NKHANI YOPHUNZILA 33
NYIMBO 130 Nkhalani Wokhululukila
Mwamene Mpingo Ungatolele Kaganizidwe ka Yehova Pocita Zinthu na Ŵanthu Amene Ecita Macimo Akulu-Akulu
“Muyakine akacita cimo, tili na wotiyavya.” —1 YOH. 2:1.
ZATI TIPHUNZILE
M’nkhani ino, tiphunzile mwamene mpingo wa ku Korinto wecitila zinthu na munthu wamene enzocita cimo ikulu.
1. Kansi Yehova ofuna kuti ŵanthu onse akocitanji?
YEHOVA etilenga na ufulu wosankha. Nthawi zinyinji tuseŵenzesha ufulu uyu popanga zosankha. Koma cosankha cofunika ngako cangapange munthu ni kuzipeleka kwa Yehova kuti ankhale mbali ya banja yake. Yehova ofuna kuti aliyense acite izi. Ndaŵa yanji? N’cifukwa cakuti okonda ŵanthu ndipo ofuna kuti zinthu zikoŵayendela bwino. Ofuna soti kuti tikonkhala naye pa ushamwali wabwino nonkhala na moyo mpaka kale-kale.—Deut. 30:19, 20; Aga. 6:7, 8.
2. Kansi Yehova ofuna cinji kuli ŵanthu amene akaliyolapa? (1 Yohane 2:1)
2 Yehova okakamizhya lini munthu aliyense kuti akomutumikila. Yove olola aliyense kusankha zaangacite. Nanga tyani ngati Mkhristu wobatizika wacita cimo ikulu? Ngati yove olapa lini, ofunika kucosewa mu mpingo. (1 Akor. 5:13) Olo n’tetyo, Yehova oyembekezela kuti munthu uyu alape nowelela kuli yove. Ici niye cifukwa cikulu camene yove epelekela nsembe ya dipo. Ofuna kuti zinkhale zokwanishika kuti ŵanthu olapa akokhululukiwa. (Ŵelengani 1 Yohane 2:1.) Mwacifundo, Mulungu wasu olimbikisha ŵala amene ecita macimo akulu kuti alape.—Zek. 1:3; Aro. 2:4; Yak. 4:8.
3. Kansi tilaŵizhyane cinji m’nkhani ino?
3 Yehova otiuzhya mwakumvwila pa nkhani yokhuza cimo koma soti ŵala amene ocita macimo akulu-akulu. Ndipo ofuna kuti nase tikokumvwa cimozimozi. Nkhani ino itiyavye kuziŵa mwatingacitile izi. Patuphunzila, tione (1) mwamene mpingo wa ku Korinto wa m’vyaka 100 voyambilila wecitila zinthu na Mkhristu muyakine wamene enzocita cimo ikulu, (2) malangizo yecipeleka Paulo Mkhristu uyu pecilapa, na (3) mwamene nkhani iyi yutiyavyila kuziŵa mwakumvwila Yehova ngati Mkhristu wacita cimo ikulu.
MWAMENE AKHRISTU A M’VYAKA 100 VOYAMBILILA ECITILA ZINTHU NA MKHRISTU MUYAKINE WAMENE ENZOCITA CIMO IKULU
4. N’cinji cecitika mu mpingo wa ku Korinto? (1 Akorinto 5:1, 2)
4 Ŵelengani 1 Akorinto 5:1, 2. Pa ulwendo wake wacitatu waumishonale, Paulo ecimvwa zinthu ziyakine ziipa ngako zamene zenzocitika mu mpingo walomba wa ku Korinto. Mkhristu muyakine mu mpingo uyu enzocita ciwelewele na mkazi wa ausuwake. Olo ŵanthu amene enzotumikila lini Yehova enzoziŵa kuti kucita izi n’kulakwa. Olo n’tetyo, ŵanthu mu mpingo uyu enzoganiza kuti penze tyala bwino Mkhristu wamene enzocita nkhalidwe iyi kupitilizhya kunkhala mu mpingo. Payakine ayakine enzoganiza kuti mwa kucita izi, enzoonesha cikondi monga ni mwakucitila Yehova ku ŵanthu ocimwa. Koma Yehova olola lini ŵanthu ocita zinthu ziipa pakati pa atumiki ŵake. Cifukwa ca zocita ziipa za munthu ula, ŵanthu amene enzotumikila lini Yehova elaŵila zinthu ziipa zokhuza atumiki a Yehova. Ndipo kuti yove enze epitilizhya kunkhala mu mpingo, Akhristu ayakine sembe eyamba kutolela nkhalidwe yake iipa. Lomba kansi Paulo eŵauzhya kuti acite cinji?
