1-2. Kansi njila yabwino yoŵelengela nophunzila Baibo ni yotyani? Fotokozani cisanzo.

 YELEKEZELANI kuti mufuna kugula ng’anda. Kansi n’cinji camungafune kuona mukaliyogula ng’anda iyi? Kansi mungafune kuona tyala foto yoonesha mwayuonekela kusogolo? Mosakaikila, mungafune kuona ng’anda iyi mwacindunji kuti muone mwayuonekela mkati, kunja noziŵa bwino mweyemangiwila. N’zoonekelatu kuti mungafune kuziŵa bwino mbali iliyonse ya ng’anda yamufuna kugula.

² Tingacite cimozimozi ngati tuŵelenga nophunzila Baibo. Kaswili muyakine wa Baibo, elaŵila kuti Baibo ili monga ni “ng’anda ikulu yamene ni itali koma soti yomangiwa pa maziko yotang’a.” Lomba kansi tingacite tyani kuti tiziŵe bwino zayulaŵila Baibo? Ngati mungoiŵelenga mofulumila, mungaziŵe tyala zinthu zitontho zamene ni “mfundo zoyambilila za m’mau opatulika a Mulungu.” (Aheb. 5:12) Tetyo, monga ni mwamene mungafunile kuloŵa m’ng’anda yamufuna kugula kuti muiziŵe bwino, mufunika soti kuŵelenga Mau a Mulungu mosamala kuti muyamvwishishe. Njila yabwino ngako yamungaphunzililemo ni kuona mwamene mbali zosiyanasiyana za uthenga wake zukatizhyilana. Mukoyesayesa kumvwisha cendi camukhulupilila na cifukwa cake mukhulupilila cendi camene ici.

3. Kansi mtumwi Paulo elimbikisha Akhristu ayake kucita cinji, ndipo ndaŵa yanji? (Aefeso 3:​14-19)

³ Kuti timvwishishe mbali zonse za Mau a Mulungu, pali mfundo ziyakine zozama zatufunika kuphunzila mosamala.  Mtumwi Paulo elimbikisha Akhristu ayake kuphunzila Mau a Mulungu mosamala kuti akwanishe “kuziŵa bwino muutali na muufupi na kutalimpha na kunoka” kwa cendi. Kucita izi kwenze kuzoŵayavya kuti ‘azike mizhyu nonkhala otang’a pa maziko’ a cikhulupililo cao. (Ŵelengani Aefeso 3:​14-19.) Nase tufunika kucita cimozimozi. Lomba, tiyeni tione mwatingaphunzilile mosamala Mau a Mulungu kuti tiziŵe mfundo zozama.

4. Kansi tingacitenji kuti tivwendele pafupi na Yehova? Fotokozani cisanzo.

⁴ Monga Akhristu, tufunika lini kukhutila cifukwa coziŵa tyala mfundo zoyambilila za m’Baibo. M’malo mwake, tufunika kunkhala ofunishisha kuphunzila “zinthu zozama za Mulungu.” Ndipo moyavyiwa na mzimu utuŵa, tingakwanishe kucita izi. (1 Akor. 2:​9, 10) Kansi mungaziikile colinga cakuti mukophunzila Mau a Mulungu mosamala kuti muvwendele pafupi na Yehova? Mwacisanzo, mungaphunzile mwamene Yehova eoneshela cikondi kuli atumiki ŵake a m’nthawi zakuvuli na mwamene izi zuoneshela kuti namwe okukondani. Mungaphunzile soti mwamene Yehova enzofunila kuti Aisiraeli akomulambilila nolinganizhya na mwamene yove ofunila kuti tikomulambilila masiku ŵano. Olo mungaphunzile mosamala za maulosi yecikwanilisha Yesu peenzocita utumiki wake pacalo.

5. Kansi pali nkhani iyakine yamungakonde kufufuza pa phunzilo ya pamweka?

⁵ Akhristu ayakine amene okonda kuphunzila Baibo mosamala, efotokoza zinthu zaangakonde kuphunzila mosamala. Ziyakine mwa zinthu zecifotokoza zili m’kabokosi kakuti “ Nkhani Zatingaphunzile pa Phunzilo ya Paseka.” Mungasangalale kuphunzila nkhani zoteti moyavyiwa na Watch Tower Publications Index olo Buku Lofufuzila Nkhani la Mboni za Yehova ya m’Cinyanja. Kuphunzila mfundo zozama za m’Baibo kungatang’ishe cikhulupililo canu nokuyavyani kuti ‘mumuziŵe cendi Mulungu.’ (Miy. 2:​4, 5) Lomba, tiyeni tilaŵizhyane ziyakine mwa mfundo za cendi cozama ca m’Baibo zatingaphunzile mosamala.

