1. Kansi paladaiso wauzimu n’cinji, ndipo tufunika kunkhala osimikizhya kucita cinji?

 MASIKU ŵano, pacalo pali paladaiso wophiphilisila mwamene muli ŵanthu anyinji amene ni otangwanika kucita nchito zabwino nosangalala na mtendele wenewene. Ŵanthu amene ali kale m’paladaiso uyu wophiphilisila ni osimikizhya kusalola ciliconse kuŵapangisha kuti afumemo. Ove ofuna soti kuyavya ŵanthu ayakine mwaangakwanishile kuti nao aloŵe m’malo aŵa. Koma kansi paladaiso uyu wophiphilisila ni cinji? Ni paladaiso wauzimu. a

2. Kansi paladaiso wauzimu ni wocitisha cidwi m’njila yotyani?

² M’njila yocitisha cidwi, Yehova wakonza malo ophiphilisila mwamene atumiki ŵake ni amtendele koma soti okatizhyana mosasamala kanthu kuti onkhala m’calo colamuliliwa na Satana, mwamene ŵanthu ozondana. (1 Yoh. 5:19; Chiv. 12:12) Mulungu wasu wacikondi oona mwamene calo ici ciipa cukhuzila ŵanthu ŵake. Tetyo, ocitisha atumiki ŵake kuzimvwa kuti ni otetezeka na colinga cakuti akomutumikila mosangalala. Mau ŵake Baibo, ofotokoza kuti paladaiso uyu wauzimu ni “malo othaŵilapo” koma soti “dimba yotililiwa bwino.” (Yes. 4:6; 58:11) Ŵanthu amene ali m’paladaiso uyu, ni osangalala koma soti otetezeka. Izi zuŵayavya kupilila m’masiku ŵano osilizhya.—Yes. 54:14; 2 Tim. 3:1.

3. Kansi ulosi upezeka mu Yesaya caputa 65 wekwanilishiwa tyani m’nthawi zakuvuli?

³ Kupitila mwa mneneli Yesaya, Yehova efotokoza mwati ukankhalile umoyo kuli ŵanthu ati akankhale m’paladaiso wauzimu.  Mungapeze nkhani iyi mu Yesaya caputa 65 yamene yekwanilishiwa koyamba mu 537 B.C.E. Pa nthawi iyi, Ayuda olapa emasuliwa mu ukapolo ku Babulo ndipo ewelela kwao. Yehova edalisa ŵanthu ŵake ndipo eŵayavya kumanga soti kacisi, yamene yenze malo kweenzolambilila Yehova.—Yes. 51:11; Zek. 8:3.

4. Kansi ulosi upezeka mu Yesaya caputa 65 ukwanilishiwa tyani masiku ŵano?

⁴ Ulosi uyu weyamba kukwanilishiwa kaciŵili mu 1919 C.E., pamene atumiki a Yehova a masiku ŵano emasuliwa mu ukapolo wa Babulo Mkulu. Pavuli pake, paladaiso wauzimu weyamba kukula pacalo conse. Atumiki a Ufumu acangu enkhazikisha mipingo inyinji ndipo enzoonesha minkhalidwe yacikhristu. Analume na anakazi amene enze na minkhalidwe iipa ‘evwala umunthu walomba wamene welengewa mokatizhyana na cifunilo ca Mulungu.’ (Aef. 4:24) N’cendi kuti madaliso anyinji yecifotokoza mneneli Yesaya yakakwanilishiwe m’calo calomba. Koma olo pali lomba, tupindula m’njila zinyinji cifukwa conkhala m’paladaiso wophiphilisila. Lomba, tiyeni tilaŵizhyane mwamene paladaiso wauzimu utikhuzila na cifukwa cake tufunika lini kufumamo.