5. Kansi Paulo euzhya mpingo kuti ucite cinji, ndipo enzotanthauzanji? (1 Akorinto 5:13) (Onani soti cithunzithunzi.)
5 Ŵelengani 1 Akorinto 5:13. Yehova euzhyila Paulo kulembela kalata mpingo wa ku Korinto. Ndipo efotokoza kuti munthu wosalapa ofunika kucosewa mu mpingo. Kansi Akhristu okhulupilika enzofunika kucita naye tyani zinthu? Paulo eŵauzhya kuti ‘aleke kukatizhyana’ naye. Kansi enzotanthauzanji? Paulo efotokoza kuti lamulo iyi yenzoyangizhyilapo ‘kusalyela naye pamozi.’ (1 Akor. 5:11) Kulyela pamozi na munthu woteti, kungacitishe kuti zinkhale zosavuta kuyamba soti kukatizhyana naye. N’zoonekelatu kuti Paulo etanthauza kuti mpingo wenzofunika lini kukatizhyana naye munthu uyu. Izi zeteteza mpingo kuti usatoleleko nkhalidwe iipa. (1 Akor. 5:5-7) Kuyangizhyila apo, zeyavya munalume uyu kuzindikila kuti ekhumudwisha Yehova na kuti enzofunika kulapa.
Yehova euzhyila mtumwi Paulo kulembela kalata mpingo noŵafotokozela kuti munthu wosalapa ofunika kucosewa mu mpingo (Onani ndime 5)
6. Kansi kalata yecilemba Paulo yekhuza tyani mpingo koma soti munthu wocimwa?
6 Pavuli pakuti watumizhya kalata yake ku mpingo wa ku Korinto, Paulo eyamba kuganizila zati ucite mpingo pavuli poiŵelenga. Posilizhyila pake, Tito eleta uthenga wamene wemusangalasa Paulo. Mpingo weseŵenzesha malangizo yenze m’kalata yake ndipo munthu wocimwa ecosewa mu mpingo. (2 Akor. 7:6, 7) Kuyangizhyila apo, pakaliyopita nthawi itali pavuli pakuti Paulo walemba kalata yake yoyambilila, munalume ula wocimwa elapa. Yove ecinja nkhalidwe yake iipa noyamba kukonkha mfundo zolungama. (2 Akor. 7:8-11) Kansi ni cinthu cokonkhapo cotyani camene Paulo euzhya mpingo kuti ucite?
MWAMENE MPINGO WENZOFUNIKILA KUCITILA ZINTHU NA MKHRISTU WAMENE ELAPA
7. Kansi n’cinji cecitika pavuli pakuti Mkhristu uyu wacosewa mu mpingo? (2 Akorinto 2:5-8)
7 Ŵelengani 2 Akorinto 2:5-8. Paulo elaŵila kuti “kuzuzuliwa na ŵanthu anyinji ni kokwanila kwa munthu uyu.” Izi zutanthauza kuti pavuli pakuti Mkhristu ula wocimwa wacosewa mu mpingo, yove ezindikila kuti enzofunika kulapa. Ndipo cifukwa cakuti elapa, penzeve cifukwa copitilizhyila kumupasa cilango.—Aheb. 12:11.
8. Kansi n’cinji ciyakine camene Paulo euzhya mpingo kuti ucite?
8 Paulo euzhya mpingo kuti: “Mukhululukileni na mtima wonse nomutonthoza” ndipo “mumusimikizhyile kuti mumukonda.” Onani kuti Paulo enzofuna kuti mpingo ucite zinyinji osati tyala kulola munthu uyu kuwelela mu mpingo. Enzofuna kuti mpingo usimikizhyile munthu uyu kupitila m’mau na m’zocita zao kuti emukhululukila cendi na kuti enzomukonda. Kucita izi, kweonesha patuŵa kuti ove esangalala kuti munthu uyu ewelela mu mpingo.
