1. Kansi ni nchito yotyani yakufuna Yehova kuti icitike pacalo conse?

 CIFUNILO ca Mulungu ni cakuti uthenga wabwino wa Ufumu ulalikiwe pacalo conse. (Mko. 13:10; 1 Tim. 2:3, 4) Iyi ni nchito yofunika ngako. Niye cifukwa cake Yehova esankha Mwana wake wokondeka kuti akosogolela pa nchito iyi. Cifukwa cakuti Yesu otisogolela pa nchito yolalikila, nise osimikizhya kuti tikwanishe kuicita, masilizhyilo akaliyofwika, monga ni mwakufunila Yehova.​—Mat. 24:14.

2. Kansi tilaŵizhyane cinji m’nkhani ino?

² M’nkhani ino, tione mwamene Yehova oseŵenzeshela “kapolo wokhulupilika na wanzelu” popeleka cakulya cauzimu nosogolela pa nchito yolalikila. Nchito iyi yucitika pa mlingo ukulu ngako m’mbili yonse ya ŵanthu. (Mat. 24:45) Tione soti zamene Mkhristu aliyense payeka ofunika kucita pocilikiza Yesu na kapolo wokhulupilika.

3. Kansi Yesu epasiwa ulamulilo wotyani?

³ Yesu osogolela pa nchito yolalikila. Kansi n’cinji cutisimikizhyila kuti mfundo iyi ni yacendi? Pekwesala nthawi itontho kuti alute kululu, Yesu ekumana na ophunzila ŵake okhulupilika pa lupili ku Galileya. Yove eŵauzhya kuti: “Ulamulilo wonse wapasiwa kuli neo kululu na pacalo.” Pavuli pake eŵauzhya kuti: “Tetyo, nkhoyani mukaphunzise ŵanthu a mitundu yonse.” (Mat. 28:18, 19) Kuyangizhyila pa maudindo yecipasiwa, Yesu epasiwa soti ulamulilo wosogolela nchito yolalikila.

4. Ndaŵa yanji tingankhale osimikizhya kuti Yesu akalusogolela nchito yolalikila?

 ⁴ Yesu elaŵila kuti nchito yolalikila nopanga ophunzila ikacitike “ku mitundu yonse ya ŵanthu.” Ndipo euzhya ophunzila ŵake kuti akankhale nao mpaka “masilizhyilo a nthawi ino.” (Mat. 28:20) Mau aŵa oonesha kuti Yesu enze kuzopitilizhya kusogolela nchito yolalikila mpaka masiku ŵano.

5. Kansi tukwanilisha tyani lemba ya Salimo 110:3?

⁵ Yesu enzocita lini nkhaŵa kuti payakine m’masiku osilizhya, pakankhale ŵanthu atontho otolako mbali pa nchito yolalikila. Yove enzoziŵa kuti ulosi wecilosela wamasalimo wakuti: “Ŵanthu ŵako akazitwale mofunishisha pa siku yati ukasogolele masoja ŵako ku nkhondo,” ukakwanilishiwe. (Sal. 110:3) Ngati mutolako mbali pa nchito yolalikila, ndiye kuti mucilikiza Yesu na kapolo wokhulupilika. Ndipo muyavya kuti ulosi uyu ukwanilishiwe. Olo kuti nchito iyi yupita pasogolo, pali mavuto yatukumana nayo.

6. Fotokozani imozi mwa mavuto yatukumana nayo monga alaliki a uthenga wa Ufumu masiku ŵano.

⁶ Imozi mwa mavuto yatukumana nayo monga alaliki a uthenga wa Ufumu ni kusushiwa. Ampatuko, asogoleli a vipembezo vawenye na azandale, olaŵila vinthu viipa vokhuza nchito yasu. Ngati abanja ŵasu, ayasu koma soti ŵanthu ŵatuseŵenza nao akhulupilila vinthu ivi vawenye, angayambe kutikakamizhya kuti tileke kutumikila Yehova nolalikila. M’vyalo viyakine, akwasu na azilongosi onzunziwa noikiwa m’jele. Koma izi zutidabwisha lini. Yesu elosela kuti: “Mitundu yonse ikakuzondeni cifukwa ca zina yangu.” (Mat. 24:9) Tetyo, ngati tusushiwa kapena kunzunziwa, ni umboni wakuti tili kumbali ya Yehova. (Mat. 5:11, 12) Maleŵania niye ocitisha mavuto aŵa. Koma tuziŵa kuti Yesu ali na mphamvu zinyinji kupambana Satana. Cifukwa cakuti Yesu ali kumbali yasu, tukwanisha kulalikila uthenga wabwino ku mitundu yonse ya ŵanthu pacalo. Tiyeni tione umboni wa mfundo iyi.

