ASIMBI aŵili enzoyenda mumzinda wa Baguio, ku Philippines ndipo eona kashelufu ka ulaliki wapatuŵa, koma aliyofwike pafupi. Kalongosi Helen wamene enze epanama pafupi na kashelufu aka eŵamwetulila. Asimbi aŵa epitilizhya ulwendo wao, koma enzokumbukila kumwetulila kwaubwenzi kweciŵaonesha kalongosi Helen.

Pavuli pake peenzowelela ku ng’anda kwao na basi, asimbi aŵa eona Ng’anda ya Ufumu, ndipo penze polemba kuti jw.org. Ekumbukila kuti vilembo ivi niye veciona pa kashelufu ka ulaliki. Eseluka m’basi nakuya pa Ng’anda ya Ufumu, ndipo eona ndandanda ya misonkhano yamene yenzocitika pa Ng’anda ya Ufumu yamene iyi.

Asimbi amene aŵa ecizopezeka pa misonkhano yokonkhapo. Edabwa ngako peciona kalongosi Helen mu Ng’anda ya Ufumu. Ove emuzindikila kuti ni wala eŵamwetulila mwaubwenzi. Kalongosi Helen elaŵila kuti, “Peenzowela kuli neo, necita wowa noganiza kuti payakine pali cenelakwisa.” Koma asimbi aŵa emufotokozela kalongosi Heleni kuti emuonapo kale pa kashelufu ka ulaliki.

Ove esangalala ngako na misonkhano koma soti kutandala na akwasu na azilongosi. Ndipo peciona akwasu na azilongosi oyelesa mu Ng’anda ya Ufumu pavuli pa misonkhano, nao eyamba kuyelesako. M’mozi mwa asimbi aŵa eluta ku calo ciyakine. Koma uyu muyakine lomba opezeka pa misonkhano nthawi zonse ndipo eyamba kuphunzila Baibo, cifukwa tyala coŵamwetulila.