NKHANI YOPHUNZILA 23
NYIMBO 28 Tinkhale pa Ushamwali na Yehova
Yehova Otiita Kuti Tinkhale Alwendo Ŵake
“Tenti yangu ikankhale pakati pao. Neo nikankhale Mulungu wao.”—EZEK. 37:27.
ZATI TIPHUNZILE
Nkhani ino itiyavye kumvwisha tanthauzo yonkhala mlwendo mu tenti ya Yehova na mwakutisamalilila monga alwendo ŵake.
1-2. Kansi Yehova opeleka ciitano cotyani kuli atumiki ŵake okhulupilika?
NGATI munthu muyakine angakukonsheni kuti ‘Yehova ni ŵani kuli mweo,’ kansi mungayankhe kuti tyani? Payakine mungayankhe kuti yove ni ‘Atata, Mulungu wangu koma soti Shamwali wangu.’ Olo payakine mungaganizileko njila ziyakine zamungamufotokozelemo Yehova. Olo n’tetyo, kansi muziŵa kuti Yehova angankhale soti monga ni mwineco wa ng’anda wamene okuitilani kuti muloŵe mu tenti yake?
2 Mfumu Davide elinganizhya ushamwali uli pakati pa Yehova na atumiki ŵake okhulupilika na ushamwali unkhala pakati pa mlwendo na mwineco wa ng’anda. Yove ekonsha kuti: “Mweo Yehova, ni ŵani angankhale mlwendo mu tenti yanu? Ni ŵani angankhale mu lupilli yanu yopatulika?” (Sal. 15:1) Pa vesi iyi, tuphunzilapo kuti tingankhale alwendo mu tenti ya Yehova. Izi zutanthauza kuti tingankhale ashamwali ŵake. Uyu ni mwai ukulu ngako.
YEHOVA OFUNA KUTI TINKHALE ALWENDO ŴAKE
3. Kansi ni ŵani enze mlwendo woyamba wa Yehova, ndipo Yehova na mlwendo wake ecimvwa tyani kunkhala pa ushamwali?
3 Akaliyoyamba kulenga zinthu zonse, Yehova enze yeka. Koma pavuli pake, elenga Mwana wake woyamba munalume. Yehova enze monga ni mwineco wa ng’anda wamene eita Mwana wake woyamba, kuti aloŵe mu tenti yake ndipo esangalala kucita izi. Baibo yulaŵila kuti Yehova “enzosangalala ngako” na Mwana wake. Naye mlwendo wake woyamba wamene ni Mwana wake, enzonkhala “wosangalala pamenso pake nthawi zonse.”—Miy. 8:30.
4. Kansi ni ŵani ayakine enkhala alwendo a Yehova?
4 Pavuli pake, Yehova elenga angelo. Ndipo nao eŵaita kuti ankhale alwendo mu tenti yake. Baibo yuita angelo kuti “ŵana a Mulungu” ndipo yuonesha kuti ove osangalala kunkhala na Mulungu. (Yobu 38:7; Dan. 7:10) Kwa vyaka vinyinji, alwendo a Mulungu niye tyala ŵanthu ŵeenzonkhala nao kululu. Koma m’kuluta kwa nthawi, elenga soti ŵanthu ndipo nao eŵaita kuti ankhale alwendo ŵake. Ayakine mwa alwendo aŵa enze Inoki, Nowa, Abulahamu na Yobu. Atumiki aŵa okhulupilika enzoitiwa kuti ashamwali a Mulungu olo ŵanthu amene eyenda “na Mulungu wacendi.”—Gen. 5:24; 6:9; Yobu 29:4; Yes. 41:8.
5. Kansi tuphunzilapo cinji pa ulosi upezeka pa Ezekieli 37:26, 27?
5 Kwa vyaka vinyinji, Yehova wapitilizhya kuita ashamwali ŵake kuti ankhale alwendo wake. (Ŵelengani Ezekieli 37:26, 27.) Mwacisanzo, ulosi wa Ezekieli utiphunzisa kuti Mulungu ofunishisha kuti atumiki ŵake okhulupilika ankhale naye pa ushamwali wotang’a. Yove olonjeza kucita nao “pangano ya mtendele.” Ulosi uyu ukamba za nthawi pamene ŵala amene ali na ciyembekezo cakuyonkhala kululu na ŵala amene ali na ciyembekezo cakuyonkhala pacalo, akankhale pamozi monga “gulu imozi.” (Yoh. 10:16) Ndipo izi zucitika lomba.