9. Ndaŵa yanji cenze covuta kuli ayakine kuti akhululukile Mkhristu wamene elapa?
9 Payakine cenze covuta kuli ŵanthu ayakine kuti amuoneshe cifundo munthu ula pavuli pakuti wawelela mu mpingo. Ndaŵa yanji talaŵila teti? N’cifukwa cakuti zocita zake zeleta mavuto mu mpingo ndipo payakine zecitisha ayakine kumvwa nsoni. Ŵanthu a mu mpingo uyu enzoseŵenza mwakhama kuti amvwile malamulo a Yehova. Tetyo, payakine eona kuti ni cilungamo lini munthu wamene ecita cimo yoteti, kulolewa kuti awelele soti mu mpingo. (Linganizhyani na Luka 15:28-30.) Lomba, ndaŵa yanji mpingo wenzofunika kuonesha cikondi kuli Mkhristu muyao wamene elapa?
10-11. Kansi sembe n’cinji cecitika kuti akulu enze ekana kukhululukila munthu wamene elapa?
10 Kansi Mkhristu wamene elapa sembe ecimvwa tyani kuti akulu aliyomulole kuwelela mu mpingo pavuli pakuti walapa? Kulaŵila cendi, sembe ekhumudwa nofooka. Payakine sembe eona kuti angankhale lini soti mbali ya mpingo. Kuyangizhyila apo, sembe eganiza kuti Yehova angamukhululukile lini na kuti paliye cifukwa cakuti yove acinjile nkhalidwe yake.
11 Kansi sembe n’cinthu ciyakine cotyani camene cecitika kuti akwasu na azilongosi ekana kumukhululukila munthu uyu wolapa? Kucita izi, sembe kwekhuza ushamwali wao na Yehova. Ndaŵa yanji? N’cifukwa cakuti zocita zao sembe zeonesha kuti otolela lini cisanzo ca Yehova wamene okhululukila ŵanthu olapa. M’malo mwake, sembe zeonesha kuti otolela cisanzo ca Satana wamene aliye cifundo. Sembe zeonesha soti kuti ove olola Satana kuŵaseŵenzesha kuti akangishe munalume uyu kutumikila Yehova.—2 Akor. 2:10, 11; Aef. 4:27.
12. Kansi mpingo wa ku Korinto wenzofunika kucitanji kuti utolele cisanzo ca Yehova?
12 Kansi mpingo wa ku Korinto sembe weonesha tyani kuti utolela cisanzo ca Yehova osati ca Satana? Ni mwa kukhululukila munthu wamene elapa monga ni mwakucitila Yehova. Onani zecifotokoza olemba Baibo ayakine ponena za Yehova. Davide elaŵila kuti: Ni “wabwino ndipo ni wokonzeka kutikhululukila.” (Sal. 86:5) Mika elemba kuti: “Kansi pali Mulungu muyakine wolingana na mweo wamene okhululukila zolakwa?” (Mika 7:18) Naye Yesaya elaŵila kuti: “Munthu muipa asiye njila zake, munthu wocitila ayake ziipa asiye maganizo yake. Awelele kwa Yehova ndipo amucitile cifundo. Awelele kwa Mulungu wasu, cifukwa amukhululukile na mtima wonse.”—Yes. 55:7.
13. Ndaŵa yanji penze poyenela kulola munthu wamene elapa kuti awelele mu mpingo? (Onani kabokosi kakuti “ Kansi ni Lini Pamene Munalume Wamene Enze Ecita Cimo ku Korinto Ewelela mu Mpingo?”)
13 Kuti atolele cisanzo ca Yehova, Akhristu a ku Korinto enzofunika kukhululukila Mkhristu wamene elapa nomuonesha kuti omukonda. Mwa kukonkha malangizo a Paulo yolandila munthu wamene elapa, mpingo wa ku Korinto weonesha kuti wenze “womvwila m’vinthu vonse.” (2 Akor. 2:9) Mosasamala kanthu kuti munthu uyu ecosewa mu mpingo kwa miyezi tyala itontho, yove elapa. Tetyo, penzeve cifukwa cakuti akulu awayewaye kumuwezhya mu mpingo.
