1. Ndaŵa yanji tingapindule ngako ngati tuphunzila Salimo 15:​1-5?

 MU NKHANI yapita, tephunzila kuti atumiki a Yehova ozipeleka angankhale alwendo mu tenti yake yophiphilisila mwa kutang’isha ushamwali wao na yove. Koma kansi tingacite cinji kuti tinkhale alwendo ŵake? Lemba ya Salimo 15 yufotokoza zinyinji pa nkhani iyi. (Ŵelengani Salimo 15:​1-5.) Yufotokoza zatufunika kucita kuti tinkhale ashamwali a Mulungu.

2. Kansi n’cinji cepangisha wamasalimo Davide kutomola tenti ya Yehova?

² Salimo 15 yuyamba na makonsho akuti: “Mweo Yehova, ni ŵani angankhale mlwendo mu tenti yanu? Ni ŵani angankhale mu lupili yanu yopatulika?” (Sal. 15:1) Pecifotokoza za “tenti” ya Yehova, payakine wamasalimo Davide enzoganizila za cihema camene pa nthawi iyo cenze ku Gibeoni kwa kanthawi. Pecitomola za “lupili yopatulika,” payakine Davide enzokamba za tenti yamene yenze pa lupili ya Ziyoni ku Yerusalemu. Makilomita anyinji ca kumwela kwa Gibeoni, Davide emanga tenti ndipo eikamo likasa ya pangano mpaka pa nthawi peyemangiwa kacisi.—2 Sam. 6:17.

3. Ndaŵa yanji tufunika kumvwishisha Salimo 15? (Onani soti cithunzithunzi.)

³ Aisiraeli anyinji aliyotumikileko pa cihema ndipo ni atontho tyala enzololewa kuloŵa mu tenti mweenzosungila likasa ya pangano. Olo n’tetyo, atumiki onse a Yehova okhulupilika angankhale alwendo ŵake mu tenti yophiphilisila mwa kupitilizhya kunkhala ashamwali ŵake. Ici niye cinthu catulakalaka tonse. Salimo 15 yutomola minkhalidwe iyakine yatufunika kukulisha noonesha kuti tipitilizhye kunkhala ashamwali a Yehova.

 MUKOYENDA MOSALAKWISA ZINTHU NOCITA ZINTHU ZABWINO

4. Kansi tuziŵa tyani kuti ubatizo niye lini tyala cinthu cakufuna Yehova kuli seo? (Yesaya 48:1)

⁴ Pa Salimo 15:​2, shamwali wa Mulungu ofotokozewa kuti ni “munthu wamene oyenda mosalakwisa zinthu nocita zinthu zabwino.” Mau akuti “kuyenda” koma soti akuti “kucita,” otanthauza kupitilizhya kucita zinthu ziyakine. Koma kansi n’zokwanishika munthu kuyenda ‘mosalakwisa zinthu’? Eee. N’cendi kuti kuliye munthu wangwilo, koma Yehova akotiona kuti ‘tuyenda mosalakwisa zinthu’ ngati tucita zonse zatingakwanishe kuti tikomumvwila. Kuzipeleka kwa Yehova nobatizika, ni ciyambi tyala ca ulwendo wasu na Mulungu. M’nthawi za m’Baibo, munthu enzonkhala mlwendo wa Yehova, osati tyala cifukwa cakuti ni Mwiisiraeli. Talaŵila teti cifukwa ayakine enzoita pa yove, koma osati m’cendi na m’cilungamo. (Ŵelengani Yesaya 48:1.) Kuti aoneshe cendi kuti enzofunishisha kunkhala alwendo a Yehova, Aisiraeli enzofunika kuphunzila malamulo a Yehova noyakonkha. Molingana na izi, kuti tinkhale ashamwali a Yehova masiku ŵano, tufunika kucita zinyinji, osati tyala kubatizika noitiwa kuti Mboni za Yehova. Tufunika kupitilizhya “kucita zinthu zabwino”. Kansi tingacite tyani izi?

5. Kansi kumvwila Yehova m’zinthu zonse kutanthauzanji?

⁵ Kwa Yehova, “kuyenda mosalakwisa zinthu” “nocita zinthu zabwino” kutanthauza zinyinji osati tyala kuluta ku misonkhano. (1 Sam. 15:22) Tufunika kumvwila Mulungu m’mbali zonse za umoyo wasu olo kuti tili kwaseka. (Miy. 3:6; Mla. 12:​13, 14) N’cinthu cofunika ngako kumvwila Yehova olo pa vinthu vitontho-vitontho. Kucita izi, kuonesha kuti tumukonda cendi ndipo izi zupangisha kuti akotikonda ngako.—Yoh. 14:23; 1 Yoh. 5:3.

