1. Tikaganizila za cikhulupililo ceenze naco Abulahamu, kansi tingazikonshe konsho yotyani?

 OLO KUTI ŵanthu anyinji emvwapo za Abulahamu, oziŵa zitontho zokhuza yove. Olo n’tetyo, mweo muziŵa zinyinji zokhuza Abulahamu. Mwacisanzo, muziŵa kuti yove oitiwa kuti “atata wa ŵala onse amene ali na cikhulupililo.” (Aro. 4:11) Koma payakine mungazikonshe kuti, ‘Kansi ningakwanishe kunkhala na cikhulupililo monga ni ceenze naco Abulahamu?’ Yankho ni yakuti eee, mungakwanishe.

2. Ndaŵa yanji n’cinthu cofunika kuphunzila cisanzo ca Abulahamu? (Yakobo 2:​22, 23)

² Njila imozi ingakuyavyeni kunkhala na cikhulupililo monga ni ceenze naco Abulahamu ni mwa kuphunzila cisanzo cake. Nthawi zonse yove enzocita zinthu zeenzomuuzhya Yehova kuti acite. Mwacisanzo, eluta ku malo a kutali, enkhala m’mahema kwa vyaka vinyinji ndipo enze wokonzeka kupeleka mwana wake wokondeka Isaki monga nsembe. Zocita za Abulahamu zeonesha kuti enze na cikhulupililo cotang’a ndipo zecitisha kuti ankhale pa ushamwali wotang’a na Yehova. (Ŵelengani Yakobo 2:​22, 23.) Yehova ofuna kuti tonse, kuyangizhyilapo mweo tinkhale ovomelezhyeka kwa yove na kuti tinkhale naye pa ushamwali. Cifukwa ca izi, yove euzhyila Paulo na Yakobo kulemba cisanzo ca Abulahamu m’Baibo. Lomba, tiyeni tilaŵizhyane cisanzo cake monga ni mwacufotokozewela mu Aroma caputa 4 na Yakobo caputa 2. Macaputa aŵa ofotokoza zinthu zofunika ngako zokhuza Abulahamu.

3. Kansi Paulo na Yakobo ekata mau a pa lemba yotyani m’Baibo?

 ³ Onse aŵili, Paulo na Yakobo ekata mau opezeka pa Genesis 15:​6, amene okamba kuti: “Abulahamu ekhulupilila mwa Yehova, ndipo Mulungu emuona kuti ni wolungama.” Kanyinji-kanyinji, mau akuti wolungama oseŵenzeshewa ponena za munthu wamene Mulungu omuona kuti ni wovomelezhyeka ndipo aliye mlandu. N’zolimbikisha ngako kuti Mulungu angaone munthu wamene aliye ungwilo koma soti wocimwa kunkhala wolungama. Mosakaikila, mufuna kuti Yehova akokuonani kuti nimwe wolungama ndipo izi n’zokwanishika. Lomba, tione cifukwa cake Yehova eita Abulahamu kuti wolungama koma soti zatufunika kucita kuti nase atiite kuti olungama.

4. Kansi n’cinji cucitisha kuti ŵanthu asankhale olungama?

⁴ M’kalata yake yecilembela Akhristu a ku Roma, Paulo elaŵila kuti ŵanthu onse ni ocimwa. (Aro. 3:23) Lomba kansi zingakwanishike tyani kuonewa olungama, osalakwa koma soti ovomelezhyeka pamenso pa Mulungu? Pofuna kuyavya Akhristu onse kupeza yankho ya konsho iyi, Paulo eseŵenzesha cisanzo ca Abulahamu.

5. Ndaŵa yanji Yehova eita Abulahamu kuti wolungama? (Aroma 4:​2-4)

⁵ Yehova eita Abulahamu kuti wolungama pa nthawi yeenzonkhala m’calo ca Kanani. Ndaŵa yanji Yehova eita Abulahamu kuti wolungama? Kansi n’cifukwa cakuti enzomvwila Cilamulo ca Mose? Yai. (Aro. 4:13) Zili teti cifukwa cilamulo ici cepelekewa ku mtundu wa Isiraeli vyaka vopitilila 400 pavuli pakuti Mulungu waita kale Abulahamu kuti wolungama. Tetyo, Yehova eonesha Abulahamu kuwama mtima kwake kukulu ndipo emuita kuti wolungama cifukwa ca cikhulupililo cake.—Ŵelengani Aroma 4:​2-4.