MWAKUPINDULILA ŴANTHU AMENE ALI M’PALADAISO WAUZIMU

5. Molingana na Yesaya 65:​13, kansi ni madaliso otyani yatusangalala nayo cifukwa conkhala m’paladaiso wauzimu?

⁵ Ni athanzi koma soti osisimuliwa. Ulosi wa Yesaya uonesha kusiyana kukulu ngako kulipo pakati pa ŵanthu amene ali m’paladaiso wauzimu na ŵala amene ali kunja kwa paladaiso uyu. (Ŵelengani Yesaya 65:13.) Mwa wanzi, Yehova opasa atumiki ŵake ciliconse cakufunikila kuti apitilizhye kunkhala pafupi na yove. Mwacisanzo, watipasa mzimu wake, Mau ŵake Baibo koma soti zofalisa zozikiwa pa Baibo na colinga cakuti “tikokulya, . . . kumwa, . . . nosangalala.” (Linganizhyani na Chivumbulutso 22:17.) Koma zinthu n’zosiyana ngako kwa ŵanthu amene ali lini m’paladaiso wauzimu. “Ove ali na njala . . . , njota . . . , ndipo ocitishiwa nsoni.” Kuyangizhyila apo, ali lini pa ushamwali na Mulungu.—Amo. 8:11.

6. Kansi Yoweli 2:​21-24 yufotokoza zinthu zotyani zawatipasa Yehova, ndipo zinthu izi zutipindulisha tyani?

⁶ Mu ulosi wake, Yoweli eseŵenzesha zinthu zofunika ngako monga tiligu, vinyu na mafuta ya maolivi. Mwa wanzi, Yehova opasa atumiki ŵake zakufunikila kuyangizhyilapo cakulya cauzimu. (Yow. 2:​21-24) Yove ocita izi kupitila m’Baibo, zofalisa zasu, webusaiti yasu, misonkhano ya mpingo, yadela na yacigao. Tingalye cakulya cauzimu siku iliyonse ndipo cifukwa ca izi, tunkhala athanzi koma soti osisimuliwa ngako.

7. Kansi n’cinji cutipasa ‘cimwemwe ca mu mtima’? (Yesaya 65:14)

⁷ Ni acimwemwe koma soti okhutila. Atumiki a Mulungu ni osangalala cifukwa ca ciyamikilo cao pa Yehova. (Ŵelengani Yesaya 65:14.) Cikhulupililo cotang’a m’malonjezo otonthoza opezeka m’Mau a Mulungu na ciyembekezo cozikiwa pa nsembe ya dipo, zutiyavya kunkhala na ‘cimwemwe ca mu mtima.’ Kuyangizhyila apo, kulaŵizhyana zinthu izi na akwasu na azilongosi kutiyavya kunkhala na cimwemwe cenecene.—Sal. 34:8; 133:​1-3.

8. Kansi ni vinthu viŵili vofunika ngako votyani vakusangalala navo ŵanthu ali m’paladaiso wauzimu?

⁸ Cikondi na mgwilizano uli pakati pa atumiki a Yehova ni vinthu viŵili vakusangalala navo ŵanthu amene ali m’paladaiso wauzimu. ‘Mgwilizano uyu wamphamvu’ utiyavya kuziŵa mwati ukankhalile umoyo m’calo calomba mwamene atumiki a Yehova akokondana ngako koma soti kukatizhyana kupambana mwakucitila masiku ŵano. (Akol. 3:14) Kalongosi muyakine efotokoza zecizindikila  ponena za Mboni za Yehova pecikumana nao kwa nthawi yoyamba. Eciti: “Nenzoziŵa lini mwaningankhalile wosangalala olo m’banja mwangu. Nthawi yoyamba peneona ŵanthu ooneshana cikondi, yenze nthawi penekumana na a Mboni za Yehova.” Aliyense wamene ofuna kunkhala na cimwemwe cenecene koma soti wokhutila, ofunika kuloŵa m’paladaiso wasu wauzimu. Mosasamala kanthu kuti ŵanthu oŵaona tyani a Mboni za Yehova, ove ali na Yehova koma soti banja yake yokatizhyana.—Yes. 65:15.

