Ngati muyasu olwala matenda a maganizo tingafooke. Koma tufunika kumuonesha kuti tusamala za yove nomuyavya kupilila. Kansi tingacite tyani zamene izi?

“Mukofulumila kumvwa.”​—YAKOBO 1:19

Cinthu cofunika ngako camungacite ni kumvwishila mosamala ngati muyanu olaŵila. Mukokumbukila kuti ni mau lini onse ŵamufunika kulaŵilapo, ndipo muonesheni kuti mumvwishila mosamala nakuti musamala za yove. Mukoyesayesa kumumvwisha ndipo mukopewa kumuweluza. Mukokumbukila kuti nthawi ziyakine angalaŵile mosaganiza bwino ndipo pavuli pake angayambe kuziimba mlandu.​—Yobu 6:2, 3.

“Mukolaŵila molimbikisha.”​—1 ATESALONIKA 5:14.

Payakine muyanu angankhale na nkhaŵa ndipo angovutika na maganizo oziona kuti ni watyalatyala. Mwa kumusimikizhyila kuti musamala za yove mungamutonthoze nomulimbikisha olo kuti muziŵa lini zenezene zamungalaŵile.

“Muyako wenewene ni ula okukonda nthawi zonse”​—MIYAMBO 17:17.

Mukopeleka thandizo yoyenela. M’malo moganiza kuti muziŵa mwamungamuyavyile, mukomukonsha zakufuna kuti mucite. Ngati muyanu ovutika kufotokoza cinthu caakufuna, mungayese kucita cinthu ciyakine camene payakine cingamuyavye monga kuyoyendako naye ku malo ayakine, kumugulilako  zinthu, kuyelesa koma soti kumuyavyako nchito ziyakine.​—Agalatiya 6:2

“Mukonkhala oleza mtima.”​—1 ATESALONIKA 5:14.

Nthawi ziyakine muyanu angankhale lini okonzeka kuti alaŵile namwe. Koma mukomusimikizhyila kuti nimwe okonzeka kumumvwishila mosamala nthawi iliyonse yangafune kuti alaŵile namwe. Cifukwa colwala, muyanu angalaŵile olo kucita zinthu zamene zingakukhumudwisheni. Matenda aŵa angamupangishe kunkhala waukali ndipo angokangiwa kukwanilisha zinthu zemwepangana kuti mucite. Pamumupasa thandizo yofunikila, mukomumvwishisha ndipo mukomulezela mtima.​—Miyambo 18:24.

“Nuyesayesa kunkhala shamwali wake wamene angokamba naye momasuka. Olo kuti nuziŵa lini mwaningasilizhyile mavuto ŵake, nuyesayesa kumumvwishila pakulaŵila. Nthawi ziyakine angafune munthu wamene angomumvwishila kuti amvweko bwino.”​—Farra, a wamene shamwali wake enze na vuto ya kulya, nkhaŵa na matenda a maganizo.

“M’mozi mwa ashamwali ŵangu ni wacifundo koma soti olimbikisha. Yove eniitila ku cakulya kung’anda kwake. Enionesha cikondi zamene zecitisha kuti nikwanishe kumasuka nomufotokozela mwenenzomvwila. Izi zenilimbikisha ngako!”​—Ha-eun, wamene ovutika na matenda a maganizo.

“Kuleza mtima n’cinthu cofunika ngako. Ngati mkazi wangu wacita cinthu camene canikhumudwisha, nukumbukila kuti niye lini mwaalili koma kulwala niye kwamucitisha kuti acite zinthu m’njila yoteti. Izi zuniyavya kuti nikocita naye zinthu m’njila yomuganizila nopewa kukalipa.”​—Jacob, wamene mkazi wake ovutika na matenda a maganizo.

“Mkazi wangu onitonthoza nonicilikiza. Ngati yove waona kuti nili na nkhaŵa, onikakamizhya lini kucita zinthu zanisafuna kucita. Ndipo nthawi ziyakine ngati ofuna kucita cinthu cakukonda kucita, oleka cifukwa ofuna lini kunikhumudwisha. Nkhalidwe yake yozipeleka koma soti wanzi zumupangisha kunkhala wapadela ngako kwa neo.”​—Enrico, wamene ovutika na nkhaŵa.