1. Kansi atumiki a Yehova a m’vyaka 100 voyambilila enzosogolelewa tyani?

 NTHAWI zonse Yehova akapasa ŵanthu ŵake nchito, oyembekezela kuti ove akoicita mwadongosolo. (1 Akor. 14:33) Mwacisanzo, cifunilo ca Mulungu n’cakuti uthenga uweme ulalikiwe pacalo conse. (Mat. 24:14) Yehova wapasa Yesu udindo wosogolela pa nchito iyi. Ndipo Yesu ooneshesha kuti nchito iyi yucitika mwadongosolo. M’vyaka 100 voyambilila mipingo peyenkhazikishiwa m’malo osiyanasiyana, akulu esankhiwa kuti akopeleka malangizo nosogolela. (Mac. 14:23) Ku Yerusalemu, bungwe ya akulu yenzoyangizhyilapo atumwi na akulu. Ove niye enzopanga zosankha ziyakine zamene mipingo yonse yenzofunika kukonkha. (Mac. 15:2; 16:4) Cifukwa cakuti enzokonkha malangizo ŵeenzopasiwa, “ŵanthu m’mipingo epitilizhya kunkhala na cikhulupililo cotang’a ndipo ciŵelengelo cenzoyangizhyilika siku na siku.”—Mac. 16:5.

2. Kuyambila mu 1919, kansi Yehova wankhala oyavya tyani ŵanthu ŵake kucita zinthu mwadongosolo noŵapasa cakulya cauzimu?

² Yehova opitilizhya kuyavya ŵanthu ŵake kuti akocita zinthu mwadongosolo olo masiku ŵano. Kuyambila mu 1919, Yesu wankhala oseŵenzesha kagulu katontho ka analume ozozewa posogolela pa nchito yolalikila nopeleka cakulya cauzimu kuli okonkha ŵake, pa nthawi yoyenela. a (Luka 12:42) Mosakaikila,  Yehova odalisa nchito ya kagulu aka.—Yes. 60:22; 65:​13, 14.

3-4. (a) Fotokozani cisanzo cuonesha mwatupindulila cifukwa conkhala na dongosolo. (b) Kansi tilaŵizhyane cinji m’nkhani ino?

³ Kuti penzeve dongosolo, sembe tukwanisha lini kukata nchito yecitipasa Yesu. (Mat. 28:​19, 20) Mwacisanzo, kuti kwenzeve makonzedwe yonkhala na magao, sembe aliyense olalikila kulikonse kwakufuna. Izi sembe zucitisha kuti magao ayakine akolalikiliwa mowelezhyawelezhya na ofalisa osiyanasiyana, pamene magao ayakine sembe olalikiliwa lini. Kansi tupindula soti tyani cifukwa cosogolelewa mwadongosolo?

⁴ Zecicita Yesu peenze pacalo ni cisanzo cabwino ngako coonesha mwamene yove oyavyila atumiki a Mulungu kucita zinthu mwadongosolo masiku ŵano. M’nkhani ino, tilaŵizhyane cisanzo cecitisiila Yesu na mwamene gulu yasu yutolela cisanzo cake. Tilaŵizhyane soti mwatingaoneshele kuti tudalila gulu ya Yehova.

GULU YASU YUKONKHA CISANZO CA YESU

5. Ni m’njila imozi yotyani yatingatolele cisanzo ca Yesu? (Yohane 8:28)

⁵ Yesu ephunzila kufumila kuli Ausuwake zakufunika kucita nolaŵila. Gulu ya Yehova yukonkha cisanzo ca Yesu mwa kuseŵenzesha Mau a Mulungu kuti itiyavye kuziŵa coyenela na cosayenela, notipasa malangizo amene angatiyavye pa umoyo wasu. (Ŵelengani Yohane 8:28; 2 Tim. 3:​16, 17) Kanyinji-kanyinji, tulandila malangizo akuti tufunika kuŵelenga noseŵenzesha Mau a Mulungu. Kansi tupindula tyani cifukwa cokonkha malangizo aŵa?