MULUNGU OTISAMALILA KULIKONSE KWATINGANKHALE
6. Kansi munthu onkhala tyani mlwendo mu tenti ya Yehova, ndipo tenti iyi yupezeka kuni?
6 M’nthawi za m’Baibo, tenti yenze malo kwamene munthu enzopumulilako nonkhala wotetezeka ku nyengo zosiyanasiyana. Mlwendo akankhala mu tenti ya munthu muyakine, enzoyembekezela kusamaliliwa bwino. Molingana na izi, tikazipeleka kwa Yehova, tunkhala alwendo mu tenti yake yophiphilisila. (Sal. 61:4) Tetyo, tili na vonse vatufunikila kuti tipitilizhye kutang’isha ushamwali wasu na Yehova ndipo tili pa ushamwali na ŵanthu amene nao ni alwendo mu tenti yake. Tenti yamene Yehova otiitila kuti tiloŵemo, ili lini tyala pa malo amozi. Payakine mwelutako ku calo ciyakine kuyocita msonkhano wapadela ndipo mwekumana na ayakine amene nao osangalala kunkhala mu tenti ya Yehova. Tetyo, tenti iyi ili kulikonse kupezeka atumiki ŵake okhulupilika.—Chiv. 21:3.
7. Kansi tuziŵa tyani kuti atumiki okhulupilika amene ecifwa akali alwendo mu tenti ya Yehova? (Onani soti cithunzithunzi.)
7 Nanga tyani za atumiki a Yehova amene ecifwa? Kansi tingalaŵile kuti akali alwendo mu tenti yake? Eee. Lomba ndaŵa yanji tingalaŵile tetyo? N’cifukwa cakuti Yehova oŵakumbukila bwino ndipo kwa yove, zili monga kuti akali moyo. Yesu efotokoza kuti: “Koma zakuti akufwa oukishiwa, olo Mose efotokoza m’nkhani ya cichamba ca minga, pamene elaŵila kuti Yehova ni ‘Mulungu wa Abulahamu, Mulungu wa Isaki koma soti Mulungu wa Yakobo.’ Yove ni Mulungu wa ŵanthu amoyo, osati akufwa, cifukwa kwa yove onse aŵa ali moyo.”—Luka 20:37, 38.
Olo atumiki okhulupilika amene ecifwa, angaonewe kunkhala alwendo mu tenti ya Mulungu (Onani ndime 7)
MAPINDU NA ZATUFUNIKA KUCITA KUTI TINKHALE MU TENTI YA YEHOVA
8. Kansi alwendo a Yehova opindula tyani cifukwa conkhala mu tenti yake?
8 Tenti ya Yehova yuteteza alwendo ŵake ku cinthu ciliconse camene cingaononge ushamwali wao na yove ndipo yuŵapasa ciyembekezo cenecene ca msogolo. Ngati tupitilizhya kunkhala pa ushamwali wotang’a na Yehova, kuliye ciliconse caangacite Satana kuti ationonge mpaka kale-kale. (Sal. 31:23; 1 Yoh. 3:8) M’calo calomba, Yehova akapitilizhye kuteteza atumiki ŵake okhulupilika osati tyala ku zinthu zamene zingaŵaononge mwauzimu, koma na ku imfwa.—Chiv. 21:4.