7. Kansi pali umboni wotyani uonesha kuti lemba ya Chivumbulutso 14:6, 7 yukwanilishiwa masiku ŵano?

⁷ Vuto iyakine yatukumana nayo patulalikila uthenga wa Ufumu, ni yakuti tupeza ŵanthu olaŵila vilaŵilo vosiyanasiyana. Koma kupitila m’mensomphenya yeciona Yohane, Yesu elosela kuti vuto iyi ikakangishe lini kuti uthenga wabwino ulalikiwe m’masiku ŵano osilizhya. (Ŵelengani Chivumbulutso 14:6, 7.) Masiku ŵano, ŵanthu pacalo conse okwanisha kumvwishila uthenga wabwino m’cilaŵilo cao, kupitila pa jw.org cifukwa pali zofalisa m’vilaŵilo vopitilila 1,000. Bungwe Yolamulila yevomelezhya kuti buku ya Sangalalani na Moyo Kosasila!, yamene tuiseŵenzesha popanga ophunzila, imasuliliwe m’vilaŵilo vopitilila 700. Kuyangizhyila apo, cakulya cauzimu cupelekewa kuli ŵanthu osamvwa na osalolesha, kupitila m’mavidyo na zofalisa za ŵanthu osalolesha. Tili na mwai ukulu ngako woona kukwanilishiwa kwa maulosi a m’Baibo. “Ŵanthu ofumila m’vilaŵilo vonse,” aphunzila cilaŵilo “cituŵa” kapena kuti cendi cofumila m’Baibo. (Zek. 8:23; Zef. 3:9) Zonse izi zakwanishika cifukwa cakuti Yesu Khristu otisogolela pa nchito iyi.

8. Kansi pankhala zofumapo zotyani pa nchito yasu yolalikila?

⁸ Masiku ŵano, pali Mboni za Yehova zopitilila 8,000,000 m’vyalo 240. Ndipo caka ciliconse, ŵanthu masauzande anyinji ozipeleka nobatizika! Cocitisha cidwi ngako ni ciŵelengelo lini ca ŵanthu amene obatizika, koma minkhalidwe yacikhristu kapena kuti “umunthu walomba,” wakuyesayesa kuvwala. (Akol. 3:8-10) Anyinji mwa ŵanthu aŵa, eleka minkhalidwe iipa monga  ciwelewele, kusankhana mitundu na ciwawa. Kuyangizhyila apo, ocilikiza lini nkhondo zamene zukwanilisha ulosi wa pa Yesaya 2:4. Ngati tuyesayesa kuvwala umunthu walomba, niye kuti tuyavya ŵanthu kuti awele m’gulu ya Yehova ndipo tuonesha kuti tucilikiza msogoleli wasu Khristu Yesu. N’zolimbikisha ngako cifukwa niye zatucita. (Yoh. 13:35; 1 Pet. 2:12) Tukwanisha kucita izi cifukwa cakuti Yesu otiyavya.

9. Molingana na Mateyu 24:45-47, kansi Yesu elosela kuti n’cinji cati cikacitike m’masiku osilizhya?

⁹ Ŵelengani Mateyu 24:45-47. Yesu elosela kuti m’masiku osilizhya, akasankhe “kapolo wokhulupilika na wanzelu,” kuti akopeleka cakulya cauzimu. Masiku ŵano, kapolo uyu ocita khama pokwanilisha udindo wecipasiwa. Yesu oseŵenzesha akwasu aŵa popeleka “cakulya cauzimu pa nthawi yoyenelela” kuli atumiki a Mulungu koma soti ŵanthu acidwi. Analume aŵa oziona lini monga kuti ni asogoleli ŵasu. (2 Akor. 1:24) M’malo mwake, ozindikila kuti Yesu Khristu niye “msogoleli koma soti wolamulila” ŵanthu ŵake.​—Yes. 55:4.

