1, 2. Tingacite cinji kuti tipitilizhye kunkhala m’cikondi ca Mulungu?

TONSE tufuna kunkhala otang’a koma soti na thanzi iweme. Tuyesayesa kulya vakulya viweme, kucita maseŵela otang’isha muŵili, nosamalila miŵili yasu. Nangu kuti izi zufuna nthina, tusangalala na zofumapo ziweme, cifukwa ca izi tuleka lini. Molingana na thanzi ya muŵili tufunika soti kunkhala na thanzi iweme mwauzimu.

² Tecita luweme ngako kuyamba kuphunzila za Yehova. Olo n’tetyo, tufunika kupitilizhya kutang’isha ushamwali wasu na Yehova. Yuda elimbikisha Akhristu mwa kuŵauzhya kuti “pitilizhyani kunkhala m’cikondi ca Mulungu.” Efotokoza mwatingacitile zamene izi. Eciti: “Zitang’isheni pa cikhulupililo canu cituŵa ngako.” (Yuda 20, 21) Kansi tingatang’ishe tyani cikhulupililo casu?

3-5. (a) Kansi Satana ofuna kuti tikoyaona tyani malamulo a Yehova? (b) Kansi muyaona tyani malamulo a Yehova na mfundo zake?

³ N’cinthu ciweme kukhulupilila kuti malangizo a Yehova ni aweme nthawi zonse. Koma Satana ofuna kuti tikoganiza kuti malamulo a Yehova ni ovuta. Ofuna soti  kuti tikoganiza kuti kuzisankhila vocita kungatipangishe kunkhala acimwemwe. Kufumila pa kupondoka koyamba m’munda wa Edeni wankhala opangisha ŵanthu kukhulupilila zamene izi. (Genesis 3:1-6) Ndipo akalucita zamene izi masiku ŵano.

⁴ Kansi Satana olaŵila cendi? Kansi malamulo a Yehova otilonda cendi ufulu? Yai. Tiyelekezele cisanzo ici: Ganizilani kuti muyenda mu paki iweme ngako soti. Ndipo mwaona fensi itali yocingilila malo ayakine. Mwina mungaganize kuti fensi ila yukulondani ufulu. Koma pakaliyopita nthawi itali, mukumvwa kuti nkhalamu yauluma kumbali iyakine ya fensi. Kansi mungaione tyani fensi lomba? Mungaione kuti ni yofunika ngako cifukwa yakutetezani kuti musalyewe na nkhalamu! Mfundo za Yehova zili monga ni fensi, ndipo Maleŵaniya ali monga ni nkhalamu. Mau a Mulungu oticenjeza kuti: “Nkhalani oganiza bwino ndipo nkhalani menso. Mdani wanu, Maleŵaniya, oyendayenda monga ni nkhalamu youluma, yofunishisha kumela muyakine.”​—1 Petulo 5:8.

⁵ Yehova ofuna kuti tinkhale na umoyo uweme. Ofuna lini kuti tikosoŵeshewa na Satana. Niye cifukwa cake watipasa malamulo na mfundo kuti zikotiteteza na kuti tinkhale na cimwemwe. (Aefeso 6:11) Yakobo elemba kuti: “Aliyense wololeshesha mu lamulo yangwilo yamene yuleta ufulu koma soti olimbikila kuicita . . . ankhale wosangalala kuicita.”​—Yakobo 1:25

6. Kansi tingakhulupilile tyani kuti malamulo a Yehova ni ofunika ngako?

⁶ Ngati tukonkha malamulo a Yehova, tunkhala na umoyo uweme koma soti ushamwali wasu na Yove unkhala wotang’a. Mwacisanzo, tupindula ngati tupemphela kwa yove nthawi zonse. (Mateyu 6:5-8; 1 Atesalonika 5:17) Tunkhala osangalala ngati tumvwila malamulo  ŵake akuti tikosonkhana pamozi, tikomulambila koma soti kulimbikishana. Tupindula ngako soti ngati tutolamo mbali m’nchito yolalikila nophunzisa ŵanthu. (Mateyu 28:19, 20; Agalatiya 6:2; Aheberi 10:24, 25) Tikaganizila mwamene izi zutiyavyila kutang’isha cikhulupililo casu, tukhulupilila kuti malamulo a Yehova ni aweme ngako.

