NKHANI YOPHUNZILA 46
NYIMBO 49 Tikokondwelesha Mtima wa Yehova
Akwasu—Kansi Muyesayesa kuti Muyenelele Kutumikila Monga Mtumiki Woyavya?
“Kupasa kuticitisha kunkhala osangalala ngako kupambana kulandila.”—MAC. 20:35.
ZATI TIPHUNZILE
Nkhani ino ilimbikishe acilumbwana obatizika kunkhala na cifuno koma soti kuti ayenelele kutumikila monga atumiki oyavya.
1. Kansi mtumwi Paulo enzoŵaona tyani atumiki oyavya?
ATUMIKI oyavya okata nchito yofunika ngako m’mipingo. Mosakaikila, mtumwi Paulo eyamikila ngako analume aŵa okhulupilika. Mwacisanzo, peenzolembela Akhristu a ku Filipi, yove epeleka moni mwacindunji kuli atumiki oyavya pamozi na akulu.—Afil. 1:1.
2. Kansi mkwasu wa zina yakuti Luis akumvwa tyani cifukwa cotumikila monga mtumiki woyavya?
2 Akwasu acilumbwana olo akulukazi amene ni obatizika, opeza cimwemwe cikulu ngako potumikila monga atumiki oyavya mu mpingo. Mwacisanzo, mkwasu Devan eyamikiliwa kunkhala mtumiki woyavya peenze na vyaka 18. Koma mkwasu wa zina yakuti Luis, enkhala mtumiki woyavya peenze na vyaka vopitilila 50. Kansi akumvwa tyani cifukwa cotumikila monga mtumiki woyavya? Mkwasu Luis ekamba kuti, “N’ne wosangalala ngako kutumikila akwasu na azilongosi mu mpingo mwanjila iyi. Ove onionesha kuti onikonda ndipo nane lomba nuŵaonesha kuti nuŵakonda.” Atumiki oyavya anyinji akumvwa cimozimozi.
3. Kansi tilaŵizhyane makonsho otyani?
3 Ngati nimwe mkwasu wobatizika ndipo mukaliyonkhala mtumiki woyavya, kansi mungaziikile colinga camene ici? Kansi n’cinji cingakusonkhezeleni kucita izi? Ndipo kansi ni ziyeneleso zotyani za m’Baibo zamufunika kukwanilisha? M’nkhani ino, tilaŵizhyane mayankho a makonsho aŵa. Koma coyamba, tiyeni tilaŵizhyane nchito yakucita atumiki oyavya.
KANSI MTUMIKI WOYAVYA OKATA NCHITO YANJI?
4. Kansi atumiki oyavya ocita nchito yanji? (Onani soti cithunzithunzi.)
4 Mtumiki woyavya ni mkwasu wobatizika wamene osankhiwa na mzimu utuŵa kuti ayavye akulu kusamalila nchito zofunika ngako mu mpingo. Atumiki oyavya ayakine, ooneshesha kuti ofalisa ali na magao okwanila koma soti zofalisa zaangaseŵenzeshe mu ulaliki. Ayakine oyavya kuyelesa nokonza soti Ng’anda ya Ufumu. Atumiki oyavya otumikila soti monga akalinde koma soti kuseŵenzela ku zokuzhyila mau na kuonesha mavidyo pa nthawi ya misonkhano ya mpingo. Nchito zinyinji zakucita atumiki oyavya n’zocitophunzisiwa. Olo n’tetyo, atumiki oyavya ni analume amene okonda ngako Yehova ndipo onkhala mokatizhyana na mfundo zolungama za Mulungu. Ove okonda soti akwasu na azilongosi. (Mat. 22:37-39) Kansi mkwasu wobatizika angayenelele tyani kunkhala mtumiki woyavya?
Atumiki oyavya otolela cisanzo ca Yesu mwa kuzitwala kuti atumikile ayakine (Onani ndime 4)
5. Kansi mkwasu angacitenji kuti ayenelele kutumikila monga mtumiki woyavya?
5 Baibo yufotokoza ziyeneleso zakufunika kukwanilisha ŵala amene ofuna kutumikila monga atumiki oyavya. (1 Tim. 3:8-10, 12, 13) Mungakwanilishe ziyeneleso izi mwa kuphunzila ziyeneleso za m’Malemba noseŵenza mwakhama kuti muzikwanilishe. Koma coyamba, mufunika kuganizila cifukwa cake mufuna kunkhala mtumiki woyavya.
