NKHANI YOPHUNZILA 45
NYIMBO 138 Ulemelelo wa Imvwi
Zatingaphunzile Kufumila pa Mau Yosilizhyila ya Analume Okhulupilika
“Kansi si pala akulukazi onkhala na nzelu, ndipo amene onkhala na moyo utali si pala omvwisha zinthu?”—YOBU 12:12.
ZATI TIPHUNZILE
M’nkhani ino tiphunzile mfundo yakuti ngati tumvwila Yehova Mulungu, yove olonjeza kutiyavya pali lomba notipasa moyo wosasila msogolo.
1. Ndaŵa yanji tufunika kuphunzila kufumila kuli akulukazi?
TONSE, tufunikila malangizo kuti tipange zosankha zofunika ngako mu umoyo. Tingapeze malangizo aya kufumila kuli akulu koma soti Akhristu ofwikapo mwauzimu. Ngati ove ni akulu kupambana seo, tufunika lini kuganiza kuti malangizo yao ni yakale ngako na kuti yangatiyavye lini. Yehova ofuna kuti tikophunzila zinyinji kufumila kuli akulukazi. Ove ankhala na moyo kwa nthawi itali kupambana seo, ndipo aphunzila zinthu zinyinji mu umoyo zamene zaŵapangisha kuti ankhale na nzelu.—Yobu 12:12.
2. Kansi tilaŵizhyane cinji m’nkhani ino?
2 M’nthawi za m’Baibo, Yehova enzoseŵenzesha atumiki ŵake okhulupilika amene enze akulukazi kuti alimbikishe nosogolela ŵanthu ŵake. Mwacisanzo, ganizilani za Mose, Davide na mtumwi Yohane. Ove enkhalako pa nthawi zosiyanasiyana ndipo ekumana na zocitika zosiyanasiyana pa umoyo wao. Cakosilizhyila kwa moyo wao, ove epeleka malangizo anzelu kuli acilumbwana. Aliyense mwa atumiki aŵa okhulupilika amene enze akulukazi, egogomezela pa kufunika komvwila Mulungu. Yehova ecitisha kuti mau ŵao anzelu alembewe na colinga cakuti tiphunzilepo kanthu. Mosasamala kanthu kuti nise akulukazi olo acilumbwana, tingapindule ngati tukonkha malangizo aŵa. (Aro. 15:4; 2 Tim. 3:16) M’nkhani ino, tiphunzile mau yosilizhyila ya analume atatu okhulupilika amene enze akulukazi, ndipo tione zatingaphunzile kufumila pa mau ŵao.
“MUNKHALE NA MOYO KWA NTHAWI ITALI”
3. Kansi Mose etumikila Mulungu na ŵanthu ŵake m’njila zotyani?
3 Mose etumikila Yehova mwakhama kwa umoyo wake wonse. Yove enzotumikila monga mneneli, woweluza, msogoleli koma soti wolemba mbili. Mose ephunzila zinthu zinyinji kufumila pa zinthu zecikumana nazo pa umoyo wake. Esogolela mtundu wa Aisiraeli kufuma mu ukapolo ku Iguputo, ndipo eona zozizwisa zinyinji zecicita Yehova. Yehova emuseŵenzesha kulemba mabuku 5 a m’Baibo, ndipo cuoneka kuti niye elemba Salimo 90 na 91. Cuoneka soti kuti niye elemba buku ya Yobu.
4. Kansi Mose elimbikisha ŵani, ndipo ndaŵa yanji?
4 Nthawi itontho akaliyokufwa, apo n’kuti ali na vyaka 120, Mose eita Aisiraeli onse na colinga cakuti aŵakumbushe zinthu zonse zeciona koma soti zeciŵacitila Yehova. Vyaka vinyinji kuvuli, ayakine mwa Aisiraeli eona zozizwisa zecicita Yehova na mwecilangila Aiguputo. (Eks. 7:3, 4) Mwacisanzo, eona mwamene Yehova epatushila manzi pa Nyanja Isweta kuti ove apitepo. Eona soti mwamene Yehova eonongela Farao na masoja ŵake. (Eks. 14:29-31) Kuyangizhyila apo, peenze m’cipululu, Yehova eŵasamalila noŵateteza. (Deut. 8:3, 4) Aisiraeli enze esala patontho kuloŵa m’calo colonjezewa. Tetyo akaliyokufwa, Mose enzofuna kuŵalimbikisha. a
