Kuti tikondweleshe Yehova, tufunika kunkhala na cikhulupililo. Olo n’tetyo, Baibo yulaŵila kuti “ni ŵanthu lini onse amene ali na cikhulupililo.” (2 Ates. 3:2) Mtumwi Paulo peenzolaŵila izi, enzolaŵila za “analume amene enze ankhanza koma soti aipa” amene enzomunzunza. Koma zecilaŵila zokhuza cikhulupililo, n’zacendi ponena za ŵanthu ayakine. Ŵanthu ayakine osankha kunyalanyaza umboni wooneka bwino wakuti kuli Nyamalenga. (Aro. 1:20) Ayakine olaŵila kuti okhulupilila cinthu ciyakine olo munthu muyakine wamphamvu ngako. Koma izi pazeka, n’zosakwanila kuti tikondweleshe Yehova.

Tufunika kunkhala osimikizhya kuti Yehova aliko na kuti opeleka mphoto kwa ŵanthu amene ali na cikhulupililo cotang’a muli yove. (Aheb. 11:6) Kuti tinkhale na cikhulupililo coteti, tufunikila mzimu utuŵa wa Mulungu. Koma kuti tinkhale na mzimu utuŵa, tufunika kumusenga Yehova kuti atipase. (Luka 11:​9, 10, 13) Njila imozi yofunika ngako yatingalandililemo mzimu utuŵa ni mwa kuŵelenga Baibo yamene olemba ŵake esogolelewa na mzimu utuŵa. Pavuli pake, tufunika kuganizila zatuŵelenga noziseŵenzesha. Mzimu wa Yehova ungakhuze umoyo wasu notiyavya kunkhala na cikhulupililo camene cingakondweleshe Mulungu.