6. Ndaŵa yanji Yehova angaite munthu wocimwa kuti wolungama?

⁶ Paulo efotokoza kuti ngati munthu okhulupilila mwa Mulungu, “cikhulupililo cake cuyesewa kunkhala colungama.” (Aro. 4:5) Eyangizhyilapo kuti: “Davide elaŵila kuti ngati munthu aliyokate nchito koma Mulungu omuona kuti ni wolungama niye kuti ni wodala. Yove elaŵila kuti: ‘Odala ni ŵala akhululukiwa zocita zao zosamvwila malamulo ndipo macimo ŵao aziŵilizhyiwa. Wodala ni munthu wamene Yehova akaŵelengele lini cimo yake.’” (Aro. 4:​6-8; Sal. 32:​1, 2) Mulungu okhululukila macimo ya ŵanthu amene okhulupilila mwa yove. Oŵakhululukila mpaka kale-kale ndipo okumbukila lini soti macimo ŵao. Tetyo, Yehova oona ŵanthu oteti kunkhala aliye mlandu koma soti olungama cifukwa ca cikhulupililo cao.

7. Ndaŵa yanji tingalaŵile kuti atumiki a m’nthawi zakuvuli enze olungama?

⁷ Olo kuti ove eitiwa kuti olungama, Abulahamu, Davide koma soti atumiki ayakine okhulupilika a Mulungu enzeve ungwilo. Koma cifukwa ca cikhulupililo cao, Yehova eŵaona kuti aliye mlandu makamaka poŵalinganizhya na ŵanthu amene enzeve cikhulupililo mwa yove. (Aef. 2:12) M’kalata yake, Paulo efotokoza momvwika bwino kuti tufunika kunkhala na cikhulupililo kuti tinkhale ashamwali a Mulungu. Abulahamu na Davide enze ashamwali a Mulungu cifukwa ca cikhulupililo cao mwa yove. Nase tingankhale ashamwali a Mulungu ngati tukhulupilila mwa yove.

8-9. Ndaŵa yanji ŵanthu ayakine angalaŵile kuti zecilemba Paulo na Yakobo zusiyana?

⁸ Kwa vyaka mahandiledi, asogoleli avipembezo ankhala okangana pa nkhani yokhuza kufunika kwa cikhulupililo na nchito. Asogoleli avipembezo ayakine ophunzisa kuti, munthu kuti apulumusiwe ofunika tyala kukhulupilila mwa  Asikulu, Yesu Khristu. Payakine mwemvwako kale ayakine olaŵila kuti, “Landilani Yesu ndipo mupulumusiwe.” Ayakine okata mau a Paulo akuti: “Mulungu omuyesa wolungama paliye munthu wamene uyo kukata nchito.” (Aro. 4:6) Olo n’tetyo, ayakine olaŵila kuti munthu angapulumusiwe mwa kuluta kuyoona malo yamene cipembezo cao cuyaona kuti ni yopatulika koma soti mwa kucita zabwino. Pofuna kumvwikisha mfundo yao, payakine angaseŵenzeshe mau opezeka pa Yakobo 2:24 akuti: “Munthu oonewa kuti ni wolungama cifukwa ca nchito zake, osati cifukwa ca cikhulupililo ceka.”

⁹ Cifukwa ca zikhulupililo izi zosiyana, akaswili a Baibo ayakine, oganiza kuti zecilemba Paulo na Yakobo pa nkhani yokhuza zakufunika kucita munthu kuti ankhale wovomelezhyeka kwa Mulungu, zusiyana. Tetyo asogoleli avipembezo ayakine okamba kuti Paulo enzokhulupilila kuti munthu ofunika tyala kunkhala na cikhulupililo, kuti ankhale wovomelezhyeka kwa Mulungu. Koma Yakobo enzokhulupilila kuti munthu ofunika tyala kucita zabwino. Kaswili muyakine wa maphunzilo a zaumulungu elaŵila kuti: “Yakobo aliyomvwishe cifukwa cake Paulo egogomezela kuti munthu ofunika tyala kunkhala na cikhulupililo [kuti aitiwe kuti wolungama] ndipo niye cifukwa cake aliyokatizhyane na zecifotokoza Paulo.” Koma Yehova euzhyila onse aŵili, Paulo na Yakobo kulemba zecicita. (2 Tim. 3:16) Tetyo kuti timvwishe zecitanthauza Paulo na Yakobo, tufunika kuziŵa soti zokhuza zinthu ziyakine zeenzolemba m’makalata ŵao.

