M’caka camene ico, gulu ya Mulungu yepanga masinthidwe yamene yeyavya Ophunzila Baibo kunkhala okatizhyana polambila. Mu Nsanja ya Olonda mweyamba kupezeka ndemanga zofotokoza lemba yamene yenzophunziliwa wiki iliyonse pa msonkhano wao woitiwa kuti Pemphelo na Citamando. Kuyangizhyila apo, Ophunzila Baibo epulinta kalenda yamene yenzoonesha lemba yamene yenzophunziliwa wiki iliyonse pa misonkhano koma soti nyimbo ya siku iliyonse yamene yenzoimbiwa pa phunzilo ya paweka na pa kulambila kwa pa banja.

Pa misonkhano yao, Ophunzila Baibo enzofotokoza zokumana nazo za mu utumiki, kuyamikila Yehova, kuimba nyimbo nopemphela. Kalongosi Eva Barney wamene ebatizika mu 1923 apo n’kuti ali na vyaka 15, elaŵila kuti: “Ngati ufuna kufotokoza cokumana naco ca mu utumiki, wenzofunika kupanama nolaŵila mau akuti, ‘Nufuna kuyamikila Asikulu pa zinthu zonse zabwino zaanicitila.’” Akwasu ayakine enzosangalala ngako kufotokoza zokumana nazo za mu utumiki. Kalongosi Barney epitilizhya kulaŵila kuti: “Mkwasu wacikulile wa zina yakuti Godwin, enzonkhala na zinthu zinyinji zoyamikila Asikulu. Koma mkazi wake enzocita kuti akazindikila kuti mkwasu wamene enzosogoza misonkhano wayamba kucita nkhaŵa, enzodonsa jakete ya mulume wake patontho ndipo mulume wake enzoleka kulaŵila nonkhala pansi.”

Kamozi mwezi ulionse, mpingo ulionse wenzonkhala na msonkhano wapadela wa Pemphelo na Citamando. Pofotokoza za msonkhano uyu, Nsanja ya Olonda ya April 1, 1923 yefotokoza kuti: “Hafu ya msonkhano uyu yufunika kunkhala ndemanga na zokumana nazo za mu utumiki koma soti mau olimbikisha ofalisa. . . .Tukhulupilila kuti misonkhano iyi iyavye kuti tinkhale okatizhyana.”

Mkwasu Charles Martin wamene enze na vyaka 19 ndipo enze wofalisa mumpingo ku Vancouver, Canada, epindula ngako na misonkhano iyi. Yove elaŵila kuti: “Pa misonkhano iyi, niye penephunzilila kucita ulaliki wa ng’anda na ng’anda. Nthawi zinyinji, munthu enzofotokoza cokumana naco pocita ulaliki wa ng’anda na ng’anda. Izi zeniyavya kuziŵa zaningalaŵile koma soti mwaningayankhile makonsho yosiyanasiyana.”

Kunkhala na masiku yamene aliyense enzolimbikishiwa kutolako mbali pa nchito yolalikila, kweyavya akwasu na azilongosi kunkhala okatizhyana.  Nsanja ya Olonda ya April 1, 1923 yepeleka cilengezo cakuti: “Pofuna kuti tonse tinkhale okatizhyana pocita nchito imozi . . . , pa Ciŵili May 1, 1923 wofalisa aliyense akafunike kutolako mbali pa nchito yolalikila. Ndipo pavuli pake, Ciŵili ciliconse coyamba ca mwezi ulionse, aliyense akofunika kutolako mbali pa nchito yolalikila. Wofalisa aliyense ofunika kutolako mbali pa nchito iyi.”

Olo Ophunzila Baibo acilumbwana enzotolako mbali pa nchito iyi. Kalongosi Hazel Burford wamene enze na vyaka 16 pa nthawi yamene iyi, elaŵila kuti: “Bulletin yenzonkhala na visanzo va ulaliki vamene tenzofunika kuvisunga pa mtima. a Nenzotolako mbali mwakhama pa nchito iyi pamozi na asikulu.” Olo n’tetyo, kalongosi Burford edabwa na mwamene mkwasu muyakine enzomvwila akamuona kuti olalikila. Yove elaŵila kuti: “Mkwasu muyakine wacikulile enzoona kuti nenzofunika lini kutolako mbali pa nchito yolalikila. Pa nthawi iyi, ayakine mwa akwasu enzomvwisha lini kuti Ophunzila Baibo onse kuyangizhyilapo acilumbwana, enzofunika kutolako mbali potamanda Nyamalenga wasu Mkulu.” (Sal. 148:​12, 13) Koma kalongosi Burford epitilizhya kulalikila. Pavuli pake, eloŵa kilasi yaciŵili ya Sukulu ya Giliyadi ndipo eyamba kutumikila monga m’mishonale ku Panama. M’kuluta kwa nthawi, akwasu aŵa enkhala na maganizo oyenelela ponena za acilumbwana kutolako mbali pa nchito yolalikila.