7, 8. N’cinji cingatiyavye kupewa kucita nkhaŵa na mayeselo ya msogolo?

⁷ Mwina tingacite nkhaŵa noganiza kuti kusogolo tingayokumana na mayeselo amene angativute kuyapilila. Ngati tikumvwa teti, tikokumbukila mau a Yehova akuti: “Neo, Yehova, nine Mulungu wanu, amene nukuphunzisani kuti zinthu zikuyendeleni bwino, amene nukusogolelani m’njila yamuwamila kuyendamo. Ngati  mungamvwile malamulo ŵangu! Mtendele wanu unkhale monga ni m’mana ndipo cilungamo canu cinkhale monga ni mafunde a m’nyanja.”​—Yesaya 48:17, 18.

⁸ Ngati tumvwila Yehova mtendele wasu unkhale monga ni m’mana wamene upwila lini, koma soti cilungamo casu cinkhale monga ni mafunde ya m’nyanja yamene nthawi zonse yokhapwila pa mtunthu. Kulaŵila cendi tingapitilizhye kunkhala okhulupilika mpaka kale-kale. Baibolo yutiuzhya kuti: “Tim’tulile Yehova nkhaŵa zasu ndipo yove aticilikize, alole lini kuti atumiki ŵake okhulupilika agwendezeke.”​—Salimo 55:22.

9, 10. Kansi kunkhala okhwima mwauzimu kutanthauza cinji?

⁹ Ngati tutang’isha ushamwali wasu na Yehova tinkhale “okhwima mwauzimu.” (Aheberi 6:1) Kansi kunkhala wokhwima mwauzimu kutanthauza cinji?

¹⁰ Kukhwima mwauzimu kuwela lini na msinkhu yai. Kuwela na kunkhala pa ushamwali wotang’a na Yehova, na kuyesayesa kuona vinthu monga ni mwakuvionela. (Yohane 4:23) Paulo elemba kuti: “Ŵanthu okonkha vofuna va muŵili oika maganizo ŵao pa vinthu va muŵili, koma ŵala okonkha vinthu va mzimu oika maganizo ŵao pa vinthu va mzimu.” (Aroma 8:5) Munthu wokhwima mwauzimu oika lini maganizo ŵake pa vinthu va muŵili. M’malo mwake, oika maganizo ŵake pakutumikila Yehova ndipo opanga vosankha vanzelu pa umoyo wake. (Miyambo 27:11; ŵelengani Yakobo 1:2, 3.) Olola lini kuti mtima umusonkhezele kucita vinthu viipa. Munthu wokhwima mwauzimu oziŵa ciweme ndipo ofunishisha kucicita.

11, 12. (a) Kansi mtumwi Paulo elaŵila cinji pankhani yozindikila? (b) Kansi kunkhala wokhwima mwauzimu kulingana tyani na wocita masoŵela youtuka?

 ¹¹ Munthu kuti ankhale wokhwima mwauzimu ofunika kuyesayesa. Mtumwi Paulo elemba kuti: “Cakulya cotanfuna ni ca ŵanthu akulu-akulu amene poseŵenzesha mphamvu zao zozindikila akwanisha kuphunzisa mphamvu zao zozindikila kusiyanisha ciweme na ciipa.” (Aheberi 5:14) Liu yakuti “kuphunzisa” yutikumbusha za munthu wamene ophunzisa munthu ocita masoŵela youtuka.

¹² Tikaona kaswili wa maseŵela outuka tuziŵa kuti aliyovyalike kaswili woutuka, koma etola nthawi itali ngako yophunzila mwaangakulishile luso yake kuti ankhale kaswili. Mwana akavyalika angaziŵe lini mwaangaseŵenzeshele manja yake na mendo yake. Koma m’kuluta kwa nthawi ophunzila mwaangaseŵenzeshele manja pokata vinthu koma soti mendo poyenda. Mwa kuphunzila, angankhale kaswili woutuka. Molingana na izi, zutola nthawi kuti munthu aphunzile nonkhala Mkhristu wokhwima mwauzimu.

