M’Baibo muli nkhani zinyinji za analume na anakazi amene enzovutika na nkhaŵa, kufooka na cisoni. Patuŵelenga nkhani zao, tingapeze nkhani ya munthu muyakine wamene enzokumvwa monga ni mwatumvwila seo.

Tonse tufunishisha kuti ŵanthu ayakine akomvwisha mwatumvwila makamaka ngati tuvutika na matenda a maganizo. Patuŵelenga nkhani za m’Baibo, tuphunzila za ŵanthu amene enzovutika maganizo ndipo enzokumvwa monga ni mwatumvwila seo. Kuziŵa kuti pali ayakine amene ekumanapo na mavuto ndipo enzokumvwa monga ni mwatumvwila seo, kutitonthoza ndipo kuticitisha kuzimvwa kuti tili lini seka patulimbana na nkhaŵa koma soti vinthu vamene vutivutisha maganizo.

• Baibo ili na mau anyinji yecifotokoza ŵanthu amene enze na nkhaŵa ndipo enzozimvwa kuti ali ŵeka. Kansi mwemvwapo kale monga ni mwecimvwila Mose, Eliya na Davide kuti ‘Naŵeŵa nazo?’​—Numeri 11:14; 1 Mafumu 19:4; Masalimo 55:4.

• Baibo yutiuzhya za munakazi muyakine wa zina yakuti Hana, wamene enze “ekhumudwa ngako” cifukwa cakuti enzeve ŵana ndipo enzovutishiwa mwankhanza na mkazi muyake.​—1 Samueli 1:6, 10.

• Baibo yutiuzhya soti za Yobu wamene ekumana na mavuto monga ni yatukumana nayo seo. Olo kuti yove enze na cikhulupililo cotang’a pa Yehova, evutika maganizo cakuti elaŵila kuti: “Moyo naukana ndipo nufuna lini kupitilizhya kunkhala na moyo mpaka kale-kale.”​—Yobu 7:16.

Kuona mwamene ŵanthu aŵa ofotokozewa m’Baibo ekwanishila kulimbana na maganizo olakwika, kungatiyavye kupeza mphamvu zamene zingatiyavye kulimbana na mavuto.