6. Ni m’njila imozi yotyani yofunika ngako mwatupindulila cifukwa cophunzila Baibo?

⁶ Tupindula ngako ngati tuseŵenzesha zofalisa zasu pophunzila Baibo. Mwacisanzo, tukwanisha kulinganizhya zayuphunzisa Baibo na malangizo yatulandila kufumila ku gulu yasu. Ndipo tikaona kuti malangizo ŵatulandila ni ozikiwa pa Malemba, cidalilo casu pa gulu ya Yehova cukula.—Aro. 12:2.

7. Kansi Yesu enzolalikila uthenga wotyani, ndipo gulu ya Yehova yutolela tyani cisanzo cake?

⁷ Yesu enzolalikila “uthenga uweme wa Ufumu wa Mulungu.” (Luka 4:​43, 44) Kuyangizhyila apo, elamula ophunzila ŵake kuti akolalikila uthenga wa Ufumu. (Luka 9:​1, 2; 10:​8, 9) Masiku ŵano, ŵanthu onse amene okatizhyana na gulu ya Mulungu, olalikila uthenga wa Ufumu mosasamala kanthu kuti onkhala kuni olo ali na udindo wotyani.

8. Kansi tili na mwai ukulu wotyani?

⁸ Ni mwai ukulu ngako kuuzhyako ayakine cendi cokhuza Ufumu wa Mulungu. Zili teti cifukwa ni ŵanthu lini onse amene ali na mwai uyu. Mwacisanzo, Yesu peenze pacalo, aliyolole ŵanthu amene enze na viŵanda kulaŵila zokhuza yove. (Luka 4:41) Masiku ŵano, kuti munthu ayambe kutolamo mbali m’nchito yolalikila pamozi na atumiki a Yehova, ofunika kukwanilisha ziyeneleso. Tuonesha kuti tuyamikila mwai uyu mwa kuuzhyako ayakine za Ufumu wa Mulungu kulikonse kwatingankhale koma soti pa nthawi iliyonse. Molingana na Yesu, colinga casu ni kukomola notilila mbeu za cendi ca Ufumu m’mitima ya ŵanthu.—Mat. 13:​3, 23; 1 Akor. 3:6.

9. Kansi gulu ya Yehova yuziŵikisha tyani zina ya Mulungu?

⁹ Yesu eziŵikisha zina ya Mulungu. Yove epemphela kuli Ausuwake akululu kuti: “Neo nacitisha kuti ove aziŵe zina yanu.” (Yoh. 17:26) Molingana na cisanzo ca Yesu, gulu ya Yehova yucita zonse zaingakwanishe kuti iyavye ayakine kuziŵa zina ya Mulungu. Njila imozi mwamene gulu yasu yacitila izi ni kupitila mu Baibulo la Dziko Latsopano la Malemba Opatulika. M’Baibo iyi, zina ya Mulungu  yewezhyeleshewa m’malo ŵake oyenelela kulingana na mweyenzele poyamba m’vilaŵilo veseŵenzeshewa poilemba. Lomba, Baibo iyi yupezeka yonse olo mbali yake m’vilaŵilo vopitilila 270. Mu Zakumapeto A4 na A5 m’Baibo ya Chichewa, mungaphunzilemo zinyinji zokhuza cifukwa cake koma soti mwamene zina ya Mulungu yewezhyeleshewamo. Appendix C yamene yupezeka m’Baibo Yophunzilila ya Cizungu, yuonesha umboni wakuti zina ya Mulungu yufunika kupezeka m’Malemba Acigiliki Acikhristu maulwendo 237.

10. Kansi mwaphunzilapo cinji pa mau yecilaŵila munakazi muyakine wa ku Myanmar?

¹⁰ Molingana na Yesu, nase tufuna kuyavya ŵanthu anyinji kuti aziŵe zina ya Mulungu. Munakazi muyakine wa ku Myanmar wamene ali na vyaka 67, elila peciphunzila kuti Mulungu ali na zina, ndipo elaŵila kuti: “Iyi ni nthawi yoyamba mu umoyo wangu kuziŵa kuti zina ya Mulungu ni Yehova. . . . Mwaniphunzisa cinthu cofunika ngako.” Cisanzo ici cuonesha kuti kuphunzila zina ya Mulungu kungakhuze ngako ŵanthu acidwi ndipo kungacinje umoyo wao.

