kansi tingacite tyani zamene izi? Baibolo yuyankha kuti: “Cifukwa cakuti kukonda Mulungu kutanthauza kusunga malamulo ŵake, ndipo malamulo ŵake ni osaŵeŵesha.”​—1 Yohane 5:3.

4, 5. Fotokozani zecitika kuti muyambe kukonda Yehova?

⁴ Kansi Baibolo yutanthauzanji ikati “Cikondi ca Mulungu”? (Buku Lopatulika) Apa yutanthauza lini cikondi cakuonesha Mulungu kuli seo, koma catuonesha kuli yove. Ko mukumbukila nthawi pemweyamba kukonda Yehova?

⁵ Kansi mwecimvwa tyani nthawi yoyamba pemwephunzila kuti Yehova ofuna kuti mukankhale na moyo wosasila m’calo calomba? Mwephunzila zecicita kuti zamene izi zikwanilishike. Ndipo mweyamikila mphaso yamtengo wapatali yecikupasani Yehova pecitumizhya Mwana wake pacalo. (Mateyu 20:28; Yohane 8:29; Aroma 5:12, 18) Pavuli pophunzila kuti Yehova okukondani, mwekhuzika mtima ndipo  mweyamba kumukonda.​—Ŵelengani 1 Yohane 4:9, 10.

6. Ko kukonda munthu muyakine kuyangizhyilapo cinji, ndipo cikondi canu pa Mulungu cekusonkhezelani kucita cinji?

⁶ Koma kukonda Yehova cenze tyala ciyambi. Mwacisanzo, ngati mukonda munthu muyakine mucita zinyinji osati tyala kulaŵila kuti “Nukukonda.” Cikondi cutisonkhezela kucita zinthu zamene zingacitishe munthu wamene uyo kukondwela. Molingana na zamene izi, cikondi canu pa Yehova cekucitishani kucita zinthu zom’kondwelesha. Cikondi pecekula, mwezitwala kuli yove nobatizika. Pemwecita izi, mwemulonjeza kuti mum’tumikile kosasila. (Ŵelengani Aroma 14:7, 8.) Kansi mungaikwanilishe tyani lonjezo iyi?

7. Ngati tukonda Yehova tufunika kucita cinji? Kansi ayakine mwa malamulo ŵake ni otyani?

⁷ Cifukwa cakuti tukonda Yehova, ‘tusunga malamulo ŵake.’ Tingacite tyani zamene izi? Tingacite izi ngati tumumvwila. M’Baibolo tephunzila zakufuna kuti tikocita Yehova. Mwacisanzo, otiuzhya kuti ozonda ucakolwa, kuiŵa, kutala wenye, kucita ciwelewele na kulambila munthu olo ciliconse m’malo molambila Yehova.​—1 Akorinto 5:11; 6:18; 10:14; Aefeso 4:28; Akolose 3:9.

8, 9. Ko tingaziŵe tyani maganizo a Yehova pa nkhani zakuti paliye malamulo a m’Baibolo acindunji? Twalani cisanzo.

⁸ Kuti tikondweleshe Yehova, tufunika kucita zinyinji osati tyala kumvwila malamulo ŵake. Aliyotipase m’ndandanda wa malamulo pa ciliconse pa  umoyo. Nthawi ziyakine Baibolo ingatipase lini malamulo acindunji otiuzhya zofunika kucita. Tingapange tyani zosankha pa zocitika zoteti? (Aefeso 5:17) M’Baibolo muli mfundo zamene zutiyavya kuona zinthu monga ni mwakuzionela Yehova. Tetyo patuŵelenga Baibolo, tufwika pomuziŵa luweme Yehova. Tuziŵa soti zinthu zakukonda na zinthu zakuzonda.​—Ŵelengani Salimo 97:10; Miyambo 6:16-19; onani Zakosilizhyila 1.

