Mtumwi Paulo elembela Akhristu a ku Tesalonika kuti: “Ngati muyakine akumvwa lini mau yasu yamene yali m’kalata iyi, muikeni cizindikilo.” (2 Ates. 3:14) M’nthawi zakuvuli, tenze telaŵila kuti malangizo aŵa yenzokuya kuli akulu. Telaŵila kuti ngati munthu onyalanyaza mfundo za m’Baibo olo pavuli popasiwa uphungu mowelezhyawelezhya, akulu ofunika kukamba nkhani yopeleka cenjezo ku mpingo. Pavuli pake, ofalisa ofunika kuleka kukatizhyana naye.

Olo n’tetyo, pofunika masinthidwe. Lomba, tumvwisha kuti malangizo a Paulo okamba za cosankha camene ŵanthu mu mpingo ofunika kupanga cifukwa ca zocitika ziyakine. Tetyo, paliye cifukwa cakuti akulu akocitokamba nkhani. Ndaŵa yanji tacinja kamvwidwe kasu pa mau opezeka pa 2 Atesalonika 3:14? Ganizilani uphungu wa Paulo uli m’nkhani yake.

Paulo elaŵila kuti ayakine mu mpingo ‘enzoyenda mosalongosoka.’ Ove enzonyalanyaza malangizo ouzhyiliwa. Pa ulwendo wake woyamba, yove epeleka lamulo yakuti: “Ngati muyakine ofuna lini kukata nchito, asalye.” Olo n’tetyo, mwadala ayakine enzokana kuseŵenza nchito yamene ingaŵacilikize pa umoyo wao. Kuyangizhyila apo, enzoloŵelela m’nkhani za ayakine. Kansi Akhristu enzofunika kucita nao tyani zinthu ŵanthu oteti?—2 Ates. 3:​6, 10-12.

Paulo elaŵila kuti, “Muikeni cizindikilo.” Mau aŵa Acigiliki otanthauza kuzindikila minkhalidwe yaali nayo munthu nonkhala osamala kuti osati tikosonkhezelewa na minkhalidwe yake. Paulo epeleka malangizo aŵa kuli Akhristu onse osati tyala kuli akulu. (2 Ates. 1:1; 3:6) Tetyo, ngati Akhristu aona kuti Mkhristu muyao omvwila lini malangizo a Mulungu, ‘enzoleka kukatizhyana naye.’

Kansi izi zenzotanthauza kuti munthu uyu ecosewa mu mpingo? Yai. Paulo eyangizhyilapo kuti: “Pitilizhyani kumulangiza monga mkwasu.” Tetyo, Akhristu enzopitilizhya kukatizhyana na munthu wamene enze na cizindikilo pa vocitika monga misonkhano na ulaliki kucoselako pa maceza. Ndawa yanji? Paulo elaŵila kuti: “Kuti acite nsoni”. Ngati tuleka kukatizhyana na mkwasu olo kalongosi mwa njila iyi, angacite nsoni noleka kucita zinthu ziipa.—2 Ates. 3:​14, 15.

Kansi Akhristu masiku ŵano angaseŵenzeshe tyani malangizo aŵa? Coyamba, tufunika kusimikizhyila kuti minkhalidwe ya munthu ni “yosalongosoka” monga ni mwecifotokozela Paulo. Paulo enzokamba lini za ŵanthu amene angacite zinthu zosakatizhyana na cikumbumtima casu olo zatukonda. Ndipo enzokamba lini soti za ŵala amene etikhumudwisha. M’malo mwake, yove enzokamba za ŵanthu amene mwadala esankha kuphwanya malangizo a m’Baibo olo pavuli pakuti apasiwapo uphungu mowelezhyawelezhya.

Masiku ŵano, ngati taona kuti Mkhristu muyasu oonesha mzimu wosamvwila, a tingapange cosankha coleka kukatizhyana naye pa vocitika monga maceza. Ici ni cosankha caumwini. Tetyo, tingafunike lini kuuzhyako ŵanthu amene ni abanja lini ŵasu. Olo n’tetyo, tingapitilizhye kukatizhyana naye pa vocitika monga misonkhano na ulaliki. Ngati munthu uyu wacinja, tingayambe soti kucita naye zinthu monga ni mwetenzocitila poyamba.