1. Ndaŵa yanji Yehova elenga vinthu va moyo?

POYAMBA Yehova enze yeka, koma izi ziliyomucitishe kunkhala wokhumudwa. Yove ofunikila lini kunkhala na munthu kuti asangalale. Olo n’tetyo, Mulungu efuna kuti ŵanthu asangalale na moyo. Cifukwa ca cikondi, Yehova eyamba kulenga vinthu va moyo.​—Sal. 36:9; 1 Yoh. 4:19.

2. Kansi Yesu na angelo ecimvwa tyani pevelengewa vinthu viyakine?

² Coyamba, Yehova elenga Mwana wake Yesu. Ndipo kupitila mwa Yesu, “vinthu vonse velengewa,” kuyangizhyilapo mamiliyoni ya angelo. (Akol. 1:16) Yesu ekondwela ngako kuseŵenzela pamozi na Ausuwake. (Miy. 8:30) Nao angelo ekondwela ngako Yehova na Yesu pecilenga kululu na calo. Kansi eonesha tyani kuti ekondwela? “Eyamba kutamanda Mulungu mokuwa” pecelengewa calo, ndipo epitilizhya kumutamanda peenzoona kulengewa kwa vinthu viyakine, makamaka ŵanthu. (Yobu 38:7; Miy. 8:31) Vonse vecilenga Yehova vuonesha cikondi na nzelu zake.​—Sal. 104:24; Aro. 1:20.

3. Molingana na 1 Akorinto 15:21, 22, kansi n’cinji cekwanishika cifukwa ca nsembe ya dipo ya Yesu?

³ Yehova enzofuna kuti ŵanthu ankhale na moyo wosasila m’calo cokongola. Koma Adamu na Eva pecipondokela Ausuwao acikondi, ucimo na imfwa zeloŵa m’calo. (Aro. 5:12) Kansi Yehova ecitapo cinji? Nthawi yamene  iyo, epanga makonzedwe yakuti apulumuse ŵanthu. (Gen. 3:15) Yehova etwala Mwana wake monga nsembe ya dipo kuti apulumuse ŵanthu ku ucimo na imfwa. Tetyo, Mulungu akapase moyo wosasila ŵanthu amene osankha kumutumikila.​—Yoh. 3:16; Aro. 6:23; ŵelengani 1 Akorinto 15:21, 22.

4. Tilaŵizhyane makonsho otyani m’nkhani ino?

⁴ Tingankhale na makonsho anyinji okhuza ciukililo. Mwacisanzo, tingazikonshe kuti: Kansi ciukililo cikacitike tyani? Ko tikakwanishe kuzindikila okondeka ŵasu akayoukishiwa? Kansi ciukililo cikatipase tyani cimwemwe? Ko kusinkhasinkha za ciukililo kungatiyavye tyani kuyamikila cikondi, nzelu na kuleza mtima kwa Yehova? Lomba, tiyeni tilaŵizhyane makonsho amene aŵa.

5. Ndaŵa yanji tulaŵila kuti ŵanthu akaukishiwe mwadongosolo?

⁵ Yehova kupitila mwa Yesu akayoyamba kuukisha akufwa, tingayembekezele lini kuti onse akauke pa nthawi imozi. Ndaŵa yanji? Cifukwa kungayonkhala msokonezo pacalo ngati ŵanthu onse angaukile pamozi. Yehova ni Mulungu wadongosolo, ndipo oziŵa kuti vinthu vufunika kucitika mwadongosolo kuti pacalo pankhale mtendele. (1 Akor. 14:33) Yehova eonesha kuti ni wanzelu koma soti woleza mtima peenzoseŵenza na Yesu polenga calo kuti ŵanthu ankhalemo. Naye Yesu akaoneshe kuti ni wanzelu koma soti woleza mtima mu ulamulilo wa vyaka 1,000. Yove akaseŵenzele pamozi na ŵati akapulumuke pa Aramagedo poyavya ŵanthu ati akaukishiwe kuti  akankhale na mang’anda koma soti viyakine vofunikila.

