Nevyalika mu 1955, ndipo n’ne mwana wosilizhyila m’banja ya ŵana atatu. Nekulila kufupi na kum’mwela kwa Finland, ku malo amene lomba oitiwa kuti Vantaa.

Amama ebatizika nonkhala Mboni ya Yehova, vyaka vitontho nikaliyovyalika. Olo n’tetyo, atata enzosusha cendi ndipo enzolola lini amama kutiphunzisa Baibo olo kuluta nase ku misonkhano. Tetyo, amama enzotiphunzisa viphunziso voyambilila va m’Baibo atata akafumapo.

Kufumila penenze mwana, nenzofuna lini kukhumudwisha Yehova. Mwacisanzo, penenze na vyaka 7, atica ŵangu enikalipila ngako penekana kulya vakulya voitiwa kuti verilättyjä, vamene ni tumakeke tweenzoikako milopa popanga. Pofuna kunikakamizhya kuti nilye, ove enifyantha mbovu na colinga cakuti nisegule pakamwa. Koma mwa mwai wanji, nekwanisha kuŵataisha foloko.

Penenze na vyaka 12, atata emwalila. Tetyo, neyamba kupezeka pa misonkhano ya mpingo. Akwasu a mumpingo uyu enionesha cidwi cikulu ngako. Izi zecitisha kuti nilute pasogolo mwauzimu. Neyamba kuŵelenga Baibo nthawi zonse nophunzila zofalisa zasu mwakhama. Izi zenisonkhezela kuti nibatizike ndipo nebatizika nili na vyaka 14, pa August 8, 1969.

Nthawi itontho pavuli pakuti nasilizhya sukulu, neyamba kucita upainiya wanthawi zonse. Pavuli  pa mawiki atontho, neluta kuyotumikila ku malo kufunika a nchito anyinji ku Pielavesi, kufupi na pakati pa Finland.

Ku Pielavesi, nekumana na msimbi wa zina yakuti Sirkka wamene enkhala mkazi wangu wokondeka. Nemukonda ngako cifukwa ca nkhalidwe yake yolicefya koma soti kukonda ngako Yehova. Yove enze na umoyo wosalila zinyinji. Tonse aŵili, tenzofuna kutumikila Yehova monga ni mwatingakwanishile mosasamala kanthu za utumiki watingapasiwe. Telungulana pa March 23, 1974. Ndipo m’malo moluta ku hanimuni, teluta kuyotumikila ku Karttula kwamene kwenzofunikila anchito anyinji.

Kufumila tyala pa ciyambi pa cikwati casu, Yehova waonesha kuti akotisamalila ngati taika Ufumu wake pasogolo mu umoyo wasu. (Mat. 6:33) Mwacisanzo, ku Karttula tenzeve motoka ndipo tenzoyenda na njinga. Olo n’tetyo, nthawi ya mphepo kwenzozizila ngako. Tetyo kuti tikwanishe kulalikila ku magao akutali a mpingo wasu, tenzofunikila motoka. Koma, tenzeve ndalama zogulila motoka.

Mosayembekezeleka, mkulu wangu ewela kuzotiona. Yove etipasa motoka yake ndipo motoka iyi yenze yolipila kale inshuwalansi. Tetyo seo tenzofunika kugula tyala mafuta. Izi zecitisha kuti tinkhale na motoka yetenzofunikila.

Yehova eonesha kuti yove watola udindo wotisamalila mwamuŵili. Ndipo nchito yasu yenze tyala kuika cifunilo cake pasogolo mu umoyo wasu.

Petenzocita Sukulu ya Utumiki wa Upainiya mu 1978, mkwasu Raimo Kuokkanen a wamene enze m’mozi mwa alangizi a sukulu iyi, etilimbikisha kuti tikonshele Sukulu ya Giliyadi. Tetyo, teyamba kuphunzila Cizungu na colinga cakuti tiyenelele kuyoloŵa sukulu iyi. Olo n’tetyo, mu 1980, apo n’kuti tikaliyokonshela sukulu iyi, tesengewa kuti tikatumikile ku ofesi ya msambo ku Finland. Pa nthawi iyi, atumiki a pa Beteli enzeve mwai wokonshela sukulu iyi. Koma tenzofunishisha kutumikila kulikonse kwangatitume Yehova osati kwatufuna seo. Tetyo, tevomela ciitano ici. Olo n’tetyo, tepitilizhya kuphunzila Cizungu kucitila kuti payakine mwai woloŵa sukulu iyi ungapezeke msogolo.