6. (a) Kansi pali kusiyana kotyani pakati pa pulani na colinga? (b) Ndaŵa yanji tingalaŵile kuti colinga ca Yehova pa ŵanthu na calo ni “ca muyaya”? (Aefeso 3:11)

⁶ Mwacisanzo, ganizilani zayulaŵila Baibo zokhuza colinga ca Mulungu. Pali kusiyana kukulu ngako pakati pa pulani na colinga. Pulani tingailinganizhye na njila yamungasankhe kuti mukafwike ku malo kwamufuna kuluta. Koma ngati cinthu ciyakine cingavale njila, pulani ingakange cifukwa mungafwike lini ku malo kwamufuna kuluta. Koma colinga, tingacilinganizhye na malo ŵeneŵene kwamufuna kuluta. Cifukwa cakuti muziŵako ku malo kwamufuna kuya, mungaseŵenzeshe njila zosiyanasiyana kuti mufwike ku malo aŵa. Ngati njila imozi ingavalike, mungaseŵenzeshe iyakine kuti mukafwike ku malo aŵa. Tuyamikila Yehova cifukwa cakuti patontho-patontho watiululila “colinga cake ca muyaya” m’Baibo. (Aef. 3:11) Yehova angasankhe kuseŵenzesha njila zosiyanasiyana kuti akwanilishe colinga ici, ndipo nthawi zonse cukwanilishiwa cifukwa “epanga ciliconse na colinga.” (Miy. 16:4) Ndipo zofumapo za nchito za Yehova zinkhalepo mpaka kale-kale. Lomba kansi colinga ca Yehova n’cinji? Ndipo wacita zinthu zotyani kuti acikwanilishe?

7. Pavuli pakuti ŵanthu oyambilila apanduka, kansi Yehova epanga makonzedwe ayakine otyani okwanilishilamo colinga cake? (Mateyu 25:34)

⁷ Mulungu euzhya makolo ŵasu oyambilila za colinga cake. Eŵauzhya kuti ‘avyalane, apake, azuzhye calo noyanganila . . . colengewa ciliconse pacalo.’ (Gen. 1:28) Adamu na Eva pecipandukila Mulungu nocitisha kuti ŵanthu onse ankhale ocimwa, ziliyokangishe Yehova kuti akwanilishe colinga cake. Yove ecinja njila yokwanilishilamo colinga ici. Enkhazikisha Ufumu kululu wamene wenze kuzokwanilisha colinga cake coyambilila ponena za ŵanthu na calo. (Ŵelengani Mateyu 25:34.) Pa nthawi yake yoyenelela, mwacikondi Yehova etumizhya Mwana wake woyamba pacalo kuti azephunzise ŵanthu zokhuza Ufumu nopeleka moyo wake kuti atiombole ku ucimo na imfwa. Yesu eukishiwa noluta kululu kuti akalamulile monga Mfumu ya Ufumu wa Mulungu. Koma pali soti zinthu zinyinji zatingaphunzile ponena za colinga ca Mulungu.

8. (a) Kansi nkhani ikulu ya m’Baibo ni yotyani? (b) Molingana na Aefeso 1:​8-11, kansi colinga cikulu ca Yehova n’cotyani? (Onani cithunzithunzi ca pacikuto.)

⁸ Nkhani ikulu ya m’Baibo ni yakuti zina ya Yehova ituŵishiwe paakukwanilisha colinga cake cokhuza calo poseŵenzesha Ufumu wake wamene Khristu niye wolamulila. Colinga ca Yehova cingacinjiwe lini. Yove elonjeza kuti ciliconse cikacitike monga ni mwecilaŵilila. (Yes. 46:​10, 11; Aheb. 6:​17, 18) Pa nthawi yoyenela calo cikankhale paladaiso ndipo mbadwa za Adamu na Eva, amene ni ŵanthu ati akankhale angwilo koma soti olungama “akasangalale na moyo kosasila.” (Sal. 22:26) Koma izi niye lini tyala zati akakwanilishe Yehova. Yove akayavye soti zolengewa zake za kululu na za pacalo kuti zikankhale zokatizhyana. Onse akomvwila Yehova mokhulupilika monga wolamulila wao. (Ŵelengani Aefeso 1:​8-11.) Kansi mucita lini cidwi na mwamene Yehova okwanilishila colinga cake?

