NKHANI YOPHUNZILA 25
NYIMBO 7 Yehova Niye Mphamvu Yasu
Mukokumbukila Kuti Yehova ni “Mulungu Wamoyo”
“Yehova ni wamoyo!”—SAL. 18:46.
ZATI TIPHUNZILE
Nkhani ino itiyavye kuona kuti tupindula mwa kukumbukila kuti Mulungu watulambila ni Mulungu wamoyo.
1. Kansi n’cinji cuyavya atumiki a Yehova kupitilizhya kumutumikila mosasamala kanthu za mavuto yakukumana nayo?
BAIBO yulaŵila kuti “tunkhala m’nthawi yapadela koma soti yovuta.” (2 Tim. 3:1) Kuyangizhyila pa mavuto yakukumana nayo ŵanthu onse m’calo cino ciipa, atumiki a Yehova olimbana soti na cisuso koma soti cinzunzo. Koma kansi n’cinji cutiyavya kupitilizhya kutumikila Yehova mosasamala kanthu za mavuto aŵa? Cinthu cimozi cutiyavya ni kuziŵa kuti Yehova ni “Mulungu wamoyo.”—Yer. 10:10; 2 Tim. 1:12.
2. Kansi tuziŵanji ponena za Yehova zamene zingatipase mphamvu zatufunikila kuti tikwanishe kupilila mavuto?
2 Yehova oona mavuto yonse yatukumana nayo ndipo ni wofunishisha kutiyavya nthawi zonse. (2 Mbi. 16:9; Sal. 23:4) Kukumbukila kuti Mulungu wasu osamala za seo na kuti ni wokonzeka kutiyavya nthawi zonse, kungatipase mphamvu zatufunikila kuti tikwanishe kupilila mavuto yaliyonse yatingakumane nayo. Ganizilani cisanzo ca Mfumu Davide.
3. Kansi Davide etanthauzanji pecilaŵila kuti “Yehova ni wamoyo”?
3 Davide enzomuziŵa bwino Yehova ndipo enzomudalila. Yove peenzosakiliwa na adani ŵake kuyangizhyilapo Mfumu Sauli, epemphela kwa Yehova kuti amuyavye. (Sal. 18:6) Ndipo pavuli pakuti Mulungu wayankha pemphelo yake nomupulumusa, Davide elaŵila kuti: “Yehova ni wamoyo!” (Sal. 18:46) Na mau aŵa, Davide enzotanthauza lini tyala kuti Mulungu aliko. M’malo mwake, enzogogomezela mfundo yakuti Yehova ni Mulungu wacendi ndipo oyavya atumiki ŵake nthawi zonse. Davide enzoziŵa kuti Mulungu enzoziŵa bwino zinthu zenzomucitikila na kuti enze wokonzeka kumuyavya. Izi zemuyavya kuti apitilizhye kumutumikila nomutamanda.—Sal. 18:28, 29, 49.
4. Kansi tupindula tyani cifukwa coziŵa kuti Yehova ni Mulungu wamoyo?
4 Kusimikizhyila kuti Yehova ni Mulungu wamoyo, kungatiyavye kuti tikomutumikila mwakhama. Tinkhale na mphamvu zatufunikila kuti tikwanishe kupilila mayeselo, nonkhala okonzeka kucita zilizonse zatingakwanishe pomutumikila. Tinkhale soti osimikizhya kupitilizhya kunkhala pa ushamwali wotang’a na Yehova.
MULUNGU WAMOYO AKUTANG’ISHENI
5. Kansi n’cinji cingatipase cidalilo patukumana na mavuto (Afilipi 4:13)
5 Tikokwanisha kupilila mavuto yaliyonse yatingakumane nayo, yakulu olo yatontho, ngati tukumbukila kuti Yehova ni wamoyo na kuti ni wokonzeka kutiyavya nthawi zonse. Yove angatiyayve cifukwa paliye vuto iliyonse yumukulila. Ni Wamphamvuzonse ndipo angatipase mphamvu zatufunikila kuti tikwanishe kupilila. (Ŵelengani Afilipi 4:13.) Izi zutipasa cidalilo cakuti tikakumana na mavuto, tikokwanisha kupilila. Tikaona kuti Yehova otiyavya kupilila mavuto atontho-atontho, tunkhala na cidalilo cakuti atiyavye soti kupilila mavuto akulu-akulu.
