Cabwino na Ciipa: Malangizo a m’Baibo—Odalilika
Nzokaikisha ngati zosankha zasu zingankhale na zofumapo zabwino ngati tusankha potolela kaganizidwe ka ŵanthu ayakine. Baibo yufotokoza cifukwa cake. Kuyangizhyila apo, yupeleka soti malangizo oyavya okhuza mwatingankhalile na umoyo wacimwemwe koma soti wokhutilisha.
MALANGIZO YATUFUNIKILA
M’Baibo, Yehova a Mulungu otiuzhya kuti epanga ŵanthu kuti akolandila malangizo kuli yove osati akozilamulila ŵeka. (Yeremiya 10:23) Ndiye cifukwa cake etipasa malangizo yokhuza minkhalidwe yabwino yamene yopezeka m’Baibo. Cifukwa cakuti otikonda ngako ofuna lini kuti tikokumana na mavuto cifukwa copanga zosankha zolakwika. (Deuteronomo 5:29; 1 Yohane 4:8) Kuyangizhyila apo, pofwana kuti ni Nyamalenga wasu ali na nzelu ndipo ndiye ofunika kutipasa malangizo. (Salimo 100:3; 104:24) Olo n’tetyo, Mulungu okakamizhya lini ŵanthu kukonkha mfundo zake.
Yehova epasa ŵanthu oyamba Adamu na Eva zinthu zonse zenzofunikila kuti ankhale na cimwemwe cenecene. (Genesis 1:28, 29; 2:8, 15) Eŵapasa soti malamulo yosavuta ndipo enzoyembekezela kuti akoyamvwila. Olo n’tetyo eŵapasa ufulu wosankha kumvwila malamulo ŵake kapena yai. (Genesis 2:9, 16, 17) Nzomvwisha cisoni kuti Adamu na Eva esankha kusamvwila malamulo a Mulungu. (Genesis 3:6) Kansi penkhala zofumapo zotyani? Kansi ŵanthu opeza cimwemwe cifukwa cozisankhila ŵeka cabwino na ciipa? Yai. Mbili yuonesha kuti kusakonkha malamulo a Mulungu kuleta lini mtendele na cimwemwe cosasila.—Mlaliki 8:9.
Baibo yupeleka malangizo yatufunikila kuti tikopanga zosankha zanzelu, mosasamala kanthu kuti tunkhala kuni. (2 Timoteyo 3:16, 17; onani bokosi yakuti “ Buku ya Ŵanthu Onse.”) Tiyeni tione mwamene Baibo yucitila zamene izi.
Phunzilani zinyinji kuti muziŵe cifukwa cake Baibo yuitiwa kuti ni “mau a Mulungu.” —1 Atesalonika 2:13. Onelelani vidyo yakuti Kansi Niŵani Elemba Baibo? pa jw.org.
BAIBO YUTIUZHYA ZAKUFUNA MULUNGU KUTI TIKOCITA
Baibo ili na mbili yolondola yokhuza mwamene Yehova ocitila zinthu na ŵanthu ŵake. Mau ŵake otiyavya kuziŵa maganizo a Mulungu pa nkhani ya cabwino na ciipa koma soti copindulisha na coononga. (Salimo 19:7, 11) Mau yatuphunzila m’Baibo ni yacendi ndipo yotiyavya kupanga zosankha zanzelu mu umoyo wasu wa siku na siku.
Mwacisanzo ganizilani malangizo opezeka pa Miyambo 13:20: “Munthu woyenda na ŵanthu anzelu ankhale wanzelu, koma ocita zinthu na ŵanthu opusa apeze mavuto.” Mau aŵa okata soti nchito masiku ŵano monga ni mwezenzele m’nthawi zakuvuli. Baibo ili na malangizo othandiza.—Onani bokosi yakuti “ Malangizo a m’Baibo a Nzelu Koma Soti Othandiza Nthawi Zonse.”
Koma mungozikonsha kuti, ‘Kansi ningankhale tyani osimikizhya kuti malangizo a m’Baibo ni oyavya masiku ŵano?’ M’nkhani yokonkhapo tione mwamene Baibo yeyavyila ŵanthu ayakine.
a Yehova ni zina ya Mulungu.—Salimo 83:18.