9. Patuŵelenga Baibo, kansi ni zinthu zotyani zati zikacitike msogolo zatingaziŵe?

⁹ Ganizilani ulosi wecifotokoza Yehova m’munda wa Edeni, wamene upezeka pa Genesis 3:15. b Ulosi uyu wefotokoza zocitika zamene zenze kuzokwanilisha cifunilo cake. Olo n’tetyo, zocitika izi zenze kuzocitika pavuli pa  vyaka masauzande anyinji. Mwacisanzo, Mulungu euzhya Abulahamu kuti pavuli pa mibadwo inyinji, m’mozi mwa mbadwa zake enze kuzonkhala Khristu. (Gen. 22:​15-18) Ndipo pavuli pake mu 33 C.E., Yesu ecitiwa ku katende molingana na ulosi. (Mac. 3:​13-15) Cocitika cosilizhyila ca ulosi uyu, camene ni kuphwanyiwa mutu kwa Satana cikacitike vyaka vopitilila 1,000 kufumila lomba. (Chiv. 20:​7-10) Ndipo Baibo yufotokoza soti zinthu zinyinji zati zikacitike pamene udani wa pakati pa calo ca Satana na gulu ya Yehova ukafwike pa cinyinawene.

10. (a) Kansi ni zocitika zotyani za msogolo zati zicitike lombapano? (b) Kansi tingakonzekeleshe tyani maganizo na mtima wasu? (Onani mau a m’nyansi.)

¹⁰ Ganizilani zocitika izi zapadela zeyelosela Baibo. Coyamba, mitundu ya ŵanthu ikalengeze “bata na mtendele.” (1 Ates. 5:​2, 3) “Nthawi yamene iyo” cisauso cikulu cikayambe pamene mitundu ya ŵanthu ikaukile vipembezo vonse vawenye. (Chiv. 17:16) Pavuli pa izi, “Mwana wa munthu akawele m’mikumbi ya kululu na mphamvu koma soti ulemelelo ukulu.” (Mat. 24:30) Yesu akaweluze ŵanthu nopatula mbelele na mbuzi. (Mat. 25:​31-33, 46) Pa nthawi iyi, Satana akankhale lini tyala. Cifukwa cozonda atumiki a Mulungu, yove akasonkhezele mitundu ya ŵanthu yamene Baibo yuita kuti ni Gogi wa Magogi kuti akaukile atumiki a Mulungu. (Ezek. 38:​2, 10, 11) Pa nthawi iyakine mkati mwa cisauso cikulu, Akhristu ozozewa ati akankhale pacalo akalute kululu kuti akakatizhyane na Khristu koma soti magulu ankhondo akululu na colinga cakuti akachaye nkhondo ya Aramagedo yamene ni mbali yosilizhyila ya cisauso cikulu. c (Mat. 24:31; Chiv. 16:​14, 16) Pavuli pake, Ulamulilo wa Khristu wa Vyaka 1,000 ukayambe pacalo.—Chiv. 20:6.

11. Kansi ciyembekezo ca moyo wosasila cutanthauzanji kuli mweo? (Onani soti cithunzithunzi.)

¹¹ Lomba, ganizilani zati zikacitike pavuli pa vyaka 1,000. Baibo yulaŵila kuti Nyamalenga wasu epasa aliyense “mtima wofuna kunkhala na moyo mpaka kale-kale.” (Mla. 3:11) Ganizilani tyala mwamene izi zikakhuzile  mweo na ushamwali wanu na Yehova. Buku yakuti Yandikirani kwa Yehova pa peji 319, yufotokoza kuti: “Pavuli pakuti tankhala na moyo kwa vyaka mahandiledi, masauzande, mamiliyoni olo mabiliyoni, tikaziŵe zinthu zinyinji zokhuza Yehova Mulungu kupambana mwatumuziŵila lomba. Koma pakankhale soti zinthu zinyinji zocitisha cidwi zati tikafunike kuphunzila. . . . Umoyo ukankhale wabwino ngako m’paladaiso. Ndipo cosangalasa n’cakuti nthawi zonse tikovwendela pafupi na Yehova.” Patupitilizhya kuphunzila Mau a Mulungu, kansi ni zinthu ziyakine zotyani zatingafufuze?