6. Kansi ni vokumana navo votyani vecikumana navo Davide vamene vetang’isha cidalilo cake pa Yehova?
6 Ganizilani zokumana nazo ziŵili zamene zetang’isha cidalilo ca Davide pa Yehova. Peenze m’ciŵeta wacilumbwana, cimbalangondo na nkhalamu, ciliconse cekata mbelele ya ausuwake. Pa vocitika vonse viŵili, Davide evipitikisha ndipo ekwanisha kupulumusa mbelele za ausuwake. Olo n’tetyo, yove aliyozitame cifukwa eziŵa kuti Yehova niye emuyavya kuti akwanishe kucita izi. (1 Sam. 17:34-37) Davide aliyoluŵe vokumana navo ivi. Ndipo kusinkhasinkha pa vokumana navo ivi kwemuyavya kunkhala na cidalilo cakuti Mulungu wamoyo akamutang’ishe msogolo.
7. Kansi Davide eika maganizo ŵake pa cinji, ndipo ndaŵa yanji izi zemuyavya kuti aniatane na Goliyati?
7 M’kuluta kwa nthawi, apo n’kuti Davide ni wacilumbwana koma enze akaliyokwanisha vyaka 20, eluta ku msasa kwenze masoja aciisiraeli. Uku, epeza kuti masoja aŵa enzoyopa kuchaya nkhondo cifukwa ca cimphona ca zina yakuti Goliyati camene cenzowela ‘kuzonyoza masoja aciisiraeli.’ (1 Sam. 17:10, 11) Masoja aciisiraeli enzoyopa Goliyati cifukwa ca kukula kwa maonekedwe ŵake na zeenzolaŵila. (1 Sam. 17:24, 25) Olo n’tetyo, Davide eika maganizo ŵake pa cinthu ciyakine. Yove enzoziŵa kuti pamene Goliyati enzonyoza masoja aciisiraeli, niye kuti ‘enzonyoza masoja a Mulungu wamoyo.’ (1 Sam. 17:26) Apa, Davide enzoganizila za Yehova. Yove enze na cikhulupililo cakuti monga ni mwamene Yehova emuyavyila peenze m’ciŵeta, amuyavye soti pa cocitika ici. Tetyo, na thandizo ya Mulungu eniatana na Goliyati ndipo epambana—1 Sam. 17:45-51.
8. Kansi n’cinji cingatang’ishe cidalilo casu cakuti Yehova atiyavye kulimbana na mavuto? (Onani soti cithunzithunzi.)
8 Nase, tingakwanishe kupilila mayeselo ngati tukumbukila kuti Mulungu wamoyo ni wokonzeka kutiyavya. (Sal. 118:6) Tingatang’ishe cidalilo casu mwa kukumbukila mwecitiyavyila m’nthawi zakuvuli. Tetyo, mukoŵelenga nkhani zamene zingakukumbusheni mwamene Yehova epulumusila atumiki ŵake. (Yes. 37:17, 33-37) Mukoŵelenga olo kuonelela nkhani za pa webusaiti yasu ya jw.org noona mwamene Yehova ocilikizila akwasu na azilongosi a m’nthawi zino. Kuyangizhyila apo, mukokumbukila nthawi pamene Yehova ekuyavyani. Ngati muona kuti paliye nthawi pamene Yehova ekucitilani cinthu cikulu monga kukupulumusani ku cimbalangondo olo nkhalamu, osacita nkhaŵa. Zacendi n’zakuti Yehova wankhala okucitilani zinthu zinyinji mu umoyo wanu. Yove wakuitilani kuti munkhale shamwali wake. (Yoh. 6:44) Kuyangizhyila apo, olo pali lomba mukalumutumikila, tyala cifukwa ca thandizo yake. Tetyo, mukomusenga kuti akokuyavyani kukumbukila nthawi peciyankha mapemphelo ŵanu, kukupasani zofunikila pa nthawi yoyenela, olo kukusamalilani pa nthawi yovuta. Kukumbukila zocitika zoteti kungatang’ishe cidalilo canu cakuti Yehova apitilizhye kukuyavyani.
Mayeselo yatukumana nayo ni mbali ya nkhani ikulu (Onani ndime 8-9)
9. Kansi tufunika kukumbukila cinji tikakumana na mavuto? (Miyambo 27:11)
9 Kuona Yehova monga Mulungu wamoyo, kungatiyavye kuona mayeselo yatingakumane nayo moyenelela. Motyani? Tingayambe kuona kuti mayeselo yatukumana nayo ni mbali ya nkhani ikulu ya pakati pa Yehova na Satana. Maleŵania olaŵila kuti tikakumana na mavuto, tingaleke kutumikila Yehova. (Yobu 1:10, 11; ŵelengani Miyambo 27:11.) Koma tikapitilizhya kunkhala okhulupilika mosasamala kanthu za mayeselo yatingakumane nayo, tuonesha kuti tumukonda Yehova na kuti Maleŵania ni wawenye. Kansi mukumana na mavuto monga cisuso cofumila ku boma, mavuto a zacuma, ŵanthu kukana uthenga wamulalikila olo mayeselo ayakine? Ngati n’tetyo, mukokumbukila kuti mayeselo yamukumana nayo yokupasani mwai wokondwelesha mtima wa Yehova. Mukokumbukila soti kuti yove alole lini kuti muyesewe mpaka kufwika pakuti mungapilile lini. (1 Akor. 10:13) Yove akupaseni mphamvu kuti mukwanishe kupilila.