NDAŴA YANJI MUFUNA KUNKHALA MTUMIKI WOYAVYA?
6. Kansi n’cinji cufunika kukusonkhezelani kuti munkhale ofunishisha kutumikila akwasu na azilongosi? (Mateyu 20:28; onani soti cithunzithunzi pacikuto.)
6 Ganizilani cisanzo ca Yesu. Yove ecita zinthu zonse cifukwa cokonda Ausuwake koma soti ŵanthu. Cikondi ici niye cemusonkhezela kuseŵenza mwakhama koma soti kucitila ayakine nchito zamene zenzooneka kuti ni zapansi. (Ŵelengani Mateyu 20:28; Yohane 13:5, 14, 15) Ngati namwe musonkhezelewa na cikondi, Yehova akudaliseni ndipo akuyavyeni kukwanilisha colinga canu cakuti muyenelele kutumikila monga mtumiki woyavya.—1 Akor. 16:14; 1 Pet. 5:5.
Poseŵenzesha cisanzo cake, Yesu ophunzisa ophunzila ŵake kutumikila ayakine molicefya m’malo mofuna udindo wapalulu (Onani ndime 6)
7. Ndaŵa yanji tufunika kupewa kufuna kunkhala mtumiki woyavya, tyala na colinga cakuti akotiona kuti nise ofunika ngako kupambana ayakine?
7 Kanyinji-kanyinji ŵanthu m’calo cino, okumbwila ŵala amene oziona kuti ni ofunika ngako. Koma izi n’zosiyana ngako na atumiki a Yehova. Mkwasu wamene okonda ayakine monga ni mwecicitila Yesu, ofuna lini kulamulila ayakine olo kuziona kuti yove ni wofunika ngako kupambana ayakine. Ngati munthu wamene oziona kuti ni wofunika ngako mu mpingo angaikiwe pa udindo, n’zoziŵikilatu kuti angocita lini nchito za pansi olo nchito ziyakine pofuna kusamalila mbelele zamtengo wapatali za Yehova. Ndipo yove angoona kuti nchito izi zumuyenelela lini. (Yoh. 10:12) Yehova angadalise lini zoyesayesa za aliyense wamene ocita zinthu izi cifukwa coziona kuti ni wofunika ngako.—1 Akor. 10:24, 33; 13:4, 5.
8. Kansi Yesu eŵapasa malangizo otyani ophunzila ŵake?
8 Nthawi ziyakine, olo ŵala amene enze ashamwali a pa mtima a Yesu enzofuna mautumiki ayakine na zolinga zolakwika. Ganizilani zecicita Yakobo na Yohane amene enze atumwi a Yesu. Ove esenga Yesu kuti akaŵapase udindo wapalulu mu Ufumu wake. Yesu aliyoŵauzhye kuti kucita izi kwenze kwabwino. M’malo mwake, yove efotokozela atumwi ŵake onse 12 kuti: “Aliyense wamene ofuna kuti ankhale mkulu pakati panu ofunika kunkhala mtumiki wanu. Ndipo wamene ofuna kuti ankhale woyamba pakati panu ofunika kunkhala kapolo wa onse.” (Mko. 10:35-37, 43, 44) Akwasu amene ali na colinga cabwino camene ni kufuna kutumikila ayakine, angayavye mpingo m’njila zinyinji.—1 Ates. 2:8.
KANSI N’CINJI CINGAKUYAVYENI KUNKHALA OFUNISHISHA KUTUMIKILA AYAKINE?
9. Kansi mungakulishe tyani cifuno cotumikila monga mtumiki woyavya?
9 Mosakaikila, mukonda Yehova ndipo mufuna kutumikila ayakine. Olo n’tetyo, payakine mungankhale muliye cifuno cocita nchito zinyinji zakucita atumiki oyavya. Koma kansi n’cinji cingakuyavyeni kutang’isha cifuno canu cotumikila ayakine? Mukoganizila cimwemwe camungankhale naco cifukwa cotumikila ayakine. Yesu elaŵila kuti: “Kupasa kuticitisha kunkhala osangalala ngako kupambana kulandila.” (Mac. 20:35) Yesu aliyokambe tyala mau aŵa, koma niye zeenzocita. Tetyo yove epeza cimwemwe cifukwa cotumikila ayakine, ndipo namwe mungapeze cimwemwe ici.
