Kansi mweŵelenga mosamala magazini a Nsanja ya Mulonda ya caka cino? Onani ngati mungakwanishe kuyankha makonsho aŵa:

Kansi “kucinja maganizo” kutanthauzanji? (Aro. 12:2)

Kutanthauza zinyinji, osati tyala kucita vinthu vitontho vabwino. Kutanthauza kuti tufunika kuzifufuza kuti tiziŵe umunthu wasu wa mkati nocinja mbali zatisacita bwino kuti umoyo wasu unkhale wokatizhyana na malamulo a Yehova.—w23.01, mapeji 8-9.

Kansi tingaoneshe tyani kuti tili na maganizo oyenelela patuona zocitika za m’calo?

Tucita cidwi tikaona mwamene zocitika za m’calo cino zukwanilishila ulosi wa m’Baibo. Tetyo, m’malo molaŵila za m’mutu mwasu, zamene zingasokoneze mgwilizano wasu, tufunika kukambisilana zinthu zamene zefalisiwa na gulu ya Yehova. (1 Akor. 1:10)—w23.02, peji 16.

Kansi ubatizo wa Yesu usiyana tyani na wa ophunzila ŵake?

Monga munthu evyalikila mu mtundu wozitwala kale kwa Mulungu, Yesu enzofunika lini kuzitwala kwa Yehova monga ni mwatucitila seo. Yove enze wangwilo ndipo enzeve ucimo. Tetyo, enzofunika lini kulapa macimo.—w23.03, peji 5.

Kansi tingayavye tyani ayakine kuti akopelekapo ndemanga pa misonkhano?

Tingacite izi mwa kupeleka ndemanga zifupi. Izi zingacitishe kuti pankhale nthawi yokwanila yakuti ayakine nao ayankhepo. Tufunika soti kupewa kufotokoza mfundo zinyinji. Kucita izi kungacitishe kuti ayakine apeze mfundo zaangayankhepo.—w23.04, peji 23.

Kansi “Mseu Utuŵa” ufotokozewa pa Yesaya 35:8 utanthauzanji?

Mseu uyu wophiphilisila, poyamba wenze mseu weciseŵenzesha Ayuda pofuma m’Babulo kuluta ku calo cao. Nanga tyani masiku ŵano? Vyaka vinyinji kuvuli cikaliyofwika caka ca 1919, nchito yokonza mseu yamene ni kumasulila koma soti kupulinta Mabaibo, yecitika. Kuyambila nthawi yamene iyi, atumiki a Mulungu ankhala oyenda pa “Mseu Utuŵa” woluta ku paladaiso wauzimu. Mseu uyu utiyavya kulambila Yehova pali lomba koma soti msogolo pati tikalandile madaliso a Ufumu.—w23.05, mapeji 15-19.

Kansi lemba ya Miyambo caputa 9 yupeleka malangizo okhuza anakazi aŵili otyani ophiphilisila?

Buku ya Miyambo yufotokoza za “munakazi wopusa” wamene ciitano cake cusogolela ku “Manda.” Yufotokoza soti za “nzelu yeneyene” yamene yupanamiliwa na munakazi wamene ciitano cake cusogolela ku “njila yomvwisha zinthu” koma soti ku moyo. (Miy. 9:​1, 6, 13, 18)—w23.06, mapeji 22-24.

Kansi Mulungu eonesha tyani kulicefya koma soti kulolela pocita zinthu na Loti?

Yehova euzhya Loti kuti afume mumzinda wa Sodomu noluta kudela ya malupili. Loti pecimusenga kuti alute ku Zowari, Mulungu aliyomuleshe. M’malo mwake, emulola kuti autukile ku malo aŵa.—w23.07, peji 21.

Kansi munakazi angacitenji ngati mulume wake oonelela vinthu va cinthaku?

Ofunika kukumbukila kuti ni yove lini ocitisha kuti mulume wake akoonelela vinthu va cinthaku. M’malo moziimba mlandu, ofunika kuika maganizo ŵake pa kutang’isha ushamwali wake na Mulungu nosinkhasinkha pa nkhani za m’Baibo za anakazi amene epeza citonthozo cifukwa copemphela kwa Yehova. Kuyangizhyila apo, angayavye mulume wake kupewa vinthu vingamucitishe kunkhala na cifuno coonelela vinthu va cinthaku.—w23.08, mapeji 14-17.

Kansi kuzindikila kungatiyavye tyani kuyankha mofasa ngati ŵanthu ayakine osusha zatukhulupilila?

Tufunika kuona konsho yaangatikonshe munthu monga njila yatingaziŵilemo zakukhulupilila koma soti zakuona kuti n’zofunika ngako. Kuziŵa izi kungatiyavye kuti timuyankhe mofasa.—w23.09, peji 17.

Kansi tingaphunzilenji kufumila kuli Mariya pa nkhani yopeza mphamvu?

Mariya peciziŵa kuti ankhale amai ŵake a Mesiya, epeza mphamvu kufumila kuli ayakine. Gabirieli na Elizabeti epasa Mariya cilimbikiso ca m’Malemba. Nase tingapeze mphamvu kufumila kuli olambila ayasu.—w23.10, peji 15.

Kansi Yehova angayankhe tyani mapemphelo ŵasu?

Yove olonjeza kuti akomvwishila mapemphelo ŵasu noona mwayokatizhyilana na colinga cake. (Yer. 29:12) Yehova angayankhe mapemphelo olingana m’njila zosiyana. Olo n’tetyo, ni wokonzeka kutiyavya nthawi zonse.—w23.11, mapeji 21-22.

Lemba ya Aroma 5:2 yufotokoza za “ciyembekezo.” Lomba ndaŵa yanji yufotokoza soti nkhani imozimozi mu vesi 4?

Munthu akamvwa uthenga uweme kwa nthawi yoyamba, angankhale na ciyembekezo cakuyosangalala na moyo m’paladaiso pacalo. Koma akakumana na mavuto, akapilila noona kuti Mulungu okondwela naye, mosakaikila ciyembekezo cake cutang’ilako ndipo cunkhala cenecene kwa yove.—w23.12, mapeji 12-13.