5. Kansi mau osilizhyila a Mose opezeka pa Deuteronomo 30:19, 20 yeŵasimikizhyila cinji Aisiraeli?
5 Kansi Mose elaŵilanji? (Ŵelengani Deuteronomo 30:19, 20.) Eŵakumbusha kuti mtundu wa Aisiraeli wenze na ciyembekezo cabwino ca msogolo. Na daliso ya Yehova, ove enze kuzonkhala nthawi itali m’calo ceciŵalonjeza Yehova. Calo ici cenze cokongola koma soti cenze na nthaka yabwino. Ponena za calo ici, Mose elaŵila kuti: “Calo conkhala na mizinda ikulu-ikulu yabwino yamene muliyomangeko, ng’anda zozula na vinthu vosiyanasiyana vabwino vamene muliyoviseŵenzele, visime vamene muliyokumbeko na minda ya mpesa koma soti vimiti va maolivi vamuliyokomoleko.”—Deut. 6:10, 11.
6. Ndaŵa yanji Mulungu elola mitundu iyakine kugonjesa Aisiraeli?
6 Mose ecenjeza soti Aisiraeli kuti ngati ofuna kuti akapitilizhye kunkhala m’calo ici cokongola, enzofunika kumvwila malamulo a Yehova. Eŵalimbikisha “kusankha moyo” mwa kupitilizhya kumvwila Yehova “nonkhala okhulupilika kwa yove.” Olo n’tetyo, Aisiraeli aliyomumvwile Yehova. Tetyo pa nthawi iyakine, Mulungu elola Asuri kuŵagonjesa ndipo m’kuluta kwa nthawi, elola Ababulo kuŵagonjesa noŵatola kuluta nao ku ukapolo.—2 Maf. 17:6-8, 13, 14; 2 Mbi. 36:15-17, 20.
7. Kansi tingaphunzilenji kufumila pa mau a Mose? (Onani soti cithunzithunzi.)
7 Kansi tuphunzilapo cinji? Tuphunzilapo kuti kumvwila kungateteze moyo wasu. Molingana na mwamene Aisiraeli enze esalila patontho kuloŵa m’calo colonjezewa, nase tasala patontho kuloŵa m’calo calomba cecitilonjeza Mulungu. Ndipo tikaone calo cucinja kunkhala paladaiso. (Yes. 35:1; Luka 23:43) Maleŵania na viŵanda vake akankhaleko lini. (Chiv. 20:2, 3) Kukankhale kuliye vipembezo vawenye vamene vuphunzisa vinthu vawenye vokhuza Yehova. (Chiv. 17:16) Kukankhale kuliye maboma a ŵanthu amene okandikizhya ŵala amene ali pansi pa cisamalilo cao. (Chiv. 19:19, 20) M’paladaiso mukankhale muliye malo ya ŵanthu opanduka. (Sal. 37:10, 11) Ŵanthu m’paladaiso akomvwila malamulo a Yehova. Izi zikacitishe kuti mukankhale mgwilizano na mtendele. Ndipo ŵanthu akokondana nokhulupililana. (Yes. 11:9) Kulaŵila cendi, tuyembekezela mwacidwi nthawi iyi. Ndipo ngati tumvwila Yehova, tingapitilizhye kunkhala na moyo pa calo osati tyala kwa vyaka mahandiledi, koma kosasila.—Sal. 37:29; Yoh. 3:16.
Ngati tumvwila Yehova, tingankhale na moyo m’paladaiso pacalo osati tyala kwa vyaka mahandiledi, koma kosasila (Onani ndime 7)
8. Kansi lonjezo yakuyonkhala na moyo wosasila msogolo yeyavya tyani m’mishonale muyakine? (Yuda 20, 21)
8 Ngati tupitilizhya kuganizila lonjezo ya Mulungu ya moyo wosasila msogolo, zitiyavye kuti tikomumvwila mosasamala kanthu za mavuto yatingakumane nayo. (Ŵelengani Yuda 20, 21.) Lonjezo iyi ingatiyavye soti kulimbana na vifooko vasu. Mkwasu muyakine wamene watumikila monga m’mishonale kwa vyaka vinyinji ku Africa efotokoza kuti, kanyinji-kanyinji enzoyesewa kuti acite vinthu vosakondwelesha Yehova. Yove elaŵila kuti: “Nezindikila kuti ningankhale lini na moyo wosasila m’paladaiso ngati numvwila lini Yehova. Izi zeniyavya kupitilizhya kulimbana na vuto yangu nopemphela kwa Yehova mowelezhyawelezhya za vuto iyi. Na thandizo yake, nekwanisha kuigonjesa.”