10. Kansi Yesu eonesha tyani kuti enzosangalala kutumikila ayakine? (Maliko 6:31-34)
10 Ganizilani cisanzo camene cuonesha kuti Yesu enzosangalala kuyavya ayakine. (Ŵelengani Maliko 6:31-34.) Pa nthawi iyakine, Yesu na ophunzila ŵake enze eŵeŵa. Tetyo, ove enze paulwendo wakuti alute ku malo kuliye ŵanthu na colinga cakuti akapumuleko. Koma ove akaliyofwika, gulu ya ŵanthu yeyambila kufwika ali na ciyembekezo cakuti akaphunzisiwe na Yesu. Kuti enze efuna, Yesu sembe ekana cifukwa yove na ophunzila ŵake “enzeve nthawi yakuti apumule olo kulya cakulya.” Olo payakine sembe Yesu euzhya ŵanthu aŵa kuti ayambepo pavuli poŵaphunzisa zinthu zitontho. Koma cifukwa cakuti enzoŵakonda, yove esonkhezelewa ‘kuyamba kuŵaphunzisa zinthu zinyinji.’ Ndipo epitilizhya kuŵaphunzisa mpaka “kwefipa.” (Mko. 6:35) Yove ecita izi osati cifukwa cakuti niye zeenzofunika kucita, koma cifukwa cakuti “eŵamvwila cisoni.” Enzofuna kuŵaphunzisa cifukwa enzoŵakonda. Kutumikila ayakine kwecitisha Yesu kunkhala na cimwemwe cikulu.
11. Kansi Yesu eyavya tyani ŵanthu ayakine? (Onani soti cithunzithunzi.)
11 Yesu pecitumikila gulu ya ŵanthu, ecita zinyinji osati tyala kuŵaphunzisa. Yove esamalila soti zosoŵa zao zamuŵili. Mozizwisa, epakisha vakulya novipeleka kuli ophunzila ŵake kuti agaŵile ŵanthu. (Mko. 6:41) Mwa kucita izi, ephunzisa ophunzila ŵake kuziŵa mwaangatumikilile ayakine. Eonesha soti kuti kucita nchito zoteti zamene kanyinji-kanyinji niye zakucita atumiki oyavya, n’kofunika ngako. Ganizilani tyala cimwemwe cecinkhala naco atumwi, pavuli poseŵenzela pamozi na Yesu kugaŵila cakulya mpaka “onse ecilya nokuta.” (Mko. 6:42) Ici ni cisanzo tyala cimozi cuonesha mwamene Yesu eikila zofuna za ŵanthu ayakine pasogolo pa zofuna zake. Peenze pacalo, yove eseŵenza mwakhama kuti atumikile ayakine. (Mat. 4:23; 8:16) Kuyangizhyila apo, enzosangalala kuphunzisa ayakine nosamalila zosoŵa zao. Mosakaikila, namwe mupeze cimwemwe ngati mufunishisha kutumikila ayakine monga mtumiki woyavya.
Ngati mukonda Yehova ndipo muli na cifuno cotumikila ayakine, mukocita zilizonse zamungakwanishe kuti musamalile akwasu na azilongosi (Onani ndime 11) a
12. Ndaŵa yanji aliyense wa seo ofunika lini kuganiza kuti aliye maluso yaangaseŵenzeshe poyavya mpingo?
12 Ngati muona kuti muliye maluso apadela, osakhumudwa. Muli na minkhalidwe yamungaseŵenzeshe poyavya mpingo. Ganizilani zecilaŵila Paulo pa 1 Akorinto 12:12-30. Tetyo, mungasenge Yehova kuti akuyavyeni kuona mwamungaseŵenzeshele malangizo aŵa. Mau a Paulo oonesha patuŵa kuti mtumiki wa Yehova aliyense ali na udindo wofunika mu mpingo. Ngati pali lomba n’zosakwanishika kutumikila monga mtumiki woyavya cifukwa ca mbali ziyakine zamufunika kuseŵenzelapo, musafooke. M’malo mwake, citani zamungakwanishe potumikila Yehova koma soti poyavya akwasu na azilongosi. Mungankhale osimikizhya kuti akulu akuganizileni ndipo akupaseni mautumiki yamungakwanishe kucita.—Aro. 12:4-8.
