4 | Baibo Yupeleka Malangizo Oyavya
BAIBO YULAŴILA KUTI: “Malemba onse ni . . . Opindulisha.”—2 TIMOTEYO 3: 16.
Kansi Izi Zutanthauzanji?
Olo kuti ni buku lini ya zacipatala, Baibo yupeleka malangizo opindulisha. Malangizo aŵa angayavye munthu wamene ovutika na matenda a maganizo. Tiyeni tione visanzo viyakine.
Kansi Izi Zingatiyavye Tyani?
“Ŵanthu abwino bwino ofuna lini dokota, koma ŵanthu olwala niye omufuna.”—MATEYU 9:12.
Baibo yuvomelezhya kuti nthawi ziyakine tingafunike thandizo ya zacipatala. Ŵanthu anyinji amene ovutika na matenda a maganizo apeza thandizo mwa kuziŵa zenezene zokhuza matenda ŵao noluta kuli dokota.
“Kucita masoŵela otang’isha muŵili n’kopindulisha”—1 TIMOTEYO 4:8a, Contemporary English Version
Kupatula nthawi yocita zinthu zotang’isha muŵili wasu kungacepesheko matenda a maganizo. Zinthu izi zuyangizhyilapo kukonkha ndandanda yasu yocitilamo masoŵela otang’isha muŵili, kulya vakulya vopasa thanzi na kulala mokwanila.
“Mtima wosangalala niye mankhwala opolesha, koma mtima wacisoni uyumisha mafupa”—MIYAMBO 17:22.
Kuŵelenga malemba olimbikisha koma soti kuziikila zolinga zamene tingazikwanilishe, kungatiyavye kunkhala na mtima wosangalala. Kunkhala na maganizo oyenelela kungatiyavye soti kuti tipitilizhye kuziona moyenelela nopilila mavuto yowela cifukwa colwala matenda a maganizo.
“Nzelu zunkhala na ŵanthu olicefya.”—MIYAMBO 11:2.
Payakine namwe muvomelezhya kuti nthawi ziyakine mungakwanishe lini kucita zinthu pamweka. Tetyo, mofunishisha landilani thandizo ya ayakine. Ashamwali na abanja ŵanu angafune kukuyavyani koma angaziŵe lini zinthu zaangafunike kucita kuti akuyavyeni. Tetyo, ŵauzhyeni zinthu zamene zingankhale zoyavya kuli mweo. Osayembekezela kuti akucitileni zinyinji. M’malo mwake, mukoyamikila zili zonse zaangakwanishe kukucitilani.
Mwamene Malangizo a m’Baibo Angayavyile Ŵanthu Amene Ovutika na Matenda a Maganizo
“Nezindikila kuti cinthu ciyakine cenze lini bwino muli neo. Tetyo, neonana na dokota. Pavuli pake a dokota ekwanisha kupeza vuto yenenze nayo. Izi zeniyavya kumvwisha vuto yenenze nayo noziŵa thandizo ya zacipatala yaningalandile kuti thanzi yangu inkhaleko bwino.”—Nicole, a wamene olwala matenda osokonezeka maganizo.
“Naona kuti kuŵelenga Baibo siku iliyonse pamozi na mkazi wangu, kuniyavya kunkhala na maganizo oyenelela ndipo kunilimbikisha. Nthawi ziyakine nikavutika kupilila, vesi iyakine yunitonthoza.”—Peter, wamene olwala matenda a maganizo.
“Cenze covuta kuti niuzhyeko ayakine vuto yenenze nayo cifukwa nenze wansoni ngako. Koma muyangu enzoyesayesa kumvwisha mwanenzomvwila. Yove eniyavya kuzimvwa kuti nili lini neka.”—Ji-yoo, wamene enze na vuto yakulya.
“Baibo yeniyavya kunkhala na maganizo oyenelela pa nkhani ya nchito na kupumula. Mfundo zake zaniyavya soti kulimbana na vuto yolwala maganizo.”—Timothy, wamene olimbana na vuto ya maganizo.
a Mazina ayakine acinjiwa.