‘ZINTHU ZIKOKUYENDELANI BWINO’
9. Kansi Davide ekumana na mavuto otyani mu umoyo wake?
9 Davide enze mfumu ya ŵanthu a Yehova ndipo enze wokhulupilika kwa Mulungu. Yove enze soti woimba nyimbo, wofotokoza ndakatulo, msoja koma soti mneneli. Davide ekumana na mavuto anyinji. Kwa vyaka vinyinji, enzonkhala umoyo wothaŵathaŵa cifukwa Mfumu Sauli enzofuna kumupaya. Pavuli ponkhala mfumu, Davide enzofunika soti kuthaŵa mwana wake Abisalomu wamene enzofuna kumulonda ufumu. Mosasamala kanthu za mavuto aŵa koma soti vifooko vake, Davide eonesha kuti enze wokhulupilika kwa Mulungu mpaka posilizhyila pa umoyo wake. Yehova ofotokoza Davide monga ‘munthu wake wa pa mtima.’ Tetyo, tufunika kumvwila malangizo anzelu a Davide.—Mac. 13:22; 1 Maf. 15:5.
10. Ndaŵa yanji Davide epasa malangizo mwana wake Solomo akaliyonkhala mfumu?
10 Mwacisanzo, ganizilani malangizo amene Davide epasa mwana wake Solomo, wamene enze kunzonkhala mfumu ya Aisiraeli yokonkhapo. Wacilumbwana uyu esankhiwa na Yehova kuti apitilizhye kulimbikisha kulambila kutuŵa koma soti kuti akamange kacisi wamene ŵanthu enze kuzouseŵenzesha polambila Mulungu. (1 Mbi. 22:5) Olo n’tetyo, penze kuzonkhala nchito ikulu yeenzofunika kucita. Tetyo, enzofunikila thandizo ya Yehova kuti asogolele mtundu uyu. Kansi Davide emuuzhya cinji? Tiyeni tione.
11. Molingana na 1 Mafumu 2:2, 3, kansi Davide emusimikizhyila cinji Solomo, ndipo n’cinji cecitika pavuli pakuti Solomo waseŵenzesha malangizo aŵa? (Onani soti cithunzithunzi.)
11 Kansi Davide elaŵilanji? (Ŵelengani 1 Mafumu 2:2, 3.) Davide euzhya mwana wake kuti ngati angamvwile Yehova, niye kuti akankhale msogoleli wabwino ndipo Yehova akamudalise. Kwa vyaka vinyinji, Yehova epasa Solomo zinthu zinyinji zabwino ndipo emuyavya m’njila zinyinji. (1 Mbi. 29:23-25) Yove emanga kacisi wocitisha cidwi, elemba ayakine mwa mabuku a m’Baibo ndipo ayakine mwa mau ŵake opezeka soti m’macaputa ayakine a m’Baibo. Yove enkhala wochuka cifukwa ca nzelu zake koma soti cuma. (1 Maf. 4:34) Koma monga ni mwecifotokozela Davide, Solomo enze kuzonkhala wanzelu, tyala ngati wamvwila Yehova Mulungu. Koma comvwisha cisoni n’cakuti Solomo pecikula, eyamba kulambila milungu iyakine. Tetyo, Yehova aliyosangalale naye ndipo eleka kumupasa nzelu zakuti akwanishe kulamulila ŵanthu ŵake mwacikondi koma soti mwacilungamo.—1 Maf. 11:9, 10; 12:4.
Mau yosilizhyila yamene Davide euzhya mwana wake Solomo yotiyavya kuona kuti ngati tumvwila Yehova, yove atipase nzelu kuti tipange zosankha zabwino (Onani ndime 11-12) b
12. Kansi tingaphunzilenji kufumila pa mau a Davide?
12 Kansi tuphunzilapo cinji? Ngati tumvwila Yehova, yove atidalise notiyavya. (Sal. 1:1-3) N’cendi kuti Yehova otilonjeza lini kuti atipase cuma koma soti ulemelelo monga ni mwecicitila kwa Solomo. Koma ngati tumvwila Mulungu, yove atipase nzelu zamene zingatiyavye kupanga zosankha zanzelu. (Miy. 2:6, 7; Yak. 1:5) Malangizo ŵake angatiyavye kuti tikopanga zosankha zanzelu pa nkhani yokhuza nchito, maphunzilo, ndalama na zosangulusha. Ngati tukonkha malangizo ŵake, titeteze ushamwali wasu na yove ndipo tikankhale na moyo wosasila. (Miy. 2:10, 11) Kuyangizhyila apo, tinkhale na ashamwali abwino koma soti mabanja acimwemwe.