PITILIZHYANI KUONESHA KUTI MUDALILA GULU YA YEHOVA

11. Kansi akulu angaoneshe tyani kuti odalila gulu ya Yehova? (Onani soti cithunzithunzi.)

¹¹ Kansi ni njila imozi yotyani yaangaoneshelemo akulu kuti odalila gulu ya Mulungu? Akalandila malangizo, ofunika kuyaŵelenga mosamala nocita zonse zaangakwanishe kuti ayakonkhe. Mwacisanzo, akulu olandila malangizo osati tyala yokhuza mwaangacitile mbali zosiyanasiyana za pa misonkhano na mwaangapelekele mapemphelo pa misonkhano, koma olandila soti malangizo okhuza mwaangasamalilile mbelele za Khristu. Ngati akulu okonkha malangizo onse ofumila ku gulu, ocitisha kuti akwasu na azilongosi akokumvwa kuti Yehova oŵakonda noŵasamalila.

12. (a) Ndaŵa yanji tufunika kumvwila nogonjela ŵanthu otisogolela? (Aheberi 13:​7, 17) (b) Ndaŵa yanji tufunika kuika maganizo ŵasu pa vinthu vakucita bwino ŵala amene otisogolela?

¹² Ngati talandila malangizo kufumila kuli akulu, tufunika kuŵakonkha mofunishisha. Ngati tucita izi, tucitisha kuti cinkhale cosavuta kuli analume aŵa kucita nchito yao. Baibo yutilimbikisha kuti tikomvwila nogonjela amene otisogolela. (Ŵelengani Aheberi 13:​7, 17.) Koma kucita izi, nthawi ziyakine kungankhale kovuta. Ndaŵa yanji? N’cifukwa cakuti analume aŵa nao aliye ungwilo. Tetyo, ngati tuika maganizo ŵasu pa vinthu vakulakwisa m’malo moika maganizo ŵasu pa vinthu vakucita bwino, tingoyavya adani ŵasu. Ndaŵa yanji talaŵila teti? Adani ŵasu ofuna kutipangisha kuti tikokaikila kuti Mulungu oseŵenzesha cendi gulu iyi potisogolela. Tetyo, ngati nthawi zonse tingoika maganizo ŵasu pa vinthu vakulakwisa akulu, tingayambe kuona gulu yasu molakwika ndipo tingaleke kuidalila. Lomba n’cinji cingatiyavye kuti tikozindikila nopewa kusoŵeshewa na wenye wakulaŵila adani ŵasu?

MUSALOLE KUTI AYAKINE AKUPANGISHENI KULEKA KUDALILA GULU YA YEHOVA

13. Kansi adani a Mulungu ocitisha tyani kuti gulu yake ioneke monga niipa?

¹³ Adani a Mulungu oyesa kupangisha kuti vinthu viweme vayucita gulu yasu, vikooneka monga ni viipa. Mwacisanzo, tuphunzila kufumila m’Malemba kuti Yehova ofuna kuti tikopitilizhya kunkhala atuŵa mwamuŵili na mwauzimu. Kuyangizhyila apo, otiuzhya kuti munthu aliyense wamene opitilizhya kucita vinthu viipa ndipo ofuna lini kulapa, ofunika lini kupitilizhya kunkhala mbali ya mpingo. (1 Akor. 5:​11-13; 6:​9, 10) Tumvwila lamulo iyi ya  m’Malemba. Koma izi zucitisha adani a Mulungu kutinena kuti tili na sankho, tukonda lini ŵanthu na kuti tukonda kuweluza ayakine.

14. Ni ŵani makamaka wamene olimbikisha wenye wokhuza gulu ya Mulungu?

¹⁴ Mukomvwisha kuti ni ŵani makamaka oukila gulu ya Mulungu. Satana Maleŵania niye olimbikisha wenye wokhuza gulu yasu. Yove ni “tata wa wenye.” (Yoh. 8:44; Gen. 3:​1-5) Tetyo, tingayembekezele Satana kuseŵenzesha ŵanthu amene ali ku mbali yake polimbikisha nkhani zawenye zokhuza gulu ya Yehova. Umboni wa izi tuupeza tikaona zecitika m’vyaka 100 voyambilila.