6. Molingana na Aheberi 6:​10-12, n’cinji cofunika ngako kupambana zinthu zabwino zetecita kuvuli?

 ⁶ Yehova oyamikila ngako zinthu zetemucitila m’nthawi zakuvuli. Koma tyala cifukwa cakuti tecita zinthu zabwino m’nthawi zakuvuli, zutanthauza lini kuti tingapitilizhye kunkhala alwendo mu tenti yake. Mfundo iyi yumvwikishiwa bwino pa Aheberi 6:​10-12. (Ŵelengani.) Yehova oluŵa lini zabwino zetecita kuvuli koma ofuna kuti tipitilizhye kumutumikila na mtima wasu wonse “mpaka posilizhyila.” Yove ankhale shamwali wasu mpaka kale-kale “ngati tuŵeŵa lini.”—Aga. 6:9.

MUKOLAŴILA CENDI MU MTIMA MWANU

7. Kansi kulaŵila cendi kufumila mu mtima kutanthauzanji?

⁷ Aliyense wamene ofuna kunkhala mlwendo mu tenti ya Yehova ofunika “kulaŵila cendi mu mtima mwake.” (Sal. 15:2) Izi zutanthauza zinyinji osati tyala kupewa kutala wenye. Yehova ofuna kuti tikonkhala oona mtima m’zolaŵila na m’zocita zasu. (Aheb. 13:18) Kucita izi n’kofunika cifukwa “Yehova onyansiwa na munthu wacinyengo, koma ŵanthu oongoka mtima onkhala nao pa ushamwali wotang’a.”—Miy. 3:32.

8. Kansi ni minkhalidwe yotyani yatufunika kupewa?

⁸ Ŵanthu amene ‘olaŵila cendi mu mtima mwao’ oyesayesa kumvwila malamulo a Mulungu akankhala kwaŵeka olo pa ŵanthu. (Yes. 29:13) Opewa kucita zinthu zacinyengo. Munthu wacinyengo oganiza kuti malamulo a Yehova angamuyavye lini. (Yak. 1:​5-8) Cifukwa ca izi, angakangiwe kumvwila Yehova olo pa nkhani zamene yove oziona kuti ni zosafunika kwenekwene. Ndipo akaona kuti aliyolandile cilango cifukwa ca kusamvwila kwake, angayambe kucita vinthu viipa vopitilila apo, zamene zingapangishe kuti kulambila kwake kunkhale kwacinyengo. (Mla. 8:11) Tetyo seo, tufuna kunkhala oona mtima m’zinthu zonse.

9. N’cinji cecitika Yesu pecikumana na Natanayeli kwa nthawi yoyamba, ndipo izi zutiphunzisanji? (Onani soti cithunzithunzi.)

⁹ Tingaphunzile zokhuza kufunika konkhala oona mtima, tikaona makambilano yenze pakati pa Yesu na Natanayeli pecikumana  kwa nthawi yoyamba. Filipo pecileta shamwali wake Natanayeli kuti akumane na Yesu, pecitika cinthu ciyakine cocitisha cidwi. Olo kuti Yesu enze akaliyokumanako na Natanayeli, elaŵila kuti: ‘Onani Mwiisiraeli uyu, muli yove muliye cinyengo.’ (Yoh. 1:47) Yesu enzoziŵa kuti ophunzila ŵake ayakine enze oona mtima, koma Natanayeli enze woona mtima ngako. Natanayeli enzeve ungwilo monga ni seo, koma enze woona mtima m’zinthu zonse. Cifukwa ca izi, Yesu emuyamikila. Mosakaikila, nase tufuna kuti Yesu akotiona teti.

10. Ndaŵa yanji tufunika kunkhala osamala na zinthu zatulaŵila? (Yakobo 1:26)

¹⁰ Zinthu zinyinji zatufunika kucita zamene zupezeka mu Salimo 15, zukatizhyana na mwatucitila zinthu na ayakine. Lemba ya Salimo 15:3 yulaŵila kuti mlwendo mu tenti ya Yehova ‘otonzhya lini na lilime yake, ocitila lini muyake ciipa ciliconse ndipo onyoza lini muyake.’ Ngati tukonda kutonzhya ayakine tingaŵakhumudwishe ndipo izi zingacitishe kuti tisayenelele kunkhala m’tenti ya Yehova.—Ŵelengani Yakobo 1:26.