6. Molingana na Machitidwe 24:15, ko ni ŵani ati akaukishiwe?

⁶ Kupambana zonse, ŵanthu ati akapulumuke pa Aramagedo akafunikile kuphunzisa oukishiwa za Ufumu wa Mulungu na malamulo a Yehova. Ndaŵa yanji? Cifukwa anyinji ati akaukishiwe akankhale ŵanthu amene Baibo yuŵaita kuti “osalungama.” (Ŵelengani Machitidwe 24:15.) Tetyo, akafunikile kucinja kuti akapindule na madaliso a nsembe ya Yesu nonkhala na moyo wosasila. Ganizilani tyala kukula kwa nchito yati tikankhale nayo yophunzisa ŵanthu mamiliyoni za Yehova. Kansi munthu aliyense akankhale na womuphunzisa monga ni mwatusogozela maphunzilo a Baibo masiku ŵano? Ko ŵanthu amene aŵa akapasiwe mipingo nophunzisiwa kuti nao akaphunziseko ŵati akaukishiwe pavuli pao? Pali pano tuziŵa lini mwati zikankhalile. Catuziŵa n’cakuti pofwika kosilizhyila kwa vyaka 1,000 va ulamulilo wa Yesu, “calo cikazule na ŵanthu oziŵa Yehova.” (Yes. 11:9) Tikankhale na nchito yosangalasha m’vyaka 1,000.

7. Ndaŵa yanji atumiki a Yehova akafunikile kunkhala acifundo poyavya oukishiwa?

⁷ Mu ulamulilo wa Khristu wa vyaka 1,000, atumiki a Yehova pacalo akafunikile kupitilizhya kucinja mbali ziyakine kuti amukondweleshe. Tetyo, atumiki a Mulungu akafunikile kunkhala acifundo poyavya oukishiwa kuti agonjese maganizo na vilakolako viipa, nonkhala mokatizhyana na malamulo a Yehova. (1 Pet. 3:8) Mosakaikila, ŵanthu oukishiwa akaone kuti atumiki a Yehova ni olicefya, cifukwa akapitilizhye kucinja kuti amukondweleshe. Ndipo izi zikacitishe kuti nao ayambe kutumikila Yehova.​—Afil. 2:12.

8. Ndaŵa yanji tukhulupilila kuti tikakwanishe kuzindikila abanja na ashamwali ŵasu ati akaukishiwe?

⁸ Pali vifukwa vinyinji vutipangisha kukhulupilila kuti ŵala ati akalondele oukishiwa akakwanishe kuzindikila okondeka ŵao. Mwacisanzo, tikaona mwamene Yehova eukishila ŵanthu m’nthawi zakuvuli, tuyembekezela kuti oukishiwa akoganiza, kulaŵila nooneka monga ni mweenzele akaliyokufwa. Kumbukilani kuti Yesu elinganizhya imfwa na tulo, ndipo ciukililo ecilinganizhya na kuushiwa m’tulo. (Mat. 9:18, 24; Yoh. 11:11-13) Ngati munthu wauka m’tulo, olaŵila nooneka monga ni mweenzele akaliyolala, ndipo okumbukila vonse vacitika akaliyolala. Ganizilani cisanzo ca Lazaro. Yove enze wakufwa kwa masiku 4 ndipo enze eyamba kuola. Koma Yesu pecimuukisha, azilongosi ŵake emuzindikila ndipo naye eŵakumbukila.​—Yoh. 11:38-44; 12:1, 2.

9. Ndaŵa yanji ŵanthu akaukishiwe lini angwilo?

⁹ Yehova elonjeza kuti m’Paladaiso kuliye ati akanene kuti: “Nulwala.” (Yes. 33:24; Aro. 6:7) Tetyo, ŵanthu ati akaukishiwe akankhale na thanzi iweme, koma izi zutanthauza lini kuti akankhale angwilo nthawi yamene iyo. Ngati zingankhale tetyo, niye kuti abanja ŵao angayokangiwa kuŵazindikila. Cuoneka kuti ŵanthu onse akonkhala angwilo patontho-patontho mu ulamulilo wa vyaka 1,000. Posilizhyila pa vyaka 1,000, Yesu akawezhyele Ufumu kwa Ausuwake. Ndipo Ufumu ukasilizhye nchito yonse, kuyangizhyilapo  kuyavya ŵanthu kuti ankhale angwilo.​—1 Akor. 15:24-28; Chiv. 20:1-3.

10. Kansi ciukililo cikakukhuzeni tyani?

¹⁰ Ganizilani cimwemwe cati mukankhale naco kulondela okondeka ŵanu ecifwa. Kansi cimwemwe cati mukankhale naco, cikakupangisheni kuseka kapena kulila? Ko mukankhale osangalala cakuti mukaimbe nyimbo yotamanda Yehova? Nise osimikizhya kuti cikondi casu pa Yehova na Mwana wake Yesu cikakule cifukwa ca ciukililo.