15. Kansi asogoleli a cipembezo ecitanji kuli Yesu na ophunzila ŵake?

¹⁵ Olo kuti Mwana wa Mulungu Yesu, enze wangwilo ndipo ecita zozizwisa zinyinji, Satana eseŵenzesha ŵanthu ayakine kufalisa nkhani zawenye zokhuza yove. Mwacisanzo, asogoleli a cipembezo euzhya ŵanthu kuti mphamvu zeenze nazo Yesu zocosa viŵanda, emupasa ni “wolamulila viŵanda.” (Mko. 3:22) Yesu peenzoweluziwa, asogoleli a cipembezo emunamizhyila kuti enzonyoza Mulungu ndipo esonkhezela ŵanthu kuti amupaye. (Mat. 27:20) Pavuli pake, ophunzila a Khristu peenzolalikila uthenga uweme, ŵala amene enzoŵasusha “euzhya ŵanthu zinthu ziipa” na colinga cakuti anzunze Akhristu aŵa. (Mac. 14:​2, 19) Ponena za lemba ya Machitidwe 14:​2, Nsanja ya Olonda ya December 1, 1998, yefotokoza kuti: “Ŵala amene enzocilikiza Satana ekana uthenga weenzolalikila Akhristu ndipo enzolaŵila vinthu viipa vokhuza ove na colinga cakuti ŵanthu asaŵamvwishile na kuti aŵazonde.”

16. Kansi tufunika kukumbukila cinji ngati tamvwa nkhani zawenye?

¹⁶ Satana aliyoleke kutala wenye m’vyaka 100 voyambilila. Olo masiku ŵano,  akalupitilizhya ‘kusoŵesha ŵanthu pacalo conse.’ (Chiv. 12:9) Ngati mwamvwa nkhani zawenye zokhuza gulu yasu olo akwasu amene osogolela, mukokumbukila mwamene adani a Mulungu ecitila zinthu na Yesu koma soti ophunzila ŵake a m’vyaka 100 voyambilila. Yesu elosela kuti ŵanthu akosusha ŵala amene otumikila Yehova noŵalaŵilila vinthu vawenye. Izi niye zucitika masiku ŵano. (Mat. 5:​11, 12) Tetyo, tikosoŵeshewa lini na nkhani zawenye ngati tuzindikila kwazufumila nocitapo kanthu nthawi yamene iyo. Kansi tingaziteteze tyani?

17. Tingacitenji kuti tisasoŵeshewe na nkhani zawenye? (2 Timoteyo 1:13) (Onani soti kabokosi kakuti “ Zatufunika Kucita Tikamvwa Nkhani Zawenye.”)

¹⁷ Mukopewa kumvwishila nkhani zawenye. Mtumwi Paulo epeleka malangizo omvwika bwino okhuza zatufunika kucita ngati tamvwa nkhani zawenye. Euzhya Timoteyo kuti “aleshe ŵanthu ayakine. . . kumvwishila ku nkhani zawenye” nopewa nkhani zoteti. (1 Tim. 1:​3, 4; 4:7) Ganizilani cisanzo ici. Mwana angadobe cinthu ciliconse ca lito noika mkamwa. Koma munthu mkulu angacite lini izi cifukwa oziŵa kuti kucita izi kungamulwalike. Molingana na izi, tupewa nkhani zawenye cifukwa tuziŵa kwazufumila. M’malo momvwishila ku nkhani zoteti, tumvwishila ku “mau olondola” a cendi.—Ŵelengani 2 Timoteyo 1:13.

18. Kansi tingaoneshe tyani kuti tudalila gulu ya Yehova?

¹⁸ M’nkhani ino, talaŵizhyana tyala zitatu mwa njila zamene gulu ya Mulungu yutolela cisanzo ca Yesu. Pamuphunzila Baibo, mukoyesa kupeza njila ziyakine mwamene gulu ya Mulungu yutolela cisanzo ca Yesu. Ndipo mukoyesa kuyavya ŵanthu ayakine mumpingo mwanu kutang’isha cidalilo cao pa gulu iyi. Kuyangizhyila apo, pitilizhyani kuonesha cidalilo canu mwa kutumikila Yehova mokhulupilika nokatizhyana na gulu yakuseŵenzesha pokwanilisha cifunilo cake. (Sal. 37:28) Tetyo, tiyeni tipitilizhye kuyamikila mwai wonkhala mbali ya gulu ya Yehova mwamene muli ŵanthu acikondi koma soti okhulupilika.