12. Kansi tingaziŵe tyani mwazilili zinthu kululu?

¹² Mau a Mulungu otipasa cithunzi cokhuza mwacumvwikila kunkhala pafupi na Mulungu wamene onkhala pa “malo apalulu.” (Yes. 33:5) Baibo yufotokoza zinthu zocitisha cidwi zokhuza Yehova na mbali ya kululu ya gulu yake. (Yes. 6:​1-4; Dan. 7:​9, 10; Chiv. 4:​1-6) Mwacisanzo, tingaŵelenge zokhuza zinthu zocitisha cidwi zeciona Ezekieli pamene kululu kweseguka ndipo eyamba kuona mensomphenya a Mulungu.—Ezek. 1:1.

13. Molingana na Aheberi 4:​14-16, kansi mukumvwa tyani mukaganizila zakucita Yesu kululu?

¹³ Mukoganizila soti pa zinthu zamene Yesu oticitila kululu monga Mfumu yasu koma soti Mkulu wa Ansembe wacifundo. Kupitila muli yove, tingafwike ku mpando wacifumu wa kuwama mtima kukulu kwa Mulungu m’pemphelo nosenga kuti aticitile cifundo koma soti kuti atiyavye pa nthawi yatufunikila thandizo. (Ŵelengani Aheberi 4:​14-16.) Siku iliyonse tufunika kuganizila zawaticitila Yehova na Yesu koma soti zakuticitila pali lomba. Cikondi cao pali seo cufunika kukhuza mtima wasu notisonkhezela kunkhala acangu potumikila Yehova.—2 Akor. 5:​14, 15.

14. Kansi ni cinthu cimozi cotyani catingacite kuti tioneshe kuti tuyamikila Yehova na Yesu? (Onani soti vithunzithunzi.)

 ¹⁴ Imozi mwa njila yabwino ngako yatingaoneshele kuti tuyamikila Mulungu na Mwana wake, ni kuyesayesa kuyavya ayakine kuti ankhale Mboni za Yehova koma soti ophunzila a Yesu. (Mat. 28:​19, 20) Izi niye zecicita mtumwi Paulo pofuna kuonesha kuti enzoyamikila Mulungu na Khristu. Yove enzoziŵa kuti cifunilo ca Mulungu n’cakuti ŵanthu “kaya ankhale a mtundu wotyani akapulumuke noziŵa cendi molondola.” (1 Tim. 2:​3, 4) Yove eseŵenza mwakhama pa utumiki wake kuti ayavye ŵanthu mwangakwanishile kuti “apulumuseko ayakine.”—1 Akor. 9:​22, 23.

15. Molingana na Salimo 1:​2, kansi n’cinji cingatipase cimwemwe?

¹⁵ Wamasalimo efotokoza kuti wodala ni munthu wamene “okondwela na cilamulo ca Yehova” ndipo oŵelenga ‘nosinkhasinkha cilamulo cake mzuŵa na usiku.’ (Sal. 1:​1-3) Womasulila Baibo muyakine wa zina yakuti Joseph Rotherham, elaŵila za mavesi aŵa kuti munthu “ofunika ngako malangizo a Mulungu cakuti ofunika kuyasakila, kuyaŵelenga nopatula nthawi yosinkhasinkha.” Yove eyangizhyilapo kuti “ngati siku yapita munthu osaŵelengako Baibo, niye kuti siku yamene iyo yangoonongeka tyala.” Mungapeze cimwemwe pophunzila Baibo mwa kupeza mfundo zosiyanasiyana noona mwazukatizhyilana. N’zosangalasa ngako kufufuza Mau a Mulungu noziŵa muufupi, muutali, kutalimpha na kunoka kwake.

16. Kansi tikalaŵizhyane cinji m’nkhani yokonkhapo?

¹⁶ Tingakwanishe kumvwisha cendi cakutiphunzisa Yehova camene cupezeka m’Mau ŵake. M’nkhani yokonkhapo, tikaone cimozi mwa cendi cozama ngako cokhuza kacisi ukulu wauzimu wa Yehova wecifotokoza Paulo m’kalata yecilembela Akhristu aciheberi. Lekani kuti kufufuza pa nkhani iyi kukakuleteleni cimwemwe cikulu.