11. Kansi kutonzhya kutanthauzanji, ndipo ni cinji cingacitikile munthu wokonda kutonzhya ayakine ndipo olapa lini?

¹¹ Wamasalimo etomola tonzhyo mwacindunji. Kansi kutonzhya kutanthauza cinji? Tinganene kuti ni kulaŵila vinthu vawenye vamene vingaipishe mbili ya munthu muyakine. Tetyo ngati munthu opitilizhya kutonzhya ayakine ndipo olapa lini, angacosewe mumpingo.—Yer. 17:10.

12-13. Kansi ni pa vocitika votyani pamene tingaononge mbili ya ashamwali wasu? (Onani soti cithunzithunzi.)

¹² Salimo 15:3 yutikumbusha kuti mlwendo wa Yehova ocitila lini maneba ŵake cinthu ciliconse ciipa, ndipo opewa kuipisha mbili ya ashamwali ŵake. Koma kansi tingaipishe tyani mbili ya ashamwali ŵasu?

¹³ Mosaziŵa, tingaipishe mbili ya munthu muyakine ngati tufalisa nkhani zawenye  zokhuza yove. Mwacisanzo, ngati (1) kalongosi waleka kucita utumiki wanthawi zonse, (2) banja yaleka kutumikila pa Beteli na (3) mkwasu waleka kutumikila monga mkulu olo mtumiki wothandiza. Cingankhale lini cinthu cabwino kuuzhya ayakine kuti akwasu na azilongosi aŵa ecita cinthu ciyakine ciipa niye cifukwa cake eleka kucita mautumiki aŵa. Koma pangankhale vifukwa vinyinji vecitisha kuti aleke mautumiki aya. Kuyangizhyila apo, mlwendo m’tenti ya Yehova ‘ocitila lini maneba ŵake cinthu ciliconse ciipa ndipo oipisha lini mbili ya ashamwali ŵake.’

MUKOLEMEKEZA ŴALA AMENE OYOPA YEHOVA

14. Kansi kupewa “munthu aliyense wamene ni wacinyengo” kutanthauzanji?

¹⁴ Salimo 15:4 yulaŵila kuti shamwali wa Yehova “okatizhyana lini na munthu aliyense wonyansa.” Kansi tingaziŵe tyani kuti ni wonyansa? Monga ŵanthu, tingakwanishe lini kuziŵa ngati munthu ni wonyansa olo yai. Ndaŵa yanji? N’cifukwa cakuti tiliye ungwilo. Tetyo, tingakonde ŵanthu ŵatuganiza kuti ni osavuta kucita nao zinthu nozonda ŵanthu ayakine amene ocita zinthu zotikhumudwisha. Tetyo, tufunika kupewa tyala ŵanthu amene Yehova oŵaona kuti ni “onyansa.” (1 Akor. 5:11) Izi zuyangizhyilapo ŵanthu osalapa amene ocita vinthu viipa, ŵala amene olemekeza lini zinthu zatukhulupilila olo ŵanthu amene oyesa kufookesha cikhulupililo casu.—Miy. 13:20.

15. Kansi ni njila imozi yotyani yatingaoneshelemo kuti tulemekeza “ŵanthu amene oyopa Yehova”?

¹⁵ Lemba ya Salimo 15:4 yutiuzhya kuti tufunika kulemekeza “ŵanthu amene oyopa Yehova.” Tetyo, tusakila njila zatingaoneshelemo cifundo na ulemu kuli ashamwali a Yehova. (Aro. 12:10) Motyani? Molingana na Salimo 15:​4, njila imozi ni yakuti mlwendo mu tenti ya Yehova ‘okwanilisha zawalonjeza mosasamala kanthu kuti zinthu zili lini bwino kwa yove.’ Kusakwanilisha malonjezo ŵasu kungakhumudwishe ayakine. (Mat. 5:37) Mwacisanzo, Yehova oyembekezela kuti alwendo ŵake akokwanilisha lumbilo ya ukwati wao. Yove osangalala soti ngati makolo oyesayesa kukwanilisha zangalonjeze ŵana ŵao. Tetyo, cifukwa cakuti tukonda Mulungu na ayakine, tipitilizhye kucita zonse zatingakwanishe kuti tikosunga malonjezo ŵasu.