9. Kansi Yesaya 65:​16, 17 yulonjezanji ponena za vinthu vamene vucitisha kuti tikokumana na mavuto?

⁹ Ni odekha. Lemba ya Yesaya 65:14 yulaŵila kuti ŵala amene opitilizhya kusankha kunkhala kunja kwa paladaiso wauzimu, ‘olila cifukwa coŵaŵiwa mtima koma soti cifukwa covutika maganizo.’ Koma tyani za vinthu vamene vankhala vucitisha atumiki a Mulungu kukumana na mavuto? Vinthu ivi vikaluŵike ndipo ‘vikafisiwe na colinga cakuti asakavione soti.’ (Ŵelengani Yesaya 65:​16, 17.) Yehova akacosepo mavuto ŵasu ndipo tikokumbukila lini olo mwetenzomvwila cifukwa ca mavuto aŵa.

10. Ndaŵa yanji muona kuti ni daliso kunkhala na akwasu na azilongosi acikhristu? (Onani soti cithunzithunzi.)

¹⁰ N’zolimbikisha ngako kuti olo pali lomba tunkhala odekha tikankhala pa misonkhano yacikhristu, pamene tuika lini maganizo ŵasu pa vinthu va m’calo vamene vuticitisha nkhaŵa. Tuyavya soti akwasu na azilongosi kunkhala odekha ngati tuonesha cikondi, cimwemwe, mtendele, kuwama mtima na kufasa yamene ni minkhalidwe ya mzimu utuŵa. (Agal. 5:​22, 23) Ni daliso ikulu ngako kuli seo kunkhala m’gulu ya Mulungu. Ŵala ati apitilizhye kunkhala m’paladaiso wauzimu, akaone kukwanilishiwa kwa lonjezo ya Mulungu yokhuza “kululu kwalomba na calo calomba.”

11. Molingana na Yesaya 65:​18, 19, kansi paladaiso wauzimu wecipanga Yehova ufunika kutikhuza tyani?

¹¹ Ni oyamikila koma soti osangalala. Yesaya epitilizhya kufotokoza cifukwa cake tufunika ‘kusangalala’ m’paladaiso wauzimu. Yehova niye ekonza malo aŵa ophiphilisila. (Ŵelengani Yesaya 65:​18, 19.) Niye cifukwa cake n’zosadabwisa kuti yove otiseŵenzesha pofuna kuyavya ŵanthu kufuma m’tumabungwe twa m’calo ici mwamene ophunzisiwa lini cendi cokhuza yove. Colinga cake ni kuŵayavya kuti awele m’paladaiso wophiphilisila. Tusangalala ngako na madaliso yatupeza cifukwa conkhala m’cendi. Izi zutisonkhezela kuuzhyako ayakine zokhuza cendi ici.—Yer. 31:12.

12. Kansi malonjezo ofotokozewa pa Yesaya 65:​20-24 okupangishani kumvwa tyani, ndipo ndaŵa yanji?

¹² Tuyamikila soti ndipo nise osangalala na  ciyembekezo catili naco cifukwa conkhala pa ushamwali wotang’a na Yehova. Ganizilani zinthu zonse zati tikoona nocita m’calo calomba. Baibo yulonjeza kuti: “Kukankhale lini soti lucece wamene akonkhala na moyo masiku atontho, olo munthu wacikulile wamene akokwanisha lini vyaka vamene munthu ofunika kunkhala na moyo.” ‘Tikomanga mang’anda nonkhalamo ndipo tikokomola minda ya mpesa na kulya votwala vake.’ ‘Tikokata lini nchito mwakhama patyala’ cifukwa tikankhale “ŵanthu odalisiwa na Yehova.” Yove otilonjeza kuti tikankhale na umoyo wabwino koma soti watanthauzo. ‘Olo tikaliyomuita,’ akoziŵa zatufunikila aliyense payeka ndipo “akakwanilishe zolakalaka za camoyo ciliconse.”—Yes. 65:​20-24; Sal. 145:16.