13. Kansi n’cinji ceyavya kalongosi Carmen kucinja umoyo wake?
13 Kalongosi Carmen wamene onkhala ku Mozambique enzoganiza kuti kucita maphunzilo apalulu kungacitishe kuti ankhale na umoyo wabwino. Tetyo, yove eyamba kucita maphunzilo ya zomangamanga pa yuniveziti iyakine. Elaŵila kuti: “Nenzokonda zenenzophunzila, koma zenzonilyela nthawi ikulu na mphamvu. Nenzonkhala ku sukulu kuyambila 7:30 mpaka 18:00. Cenzonkhala covuta kuti nilute ku misonkhano ndipo zecitisha kuti ushamwali wangu na Yehova ufooke. Pansi pa mtima, nezindikila kuti nenzoyesa kutumikila asikulu aŵili.” (Mat. 6:24) Tetyo, yove epemphelela nkhani iyi koma soti efufuza mu zofalisa zasu. Elaŵila soti kuti: “Pavuli polandila malangizo abwino kufumila kuli akulu na amama, neganiza zoleka kucita maphunzilo a pa yuniveziti kuti nikotumikila Yehova nthawi zonse. Nuona kuti nepanga cosankha cabwino ngako ndipo n’ne wosangalala kuti necita izi.”
14. Kansi mfundo ikulu ya Mose na Davide yenze yotyani?
14 Mose na Davide enzokonda ngako Yehova ndipo enzoziŵa kufunika komumvwila. Tetyo m’mau ŵao osilizhyila, elimbikisha ayakine kutolela cisanzo cao nopitilizhya kunkhala okhulupilika kwa Yehova. Onse aŵili, ecenjeza soti ayakine kuti ngati opitilizhya lini kunkhala okhulupilika kwa Yehova, niye kuti angankhale lini ashamwali ŵake ndipo akadalisiwe lini. Malangizo aya yanzelu ni yofunika ngako olo masiku ŵano. Vyaka mahandiledi pavuli pake, mtumiki wa Yehova muyakine efotokoza soti kufunika kopitilizhya kunkhala okhulupilika kwa Mulungu.
MUPEZE CIMWEMWE CIKULU
15. Kansi mtumwi Yohane ekumana na zinthu zotyani mu umoyo wake?
15 Yohane enze mtumwi wamene enzokondewa ngako na Yesu Khristu. (Mat. 10:2; Yoh. 19:26) Yove elalikila na Yesu kwa nthawi itali, ndipo eona Yesu ocita zozizwisa. Epitilizhya kunkhala wokhulupilika kwa Yesu pa nthawi zovuta. Eona soti Yesu peenzopaiwa koma soti pavuli pakuti waukishiwa. Kuyangizhyila apo, ecitila soti umboni wokhuza kukula kwa Cikhristu mu vyaka 100 voyambilila, kufumila pa kagulu katontho ka Akhristu okhulupilika mpaka uthenga wabwino “welalikiliwa pa calo conse.”—Akol. 1:23.
16. Kansi ni ŵani opindula na makalata a Yohane?
16 Yohane peenze wacikulile, enkhala na mwai wolemba buku yocitisha cidwi ya Chivumbulutso. (Chiv. 1:1) Yove elemba soti imozi mwa mabuku a Uthenga Wabwino yoziŵika na zina yake. Kuyangizhyila apo, elemba soti makalata yatatu yamene lomba yoziŵika kuti 1 Yohane, 2 Yohane na 3 Yohane. Yove elemba kalata yacitatu kuli Mkhristu wokhulupilika wa zina yakuti Gayo, wamene yove enzomukonda monga mwana wake wokondeka. (3 Yoh. 1) Pa nthawi iyi, cuoneka kuti penze ŵanthu anyinji amene Yohane enzoŵakonda monga ŵana ŵake. Zecilemba munalume uyu wacikulile, ni zolimbikisha kuli okonkha onse a Yesu masiku ŵano.
17. Molingana na 3 Yohane 4, kansi n’cinji cutipasa cimwemwe cikulu?
17 Kansi Yohane elemba cinji? (Ŵelengani 3 Yohane 4.) Yohane elemba za cimwemwe camene cuwela cifukwa comvwila Mulungu. Kufwika pa nthawi yeenzolemba kalata yake yacitatu, ŵanthu ayakine enzophunzisa viphunziso vawenye ndipo enzocitisha magaŵano mu mpingo. Olo n’tetyo, ayakine epitilizhya “kuyenda m’cendi.” Emvwila Yehova ndipo ‘enzoyenda mokonkha malamulo ŵake.’ (2 Yoh. 4, 6) Akhristu aŵa okhulupilika ecitisha Yohane na Yehova kunkhala na cimwemwe.—Miy. 27:11.