16. Kansi ni njila iyakine yotyani yatuoneshelamo kuti tulemekeza ashamwali a Yehova?

¹⁶ Njila iyakine yatuoneshelamo kuti tulemekeza ashamwali a Mulungu ni mwa kunkhala ofwikilika koma soti awanzi. (Aro. 12:13) Ngati tupatula nthawi yotandala na akwasu na azilongosi, zitiyavye kuti titang’ishe ushamwali wasu na ove koma soti na Yehova. Ndipo ngati tunkhala ofwikilika tuonesha kuti tutolela Yehova.

PITILIZHYANI KUPEWA KUKONDESHESHA NDALAMA

17. Ndaŵa yanji Salimo 15 yulaŵila za ndalama?

¹⁷ Tuŵelenga kuti mlwendo wa Yehova “okongolesha lini ndalama na colinga cakuti apezelepo kapalulu ndipo olandila lini ciphuphu kuti zinthu ziipile munthu wosalakwa.” (Sal. 15:5) Ndaŵa yanji Salimo iyi yulaŵila pa ndalama? N’cifukwa cakuti kunkhala na kaonedwe kosayenela pa nkhani ya ndalama kungakhumudwishe ayakine ndipo kungaononge ushamwali wasu na Mulungu. (1 Tim. 6:10) M’nthawi za m’Baibo, ayakine enzocitila cinyengo olambila ayao amene enze osauka mwa kuŵalipilisha ndalama zinyinji kupambana zecikongola. Kuyangizhyila apo, oweluza ayakine enzolandila viphuphu noweluza ŵanthu osalakwa m’njila iliye cilungamo. Kulaŵila  cendi, Yehova ozonda ngako zocitika zoteti.—Ezek. 22:12.

18. Kansi ni makonsho otyani yatingazikonshe kuti tiziŵe mwatumvwila pa nkhani ya ndalama? (Aheberi 13:5)

¹⁸ N’cinthu cofunika ngako kuganizila mwatumvwila pa nkhani ya ndalama. Zikonsheni kuti: ‘Kansi kanyinji-kanyinji, nuganizila za ndalama na zinthu zaningagule? Ngati nakongola ndalama, kansi nucelwa kuwezhya poganiza kuti mwineco aliye nayo nchito? Kansi kunkhala na ndalama kunipangisha kuziona kuti n’ne ofunika ngako nonicitisha kuciona kunkhala covuta kunkhala wa wanzi? Kansi nuganiza kuti ngati akwasu na azilongosi ali na ndalama zinyinji niye kuti okonda ngako ndalama kupambana Yehova? Kansi nupanga ushamwali na ŵanthu olemela osati osauka?’ Kuzikonsha makonsho aya ni kofunika ngako cifukwa tapasiwa mwai wonkhala alwendo a Yehova. Tingateteze mwai uyu mwa kupitilizhya kupewa kukondeshesha ndalama. Tikacita izi, niye kuti Yehova atisiye lini.—Ŵelengani Aheberi 13:5.

YEHOVA OKONDA ASHAMWALI ŴAKE

19. Ndaŵa yanji Yehova ofuna kuti tikocita vonse vufotokozewa mu Salimo 15?

¹⁹ Salimo 15 yusila na lonjezo yakuti: “Munthu aliyense wamene ocita izi akanyezhyeke lini.” (Sal. 15:5) Apa, wamasalimo ofotokoza cifukwa cake Yehova ofuna kuti tikocita zinthu zonse zufotokozewa mu Salimo iyi. Otiuzhya izi cifukwa ofuna kuti tikonkhala osangalala. Tetyo, tikacita zakutiuzhya Mulungu tunkhala na umoyo wabwino ndipo atiteteze.—Yes. 48:17.

20. Kansi alwendo a Yehova angayembekezele cinji?

²⁰ Alwendo a Yehova ovomelezhyeka oyembekezela sogolo yabwino. Ŵala amene ezozewa akankhale kululu kwamene Yesu ‘eŵakonzela malo.’ (Yoh. 14:2) Akhristu amene ali na ciyembekezo cakuyonkhala na moyo pacalo, oyembekezela mwacidwi kukwanilishiwa kwa malonjezo opezeka pa Chivumbulutso 21:3. Kulaŵila cendi, ni mwai ukulu ngako kuitiwa na Yehova kuti tinkhale alwendo m’tenti yake mpaka kale-kale.