 Vyaka vitontho pavuli pake, Bungwe Yolamulila yepeleka mwai kuli atumiki a pa Beteli kuti angakonshele Sukulu ya Giliyadi. Tetyo nthawi yamene iyo tefiling’a mafomu. Tecita izi osati cifukwa cakuti tenzosangalala lini na utumiki wa pa Beteli, koma cifukwa cakuti tenzofunishisha kuyotumikila ku malo kufunika a nchito anyinji ngati tingayenelele. Teitiwa kuti tikaloŵe kilasi ya namba 79 ya Sukulu ya Giliyadi ndipo tesilizhya maphunzilo aŵa mu September 1985. Pavuli pake, tetumiwa kuti tikatumikile ku Colombia.

Ku Colombia, utumiki woyamba wetepasiwa, wenze kutumikila pa ofesi ya msambo. Neyesayesa kucita zonse zaningakwanishe pa utumiki wangu, koma pavuli pa caka cimozi, neona kuti tenzofunika kucinja utumiki. Kwa nthawi yoyamba koma soti yosilizhyila mu umoyo wangu, nesenga kuti anipaseko utumiki uyakine. Pavuli pake, tetumiwa kuti tikatumikile monga amishonale mu mzinda wa Neiva, m’dela ya Huila.

Kufumila kale, nusangalala na nchito yolalikila. Ku Finland, monga mbeta koma soti mpainiya, nthawi ziyakine nenzolalikila kufuma m’mawa mpaka mcingulo. Monga banja yamene yenze yelungulana calombapano, neo na Sirkka tenzocomelela kulalikila. Ngati tuseŵenzela ku madela a kutali, nthawi ziyakine tenzolala m’motoka. Izi zenzotilyela lini nthawi ndipo zenzotiyavya kuti siku yokonkhapo, tiyambe m’mamawa kulalikila.

Monga amishonale, teyamba soti kucita khama pa nchito yolalikila monga ni mwetenzocitila poyamba. Mpingo wasu wekula ndipo akwasu na azilongosi a ku malo aŵa enze aulemu, acikondi koma soti oyamikila.

Pafupi na mzinda wa Neiva kwetenzolalikila, kwenze matauni ayakine mwamene mwenzeve Mboni. Nenzoganizila ngako mwamene uthenga uweme ungafwikile ku malo aŵa. Cifukwa ca ciwawa ceenzocita masoja oukila, malo aŵa enze lini otetezeka kuli ŵanthu amene enze lini nzika. Tetyo, nepemphela kuti munthu muyakine wa ku matauni aŵa aphunzile cendi nonkhala Mboni. Nenzoganiza kuti munthu uyu angafunike kuwela kuzonkhala ku Neiva na colinga cakuti aphunzile cendi. Pavuli pobatizika nokula mwauzimu, angafunike kuwelela kwao kuti akalalikile. Nenzoziŵa lini kuti Yehova enze na njila yabwino ngako yocitilamo izi kupambana yenenzoganizila neo.

Pakaliyopita nthawi itali, neyamba kuphunzila Baibo na wacilumbwana muyakine wa zina yakuti Fernando González. Yove enzonkhala mu mzinda wa Algeciras wamene wenze umozi mwa matauni mwenzeve Mboni. Fernando enzoyenda msenga wopitilila makilomita 50, kuwela ku nchito ku Neiva. Enzokonzekela bwino phunzilo iliyonse ndipo nthawi yamene iyo eyamba kupezeka pa misonkhano yonse. Kuyambila tyala wiki yoyamba yeciyamba kuphunzila Baibo, Fernando enzosonkhanisha ŵanthu a m’tauni mwao na colinga cakuti aŵaphunzise zinthu zeenzophunzila m’Baibo.