9. Kansi Yehova oyembekezela cinji kuli alwendo ŵake?
9 Kulaŵila cendi, ni mwai ukulu ngako kunkhala mu tenti ya Yehova ndipo tingankhale pa ushamwali wotang’a na yove mpaka kale-kale. Koma kansi tingacitenji kuti tipitilizhye kunkhala alwendo ŵake? Ngati munthu muyakine angakuitileni ku ng’anda kwake, mungafune kuziŵa zakuyembekezela kuti mukacite. Mwacisanzo, payakine angayembekezele kuti mukavule nsapato mukaliyoloŵa mu ng’anda ndipo mungankhale ofunishisha kuyocita izi. Molingana na izi, tufunishisha kuziŵa zakuyembekezela Yehova kuli ŵala ofuna kunkhala mu tenti yake. Cikondi casu pa yove cufunika kutisonkhezela kucita zilizonse zatingakwanishe kuti “tikomukondwelesha pa ciliconse.” (Akol. 1:10) Patuona Yehova monga shamwali wasu, tuzindikila soti kuti yove ni Mulungu wasu koma soti Atata amene ofunika kulemekezewa. (Sal. 25:14) Tetyo tufunika lini kuluŵa izi ndipo tufunika kuŵalemekeza ngako. Kucita izi kutiyavye kupewa kucita cinthu ciliconse camene cingaŵakhumudwishe. Kulaŵila cendi, tufunishisha “kuyenda molicefya” na Mulungu wasu.—Mika 6:8.
YEHOVA EONESHA KUTI ALIYE SANKHO POCITA ZINTHU NA AISIRAELI
10-11. Kansi Yehova ecita tyani zinthu na Aisiraeli m’cipululu ca Sinai, ndipo izi zuonesha tyani kuti yove aliye sankho?
10 Yehova aliye sankho pocita zinthu na alwendo ŵake. (Aro. 2:11) Tingazindikile mfundo iyi, tikaona mwecicitila zinthu na Aisiraeli m’cipululu ca Sinai.
11 Pavuli pakuti wapulumusa atumiki ŵake mu ukapolo ku Iguputo, Yehova esankha ansembe kuti akotumikila pa cihema. Esankha soti Alevi kuti akokata nchito ziyakine za pa cihema. Kansi izi zutanthauza kuti Yehova enzosamalila ngako ŵala enzotumikila pa cihema, olo ŵala enzonkhala pafupi kupambana ayakine? Yai. Yehova aliye sankho.
12. Tikaona mwamene Yehova ecitila zinthu na Aisiraeli m’cipululu, kansi zuonesha tyani kuti aliye sankho? (Ekisodo 40:38) (Onani soti cithunzithunzi.)
12 Mwiisiraeli aliyense enze na mwai wonkhala pa ushamwali na Yehova mosasamala kanthu kuti enzotumikila pa cihema, enzonkhala pafupi olo yai. Mwacisanzo, Yehova enzooneshesha kuti mtundu wonse ukwanisha kuona mkumbi koma soti mulilo palulu pa cihema. (Ŵelengani Ekisodo 40:38.) Ngati mkumbi wayamba kuyenda, olo ŵala enzonkhala kutali na cihema enzokwanisha kuona nolonga katundu wao, kupasula matenti ya mabanja ŵao nopitilizhya kuyendela pamozi na ŵanthu onse. (Num. 9:15-23) Onse enzokwanisha kumvwa kulila kwa mitolilo iŵili ya siliva yamene yenze cizindikilo coŵaziŵisha kuti ofunika kuyamba kuyenda, kufuma pa malo paali. (Num. 10:2) Tetyo, tyala cifukwa cakuti munthu enzonkhala pafupi na cihema zenzotanthauza lini kuti enze pa ushamwali wotang’a na Yehova kupambana ŵala enzonkhala kutali. M’malo mwake, Mwiisiraeli aliyense enze na mwai wonkhala mlwendo wa Yehova nonkhala wosimikizhya kuti yove akomuteteza nomusogolela. N’cimozimozi na masiku ŵano. Yehova otikonda, kutisamalila notiteteza.