Misonkhano ikulu-ikulu yeyavya soti akwasu kunkhala okatizhyana. Pa misonkhano inyinji, penzonkhala masiku yamene yenzoikiwa kuti ni yolalikila. Mwacisanzo, pa msonkhano wecitikila ku “Winnipeg, Canada” onse amene epezekapo elimbikishiwa kuti akatoleko mbali pa nchito yolalikila mumzinda uyu pa March 31. Pa masiku oteti, ŵanthu enzolalikiliwa ndipo penzonkhala zofumapo ziweme. Pa August 5, ŵanthu opitilila pa 7,000 epezeka pa msonkhano uyakine ku Winnipeg. Pa nthawi iyi, ici niye cenze ciŵelengelo cikulu ngako polinganizhya na misonkhano yecitika kuvuli.

Msonkhano wofunika ngako wa atumiki a Yehova wa mu 1923 wecitika pa August 18 mpaka 26 ku Los Angeles, California. M’mawiki yakuti msonkhano uyu wasala patontho kucitika, cilengezo  cepelekewa m’manyuzipepa ndipo Ophunzila Baibo eyaŵila tumapepa toitila ŵanthu ku msonkhano uyu topitilila 500,000. Kuyangizhyila apo, vikwangwani veikiwa pa mamotoka osiyanasiyana.

Pa Ciŵelu pa August 25, mkwasu Rutherford elaŵila nkhani ya mutu wakuti “Mbelele na Mbuzi.” Mu nkhani iyi, efotokoza kuti “mbelele” zupanamila ŵanthu amene ali na maganizo oyenelela amene akankhale na moyo m’paladaiso pacalo. Ekamba soti nkhani nopeleka cilengezo coitiwa kuti “Cenjezo.” M’cilengezo ici, elaŵila kuipa kwa cipembezo cawenye ndipo elimbikisha ŵanthu amene ali na maganizo oyenelela kuti afume “m’Babulo Mkulu.” (Chiv. 18:​2, 4) Pavuli pake, Ophunzila Baibo acangu pacalo conse eyaŵila tumatrakiti mamiliyoni twamene twenze na cilengezo ici.

Pa siku yosilizhyila ya msonkhano uyu, ŵanthu opitilila 30,000 emvwishila ku nkhani ya onse ya mkwasu Rutherford ya mutu wakuti “Mitundu Yonse ya Ŵanthu Ikuya ku Aramagedo, Koma Ŵanthu Mamiliyoni Amene Ali na Moyo Akafwe Lini.” Cifukwa cakuti enzoyembekezela kuti pa msonkhano uyu pakawele ŵanthu anyinji, Ophunzila Baibo ecita lendi sitediyamu ku Los Angeles yamene yenze yemangiwa calombapano. Pofuna kuti aliyense apindule na nkhani iyi, akwasu eseŵenzesha vokuzhyila mau va mu sitediyamu vamene venze vipangizo valomba pa nthawi yamene iyo. Ŵanthu anyinji emvwishila pulogilamu iyi kupitila pa wailesi.

M’caka ca 1923, nchito yolalikila yeluta pasogolo mu Africa, Europe, India, na South America. Ku India, mkwasu A. J. Joseph enzoyavya pa nchito yomasulila zofalisa m’Cihindi, Citamil, Citelugu na m’Ciurdu. Enzocita izi olo kuti enzosamalila mkazi wake na ŵana ŵake 6.