13. Kansi tuziŵanji zokhuza ziyeneleso za analume a pa udindo?
13 Ganizilani cifukwa ciyakine camufunikila kuyesayesa kuti muyenelele kunkhala mtumiki woyavya. Ziyeneleso zinyinji zukata nchito kuli Akhristu onse. Ndipo Akhristu onse ofunika kuvwendela pafupi na Yehova, kupeza cimwemwe camene cuwela cifukwa copasa noonesha cisanzo cabwino pa umoyo wao. Kansi mkwasu ofunika kucita cinji makamaka kuti ayenelele kutumikila monga mtumiki woyavya?
ZAMUNGACITE KUTI MUYENELELE KUTUMIKILA MONGA MTUMIKI WOYAVYA
14. Kansi mau akuti “aliye cibwana” otanthauzanji? (1 Timoteyo 3:8-10, 12)
14 Lomba, tiyeni tilaŵizhyane ziyakine mwa ziyeneleso zufotokozewa pa 1 Timoteyo 3:8-10, 12. (Ŵelengani.) Mtumiki woyavya ofunika kunkhala “aliye cibwana.” Mau aŵa angamasuliliwe soti kuti “woyenelela ulemu,” olo “wodalilika.” Izi zutanthauza lini kuti mungaseke lini olo kusangalala. (Mla. 3:1, 4) Koma zutanthauza kuti mufunika kuseŵenza mwakhama pokwanilisha maudindo ŵanu. Ngati nthawi zonse mukwanilisha nchito yamwapasiwa ndipo muicita bwino, akwasu na azilongosi mu mpingo akokudalilani ndipo akokupasani ulemu.
15. Kansi mau akuti “osanena paŵili” na akuti “osakonda kupeza phindu mwacinyengo” otanthauzanji?
15 Mau akuti “osanena paŵili,” otanthauza kuti mufunika kunkhala oona mtima, wacilungamo koma soti wodalilika. Mucita zamwalonjeza ndipo mutalizhya lini wenye ayakine. (Miy. 3:32) Mau akuti “osakonda kupeza phindu mwacinyengo,” otanthauza kuti mufunika kucita zinthu moona mtima pamucita bizinesi na ŵanthu ayakine koma soti mwamuseŵenzeshela ndalama zanu. Mufunika lini kuseŵenzesha ayanu mu mpingo kuti mupezelepo ndalama.
16. (a) Kansi mau akuti “osamwa ngako walwa” otanthauzanji? (b) Kansi mau akuti kunkhala na “cikumbumtima cituŵa” otanthauzanji?
16 Mau akuti “osamwa ngako walwa,” otanthauza kuti mufunika lini kunkhala na mbili yaucakolwa. M’malo mwake, mufunika kunkhala na “cikumbumtima cituŵa,” mwa kukonkha mfundo zolungama za Yehova. Olo kuti muliye ungwilo, mungasangalale na mtendele wamene uwela cifukwa conkhala pa ushamwali wabwino na Mulungu.
17. Kansi mkwasu angaoneshe tyani kuti ni wodalilika mwa “kuyesewa coyamba ngati ni woyenelela”? (1 Timoteyo 3:10; onani soti cithunzithunzi.)
17 Mau akuti “ayesewe coyamba ngati ni oyenelela,” otanthauza kuti akulu akoona ngati mukwanisha kusamalila bwino maudindo na kuti angakudalileni. Tetyo, ngati akulu akupasani nchito yakuti mucite, mufunika kukonkha mosamala malangizo yaakupasani koma soti ofumila ku gulu yasu. Mukooneshesha kuti mwamvwisha zamufunika kucita koma soti nthawi yamufunika kusilizhyilamo nchito yamwapasiwa. Ngati mucita bwino nchito yamwapasiwa koma soti mwakhama, akwasu na azilongosi mu mpingo aone kuti mupita pasogolo na kuti nimwe odalilika. Akulu, mukooneshesha kuti muphunzisa akwasu obatizika. (Ŵelengani 1 Timoteyo 3:10.) Kansi mu mpingo mwanu muli akwasu amene ni obatizika ndipo ali na vyaka va m’ma 14 olo kucepelapo? Kansi ove ni cisanzo cabwino pa nkhani yocita phunzilo ya paŵeka? Kansi nthawi zonse oyankhapo pa misonkhano notolamo mbali mu utumiki? Ngati n’tetyo, mukoŵapasa nchito zaangakwanishe kucita molingana na msinkhu wao. Mwa kucita izi, akwasu aŵa acilumbwana angaoneshe kuti ni “odalilika.” Ndipo akakwanisha vyaka 18, angayenelele kutumikila monga atumiki oyavya.