Miyezi 6 pavuli pakuti wayamba kuphunzila Baibo, Fernando ebatizika mu January 1990. Pavuli pake, eyamba kucita upainiya wanthawi zonse. Cifukwa cakuti pa nthawi iyi m’tauni ya Algeciras mwenze Mboni imozi, ofesi ya msambo  yeona kuti penze poyenelela kutumizhya apainiya apadela kuti akatumikile ku malo aŵa. Ndipo mu February 1992, mpingo wenkhazikishiwa m’tauni iyi.

Kansi Fernando enzolalikila tyala ku tauni ya kwao? Yai. Pavuli pakuti walungula, yove na mkazi wake eluta ku San Vicente del Caguán yamene ni tauni iyakine mwamene mwenzeve Mboni. Ndipo eyavya kuti m’tauni iyi munkhazikishiwe mpingo. Mu 2002, Fernando eikiwa kunkhala woyanganila dela ndipo yove na mkazi wake Olga, apitilizhya m’nchito yadela mpaka lomba.

Pa cokumana naco ici, nephunzilapo kufunika kopemphelela nkhani zokhuza mautumiki ŵasu mwacindunji. Yehova okwanisha kucita zinthu zamene seo tingakwanishe lini kucita. Ndipo iyi ni nchito yake osati yasu.—Mat. 9:38.

Mu 1990, teyamba kutumikila m’nchito ya dela. Dela yasu yoyamba yenze m’tauni ikulu ya Bogotá. Poyamba, tenze tecita nkhaŵa poganiza kuti payakine tikwanishe lini utumiki uyu. Neo na mkazi wangu tiliye maluso apadela. Ndipo tenze tiliyoyoŵelele kunkhala m’tauni muli ŵanthu anyinji. Olo n’tetyo, Yehova ekwanilisha lonjezo yake yupezeka pa Afilipi 2:13 yakuti: “Mulungu niye okutang’ishani. Okupasani mtima wofuna kucita zinthu zakukonda koma soti mphamvu zocitila zinthu zamene izo.”

Pavuli pake, teyamba kutumikila ku dela ya Medellín, wamene ni mzinda wenenze natomola koyambilila kwa nkhani ino. Ŵanthu a m’tauni iyi enze eyoŵelela ciwawa cenzocitika cakuti enzocita lini wowa olo nkhaŵa. Mwacisanzo, siku iyakine penenzosogoza phunzilo ya Baibo, ŵanthu eyamba kushutana panja. Tetyo, nenze necita wowa ngako cakuti nenzofuna tyala kulala pansi kuti nifisame. Koma wophunzila Baibo wangu epitilizhya kuŵelenga ndime modekha. Pecisilizhya kuŵelenga, eluta panja. Pavuli pa kanthawi katontho, ewela na ŵana aŵili ndipo modekha elaŵila kuti, “Pepani, nenze naluta kuyotola ŵana ŵangu.”

Penze soti nthawi ziyakine pamene moyo wasu wenzonkhala pangozi. Mwacisanzo, pa nthawi iyakine petenzocita ulaliki wa ng’anda na ng’anda, mkazi wangu ewela kuli neo apo n’kuti outuka ndipo enzooneka wa nkhaŵa. Yove elaŵila kuti munthu muyakine wamushuta na mfuti. Necita wowa ngako. Koma pavuli pake, tezindikila kuti munthu uyu aliyoshute Sirkka. M’malo mwake, eshuta munalume muyakine wamene enzoyenda pafupi na yove.

M’kuluta kwa nthawi, teleka kucita nkhaŵa na ciwawa cenzocitika. Telimbikishiwa na Mboni zenzonkhala m’dela iyi zamene nazo zenzokumana na mavuto monga aŵa koma soti opitililapo. Teganiza kuti ngati Yehova enzoŵayavya niye kuti nase atiyavye. Nthawi zonse tenzomvwila malangizo ya akulu a m’dela iyi, tenzonkhala osamala nosiya zonse m’manja mwa Yehova.