MULUNGU WAMOYO AKAKUDALISENI
10. Kansi Mulungu wamoyo akaŵacitile cinji ŵanthu amene omulambila?
10 Yehova odalisa ŵala omulambila. (Aheb. 11:6) Yove otipasa cimwemwe na mtendele pali lomba ndipo akatipase moyo wosasila msogolo. Tingankhale na ciyembekezo pa Yehova nonkhala na cidalilo cakuti yove ali na cifuno koma soti mphamvu zotidalisa. Cidalilo ici cutiyavya kunkhala otangwanika pa kulambila kwasu monga ni mwecicitila atumiki okhulupilika a m’nthawi zakuvuli. Izi niye zecitikila Timoteyo, m’vyaka 100 voyambilila.—Aheb. 6:10-12.
11. Ndaŵa yanji Timoteyo enzoseŵenza mwakhama mumpingo? (1 Timoteyo 4:10)
11 Ŵelengani 1 Timoteyo 4:10. Timoteyo enze na cikhulupililo cotang’a cakuti Yehova akamudalise. Niye cifukwa cake yove enzoseŵenzela Yehova na ŵanthu ayakine mwakhama. Kansi ecita tyani izi? Mtumwi Paulo emulimbikisha kukulisha luso yake yophunzisa mu utumiki na mumpingo. Emuuzhya soti kuti enzofunika kunkhala cisanzo ciweme kuli okhulupilila ayake onse, ŵana na akulu. Kuyangizhyila apo, epasiwa soti nchito yovuta yamene yenzoyangizhyilapo kupeleka uphungu motang’a mtima koma mwacikondi kuli ŵala enzofunikila izi. (1 Tim. 4:11-16; 2 Tim. 4:1-5) Nthawi ziyakine ŵanthu ayakine enzoona lini nchito zeenzocita Timoteyo olo kuyamikila. Koma yove enze wosimikizhya kuti Yehova akamudalise.—Aro. 2:6, 7.
12. Ndaŵa yanji akulu opitilizhya kuseŵenza mwakhama mumpingo? (Onani soti cithunzithunzi.)
12 Nao akulu masiku ŵano angankhale na cidalilo cakuti Yehova oona ndipo oyamikila nchito zao zabwino. Kuyangizhyila pa maulwendo aubusa, kuphunzisa na kulalikila, akulu anyinji ocilikiza nchito yacimango nopeleka thandizo pakacitika masoka acilengedwe. Ayakine otumikila m’Tumagulu Toyendela Olwala olo mu Komiti Yolaŵizhyana na Azacipatala. Akulu oziŵa kuti mpingo ni wa Yehova osati wa ŵanthu. Cifukwa ca izi, ove oseŵenza mwakhama poziŵa kuti Yehova akaŵadalise cifukwa ca nchito yakucita.—Akol. 3:23, 24.
Mulungu wamoyo akakudaliseni ngati mutumikila mwakhama mumpingo (Onani ndime 12-13)
13. Kansi Yehova akumvwa tyani pa zonse zatumucitila pomutumikila?
13 Ni tonse lini tingankhale akulu. Koma pali cinthu ciyakine catingamupase Yehova. Mulungu wasu oyamikila ngako ngati tucita zonse zatingakwanishe pomutumikila. Yove oona zonse zatukwanisha kucita pocilikiza nchito ya pacalo conse, mosasamala kanthu kuti zingankhale zitontho. Osangalala soti akaona kuti tapanamika kwanja kuti tiyankhepo pa misonkhano mosasamala kanthu kuti nise ansoni. Kuyangizhyila apo, osangalala ngako akaona kuti takwanisha kukhululukila ŵanthu amene atilakwila. Olo kuti tingaone kuti tucita lini zinyinji pomutumikila, tingankhale na cidalilo cakuti yove oyamikila zatucita. Otikonda ndipo akatidalise.—Luka 21:1-4.
PITILIZHYANI KUNKHALA PA USHAMWALI NA MULUNGU WAMOYO
14. Kansi kunkhala pa ushamwali wotang’a na Yehova kutiyavya tyani kupitilizhya kunkhala okhulupilika? (Onani soti cithunzithunzi.)