13. Kansi n’cinji cingatiyavye kutolela kaganizidwe ka Yehova?

¹³ M’buku ino taphunzila mwamene tingatolele kaganizidwe ka Yehova koma soti noona vinthu monga ni mwakuvionela. Taphunzila soti mwatingaoneshele kuti tuyamikila nokonda malamulo a Yehova. Popanga vosankha tikozikonsha kuti: ‘Kansi ni lamulo olo mfundo yotyani ingakate nchito pa cocitika ici? Ndipo ningaiseŵenzeshe tyani? Kansi Yehova ofuna kuti n’citenji?’​—Ŵelengani Miyambo 3:5, 6; Yakobo 1:5.

14. Tingacite cinji kuti titang’ishe cikhulupililo casu?

¹⁴ Tufunika lini kuleka kutang’isha cikhulupililo casu pa Yehova. Monga mwamene kulya vakulya vopasa thanzi  kutiyavyila kuti tinkhale na miŵili yotang’a, kuphunzila zinthu zokhuza Yehova kutiyavya kutang’isha cikhulupililo. Tikayamba kuphunzila Baibolo, tuphunzila mfundo zacendi zoyambilila zokhuza Yehova na njila zake. Koma m’kuluta kwa nthawi tufunika kumvwishisha mfundo zozama. Izi niye zecitanthauza mtumwi Paulo pecilaŵila kuti: “Cakulya cotanfuna ni ca ŵanthu akulu-akulu.” Mwa kuseŵenzesha mfundo zatuphunzila, tunkhala anzelu. Baibolo yutiuzhya kuti: “Nzelu ni cinthu cofunika ngako.”​—Miyambo 4:5-7; 1 Petulo 2:2.

15. Ndaŵa yanji kukonda Yehova na akwasu na azilongosi n’kofunika?

¹⁵ Munthu angankhale wotang’a koma soti na thanzi iweme koma kuti apitilizhye kunkhala na thanzi iweme, ofunika kupitilizhya kuzisamalila. Molingana na zamene izi, munthu wokhwima mwauzimu oziŵa kuti ofunika kupitilizhya kunkhala na ushamwali wotang’a na Yehova. Mtumwi Paulo otilimbikisha kuti: “Pitilizhyani kuziyesa kuti muone ngati mukali wotang’a m’cikhulupililo; Pitilizhyani kuziyesa kuti muziŵe kuti nimwe munthu wotyani.” (2 Akorinto 13:5) Kuyangizhyila pa cikhulupililo cotang’a, pali soti zinyinji zatufunika kucita. Tufunika kukulisha cikondi casu pa Yehova na pa akwasu na azilongosi. Mtumwi Paulo elaŵila kuti: “Ngati nili na nzelu, nili na cikhulupililo cotang’a cakuti ningakwanishe kukankha malupili, koma niliye cikondi, n’ne watyalatyala.”​—1 Akorinto 13:1-3.

16. Kansi Satana ofuna kuti tikonkhala na maganizo otyani?

¹⁶ Satana ofuna kuti tikoganiza kuti tingakwanishe lini kukondwelesha Yehova. Ofuna kutimvwisha ulesi, notipangisha kuti tikoganiza kuti tingapeze lini thandizo  iliyonse pa mavuto ŵasu. Ofuna lini kuti tikokhulupilila Akhristu ayasu koma soti ofuna lini kuti tikonkhala osangalala. (Aefeso 2:2) Satana oziŵa kuti maganizo aipa angationonge noononga ushamwali wasu na Mulungu. Koma Yehova watipasa ciyembekezo camene cingatiyavye kulimbana na maganizo aipa.

17. Ndaŵa yanji ciyembekezo n’cofunika?

¹⁷ Pa 1 Atesalonika 5:8 Baibolo yuyelekezela ciyembekezo casu na cisote coteteza msoja pa nkhondo, ndipo cuitiwa kuti “ciyembekezo ca cipulumuso.” Kunkhala na ciyembekezo pa malonjezo a Yehova kungateteze maganizo ŵasu notiyavya kukanizhya maganizo aipa.