10. Kansi Paulo enzotanthauza “nchito” zotyani? (Aroma 3:​21, 28) (Onani soti cithunzithunzi.)

¹⁰ Kansi ni “nchito” zotyani zeenzotanthauza Paulo mu Aroma caputa 3 na 4? Enzotanthauza kumvwila Cilamulo ca Mose camene cenze cepasiwa kuli Aisiraeli. (Ŵelengani Aroma 3:​21, 28.) Cuoneka kuti m’nthawi ya Paulo,  Ayuda ayakine enzokhulupilila kuti enzofunika mphela kumvwila Cilamulo ca Mose. Cifukwa ca izi, Paulo eseŵenzesha cisanzo ca Abulahamu pofuna kumvwikisha mfundo yakuti munthu ofunika lini kumvwila Cilamulo kuti ankhale wovomelezhyeka kwa Mulungu. M’malo mwake, ofunika kunkhala na cikhulupililo. Izi n’zolimbikisha ngako cifukwa zutiphunzisa kuti ngati tili na cikhulupililo mwa Mulungu koma soti mwa Khristu, tinkhale ovomelezhyeka kwa Mulungu.

11. Kansi Yakobo enzotanthauza “nchito” zotyani?

¹¹ Olo n’tetyo, “nchito” zutomolewa mu Yakobo caputa 2 zulingana lini na kumvwila Cilamulo ca Mose. Yakobo enzotanthauza nchito olo zinthu zakucita Akhristu mu umoyo wao wa siku na siku. Nchito izi niye zuonesha ngati Mkhristu ali cendi na cikhulupililo mwa Yehova olo yai. Ganizilani visanzo viŵili veciseŵenzesha Yakobo.

12. Kansi Yakobo efotokoza tyani kukatizhyana kulipo pakati pa cikhulupililo na nchito? (Onani soti cithunzithunzi.)

¹² M’cisanzo coyamba, Yakobo efotokoza kuti Mkhristu ofunika kunkhala aliye sankho pocita zinthu na ŵanthu ayakine. Yove emvwikisha mfundo iyi pecifotokoza cisanzo ca munthu muyakine wamene eonesha cifundo kuli munthu wolemela koma aliyooneshe cifundo kuli munthu wosauka. Tetyo, Yakobo ekamba kuti ngati munthu uyu enzokamba kuti enze na cikhulupililo, zocita zake zeonesha kuti enzeve cikhulupililo. (Yak. 2:​1-5, 9) M’cisanzo caciŵili, Yakobo efotokoza za munthu wamene eona ‘mkwake aliye vovwala olo vakulya’ koma aliyocitepo kanthu kuti amuyavye. Tetyo ngati naye munthu uyu enzokamba kuti enze na cikhulupililo, zocita zake zeonesha kuti enzeve cikhulupililo. Molingana na zecilemba Yakobo, “cikhulupililo paceka, ngati ciliye nchito zake, n’cakufwa.”—Yak. 2:​14-17.

13. Kansi ni cisanzo cotyani ceciseŵenzesha Yakobo pofuna kuonesha kuti tufunikila cikhulupililo koma soti nchito zabwino? (Yakobo 2:​25, 26)

 ¹³ Yakobo efotokoza za Rahabi monga cisanzo cabwino ca munthu wamene eonesha m’zocita zake kuti enze na cikhulupililo. (Ŵelengani Yakobo 2:​25, 26.) Yove ecimvwa zokhuza Yehova ndipo ezindikila kuti enzocilikiza Aisiraeli. (Yos. 2:​9-11) Tetyo, eonesha cikhulupililo cake kupitila m’zocita zake mwa kuteteza azondi aŵili amene miyoyo yao yenze pangozi. Cifukwa ca izi, munakazi uyu wamene enze lini Mwiisiraeli koma soti wamene enzeve ungwilo, eitiwa kuti wolungama monga ni mweenzele Abulahamu. Pa cisanzo ca Rahabi, tuphunzilapo kuti n’cinthu cofunika ngako kuonesha m’zocita zasu kuti tili na cikhulupililo.