Ngati akulu opasa akwasu obatizika nchito, niye kuti angaŵayese kuti aone ngati “ni oyenelela” (Onani ndime 17)
18. Kansi mau akuti “aliye cifukwa comunenezela” otanthauzanji?
18 Mau akuti “aliye cifukwa comunenezela,” otanthauza kuti munthu aliyense ofunika lini kukuimbani mlandu cifukwa cakuti mwecita colakwa cikulu. N’cendi kuti Akhristu angatalizhyiliwe wenye. Ŵanthu anyinji etalizhyila wenye Yesu, ndipo yove elaŵila kuti izi niye zati zikacitikile okonkha ŵake. (Yoh. 15:20) Olo n’tetyo, ngati mupitilizhya kunkhala na minkhalidwe yabwino monga ni mwecicitila Yesu, mungankhale na mbili yabwino mu mpingo.—Mat. 11:19.
19. Kansi kunkhala ‘munalume wa munakazi m’mozi’ kuyangizhyilapo cinji?
19 Mau akuti ‘munalume wa munakazi m’mozi,’ oonesha kuti aliyense ofunika kukonkha mfundo zolungama za Yehova zokhuza cikwati, zamene zulola tyala cikwati kucitika pakati pa munalume m’mozi na munakazi m’mozi. (Mat. 19:3-9) Munalume wacikhristu ofunika lini kucita dama. (Aheb. 13:4) Izi zutanthauza kuti ofunika kunkhala wokhulupilika kuli mkazi wake. Tetyo, ofunika lini kukopeka na anakazi ayakine.—Yobu 31:1.
20. Kansi mkwasu angaoneshe tyani kuti osamalila “bwino” banja yake?
20 Mau akuti “oyanganila bwino ŵana ŵao na mabanja ŵao,” otanthauza kuti ngati nimwe mutu wabanja, mufunika lini kuuona mopepuka udindo wanu. Nthawi zonse mukocitisha kulambila kwa pa banja. Mukopatula soti nthawi yoluta mu utumiki pamozi na mkazi wanu koma soti ŵana ŵanu nthawi zonse. Mukoyavya ŵana ŵanu kukulisha ushamwali wao na Yehova, aliyense payeka. (Aef. 6:4) Munalume wamene osamalila bwino banja yake, oonesha kuti angakwanishe kusamalila mpingo.—Linganizhyani na 1 Timoteyo 3:5.
21. Ngati mukaliyoyamba kutumikila monga mtumiki woyavya, kansi mufunika kucitanji?
21 Akwasu, ngati mukaliyoyamba kutumikila monga mtumiki woyavya, conde ganizilani mfundo zatalaŵizhyana mwapemphelo. Mukophunzila ziyeneleso za atumiki oyavya noyesayesa mwakhama kuti muzikwanilishe. Mukoganizila soti za cikondi canu pa Yehova koma soti akwasu na azilongosi. Kulishani cifuno cotumikila akwasu na azilongosi. (1 Pet. 4:8, 10) Pezani cimwemwe camene cuwela cifukwa cotumikila akwasu na azilongosi. Lekani kuti Yehova adalise kuyesayesa kwanu kuti mutumikile monga mtumiki woyavya.—Afil. 2:13.
NYIMBO 17 “Nufuna”
a MAU OFOTOKOZA VITHUNZITHUNZI : Kumazhyele, Yesu molicefya otumikila ophunzila ŵake; kumalendi, mtumiki woyavya othandiza mkwasu wacikulile wa mu mpingo mwao.
