KANSI muvutika kuphunzila Baibo wiki iliyonse? Kansi nthawi ziyakine muona kuti kuphunzila Baibo n’kosasangalasa? Tonse tukumvwa teti nthawi ziyakine. Koma ganizilani za zinthu ziyakine zatucita nthawi zonse monga kusamba na kuwasha. Zinthu izi zufuna nthawi na khama, koma tusangalala pavuli pake. Kuphunzila Baibo nako kungatisangalase. (Aef. 5:26) Ganizilani ziyakine mwa mfundo zingakuyavyeni:

• Mukopanga ndandanda. Phunzilo ya pamweka ni cimozi mwa “zinthu zofunika ngako” zamene Mkhristu ofunika lini kunyalanyaza. (Afil. 1:10) Kuti osati mukoluŵa nthawi yamucitilamo phunzilo, mungalembe siku na nthawi pa pepa noiika pa malo pamungoiona mosavuta. Olo payakine mungaike alamu pa foni yanu na colinga cakuti ikokukumbushani kukasala nthawi itontho kuti mucite phunzilo ya pamweka.

• Mukoganizila zinthu zingakuyavyeni kumvwisha. Kansi mungakonde kucita tyani phunzilo yanu? Mwacisanzo, kansi ni cipepu kwa mweo kumvwisha zamuŵelenga ngati mwaŵelenga kwa nthawi itali? Olo kansi mungakonde kuŵelenga kwa nthawi itontho koma kanyinji-kanyinji? Mweo niye mungaziŵe zingankhale bwino ngako kuli mweo. Tetyo, mukoganizila izi pamusankha nthawi yocitilamo phunzilo ya pamweka. Ngati muona kuti mufuna lini kuphunzila Baibo pa nthawi yemwesankha, mungayese kuphunzila tyala kwa maminesi 10. Olo kuti mungaphunzile tyala kwa maminesi 10, mungaphuzile zinyinji. Ndipo payakine pavuli pa maminesi 10, mungasangalale na zamuphunzila cakuti mungafune kupitilizhya kuphunzila.—Afil. 2:13.

• Mukosankhilatu nkhani zati mukaphunzile. Ngati muganizila pa zati muphunzile nthawi yophunzila ikakwana, niye kuti ‘museŵenzesha lini bwino nthawi yanu.’ (Aef. 5:16) Tetyo, mungayese kulembelatu ziyakine mwa mfundo zamungakonde kuphunzila. Mwacisanzo, ngati muli na konsho iyakine yamusamvwisha, mungalembe konsho iyo pa m’ndandanda wa zinthu zamufuna kuphunzila. Ndipo pavuli pa phunzilo iliyonse, mungayangizhyilepo mfundo ziyakine zamungakonde kuphunzila.

• Mukonkhala okonzeka kucinja. Cofunika ngako ni kucita phunzilo ya pamweka wiki iliyonse. Kuti izi zikwanishike, nthawi ziyakine mungafunike kucinja siku na nthawi, kukula kwa nthawi yamungacite phunzilo na zamungaphunzile ngati n’pofunikila.

Tupindula ngako ngati tucita phunzilo ya paseka wiki iliyonse. Mwacisanzo, ushamwali wasu na Yehova utang’ilako, tuphunzila kupanga zosankha zanzelu ndipo tulimbikishiwa.—Yos. 1:8.