Cabwino na Ciipa: Cosankha Camufunika Kupanga
Malangizo yatingasankhe kukonkha yangakhuze ngako umoyo wasu. Yehova Mulungu oziŵa bwino zamene izi. Ndiye cifukwa cake ofuna kuti tikocita zinthu mokatizhyana na malangizo ŵake.
Yehova ofuna kuti tikosangalala na umoyo wamtendele.
“Neo n’ne Mulungu wanu, amene nukuphunzisani kuti zinthu zikuyendeleni bwino, amene nukusogolelani m’njila yamufunika kuyendamo. Zingankhale bwino ngako ngati mungamvwile malamulo ŵangu! Mukacita tetyo, mtendele wanu unkhale monga ni m’mana ndipo cilungamo canu monga mafunde a m’nyanja.”—Yesaya 48:17, 18.
Ponkhala Nyamalenga wasu, Mulungu oziŵa zatufunika kucita kuti tinkhale na umoyo wabwino. Otisenga kuti tikokonkha malangizo ŵake cifukwa ni opindulisha. Ngati tukonkha malangizo a Mulungu, tikokaikila lini ngati zosankha zatapanga zinkhale na zofumapo zabwino. Tikopanga zosankha zabwino zamene zingatisogelele ku moyo wacimwemwe na mtendele.
Yehova otisenga lini kucita zinthu zamene tingakwanishe lini kucita.
“Lamulo yanukupasani lelo niyosavuta kuli mweo kuikonkha, ndipo ili lini pakuti mungakwanishe lini kuipeza.”—Deuteronomo 30:11.
Kuti tikwanishe kunkhala na umoyo wokatizhyana na malamulo a Mulungu, tufunika kusintha mwatuganizila na mwatucitila zinthu. Olo n’tetyo, Yehova otisenga lini kucita zinthu zamene tingakwanishe lini. Monga Nyamalenga wasu, oziŵa bwino zatingakwanishe kucita. Ndipo pamupitilizhya kumuziŵa bwino Yehova, muone kuti “malamulo ŵake ni osaŵeŵesha.”—1 Yohane 5:3.
Yehova olonjeza kuti akayavye ŵala onse amene ocita zinthu mokatizhyana na malamulo ŵake.
“Neo Yehova Mulungu wako, nakata kwanja yako yamalendi, Neo amene nukuuzhya kuti, ‘Usacite wowa. Neo nikuyavye.’”—Yesaya 41:13.
Tingakwanishe kukonkha malamulo a Mulungu cifukwa yove atiyavye. Angatiyavye kupitila m’Mau ŵake Baibo amene otilimbikisha notipasa ciyembekezo.
Ŵanthu mamiliyoni anyinji pacalo conse aona kuti kucita zinthu mokatizhyana na mfundo za m’Baibo kwacinja umoyo wao. Tyani osaphunzila zinyinji zokhuza malangizo a nzelu opezeka m’Baibo? Mungaziŵe zinyinji mwakuphunzila mahala bulosha yatuseŵenzesha pophunzila Baibo na ŵanthu yakuti Sangalalani na Moyo Kosasila! Yupezeka pa jw.org. Ili na mitu iyi:
-
Kansi Baibo Ingakuyavyeni Tyani?
-
Baibo Yutipasa Ciyembekezo
-
Kansi Mungakhulupilile Zayulaŵila Baibo?
Pamuphunzila Mau a Mulungu Baibo, muone kuti ikasile lini nchito; “niyodalilika lomba mpaka kale-kale.” (Salimo 111:8) Kukonkha mfundo zoyavya za m’Baibo ni cinthu ciweme ngako camungasankhe kucita mu umoyo wanu. Koma Mulungu otikakamizhya lini kukonkha malamulo ŵake. (Deuteronomo 30:19, 20; Yoswa 24:15) Ni cosankha camene aliyense waseo ofunika kupanga.
