Kansi Muziŵa?
Ndaŵa yanji analume amene enze lini Aisiraeli enzotumikila pa gulu ya masoja a Mfumu Davide?
PA GULU ya masoja a Mfumu Davide penze masoja amene enze lini Aisiraeli. Mwacisanzo, penze analume monga Zeleki Muamoni, Uriya Muhiti na Itima M’moabu. a (1 Mbi. 11:39, 41, 46) Masoja a Davide enzoyangizhyilapo soti “Akereti, Apeleti na Agiti.” (2 Sam. 15:18) Cuoneka kuti Akereti na Apeleti enze pa ukwao na Afilisiti. (Ezek. 25:16) Kuyangizhyila apo, Agiti efumila mumzinda wa Afilisiti wa Gaza.—Yos. 13:2, 3; 1 Sam. 6:17, 18.
Ndaŵa yanji Davide elola ŵanthu aŵa kunkhala masoja ŵake? Yove enze na cidalilo cakuti ŵanthu aŵa enze okhulupilika kwa yove, koma makamaka kwa Yehova. Mwacisanzo, ponena za Akereti na Apeleti, buku iyakine yakuti The New Interpreter’s Dictionary of the Bible, yefotokoza kuti: “Ŵanthu aŵa epitilizhya kunkhala okhulupilika kwa Davide pa nthawi yovuta ngako ya ulamulilo wake.” Motyani? “Ŵanthu onse a Isiraeli” pecimuthaŵa Mfumu Davide noyamba kukonkha “munthu watyalatyala wa zina yakuti Sheba,” Akereti na Apeleti epitilizhya kunkhala okhulupilika kwa Davide nomuyavya kukangisha zolinga ziipa za Sheba. (2 Sam. 20:1, 2, 7) Pa cocitika ciyakine, mwana wa Mfumu Davide Adoniya eyesa kuziika kunkhala mfumu m’malo mwa Solomo. Apa soti, Akereti na Apeleti epitilizhya kunkhala okhulupilika kwa Davide nomuyavya kuika Solomo kunkhala mfumu yokonkhapo cifukwa niye wecisankha Yehova.—1 Maf. 1:24-27, 38, 39.
Munthu muyakine wamene enze lini Mwiisiraeli koma enkhala wokhulupilika kwa Davide, enze Itai Mgiti. Itai na masoja ŵake 600, ecilikiza Mfumu Davide pamene mwana wake Abisalomo em’pandukila nocitisha analume ayakine Aciisiraeli kuti am’pandukile. Davide euzhya Itai kuti cifukwa cakuti enze lini Mwiisiraeli, enzofunika lini kumuyavya. Koma Itai elaŵila kuti: “Nulumbila m’zina ya Yehova Mulungu wa moyo koma soti asikulu ŵangu mfumu muli apa, kulikonse kwati mulute mweo, neo mtumiki wanu nilute namwe ndipo n’ne wokonzeka olo kufwila namwe pamozi.”—2 Sam. 15:6, 18-21.
Itai enze wokhulupilika kwa Davide, wamene enze Mfumu yozozewa ya Yehova
Olo kuti Akereti, Apeleti na Agiti enze lini Aisiraeli, enzolemekeza Yehova monga Mulungu wacendi koma soti Davide monga wozozewa wa Mulungu. Kulaŵila cendi, Davide eyamikila ngako kunkhala na analume aŵa okhulupilika.
a Lamulo ya Mulungu yupezeka pa Deuteronomo 23:3-6 yenzolesha Aamoni na Amoabu kuloŵa mumpingo wa Aisiraeli. Olo n’tetyo, cuoneka kuti lamulo iyi yenzolola ŵanthu amene enze lini Aisiraeli kuti akokatizhyana na atumiki a Mulungu. Koma yenzoŵalesha kuti acinje unzika wao nonkhala Aisiraeli ŵeneŵene nopasiwa ufulu wonse. Onani buku ya m’Cizungu yakuti Insight on the Scriptures, Volume 1, peji 95.