18. Kansi tingaphunzilenji kufumila pa mau a mtumwi Yohane?
18 Kansi tuphunzilapo cinji? Ngati tupitilizhya kunkhala okhulupilika kwa Yehova, tunkhala osangalala ndipo tucitisha ayakine kunkhala osangalala. (1 Yoh. 5:3) Mwacisanzo, tusangalala kuziŵa kuti tusangalasa Yehova. Yove osangalala ngati tupewa kucita vinthu viipa nomvwila malamulo ŵake. (Miy. 23:15) Angelo kululu nao osangalala. (Luka 15:10) Tusangalala soti tikaona kuti akwasu na azilongosi opitilizhya kunkhala okhulupilika, mosasamala kanthu kuti onzunziwa olo kuyesewa kuti acite vinthu viipa. (2 Ates. 1:4) Ndipo calo ca Satana cikayoonongewa, tikasangalale kuziŵa kuti tepitilizhya kunkhala okhulupilika kwa Yehova.
19. Kansi kalongosi wa zina yakuti Rachel elaŵilanji zokhuza kuphunzisa ayakine cendi? (Onani soti cithunzithunzi.)
19 Tusangalala ngako ngati tuphunzisa ŵanthu ayakine zokhuza Yehova. Kalongosi Rachel wamene onkhala ku Dominican Republic oona kuti ni mwai ukulu ngako kuphunzisa ayakine zokhuza Yehova Mulungu wasu. Yove wayavya ŵanthu anyinji kuyamba kutumikila Yehova. Elaŵila kuti: “Ningakwanishe lini kufotokoza cimwemwe canunkhala naco nikaona ŵanthu wanuphunzisa za Yehova opitilizhya kumukonda nomudalila koma soti ocinja umoyo wao na colinga cakuti amusangalase. Cimwemwe ici ni cikulu ngako kupambana kuzipeleka olo kuyesayesa kwenecita kuti niŵaphunzise.”
Tupeza cimwemwe ngati tuphunzisa ayakine kukonda nomvwila Yehova (Onani ndime 19)
MWATINGAPINDULILE NA MAU YOSILIZHYILA YA ANALUME OKHULUPILIKA
20. Kansi tulingana tyani na Mose, Davide koma soti Yohane?
20 Mose, Davide na Yohane enkhalako m’nthawi zakuvuli. Ndipo mwazilili zinthu masiku ŵano ni zosiyana ngako na mwezenzele m’nthawi yao. Olo n’tetyo, tulingana nao m’njila zinyinji. Ove enzotumikila Mulungu wacendi ndipo nase niye zatucita. Molingana na ove, tupemphela kwa Yehova, tumudalila kuti atiyavye notisogolela. Ndipo molingana na analume aŵa, tili na cidalilo cakuti Yehova adalise ŵala amene omumvwila.
21. Kansi ni madaliso yotyani yati akapeze ŵala amene omvwila malangizo kufumila kuli akulukazi okhulupilika monga Mose, Davide na Yohane?
21 Lomba, tiyeni tinkhale osimikizhya kumvwila mau yosilizhyila ya analume aŵa okhulupilika mwa kumvwila malamulo a Yehova. Ngati tumvwila Yehova, yove atidalise notiyavya. Kupambana zonse, tikapeze moyo wosasila. (Deut. 30:20) Kulaŵila cendi, tinkhale osangalala cifukwa cokondwelesha Ausuwasu acikondi amene akatidalise mwapadela.—Aef. 3:20.
NYIMBO 129 Tipitilizhye Kupilila
a Anyinji mwa Aisiraeli amene eona zozizwisa za Yehova pa Nyanja Isweta, aliyopitilizhye kunkhala na moyo kuti aone Calo Colonjezewa. (Num. 14:22, 23) Zenze tetyo cifukwa Yehova ekamba kuti analume onse amene enze na vyaka 20 kuluta msogolo, akafwile m’cipululu. (Num. 14:29) Koma anyinji amene enze akaliyokwanisha vyaka 20, epitilizhya kunkhala na moyo pamozi na Yoswa, Kalebe koma soti ayakine a m’fuko ya Levi amene etauka Nyanja ya Yorodano ndipo eloŵa m’Calo Colonjezewa.—Deut. 1:24-40.
b MAU OFOTOKOZA CITHUNZITHUNZI: Kumanzhyele: Davide opeleka malangizo osilizhyila kuli mwana wake Solomo. Kumalendi: Akwasu na azilongosi opindula na nzelu za Yehova ku sukulu ya apainiya.
