Kuli mweo amene mukonda Yehova Mulungu na Mau ŵake Baibolo:

Yesu elaŵila kuti, “Muziŵe cendi ndipo cendi cikumasuleni.” (Yohane 8:32) Ganizilani mwemwemvwila pemwephunzila cendi ca m’Baibolo! Cenze cinthu cocitisha cidwi kuziŵa kuti m’calo cozula na wenye tingaphunzile cendi.—2 Timoteyo 3:1.

Yehova Mulungu ofuna kuti tiziŵe cendi. Tufunishisha kuuzhya ŵanthu cendi cifukwa cakuti tuŵakonda. Koma tufunika kucita zinyinji kuti titumikile Mulungu. Tufunika kuyesayesa kucita zinthu monga Akhristu cifukwa tulemekeza mfundo za Yehova. Yesu efotokoza njila yofunika ngako yatingaoneshele kuti tukonda Mulungu. Elaŵila kuti: “Ngati musunga malamulo ŵangu, mupitilizhye kunkhala m’cikondi cangu, monga mwamene neo nasungila malamulo ya Atata nopitilizhya kunkhala m’cikondi cake.”—Yohane 15:10.

Yesu enzokonda ngako Ausuwake, ndipo enzocita zilizonse zakufuna Ausuwake. Ngati tutolela cisanzo ca Yesu pa umoyo wasu, Yehova atikonde ndipo nase tinkhale okondwa. Yesu elaŵila kuti, “ngati zamene izi muziziŵa, nimwe osangalala keno muzicita.”—Yohane 13:17.

Tili na cidalilo cakuti buku ino ikuyavyeni kucita zinthu mokatizhyana na cendi ca m’Baibolo nonkhala pa ushamwali na Mulungu. Nise osimikizhya kuti cikondi canu pa Mulungu cikule ndipo mupitilizhye kucita zinthu zamene zingacitishe kuti ‘Mulungu akokukondani’ koma soti mukapeze moyo wosasila.”—Yuda 21.