10. Pa zofalisa zaoneshewa pa cithunzithunzi, kansi ni cofalisa cotyani camene cekuyavyani kuti muyambe kuyenda pa njila ya ku moyo?

¹⁰ Kuyambila mu 1919, kapolo wokhulupilika wankhala ofumya zofalisa zosiyanasiyana pofuna kuyavya ŵanthu acidwi kuphunzila cendi copezeka m’Mau a Mulungu. Mu 1921, efumya buku yakuti Zeze wa Mulungu pofuna kuyavya ŵanthu acidwi kuphunzila mfundo zoyambilila za m’Baibo. M’kuluta kwa nthawi, efumya soti zofalisa ziyakine zosiyanasiyana. Kansi ni cofalisa cotyani cekuyavyani kuphunzila za Ausuwasu akululu noyamba kum’konda? Kansi ni buku yakuti  “Mulungu akhale woona,” Choonadi Chotsogolela ku Moyo Wosatha, Mungathe Kukhala ndi Moyo Kosatha m’Paradaiso Padziko Lapansi, Chidziwitso Chotsogolela ku Moyo Wosatha, Kodi Baibulo Limaphunzitsa Chiyani Kwenikweni?, Kansi Baibolo Ingatiphunzise Cinji?, kapena buku ya Sangalalani na Moyo Kosasila! yamene yefumyiwa lombapano? Mabuku yonse aya yepangiwa m’njila yakuti yakofwika ŵanthu pamtima kulingana na mwezenzele zinthu pacalo pa nthawi yamene iyo.

11. Ndaŵa yanji seo tonse kuyangizhyilapo na ŵala amene ayamba lombapano kuphunzila Baibo tufunika kuphunzila zinthu zozama zokhuza Yehova na Mau ŵake?

¹¹ Seo tonse, kuyangizhyilapo na ŵala amene ayamba lombapano kuphunzila Baibo, tufunika kuphunzila zinthu zozama zokhuza Yehova na Baibo. Mtumwi Paulo elaŵila kuti: “Cakulya cotafuna ni ca ŵanthu okhwima mwauzimu.” Eyangizhyila kuti kuseŵenzesha zinthu zatuphunzila m’Baibo kungatiyavye “kusiyanisha pakati pa coyenela na cosayenela.” (Aheb. 5:14) M’masiku ŵano osilizhya, n’cinthu lini cipepu kukonkha malamulo a Yehova cifukwa minkhalidwe ya ŵanthu yuipilaipila. Koma Yesu otiyavya kunkhala athanzi mwauzimu mwa kutipasa cakulya cauzimu pa nthawi yoyenelela. Cakulya ici cufumila m’Mau ouzhyiliwa a Mulungu, Baibo. Kapolo wokhulupilika na wanzelu okonza nopeleka cakulya ici mosogolelewa na Yesu.

12. Molingana na Yesu, kansi tuonesha tyani kuti tulemekeza zina ya Mulungu?

¹² Molingana na Yesu, tucita zonse zatingakwanishe kuti tioneshe kuti tulemekeza zina ya Mulungu. (Yoh. 17:6, 26) Mwacisanzo, mu 1931 teyamba kuziŵika na zina ya m’Malemba yakuti Mboni za Yehova. Izi zeonesha kuti tuona zina ya Mulungu kunkhala yofunika ngako na kuti tufuna kuziŵika na zina ya Ausuwasu akululu. (Yes. 43:10-12) Kuyambila mu October caka camene ici, zina  ya Mulungu yankhala yuikiwa pa cikuto ca magazini yosiyanasiyana. Kuyangizhyila apo, m’Baibulo la Dziko Latsopano, zina ya Mulungu yawezhyeleshewa m’malo yofunikila. Izi n’zosiyana ngako na machechi yacikhristu yamene yefumyamo zina ya Mulungu m’ma Baibo yao.