MWATINGATOLELE CISANZO CA YEHOVA PA NKHANI YOONESHA CIFUNDO NA CILUNGAMO
14-15. Kansi tingaphunzilenji kufumila pa zecitika mu mpingo wa ku Korinto? (2 Petulo 3:9) (Onani soti cithunzithunzi.)
14 Nkhani yokhuza mwamene mpingo wecitila zinthu na munthu wamene ecita cimo ikulu mu mpingo wa ku Korinto, yelembewa kuti “itilangize.” (Aro. 15:4) Nkhani iyi yutiphunzisa kuti Yehova olola lini ŵanthu amene ocita macimo akulu-akulu koma soti osalapa kupitilizhya kunkhala mu mpingo. Payakine ayakine angaganize kuti cifukwa cakuti Yehova ni wacifundo, olola munthu wosalapa kupitilizhya kunkhala mu mpingo. Koma umu niye lini mwamene Yehova ooneshela cifundo. N’cendi kuti yove ni wacifundo, koma olola lini atumiki ŵake kucita minkhalidwe iipa. Izi zutanthauza kuti mfundo zake zokhuza coyenela na cosayenela, zucinja lini. (Yuda 4) Kulaŵila cendi, ngati Yehova angalole ŵanthu osalapa kupitilizhya kunkhala mu mpingo, niye kuti zingaoneshe kuti aliye cifundo cifukwa zingaike umoyo wa akwasu na azilongosi pa ngozi.—Miy. 13:20; 1 Akor. 15:33.
15 Olo n’tetyo, tuphunzilapo soti kuti Yehova ofuna lini kuti aliyense akaonongewe. Colinga cake n’cakuti ŵanthu onse akapulumuke. Tetyo, yove oonesha cifundo kuli ŵanthu amene ocinja kaganizidwe kao, minkhalidwe yao koma soti amene ofuna kumutumikila. (Ezek. 33:11; ŵelengani 2 Petulo 3:9.) Niye cifukwa cake Mkhristu wa ku Korinto pecilapa nosiya minkhalidwe yake iipa, Yehova eseŵenzesha Paulo pofotokozela Akhristu a mu mpingo uyu kuti enzofunika kumukhululukila kuti awelele mu mpingo.
Tutolela cisanzo ca Yehova coonesha cifundo na cikondi mwa kuŵaonesha cifundo na cikondi ŵala amene awezhyeleshewa (Onani ndime 14-15)
16. Kansi mwamvwa tyani pavuli pophunzila zecitika mu mpingo wa ku Korinto?
16 Nkhani yokhuza mwamene mpingo wa ku Korinto wecitila zinthu na munthu wamene enzocita cimo ikulu, yutiyavya kuona cikondi na cilungamo ca Yehova. (Sal. 33:5) Kulaŵila cendi, kuphunzila minkhalidwe yaali nayo Yehova kuticitisha kufuna kupitilizhya kumutamanda. Tuyamikila ngako kuti yove ni wacifundo cifukwa tonse nise ocimwa ndipo tufunikila cikhululukilo cake. Tuyamikila soti Yehova cifukwa cotipasa dipo yamene yucitisha kuti yove akotikhululukila macimo ŵasu. Kuziŵa kuti Yehova okonda ngako ŵanthu ŵake na kuti oŵafunila zabwino, n’kotonthoza ngako.
17. Kansi tikalaŵizhyane cinji m’nkhani zokonkhapo?
17 Ngati munthu wacita cimo ikulu masiku ŵano, kansi akulu angatolele tyani cisanzo ca Yehova pa nkhani yoonesha cikondi noyavya munthu kuti alape? Kansi mpingo ufunika kucita cinji ngati akulu apanga cosankha cakuti acose olo kuwezhyelesha munthu mu mpingo? Makonsho aŵa akayankhiwe m’nkhani zokonkhapo.
NYIMBO 109 Tikokondana Kufumila Pansi pa Mtima