13. Kansi Yesaya 65:25 yufotokoza tyani masinthidwe yakupanga ŵanthu mu umoyo wao ngati ayamba kutumikila Yehova?

¹³ Ni amtendele koma soti otetezeka. Moyavyiwa na mzimu wa Mulungu, ayakine amene poyamba enze na minkhalidwe iipa apanga masinthidwe akulu ngako mu umoyo wao. (Ŵelengani Yesaya 65:25.) Ove ayesayesa mwakhama kuti aleke minkhalidwe iipa. (Aro. 12:2; Aef. 4:​22-24) Monga atumiki a Mulungu, tiliye mphela ungwilo. Tetyo tipitilizhye kulakwisa zinthu. Olo n’tetyo, Yehova waleta pamozi ‘ŵanthu a mitundu yonse’ amene omukonda nokondana, zamene zacitisha kuti akonkhala mwamtendele koma soti mokatizhyana. (Tito 2:11) Ici ni cozizwisa camene ni Mulungu tyala angakwanishe kucicita.

14. Kansi lemba ya Yesaya 65:25 yekwanilishiwa tyani kuli mkwasu muyakine?

¹⁴ Kansi n’zokwanishika kuti ŵanthu acinje umunthu wao? Ganizilani cocitika ici. Wacilumbwana muyakine eikiwa m’jele mowelezhyawelezhya apo n’kuti ali na vyaka 20 cifukwa ca minkhalidwe yake iipa. Yove enze emangiwa cifukwa coiŵa motoka koma soti cifukwa cocita milandu iyakine ikulu-ikulu. Kuyangizhyila apo, enze wokonzeka kuniatana na munthu aliyense. Koma kwa nthawi yoyamba peecimvwa cendi cupezeka m’Mau a Mulungu Baibo, eyamba kupezeka pa misonkhano ya Mboni za Yehova ndipo enze wosimikizhya kuti wapeza umoyo watanthauzo wamene ni kulambila Yehova m’paladaiso wauzimu. Pavuli pakuti wabatizika nonkhala Mboni ya Yehova, nthawi zinyinji enzoganizila mwamene lemba ya Yesaya 65:25 yenzokatila nchito pali yove. Tetyo, ecinja minkhalidwe yake, eleka kunkhala munthu muipa ndipo enkhala munthu wamtendele.

15. Ndaŵa yanji tufuna kuyavya ayakine kuti awele m’paladaiso wauzimu, ndipo tingacite tyani izi?

¹⁵ Lemba ya Yesaya 65:13 yuyamba na mau akuti: “Yehova Asikulu Mkulu Ngako walaŵila kuti.” Vesi 25 yusila na mau akuti “walaŵila tetyo Yehova.” Malonjezo ŵake okwanilishiwa nthawi zonse. (Yes. 55:​10, 11) Ndipo paladaiso wauzimu aliko cendi masiku ŵano. Yehova ali na banja yapadela. Cifukwa cakuti tili mbali ya banja iyi, tusangalala kunkhala mwamtendele nokumvwa kuti nise otetezeka m’calo ici ciipa. (Sal. 72:7) Cifukwa ca izi, tufuna kuyavya ŵanthu anyinji mwatingakwanishile kuti nao ankhale mbali ya banja iyi. Ndipo tingacite izi mwa kuika maganizo ŵasu pa nchito yopanga ophunzila.—Mat. 28:​19, 20.