11. Molingana na mau a Yesu opezeka pa Yohane 5:28, 29, kansi ŵanthu ati akacinje akalondele madaliso otyani?

¹¹ Ganizilani cimwemwe cati akankhale naco ŵanthu ati akaukishiwe akayovula umunthu wakale nonkhala mokatizhyana na malamulo a Mulungu. Ŵala ati akacinje, akankhale na moyo wosasila m’Paladaiso. Koma ŵala ati akakane kucinja Yehova akaŵalole lini kunkhala m’paladaiso cifukwa angayoleta msokonezo.​—Yes. 65:20; ŵelengani Yohane 5:28, 29.

12. Kansi ŵanthu ati akankhale pacalo akadalisiwe tyani na Yehova?

¹² Mu Ufumu wa Mulungu, atumiki a Mulungu akaone kukwanilishika kwa mau opezeka pa Miyambo 10:22 akuti: “Madaliso a Yehova olemelesha, ndipo oyangizhyilapo lini ululu.” Moyavyiwa na mzimu utuŵa, atumiki a Yehova akankhale olemela mwauzimu, kutanthauza kuti akankhale angwilo monga ni Khristu. (Yoh. 13:15-17; Aef. 4:23, 24) Siku iliyonse miŵili yao ikonkhala yathanzi koma soti yotang’a. Kulaŵila cendi, ukankhale moyo wosangalasha ngako! (Yobu 33:25) Kansi kusinkhasinkha za ciukililo kungatiyavye tyani masiku ŵano?

13. Molingana na Salimo 139:1-4, kansi ciukililo cuonesha tyani kuti Yehova otiziŵa luweme?

¹³ Monga ni mwataphunzilila koyambilila, Yehova akayoukisha ŵanthu, akaŵacitishe kunkhala na maganizo na minkhalidwe yeenze nayo akaliyokufwa. Izi zutanthauza kuti Yehova otikonda ngako cakuti oziŵa zatuganiza, zatulaŵila, zatucita na mwatumvwila. Tetyo, ngati tafwa, akatiukishe na maganizo koma soti minkhalidwe yetenze nayo tikaliyokufwa. Mfumu Davide enzoziŵa kuti Yehova oziŵa luweme munthu aliyense. (Ŵelengani Salimo 139:1-4.) Kansi tukumvwa tyani tikaziŵa kuti Yehova otiziŵa luweme?

14. Kansi tukumvwa tyani tikaziŵa kuti Yehova otiziŵa luweme?

¹⁴ Kusinkhasinkha mwaakutiziŵila Yehova kufunika lini kuticitisha nkhaŵa. Ndaŵa yanji? Kumbukilani kuti Yehova otisamalila ndipo otiona kuti nise ofunika ngako. Ndipo oziŵa vonse vatukumana navo pa umoyo wasu. Kuziŵa izi kutitonthoza ngako ndipo tufunika lini kuzimvwa kuti tili seka. Yehova ali nase nthawi zonse ndipo ofuna kutiyavya.​—2 Mbi. 16:9.

15. Kansi ciukililo cuonesha tyani nzelu za Yehova?

¹⁵ Ngati ŵanthu oyopa kufwa, adani ŵao angaŵakakamizhye kucita vinthu viipa mwa kuŵayofya kuti aŵapaye. Ŵanthu amene ali ku mbali ya Satana oseŵenzesha njila yamene iyi kuti acitishe ŵanthu amene oyopa imfwa kuyamba kucita vinthu viipa. Koma seo angatikakamizhye lini kucita zamene izi. Tuziŵa  kuti ngati adani ŵasu angatipaye, Yehova akatiukishe. (Chiv. 2:10) Nise osimikizhya kuti paliye ciliconse cingatikangishe kunkhala pa ushamwali na Yehova. (Aro. 8:35-39) Yehova waonesha kuti ni wanzelu ngako potipasa ciyembekezo ca ciukililo. Cifukwa ca izi, tuyopa lini ngati ŵanthu ali ku mbali ya Satana otiyofya kuti atipaye. Tunkhala otang’a mtima nopitilizhya kunkhala okhulupilika kwa Yehova.