Zocitika ziyakine zenzonkhala lini zoyofya ngako monga ni mwetenzoganizila. Mwacisanzo, siku iyakine necimvwa monga kuti azimai aŵili  oyambana kunja kwa ng’anda ya phunzilo yenenzosogoza. Nenzofuna lini kuonelela mkangano uyu koma mwineco wa ng’anda enikakamizhya kuti tikankhale pa malo ayakine panja. Peteluta panja, nezindikila kuti ni azimai lini enzokangana koma ni vinyoni viŵili venzopanga congo.

Mu 1997, nesankhiwa kunkhala mlangizi wa Sukulu Yophunzisa Utumiki. b Nenzoyamikila ngako mwai wopezekako pa masukulu ya m’gulu yasu. Koma niliyoganizileko kuti ningankhale na mwai wonkhala mlangizi.

Pavuli pake, neyamba kutumikila monga woyanganila cigao. Koma makonzedwe aŵa peyesila, newelela soti m’nchito ya dela. Tetyo, kwa vyaka vopitilila 30 nankhala nusangalala kutumikila monga mlangizi koma soti woyanganila dela. Mautumiki aŵa aniyavya kuti nilandile madaliso anyinji. Koma nukumana soti na mavuto. Lekani nifotokoze.

N’ne munthu wotang’a mtima. Nkhalidwe iyi yaniyavya kulimbana na mavuto anyinji. Koma nthawi ziyakine nucita zinthu mopitilila malile pofuna kuongolela zinthu zolakwika m’mipingo. Mwacisanzo, nthawi ziyakine nulimbikisha akwasu na azilongosi mwamphamvu kuti akooneshana cikondi nololelana. Koma m’njila iyakine, neo niye nukangiwa kuonesha minkhalidwe iyi pa nthawi zoteti.—Aro. 7:​21-23.

Cifukwa ca vifooko vangu, nthawi ziyakine nufooka. (Aro. 7:24) Pa nthawi iyakine, neuzhya Yehova m’pemphelo kuti cingankhale bwino kuti nileke utumiki uyu nowelela kwasu ku Finland. Pa siku iyi mcingulo, neluta ku misonkhano. Pa misonkhano iyi, nelandila cilimbikiso cakuti nufunika kupitilizhya kucita utumiki wangu nopitilizhya kuseŵenzela pa vifooko vangu. Mpaka lelo, nikalucita cidwi na mwamene Yehova eyankhila pemphelo yangu. Kuyangizhyila apo, nuyamikila ngako kuti mwacifundo yove waniyavya kulimbana na vifooko vangu.

Neo na Sirkka tuyamikila ngako Yehova potipasa mwai woseŵenzesha mbali ikulu ya moyo wasu pocita utumiki wanthawi zonse. Nuyamikila soti Yehova ponipasa mkazi wacikondi koma soti wokhulupilika.

Lombapano, nikwanishe vyaka 70 ndipo nileke kutumikila monga mlangizi na woyanganila dela. Olo n’tetyo, izi zunikhumudwisha lini. Ndaŵa yanji? N’cifukwa cakuti nuziŵa bwino kuti cofunika ngako ni kutumikila Yehova molicefya nomutamanda na mtima wozula na cikondi na kuyamikila. (Mika 6:8; Mko. 12:​32-34) Kuti titumikile Yehova, tufunika lini kucitonkhala na utumiki wapadela.

Nikaganizila pa mautumiki yanacitako, nuzindikila kuti niliyolandile mautumiki aŵa cifukwa nupambana ayakine olo cifukwa cakuti nili na maluso apadela. M’malo mwake, Yehova enipasa mautumiki aŵa cifukwa ca kuwama mtima kwake. Enipasa mautumiki aŵa mosasamala kanthu za vifooko vangu. Nuziŵa kuti nakwanisha kucita mautumiki aŵa cifukwa ca thandizo yake. Tetyo, vifooko vangu vaonesha kuti Yehova ni wamphamvu ngako.—2 Akor. 12:9.