Makonsho Ofumila Kuli Oŵelenga
Kansi mau akuti “Mweo Yehova mukaŵayanganile,” opezeka pa Salimo 12:7, okamba za ŵanthu “ovutika” ofotokozewa pa (vesi 5) olo okamba za “mau a Yehova” ofotokozewa pa (vesi 6)?
Cuoneka kuti mau a pa vesi iyi okamba za ŵanthu.
Pa Salimo 12:1-4, Davide eyamba kulaŵila na mau akuti “Ŵanthu okhulupilika asililatu pakati pa ŵanthu.” Koma pa Salimo 12:5-7, yove olaŵila kuti:
“‘Cifukwa cakuti ovutika okandikizhyiwa,
Cifukwa ca kuusa moyo kwa ŵanthu osauka,
Nikanyamuke nocitapo kanthu,’
‘Nikaŵapulumuse kuli ŵanthu amene oŵanyoza.’
Mau a Yehova ni atuŵa;
Ali monga siliva woyengewa m’ng’anjo ya lito, nthawi zokwanila 7.
Mweo Yehova mukaŵayanganile;
Aliyense mwa ove mukamuteteze ku m’badwo uyu mpaka kale-kale.”
Vesi 5 yukamba zamene Mulungu akacitile ŵanthu ovutika. Yove akaŵapulumuse.
Vesi 6 yuyangizhyilapo kuti, “mau a Yehova ni atuŵa,” ‘monga siliva oyengewa.’ Izi zuonesha mwatumvwila ponena za mau a Yehova.—Sal. 18:30; 119:140.
Lomba onani mau okonkhapo pa Salimo 12:7 pamene pokamba kuti: “Mweo Yehova mukaŵayanganile; aliyense mwa ove mukamuteteze ku m’badwo uyu mpaka kale-kale.” Kansi mau akuti “mukaŵayanganile” okamba za ŵani?
Cifukwa cakuti vesi 6 yukamba za “mau a Yehova,” payakine ayakine angaganize kuti izi zutanthauza kuti Mulungu ‘akateteze’ mau ŵake. Ndipo tuziŵa kuti Mulungu wankhala oteteza Baibo mosasamala kanthu za zoyesayesa za osusha kuti aiononge.—Yes. 40:8; 1 Pet. 1:25.
Koma n’cendi kuti Yehova oteteza ŵanthu ŵake ofotokozewa m’vesi 5. Yove wankhala oteteza ndipo apitilizhye kuyavya nopulumusha “ŵanthu ovutika” koma soti ŵala amene “okandikizhyiwa.”—Yobu 36:15; Sal. 6:4; 31:1, 2; 54:7; 145:20.
Lomba kansi mau akuti “mukaŵayanganile” opezeka mu vesi 7 okamba za ŵani?
Tikaganizila mosamala pa Salimo iyi, tingaone kuti mau akuti “mukaŵayanganile” okamba za ŵanthu.
Cakoyambilila kwa Salimo 12:1 Davide olaŵila za atumiki okhulupilika a Yehova amene ankhala otalizhyiwa wenye. Koma m’vesi yokonkhapo, tuŵelenga kuti Yehova akaononge ŵanthu amene oseŵenzesha lilime yao molakwika mwa kulaŵila vinthu viipa. Salimo iyi yutisimikizhyila kuti tingadalile Mulungu kuti akacitepo kanthu kuti ayavye atumiki ŵake cifukwa mau ŵake ni atuŵa.
Tetyo vesi 7 yukamba kuti Yehova ‘akaŵateteze,’ kutanthauza ŵanthu ovutika amene okandikizhyiwa na ŵanthu aipa.
Mau amene emasuliliwa kuti “mukaŵayanganile,” eseŵenzeshewa m’makope odalilika a Malemba Aciheberi. M’Malemba Acigiriki a Septuagint, mau akuti “mukatiyanganile” eseŵenzeshewa kaŵili konse pa vesi 7, ponena za ŵanthu amene ovutishiwa nokandikizhyiwa. Posilizhyila, vesi 7 yulaŵila kuti “aliyense” mwa ŵanthu okhulupilika akatetezewe “ku m’badwo uyu,” kutanthauza ŵanthu amene ocilikiza kukandikizhyana. (Sal. 12:7, 8) M’Malemba Aciaramu oitiwa kuti Targum, vesi 7 yemasuliliwa kuti: “Mweo ASIKULU, mukateteze ŵanthu olungama, mukaŵateteze ku m’badwo uyu uipa mpaka kale-kale.” Kamasulilidwe aka kopeleka umboni woyangizhyilika wakuti Salimo 12:7 yukamba lini za mau a Mulungu.
Pa cifukwa ici, vesi iyi yupeleka ciyembekezo kwa “atumiki okhulupilika”—cakuti Mulungu akacitepo kanthu kuti aŵayavye.
