Yehova Mulungu otisenga kuti tikomuuzhya nkhaŵa zasu zonse kuyangizhyilapo zilizonse zamene zutivutisha maganizo. (Masalimo 55:22) Tufunika kumuuzhya Yehova m’pemphelo vuto iliyonse kaya ni ikulu olo itontho. Zili zonse zamene n’zofunika kuli seo n’zofunika soti kwa Yehova. Izi zili tetyo cifukwa cakuti osamala za seo. Kupemphela kwa Yehova niye cinthu cofunika ngako camene cingatiyavye kunkhala na mtendele wa m’maganizo.​—Afilipi 4:6, 7.

Ngati tuvutika na matenda a maganizo tingazimvwe kuti tili seka ndipo ŵanthu ayakine angamvwishishe lini zatupitamo. (Miyambo 14:10) Koma patuuzhya Mulungu m’pemphelo mwatumvwila, yove otionesha cifundo ndipo otimvwishisha. Yehova oziŵa mavuto yatupitamo na ululu watukumvwa. Ndipo ofuna kuti tikopemphela kwa yove nomuuzhya ciliconse camene cuticitisha nkhaŵa.​—2 Mbiri 6:29, 30.

Kulaŵila na Yehova m’pemphelo kutang’isha cidalilo casu cakuti osamala za seo. Tingamvwe monga ni mwecimvwila wamasalimo wamene epemphela kuti: “Mwaona kusaushika kwangu ndipo mwaziŵa zoŵaŵa zaniponela.”(Masalimo 31:7) Kuziŵa kuti Yehova oona mavuto yatukumana nayo kutiyavya kuti tipitilizhye kupilila m’nthawi zino zovuta. Koma yove ocita zinyinji osati tyala kungoziŵa mavuto yatukumana nayo. Omvwisha ngako mavuto yatukumana nayo kupambana munthu aliyense ndipo otiyavya kupeza citonthozo na cilimbikiso m’Baibo.