13. Kansi n’cinji cukusimikizhyilani kuti Yesu oseŵenzesha “kapolo wokhulupilika na wanzelu” masiku ŵano? (Yohane 6:68)

¹³ Kupitila mwa “kapolo wokhulupilika na wanzelu,” Yesu wankhazikisha gulu yooneka na menso pacalo yamene yucilikiza kulambila kutuŵa. Kansi mukumvwa tyani kunkhala pakati pa gulu iyi? Payakine mukumvwa monga ni mwecimvwila mtumwi Petulo wamene euzhya Yesu kuti: “Tingalute soti kwa ŵani? Mweo muli na mau a moyo wosasila.” (Yoh. 6:68) Kulaŵila cendi, kunkhala m’gulu iyi kuticitisha kuzimvwa kuti nise otetezeka. Kupitila m’gulu iyi, Yesu ooneshesha kuti tili na cakulya cauzimu na colinga cakuti tipitilizhye kutumikila Yehova mokhulupilika. Otiphunzisa soti mwatingalalikilile mokata mtima. Kuyangizhyila apo, otiyavya “kuvwala umunthu walomba” kuti tikondweleshe Yehova.​—Aef. 4:24.

14. Kansi tapindula tyani pa nthawi ya mlili wa COVID-19 cifukwa conkhala m’gulu ya Yehova?

¹⁴ Yesu opeleka malangizo anzelu pa nthawi zovuta. Mapindu a malangizo aŵa eonekela bwino peweyamba mlili wa COVID-19. Ŵanthu anyinji m’calo ici, enzoziŵa lini cocita. Koma Yesu eoneshesha kuti tapasiwa malangizo omvwika bwino na colinga cakuti tinkhale otetezeka. Telimbikishiwa kuvwala mamaski na kunkhala patali na patali ngati tili pagulu ya ŵanthu. Akulu ekumbushiwa  kuti ofunika kulaŵizhyana na akwasu na azilongosi na colinga cakuti aŵayavye kunkhala pa ushamwali wotang’a na Yehova. (Yes. 32:1, 2) Ndipo olo pali lomba, tulandila malangizo koma soti cilimbikiso kufumila m’malipoti ofumila ku Bungwe Yolamulila.

15. Kansi telandila malangizo otyani okhuza mocitila misonkhano koma soti ulaliki pa nthawi ino ya mlili, nanga pankhala zofumapo zotyani?

¹⁵ Mlili uyu peweyamba, telandila soti malangizo okhuza mwatingacitile misonkhano koma soti nchito yolalikila. M’kanthawi tyala katontho, teyamba kucita misonkhano yampingo, yadela na yacigao kupitila pa vidyokonfalensi. Teyamba soti kulalikila poseŵenzesha makalata na mafoni. Yehova edalisa kuyesayesa kwasu. Maofesi anyinji a msambo ecitila lipoti kuti ciŵelengelo ca ofalisa cayangizhyilika. Ndipo ofalisa anyinji ankhala na zofumapo zolimbikisha ngako pa nchito yolalikila.​—Onani bokosi yakuti “ Yehova Edalisa Khama Yasu pa Nchito Yolalikila.”

16. Kansi tingankhale osimikizhya za cinji?

¹⁶ Poyamba, ŵanthu ayakine enzoona monga gulu ya Yehova yukosesha zinthu pa nthawi ino ya mlili. Koma m’kuluta kwa nthawi, zeonekelatu kuti malangizo yatenzolandila yenze yoyavya. (Mat. 11:19) Kusinkhasinkha mwamene Yesu osogolelela ŵanthu ŵake mwacikondi, kutisimikizhyila kuti mosasamala kanthu na zati zicitike msogolo, Yehova na Mwana wake wokondeka, apitilizhye kutiteteza.​—Ŵelengani Aheberi 13:5, 6.

17. Kansi mukumvwa tyani cifukwa cosogolelewa na Yesu?

¹⁷ Tuyamikila ngako kuti Yesu otisogolela! Nise mbali ya gulu yamene ni yokatizhyana mosasamala kanthu kuti tufumila m’vyalo vosiyanasiyana koma soti tulaŵila vilaŵilo vosiyanasiyana. Tulandila malangizo kufumila m’Mau a Mulungu ndipo tuphunzisiwa mwatingacitile nchito yolalikila. Aliyense payeka olimbikishiwa kuvwala umunthu walomba nokulisha nkhalidwe yacikondi. Kulaŵila cendi, tili na cifukwa comvwika coyamikilila Yehova potipasa msogoleli wacikondi, Yesu Khristu!