⁹ Mwacisanzo, ko tuziŵa tyani zinthu zoyenela kuonelela pa TV olo pa Intaneti? Yehova otiuzhya lini ndendende zatufunikila kucita. Koma yove otipasa mfundo zamene zingatiyavye kupanga zosankha ziweme. Zosangulusha zinyinji masiku ŵano ni zozula na ciwawa koma soti ciwelewele. Koma Baibolo yulaŵila kuti ‘Yehova ozonda aliyense wokonda ciwawa’ ndipo “akaweluze acigololo.” (Salimo 11:5; Aheberi 13:4) Kansi mfundo izi zingatiyavye tyani kupanga zosankha ziweme? Ngati taziŵa kuti Yehova ozonda cinthu ciyakine olo ociona kuti ni cosayenela, tufunika kucipewa.

10, 11. Ndaŵa yanji tumumvwila Yehova?

¹⁰ Ndaŵa yanji tumumvwila Yehova? Tumumvwila osati cifukwa coyopa cilango olo mavuto yatingakumane nao cifukwa ca zosankha ziipa. (Agalatiya 6:7) Koma tumumvwila cifukwa comukonda. Monga mwamene ŵana ofuna kukondwelesha ausuwao, nase tufuna kukondwelesha Ausuwasu akululu. Paliye cinthu cokondwelesha kupambana kuziŵa kuti Yehova okondwela nase!​—Salimo 5:12; Miyambo 12:2; onani Zakosilizhyila 2.

 ¹¹ Tumvwila Yehova osati cifukwa cakuti zaakutiuzhya n’zosavuta olo cifukwa cakuti paliye mwatingacitile. Ndipo tusankha lini malamulo ofunika kukonkha. (Deuteronomo 12:32) Koma tumumvwila na mtima wonse monga ni wamasalimo wamene eciti: ‘Nukondwela na malamulo ŵanu ndipo nuŵakonda.’ (Salimo 119:47; Aroma 6:17) Tufuna kunkhala monga ni Nowa wamene eonesha kuti enzokonda Yehova mwa kucita ciliconse cecimulamula kucita. Baibolo yulaŵila kuti Nowa “ecita zonse zecimuuzhya.” (Genesis 6:22) Ko mungakonde kuti Yehova alaŵile zolingana na izi pali mweo?

12. Kansi tingamukondweleshe tyani Yehova?

¹² Kansi Yehova okumvwa tyani ngati tumumvwila? Onkhala ‘wokondwa mumtima mwake.’ (Miyambo 11:20; 27:11) Ganizilani mfundo iyi, ngati tumvwila tukondwelesha Nyamalenga wacilengedwe conse. Koma otikakamizhya lini kumumvwila. Yove etipasa ufulu wosankha, ndipo izi zutanthauza kuti tili na ufulu wosankha kucita ciweme olo ciipa. Yehova ofuna kuti cikondi catili naco pali yove cikotisonkhezela kupanga zosankha ziweme kuti tinkhale na umoyo uweme.​—Deuteronomo 30:15, 16, 19, 20; onani Zakosilizhyila 3.

13, 14. Tuziŵa tyani kuti malamulo a Mulungu ni osavuta kuŵakonkha? Twalani cisanzo.

¹³ Tyani ngati tuganiza kuti malamulo a Yehova ni ovuta ndipo otilonda ufulu? Baibolo yulaŵila kuti: “Malamulo ŵake ni osaŵeŵesha.” (1 Yohane 5:3) Liu  ya Cigiriki yakuti “osaŵeŵesha” yutanthauza “kulema.” Liu yamene iyi, m’Mabaibolo ayakine yutanthauza malamulo osayenelela olo ŵanthu amene oyesa kulamulila novutisha ayakine. (Mateyu 23:4; Machitidwe 20:29, 30) Malamulo a Yehova ni osavuta ndipo tingakangiwe lini kuŵakonkha. Nthawi zonse yove otipasa malamulo yakuziŵa kuti tingakwanishe kuyakonkha.