Ku Sierra Leone, Ophunzila Baibo mkwasu Alfred Joseph na mkwasu Leonard Blackman elembela ku likulu ya pacalo conse ku Brooklyn, New York kusenga thandizo. Pa April 14, 1923, pempho yao yeyankhiwa. Mkwasu Alfred elaŵila kuti “Pa Ciŵelu ciyakine usiku, nelandila foni yosayembekezeleka.” Ecimvwa mau akuti, “Kansi ni mweo mwelembela ku Watch Tower Society kusenga alaliki anyinji?” Mkwasu Alfred elaŵila kuti, “Eee.” “Atumizhya neo.” Mau aŵa enze a mkwasu William R. Brown. Efwika pa siku yamene iyi kufumila ku Caribbean pamozi na mkazi wake Antonia na ŵana ŵao anakazi aŵili Louise na Lucy. Akwasu enzoyembekezela mwacidwi kukumana na mkwasu uyu.

Mkwasu Alfred epitilizhya kulaŵila kuti: “M’mawa pa siku yokonkhapo, neo na Leonard tenzophunzila Baibo monga ni mwetenzocitila wiki  iliyonse. Mosayembekezeleka, teona munthu mtali wapanama pamlyango. Munthu uyu enze mkwasu Brown. Yove enzokonda cendi cakuti enzofunishisha kukamba nkhani ya onse siku yokonkhapo.” Akaliyokwanisha mwezi umozi, mkwasu Brown eyaŵila zofalisa zonse zeciwela nazo. Pavuli pake, elandila soti mabuku yopitilila pa 5,000 koma nayo yesila pakaliyopita nthawi itali ndipo enzofunikila mabuku ayakine. Koma mkwasu Brown enzoziŵika lini monga munthu wogulisa mabuku. Yove enzokonda kuseŵenzesha Malemba pocita nchito yolalikila na polaŵila nkhani. Izi zecitisha kuti ŵanthu akomuita kuti Baibo Brown.

Ku Germany, ofesi ya msambo ya ku Barmen yenze itontho ndipo akwasu enze ecimvwa mbili yakuti calo ca France lombapano ciukile mzinda uyu. Tetyo, Ophunzila Baibo eganiza zokukisha ofesi ya msambo kuluta ku Magdeburg yamene yenze malo abwino ocitilako nchito yopulinta mabuku. Pa June 19, akwasu esilizhya kulonga mamashini koma soti vinthu viyakine nokukila ku Beteli yalomba ku Magdeburg. Pa siku yamene likulu ya pacalo conse yeziŵishiwa kuti akwasu asilizhya kukuka, manyuzipepa yepeleka cilengezo cakuti calo ca France caukila mzinda wa Barmen. Akwasu eona umboni wakuti Yehova enzoŵadalisa noŵateteza.

Ku Brazil, mkwasu George Young wamene eyenda ngako pocita nchito yolalikila uthenga uweme emanga ofesi ya msambo yalomba noyamba kumasulila Nsanja ya Olonda m’Cipotyugizi. M’miyezi tyala itontho, ekwanisha kuyaŵila zofalisa zopitilila pa 7,000. Kalongosi Sarah Ferguson esangalala ngako mkwasu Young pecitandalila banja yao. Yove enzokonda kuŵelenga Nsanja ya Olonda kuyambila mu 1899 koma enzeve mwai wakuti azipeleke kwa Yehova nobatizika. Pavuli pa miyezi itontho, kalongosi Ferguson na ŵana ŵake 4 ebatizika.

Cakosilizhyila kwa caka, Nsanja ya Olonda ya December 15, 1923 yefotokoza mwamene masinthidwe aŵa ponena za misonkhano, utumiki na misonkhano ikulu-ikulu yekhuzila Ophunzila Baibo. Yelaŵila kuti: “N’zoonekelatu kuti akwasu na azilongosi mu mipingo ali na cikhulupililo cotang’a. Tiyeni tikonzekele kuyocita nchito ikulu m’caka ca 1924, ndipo tiyeni tipitilizhye kutumikila Mulungu mozipeleka koma soti mwacimwemwe.”

Caka cokonkhapo cenze kuzonkhala caka capadela kuli Ophunzila Baibo. Kwa miyezi inyinji, akwasu a pa msambo eseŵenza mwakhama kukonza malo ya pa cisumbu ca Staten. Ndipo cisumbu ici cenze kufupi na likulu ya Mboni za Yehova ku Brooklyn. Maofesi yamene yemangiwa pa malo aŵa alomba, yesila cakoyambilila kwa 1924 ndipo yeyavya kuti akwasu pacalo conse ankhale okatizhyana na kuti uthenga wabwino wa Ufumu ulalikiwe pa mlingo ukulu ngako kupambana kale.