Makonzedwe a Mulungu a pa cihema enzoonesha kuti Mulungu aliye sankho (Onani ndime 12)
VISANZO VA MASIKU ŴANO VUONESHA KUTI YEHOVA ALIYE SANKHO
13. Kansi ni m’njila imozi yotyani yakuoneshelamo Yehova kuti aliye sankho olo masiku ŵano?
13 Ayakine mwa atumiki a Mulungu masiku ŵano, onkhala pafupi na likulu yasu ya pacalo conse olo ofesi ya msambo ya Mboni za Yehova. Ayakine otumikila pa malo aŵa ndipo cifukwa ca izi, ali na mwai wotolako mbali m’zocitika zosiyanasiyana za pa malo aŵa. Ndipo mwacindunji, ocitila zinthu pamozi na ŵanthu amene osogolela. Ayakine otumikila monga oyanganila a madela ndipo ayakine ocita mautumiki osiyanasiyana a nthawi zonse. Ngati muli pakati pa ŵanthu anyinji amene pali lomba aliye mwai wotolako mbali mu zocitika zoteti, mungankhale osimikizhya kuti Yehova okukondani mweo monse, monga alwendo ŵake ovomelezhyeka. Yove okuziŵani bwino ndipo okupasani zofunikila. (1 Pet. 5:7) Yehova opeleka cakulya cauzimu kuli mtumiki wake aliyense ndipo omusogolela nomuteteza.
14. Kansi ni m’njila iyakine yotyani yakuoneshelamo Yehova kuti aliye sankho?
14 Njila iyakine yakuoneshelamo Yehova kuti aliye sankho ni mwa kuoneshesha kuti aliyense ali na mwai wonkhala na Baibo. Poyamba, Malemba opatulika elembewa m’vilaŵilo vitatu vamene ni Ciheberi, Ciaramu na Cigiriki. Kansi izi zutanthauza kuti ŵala amene okwanisha kuŵelenga Baibo m’vilaŵilo ivi voyambilila ali pa ushamwali wotang’a na Yehova, kupambana ŵala amene okwanisha lini kuŵelenga Baibo m’vilaŵilo ivi? Yai. Zili lini tetyo.—Mat. 11:25.
15. Kansi n’cinji cutisimikizhyila kuti Yehova aliye sankho? (Onani soti cithunzithunzi.)
15 Kunkhala ovomelezhyeka kwa Yehova kudalila lini pa kunkhala ophunzila ngako olo kuziŵa vilaŵilo vinyinji. Yove opasa lini tyala nzelu ŵanthu amene ni ophunzila ngako. M’malo mwake, opeleka nzelu zake kuli ŵanthu onse pacalo mosasamala kanthu kuti ni ophunzila ngako olo yai. Mau ŵake ouzhyiliwa Baibo, amasuliliwa m’vilaŵilo masauzande na colinga cakuti ŵanthu pacalo conse akopindula na viphunziso vake nophunzila mwaangankhalile ashamwali ŵake.—2 Tim. 3:16, 17.
Kansi kumasuliliwa kwa Mabaibo m’vilaŵilo vinyinji kuonesha tyani kuti Yehova aliye sankho? (Onani ndime 15)
PITILIZHYANI “KUNKHALA ALWENDO” A YEHOVA
16. Molingana na Machitidwe 10:34, 35, kansi tingankhale tyani ovomelezhyeka kwa Yehova?
16 Ni mwai ukulu ngako kulandiliwa monga mlwendo mu tenti ya Yehova yophiphilisila. Yove ni wacikondi, wacifundo koma soti wofwikilika kupambana munthu aliyense. Kuyangizhyila apo, aliye sankho, olandila munthu aliyense mosasamala kanthu kuti ni munalume olo munakazi, kwakunkhala, mwecikulila, maphunzilo, mtundu, cinkhalidwe olo vyaka. Olo n’tetyo, Yehova olandila tyala ŵanthu amene omumvwila monga alwendo ŵake—Ŵelengani Machitidwe 10:34, 35.
17. Kansi ni kuni kwatingapeze malangizo oyangizhyilika okhuza kunkhala mlwendo mu tenti ya Yehova?
17 Monga ni mwayufotokozela Salimo 15:1, Davide ekonsha kuti: “Mweo Yehova, ni ŵani angankhale mlwendo mu tenti yanu? Ni ŵani angankhale mu lupili yanu yopatulika?” Yehova eseŵenzesha Davide poyankha makonsho aŵa opezeka mu Salimo 15. Nkhani yokonkhapo ikafotokoze zatufunika kucita kuti tikondweleshe Yehova nopitilizhya kunkhala ashamwali ŵake.
NYIMBO 32 Nkhalani Okhulupilika Kwa Yehova!