¹⁴ Mwacisanzo, Ganizilani kuti mufuna kuyavya muyanu wamene ofuna kukuka ndipo walonga katundu m’mabokosi. Katundu uyakine niupepu koma uyakine ni wolema ndipo ufunikila ŵanthu aŵili. Ngati muyanu okuganizilani, ko angakuuzhyeni kuti munyamule bokosi yolema mweka? Yai! Ndaŵa yanji? Cifukwa okudelani nkhaŵa. Molingana na zamene izi, Yehova angatiuzhye lini kucita zinthu zamene ni zovuta. (Deuteronomo 30:11-14) Yehova otiziŵa luweme. “Oziŵa luweme mwecitiumbila, okumbukila kuti nise lito.”​—Salimo 103:14.

15. Ndaŵa yanji tingalaŵile mosimikizhya kuti malamulo a Yehova ni opindulisha?

¹⁵ Mose euzhya mtundu wa Aisiraeli kuti malamulo a Yehova sembe yeŵayavya kuti zinthu zikoŵayendela luweme “nthawi zonse” koma soti kumvwila sembe kweŵayavya kuti ‘apitilizhye kunkhala na moyo.’ (Deuteronomo 5:28-33; 6:24) N’cimozimozi na masiku ŵano. Zilizonse zaangatiuzhye Yehova kuti ticite zutipindulisha. (Ŵelengani Yesaya 48:17.) Ausuwasu Yehova oziŵa zinthu zamene zingatipindulishe nthawi zonse. (Aroma 11:33) Baibolo yutiuzhya kuti “Mulungu niye cikondi.” (1 Yohane  4:8) Izi zutanthuza kuti zilizonse zamene Yehova olaŵila nocita, ozicita cifukwa ca cikondi.

16. Tuziŵa tyani kuti tingankhale omvwila nangu kuti tiliye ungwilo koma soti tunkhala m’calo ciipa?

¹⁶ N’cinthu lini cipepu kumvwila Mulungu, cifukwa tunkhala m’calo ciipa camene culamuliliwa na Maleŵaniya. Yove osonkhezela ŵanthu kucita vinthu viipa. (1 Yohane 5:19) Cifukwa cakuti nise lini angwilo, tulimbana na maganizo aipa amene angaticitishe kuti tisamvwile Mulungu. (Aroma 7:21-25) Koma kukonda Yehova kutiyavya kucita zoyenela. Oona kuyesayesa kwasu kuti timumvwile, ndipo otiyavya mwa kutipasa mzimu wake utuŵa. (1 Samueli 15:22, 23; Machitidwe 5:32) Mzimu utuŵa utiyavya kukulisha minkhalidwe yamene ingatiyavye kumumvwila.​—Agalatiya 5:22, 23.

17, 18. (a) Kansi tiphunzile cinji m’buku ino? (b) Tikaphunzile cinji m’nkhani yokonkhapo?

¹⁷ M’buku ino, tiphunzile mwatingankhalile na umoyo wokondwelesha Yehova. Tiphunzile mwatingaseŵenzeshele mfundo za minkhalidwe iweme pa umoyo wasu. Tufunika kukumbukila kuti Yehova otikakamizhya lini kuti timumvwile. Ngati tasankha kumumvwila, tinkhale na umoyo uweme koma soti tikankhale na sogolo iweme. Cofunika ngako n’cakuti ngati tumvwila, tuonesha kuti tumukonda Mulungu.​—Onani Zakosilizhyila 4.

¹⁸ Kuti tiziŵe ciweme na ciipa, Yehova watipasa cikumbumtima. Ngati taciphunzisa cingatiyavye kuti ‘tikomvwila malamulo ŵake.’ Kansi cikumbumtima n’cinji, ndipo tingaciphunzise tyani? Tiyeni tione.