14. Ndaŵa yanji tingalaŵile kuti zecilemba Paulo na Yakobo zusiyana lini?

¹⁴ Paulo na Yakobo efotokoza za cikhulupililo na nchito m’njila ziŵili zosiyana. Paulo euzhya Akhristu aciyuda kuti angankhale lini ovomelezhyeka kwa Yehova, tyala cifukwa comvwila Cilamulo ca Mose. Koma Yakobo egogomezela kuti Akhristu onse ofunika kuonesha cikhulupililo cao mwa kucitila ŵanthu ayakine zabwino.

15. Kansi ni njila ziyakine zotyani zatingaoneshelemo kuti tili na cikhulupililo mwa nchito zasu? (Onani soti vithunzithunzi.)

¹⁵ Yehova olaŵila lini kuti tufunika kucita zinthu ndendende monga ni mwecicitila Abulahamu kuti tiitiwe kuti olungama. Pali njila zinyinji zatingaoneshelemo kuti tili na cikhulupililo mwa zocita zasu. Mwacisanzo, tingalandile Akhristu alomba mumpingo, tingayavye akwasu na azilongosi amene ofunikila thandizo koma soti kucitila zabwino ŵanthu a m’banja mwasu zamene ni zinthu zaangavomelezhye Mulungu nodalisa. (Aro. 15:7; 1 Tim. 5:​4, 8; 1 Yoh. 3:18) Imozi mwa njila zofunika ngako zatingaoneshelemo kuti tili  na cikhulupililo, ni mwa kulalikila uthenga uweme mwacangu. (1 Tim. 4:16) Tonse tingaoneshe mwa zocita zasu kuti tili na cikhulupililo cakuti malonjezo a Yehova akakwanilishiwe na kuti njila zake ni zoyenela. Ngati tucita izi, tingankhale osimikizhya kuti Mulungu atione kuti nise olungama ndipo tinkhale ashamwali ŵake.

16. Kansi Abulahamu enze na ciyembekezo cotyani ndipo enzokhulupilila kuti akankhale cinji?

¹⁶ Pa Aroma caputa 4 tuphunzilapo phunzilo iyakine yofunika ngako kufumila kuli Abulahamu. Mu caputa ici, tuphunzila kuti tufunika kuyembekezela mwacidwi kukwanilishiwa kwa ciyembekezo casu. Yehova elonjeza kuti kupitila mwa Abulahamu “mitundu inyinji” ikadalisiwe. Ganizilani tyala ciyembekezo cosangalasa ceenze naco Abulahamu. (Gen. 12:3; 15:5; 17:4; Aro. 4:17) Olo n’tetyo, pa nthawi pamene Abulahamu enze na vyaka 100 ndipo Sara enze na vyaka 90, enze akaliyonkhala na mwana. M’kaonedwe kaumunthu, zenze zosakwanishika kuti Abulahamu na Sara ankhale na mwana. Ici cenze ciyeso cikulu ngako kwa Abulahamu. “Koma cifukwa ca ciyembekezo, yove enze na cikhulupililo cakuti akankhale atata wa mitundu inyinji.” (Aro. 4:​18, 19) Tetyo m’kuluta kwa nthawi, zeenzoyembekezela Abulahamu zekwanilishiwa. Yove enkhala na mwana wa zina yakuti Isaki.—Aro. 4:​20-22.

17. Kansi tuziŵa tyani kuti tingaitiwe olungama monga ashamwali a Mulungu?

¹⁷ Tingankhale ovomelezhyeka kwa Mulungu, kuonewa olungama koma soti kunkhala ashamwali ŵake monga ni mweenzele Abulahamu. Izi niye zecigogomezela Paulo pecilemba kuti: “Koma zokamba kuti eyesewa wolungama ziliyolembewele yove yeka, koma na seo amene tikayesewe otetyo, cifukwa cakuti tukhulupilila yove wamene eukisha Yesu Asikulu ŵasu kwa akufwa.” (Aro. 4:​23, 24) Molingana na Abulahamu, tufunika kunkhala na cikhulupililo, kucita nchito zabwino nonkhala na cidalilo cotang’a cakuti malonjezo a Yehova akakwanilishiwe cendi. Paulo epitilizhya kufotokoza za ciyembekezo casu cupezeka mu Aroma 5, camene niye cati tikalaŵizhyane m’nkhani yokonkhapo.