MWATINGAYAVYILE AYAKINE KUTI AWELE M’PALADAISO WAUZIMU

16. N’cinji cingasonkhezele ŵanthu kuti awele m’paladaiso wauzimu?

¹⁶ Aliyense wa seo ali na mbali yofunika ngako yakufunika kucita pofuna kuyavya ŵanthu kuona kuti paladaiso wauzimu ni wokongola. Tingakwanishe kucita izi ngati tutolela cisanzo ca Yehova. Yove okakamizhya lini ŵanthu kunkhala mbali ya banja yake. M’malo  mwake, “odonsa” ŵanthu aŵa mwacikondi kuti avwendele pafupi na yove. (Yoh. 6:44; Yer. 31:3) Ŵanthu acidwi amene ophunzila za cikondi ca Yehova na minkhalidwe yake iweme, osonkhezelewa kuvwendela pafupi na yove. Koma kansi tingayavye tyani ayakine kuwela m’paladaiso wauzimu kupitila m’minkhalidwe yasu iweme?

17. Kansi tingayavye tyani ayakine kuona kuti paladaiso wauzimu ni wokongola?

¹⁷ Njila imozi mwatingayavyile ayakine kuona kuti paladaiso wauzimu ni wokongola, ni mwa kucita zinthu m’njila yacikondi koma soti yacifundo na olambila ayasu. Ngati ŵanthu acidwi apezeka pa misonkhano yasu, tufuna kuti akokumvwa monga ni mweenzomvwila ŵanthu osakhulupilila a m’nthawi zakale amene enzopezeka pa misonkhano ya Akhristu a ku Korinto. Ove elaŵila kuti: “N’cendi, Mulungu ali pakati panu.” (1 Akor. 14:​24, 25; Zek. 8:23) Tetyo, tufunika kupitilizhya kumvwila malangizo akuti “mukonkhala mwamtendele pakati panu.”—1 Ates. 5:13.

18. Kansi n’cinji cingayavye ayakine kuwela m’gulu yasu?

¹⁸ Nthawi zonse mukoyesayesa kuona akwasu na azilongosi monga ni mwakuŵaonela Yehova. Tingacite izi mwa kuika maganizo ŵasu pa zinthu zakucita bwino, osati pa kusoŵa ungwilo kwao kwamene lombapano kusile. Ngati pankhala kusamvwishishana, tingakwanishe kusilizhya vuto ngati tucita zinthu ‘mowamilana mtima, kuoneshana cifundo cikulu nokhululukilana na mtima wonse.’ (Aef. 4:32) Ngati tucita izi, niye kuti ŵanthu amene nao ofuna kucita nao zinthu m’njila iyi yacikondi asonkhezelewe kunkhala mbali ya banja yauzimu. b

 PITILIZHYANI KUNKHALA M’PALADAISO WAUZIMU

19. (a) Monga ni mwakooneshela kabokosi kakuti “ Eluta Nowelela,” kansi ayakine elaŵilanji pavuli powelela m’paladaiso wauzimu? (b) Kansi tufunika kunkhala ofunishisha kucita cinji? (Onani soti cithunzithunzi.)

¹⁹ Tuyamikila ngako kuti tili m’paladaiso wauzimu. Ni wokongola ngako kupambana kale ndipo muli atumiki a Yehova anyinji kupambana kale. Nise ofunishisha kupitilizhya kuyamikila paladaiso waatikonzela Yehova. Munthu aliyense wamene ofuna kusisimuliwa, kunkhala wokhutila, wodekha koma soti wotetezeka, ofunika kuwela m’paladaiso wauzimu nonkhala wofunishisha kusalola ciliconse kumupangisha kuti afumemo. Olo n’tetyo, tufunika kunkhala osamala ngako cifukwa Satana ocita zonse zaangakwanishe kuti atipangishe kufumamo. (1 Pet. 5:8; Chiv. 12:9) Tufunika lini kumulola kuti apambane. Tetyo, tiyeni tikoseŵenza mwakhama kuti titeteze kukongola na mtendele wa paladaiso wauzimu na colinga cakuti upitilizhye kunkhala wokongola.