14 Ngati tili pa ushamwali wotang’a na Yehova, cikonkhala cosavuta kunkhala okhulupilika kwa yove. Umu niye mwezenzele kwa Yosefe. Cifukwa cakuti yove enzoziŵa kuti zocita zake zenzomukhuza Yehova, ekana kucita ciwelewele, cinthu camene sembe cekhumudwisha Yehova. (Gen. 39:9) Kuti tinkhale pa ushamwali wotang’a na Yehova, tufunika kupatula nthawi yopemphela nophunzila Mau ŵake. Tikankhala pa ushamwali wotang’a na Yehova monga ni Yosefe, tikopewa kucita ciliconse camene cingamukhumudwishe.—Yak. 4:8.
Kuvwendela pafupi na Mulungu wamoyo kukuyavyeni kuti munkhale okhulupilika (Onani ndime 14-15)
15. Kansi tuphunzilapo cinji pa zecitikila Aisiraeli m’cipululu? (Aheberi 3:12)
15 Ŵala amene oluŵa kuti Yehova ni Mulungu wamoyo, oleka kunkhala okhulupilika kuli yove mosavuta. Ganizilani zecitikila Aisiraeli peenze m’cipululu. Ove enzoziŵa kuti Yehova aliko koma eyamba kukaikila ngati enzoŵasamalila. Tetyo, efwika na pokonsha kuti: “Kansi pakati pasu pano, Yehova alipo kapena yai?” (Eks. 17:2, 7) Cifukwa ca izi, ove emupandukila Mulungu. Kulaŵila cendi, tufunishisha kupewa kutolela cisanzo cao ciipa.—Ŵelengani Aheberi 3:12.
16. Kansi n’cinji cingacitishe kuti cinkhale covuta kwa seo kunkhala na cikhulupililo cotang’a?
16 Calo cucitisha kuti zinkhale zovuta kwa seo kupitilizhya kunkhala pa ushamwali wotang’a na Yehova. Anyinji okhulupilila lini kuti Mulungu aliko. Ndipo kanyinji-kanyinji, ŵanthu amene ophwanya malamulo a Mulungu zinthu zuŵayendela bwino. Tikaona izi zucitika, cikhulupililo casu cingayesewe. Olo kuti tukhulupilila kuti Mulungu aliko, payakine tingayambe kukaikila ngati otiyavya. Wolemba Salimo 73 emvwapo tetyo pa nthawi iyakine. Yove enzoona kuti ŵanthu ŵenzonkhala nao pafupi amene enzomphwanya malamulo a Mulungu, zinthu zenzoŵayendela bwino. Cifukwa ca izi, yove eyamba kukaikila ngati kutumikila Mulungu kwenze na phindu.—Sal. 73:11-13.
17. Kansi n’cinji cingatiyavye kupitilizhya kunkhala pa ushamwali wotang’a na Yehova?
17 Kansi n’cinji ceyavya wamasalimo kucinja kaganizidwe kake? Ni kusinkhasinkha pa zingacitikile ŵanthu amene oleka kukhulupilila Yehova. (Sal. 73:18, 19, 27) Enzoganizila soti pa mapindu yowela cifukwa cotumikila Yehova. (Sal. 73:24) Nase tingasinkhesinkhe pa madaliso yawatipasa Yehova. Tingacite soti bwino kuganizila kuti sembe umoyo wasu wenze tyani kuti tenzotumikila lini Yehova. Tetyo ngati tukumbukila cifukwa cake n’cinthu cabwino kutumikila Yehova, zitiyavye kuti tipitilizhye kunkhala okhulupilika. Ndipo molingana na wamasalimo, tingalaŵile kuti: “Kwa neo, kuvwendela pafupi na Mulungu ni cinthu cabwino.”—Sal. 73:28.
18. Ndaŵa yanji tufunika lini kucita wowa na zinthu zati zikacitike msogolo?
18 Tingagonjese mavuto yaliyonse yatingakumane nayo m’masiku ŵano osilizhya cifukwa ‘tutumikila Mulungu wamoyo koma soti wacendi.’ (1 Ates. 1:9) Mulungu wasu otisamalila ndipo akotiyavya nthawi zonse. Yove eyavya atumiki ŵake m’nthawi zakuvuli ndipo akotiyavya olo masiku ŵano. Lombapano, tikumane na cisauso cikulu camene cicitike pacalo conse. Koma tikankhale lini seka. Yehova akankhale nase. (Yes. 41:10) Tetyo, tiyeni “tinkhale otang’a mtima ndipo tilaŵile kuti: ‘Yehova niye otiyavya. Tiyope lini.’”—Aheb. 13:5, 6.
NYIMBO 3 Nimwe Mphamvu Zasu, Ciyembekezo Casu na Cidalilo Casu