16. Kansi tufunika kuzikonsha makonsho otyani, nanga mayankho ŵake angatiyavye tyani kuziŵa ngati tudalila Yehova?

¹⁶ Ngati adani a Yehova okuyofyani kuti akupayeni, kansi mungankhale na cidalilo cakuti Yehova akakuukisheni? Kansi tingaziŵe tyani kuti tili na cidalilo camene ici? Njila imozi yatingaziŵile ni mwa kuzikonsha kuti, ‘Kansi vosankha vitontho-vitontho vanupanga siku iliyonse, vuonesha kuti nudalila Yehova?’ (Luka 16:10) Tingazikonshe soti kuti, ‘Ko umoyo wangu uonesha kuti nudalila lonjezo ya Yehova yakuti anisamalile ngati nuika Ufumu wake pasogolo?’ (Mat. 6:31-33) Ngati mwayankha kuti eee pa makonsho aya, niye kuti mudalila Yehova, ndipo munkhale okonzeka kupilila mayeselo yamungakumane nayo.​—Miy. 3:5, 6.

17. (a) Kansi ciukililo cuonesha tyani kuti Yehova ni woleza mtima? (b) Tingaoneshe tyani kuyamikila pa kuleza mtima kwa Yehova?

¹⁷ Yehova oziŵa siku na nthawi yati akalete cionongeko. (Mat. 24:36) Yove angalete lini cionongeko nthawi yake ikaliyokwana. Olakalaka kuukisha akufwa, koma akaluleza mtima. (Yobu 14:14, 15) Oyembekeza tyala nthawi yakuti akaŵaukishe. (Yoh. 5:28) Tili na vifukwa viweme vutipangisha kuyamikila kuleza mtima kwa Yehova. Ganizilani tyala: Cifukwa ca kuleza mtima kwa Yehova, ‘ŵanthu onse apasiwa mpata wakuti alape.’ (2 Pet. 3:9) Yehova ofuna kuti ŵanthu onse akapeze moyo wosasila. Tetyo, tufunika kuyamikila kuleza mtima kwake. Motyani? Mwa kuyesayesa kusakila ŵanthu amene ali na ‘maganizo oyenela amene angaŵayavye kuti akapeze moyo wosasila,’ noŵayavya kukonda Yehova nomutumikila. (Mac. 13:48) Tikacita izi, nao apindule na kuleza mtima kwa Yehova monga ni mwatapindulila seo.

18. Ndaŵa yanji tufunika kucita vinthu moleza mtima na ayakine?

¹⁸ Yehova apitilizhye kuleza mtima mpaka kosilizhyila kwa vyaka 1,000 pati  tikankhale angwilo. Mpaka nthawi yamene iyo, Yehova apitilizhye kutikhululukila macimo. Tetyo, tufunika kukonkha cisanzo cake mwa kulolesha pa viweme vakucita ayakine, noŵalezela mtima. Ganizilani cisanzo ca kalongosi wamene mulume wake eyamba kuvutika na nkhaŵa yopitilila malile, ndipo eleka kusonkhana. Kalongosi uyu elaŵila kuti: “Izi zeniŵaŵa ngako cifukwa vinthu vecinja mosayembekezeleka pa umoyo wasu, ndipo tenzokwanisha lini kucita vetenzofuna.” Pa nthawi yonse iyi, munakazi wacikondi uyu epitilizhya kucita vinthu moleza mtima na mulume wake. Yove edalila Yehova ndipo aliyotaye mtima. Molingana na Yehova, yove enzololesha pa vinthu viweme veenzocita mulume wake, m’malo moganizila za vuto yecikumana nayo. Elaŵila kuti, “Mulume wangu ali na minkhalidwe iweme, ndipo oyesayesa kugonjesa nkhaŵa yake patontho-patontho.” N’cinthu cofunika ngako kunkhala oleza mtima kuli a m’banja mwasu na a mumpingo amene oyesayesa kugonjesa mavuto.

19. Kansi tufunika kunkhala osimikizhya kucitanji?

¹⁹ Yesu na angelo ekondwela ngako pecilengewa calo. Ganizilani tyala cimwemwe cati akankhale naco poona calo cozula na ŵanthu angwilo amene okonda Yehova nomutumikila. Ganizilani soti cimwemwe cati akankhale naco ŵala ati akalamulile na Yesu kuona ŵanthu opindula na nchito yao. (Chiv. 4:4, 9-11; 5:9, 10) Ganizilani soti mwati tikamvwile kunkhala m’calo mwamene muliye voŵaŵa, matenda, cisoni na imfwa. (Chiv. 21:4) Mpaka pa nthawi yamene iyo, tufunika kunkhala osimikizhya kutolela cikondi, nzelu na kuleza mtima kwa Ausuwasu akululu. Tikacita tetyo, tipitilizhye kunkhala acimwemwe olo tikumane na mavuto otyani. (Yak. 1:2-4) Nise oyamikila ngako soti lonjezo ya Yehova yakuti “kukankhale kuuka.”​—Mac. 24:15.