18, 19. Kansi ciyembekezo cemuyavya tyani Yesu?

¹⁸ Ciyembekezo ceyavya Yesu kunkhala wotang’a. Pa usiku wosilizhyila wa moyo wake pano pacalo ekumana na mavuto osiyanasiyana. Wophunzila wake emupeleka. Muyakine emukana kuti omuziŵa lini. Ayakine emusiya nothaŵa. Ŵanthu a m’dela yake emukana nosenga  kuti amupaye nomupacika pa cimuti conzunzikilapo. Kansi n’cinji cemuyavya kuti apilile zinthu zamene izi? “Cifukwa ca cimwemwe cecimuikila pasogolo pake, epilila cimuti conzunzikilapo, ndipo wankhala pansi ku kwanja kwendi kwa mpando wacifumu wa Mulungu.”​—Aheberi 12:2.

¹⁹ Yesu enzoziŵa kuti ngati wankhala wokhulupilika alete ulemelelo kwa Awisi noonesha kuti Satana ni wawenye. Ciyembekezo ici cemuletela cimwemwe cikulu. Enzoziŵa soti kuti lombapano awelele kwa Ausuwake kululu. Ciyembekezo ici cemuyavya kuti apilile. Molingana na Yesu, tufunika kuika maganizo ŵasu pa ciyembekezo casu. Izi zitiyavye kupilila nangu kuti tikumane na mavuto otyani.

20. N’cinji cingatiyavye kunkhala na maganizo oyenelela?

²⁰ Yehova oona kukhulupilika kwanu na cipililo. (Yesaya 30:18; ŵelengani Malaki 3:10.) Walonjeza kuti akakupaseni zofuna za mtima wanu. (Salimo 37:4) Tetyo  pitilizhyani kuika maganizo pa ciyembekezo canu. Satana ofuna kukutaishani ciyembekezo nokupangishani kuganiza kuti malonjezo a Yehova yakakwanilishiwe lini. N’cendi kuti maganizo aipa angasililetu lini. Tetyo ngati mwaona kuti cikhulupililo canu cayamba kucepa, mukosenga thandizo kwa Yehova kuti akuyavyeni. Mukokumbukila mau opezeka pa Afilipi 4:6, 7 akuti: “Osacita nkhaŵa na kanthu kalikonse, koma pa ciliconse, mwa pemphelo na pembezelo, pamozi na kuyamikila, zosenga zanu ziziŵike kwa Mulungu; ndipo mtendele wa Mulungu, wamene upambana kuganiza mozama kulikonse, uteteze mitima yanu na maganizo ŵanu mwa Khristu Yesu.”

21, 22. (a) Kansi Yehova ali na colinga cotyani pacalo? (b) Kansi mwasimikizhya mtima kucita cinji?

²¹ Nthawi zonse mukonkhala na nthawi yosinkhasinkha pa vinthu vosangalasha vakusogolo. Lombapano ŵanthu onse akolambila Yehova. (Chivumbulutso 7:9, 14) Ganizilani mwati ukankhalile umoyo m’calo calomba, ukankhale uweme ngako soti kupambana ciliconse catingaganizile! Satana na viŵanda vake na ŵanthu aipa kukaŵeve soti. Tikolwala lini ndipo tikokufwa lini. Tikouka siku iliyonse tili na mphamvu koma soti tili osangalala, noseŵenzela pamozi na akwasu kupanga calo kunkhala paladaiso. Tikaŵe na vakulya vopasa thanzi na malo aweme onkhala. Ŵanthu akaŵe lini ankhanza olo aciwawa koma akocitilana cifundo. M’kuluta kwa nthawi ŵanthu pacalo akasangalale na “ufulu wa ulemelelo wa ŵana a Mulungu.”​—Aroma 8:21.

²² Yehova ofuna kuti munkhale pa ushamwali wotang’a na yove. Mukocita vilivonse vamungakwanishe kuti mukomvwila Yehova novwendela pafupi naye masiku onse. Tiyeni tipitilizhye kunkhala m’cikondi ca Mulungu mpaka kale-kale!​—Yuda 21.