M’Baibo muli uthenga wacitonthozo wamene ungatiyavye kupilila ngati tulimbana na maganizo ofookesha. Uthenga wa m’Baibo utipasa soti ciyembekezo cakuti lombapano matenda a maganizo asile.

Nthawi ziyakine tonse tukhumudwa. Koma ŵala amene ovutika na nkhaŵa koma soti olwala matenda a maganizo, onkhala okhumudwa nthawi zonse. Kansi Baibo ingatiyavye tyani?

• Baibo ili na mfundo zinyinji zamene zingatiyavye kucosa maganizo olakwika. (Afilipi 4:8) Mfundo izi zingatitonthoze notiyavya kunkhala na maganizo oyenela. Ndipo zingativye soti kuongolela maganizo ŵasu.​—Masalimo 94:18, 19.

• Baibo ingatiyavye kuleka kuziona kuti nise atyalatyala.​—Luka 12:6, 7.

• Malemba anyinji m’Baibo otisimikizhyila kuti tili lini seka nakuti Mulungu wamene ni Nyamalenga wasu oziŵa mwatumvwila.​—Masalimo 34:18; 1 Yohane 3:19, 20.

• Baibo yulonjeza kuti Mulungu akacosepo mavuto yonse ndipo zakale zikakumbukiliwe lini soti. (Yesaya 65:17; Chivumbulutso 21:4) Ngati tuvutika maganizo, lonjezo iyi yutipasa mphamvu kuti tikwanishe kupilila.