1. Kansi mtumiki aliyense wa Yehova wapasiwa cinji?

MWACIKONDI, Yehova wapasa mtumiki wake aliyense mbali mumpingo. Olo kuti tili na mbali zosiyanasiyana, aliyense ni wofunika. Mtumwi Paulo otiyavya kumvwisha mfundo yamene iyi. Motyani?

2. Molingana na Aefeso 4:16, ndaŵa yanji tufunika kuona ayakine kuti ni ofunika noseŵenzela nao pamozi?

² Molingana na lemba pafumila nkhani ino, Paulo egogomezela mfundo yakuti paliye mtumiki wa Yehova angauzhye muyakine kuti: “Niliye nawe nchito.” (1 Akor. 12:21) Kuti mumpingo munkhale mtendele, tufunika kuona ayakine kuti ni ofunika noseŵenzela nao pamozi. (Ŵelengani Aefeso 4:16.) Ngati tuseŵenzela pamozi mokatizhyana, aliyense angazimvwe kuti ni wokondewa koma soti mpingo unkhale wotang’a.

3. Kansi tilaŵizhyane cinji m’nkhani ino?

³ Kansi tingaoneshe tyani kuti tulemekeza Akhristu ayasu mumpingo? M’nkhani ino tilaŵizhyane: Mwamene akulu angaoneshele kuti olemekeza akulu ayao, mwatingaoneshele kuti tulemekeza akwasu na azilongosi amene ni mbeta, koma soti mwatingaoneshele kuti tulemekeza ŵanthu amene oziŵa lini ngako cilaŵilo casu.

4. Kansi ni malangizo otyani opezeka pa Aroma 12:10, yamene akulu ofunika kukonkha?

⁴ Akulu onse mumpingo osankhiwa na mzimu utuŵa. Olo n’tetyo, aliyense ali na maluso osiyana na yaali nayo ayakine. (1 Akor. 12:17, 18) Ayakine onkhala kuti eyamikiliwa calombapano ndipo oziŵa lini zinyinji polinganizhya na akulu ayakine. Ayakine okangiwa kucita zinyinji cifukwa ca ukulukazi na kufooka kwa thanzi. Nangu n’tetyo, paliye mkulu ofunika kuuzhya akulu ayake kuti “niliye namwe nchito.” M’malomwake, ofunika kukonkha malangizo opezeka pa Aroma 12:10.​—Ŵelengani.

5. Kansi akulu angaoneshe tyani kuti olemekeza akulu ayao, ndipo ndaŵa yanji kucita zamene izi n’kofunika?

⁵ Akulu oonesha kuti olemekeza akulu ayao ngati omvwishila mosamala akulu ayao ngati olaŵila. Ndaŵa yanji kucita izi n’kofunika? Nsanja ya Olonda ya October 1, 1988, yelaŵila kuti: “Akulu ofunika kuzindikila kuti Khristu poseŵenzesha mzimu utuŵa, angacitishe mkulu aliyense pa bungwe ya akulu kulaŵila mfundo ya m’Baibo, yamene ingayavye kuti asilizhye vuto iyakine olo kuti apange cosankha cofunika. (Mac. 15:6-15) Paliye mkulu opambana akulu ayake pa bungwe.”

6. Kansi akulu angaseŵenzele tyani pamozi mokatizhyana, ndipo mpingo ungapindule tyani ngati ocita izi?

⁶ Mkulu wamene olemekeza akulu ayake, onkhala lini woyamba kulaŵila nthawi zonse pa miting’i ya akulu. Yove olaŵilapo lini ngako ndipo oona lini kuti maganizo yake niye ofunika ngako. M’malomwake, ofotokoza maganizo yake molicefya, ndipo omvwishila mosamala ngati ayakine olaŵila. Koma copambana vonse, onkhala wofunishisha kulaŵizhyana mfundo za m’Malemba ndipo okonkha malangizo ya “kapolo wokhulupilika na wanzelu.” (Mat. 24:45-47) Ngati akulu olaŵizhyana mwacikondi na mwaulemu, mzimu wa Mulungu ungaŵayavye kupanga vosankha vamene vingatang’ishe mpingo.​—Yak. 3:17, 18.

7. Kansi Yesu enzoŵaona tyani ŵanthu amene enze mbeta?

⁷ Masiku ŵano, mumpingo mupezeka Akhristu olungulana na mbeta. Kansi tufunika kuŵaona tyani Akhristu amene ni mbeta? Ganizilani mwamene Yesu enzoonela mbeta. Pa utumiki wake wa pacalo, Yesu aliyolungule, ndipo epitilizhya kuika maganizo yake pa nchito yecimupasa. Yesu aliyophunzise kuti kunkhala mbeta olo kukwatila niye ciyeneleso conkhala Mkhristu. Nangu n’tetyo, yove elaŵila kuti Akhristu ayakine akosankha kunkhala mbeta. (Mat. 19:11, 12) Yesu enzolemekeza ngako ŵanthu amene enze mbeta. Enzoona lini mbeta monga ni ŵanthu okangiwa olo kuŵaona kuti enzosoŵekela cinthu ciyakine cofunika.

8. Molingana na 1 Akorinto 7:7-9, kansi Paulo elimbikisha Akhristu kucitanji?

⁸ Molingana na Yesu, mtumwi Paulo aliyolungule pa nthawi yonse ya utumiki wake. Koma yove aliyophunzise kuti Mkhristu ofunika lini kulungula, cifukwa enzoziŵa kuti ici n’cosankha ca munthu aliyense payeka. Nangu n’tetyo, elimbikisha Akhristu kutumikila Yehova monga mbeta ngati angakwanishe. (Ŵelengani 1 Akorinto 7:7-9.) N’zoonekelatu kuti Paulo enzoona lini Akhristu amene enze mbeta kunkhala atyalatyala kapena okangiwa. Tuziŵa izi cifukwa yove esankha wacilumbwana Timoteyo, wamene enze mbeta, kusamalila maudindo akulu-akulu. * (Afil. 2:19-22) Tetyo, kungankhale kulakwa kuganiza kuti kulungula olo kusalungula niye kungacitishe mkwasu kuyenelela udindo.​—1 Akor. 7:32-35, 38.

9. Kansi tufunika kuiona tyani nkhani yolungula olo kunkhala mbeta?

⁹ Pofwana kuti Yesu na Paulo aliyophunzise kuti Akhristu ofunika kulungula kapena kunkhala mbeta, kansi tufunika kuiona tyani nkhani yolungula olo kunkhala mbeta? Nsanja ya Olonda ya October 1, 2012, yefotokoza kuti: “Kulaŵila cendi, kulungula kapena umbeta ni mphaso yofumila kwa Mulungu. . . . Yehova oona lini umbeta kunkhala cinthu cocitisha nsoni.” Tetyo, tufunika kulemekeza akwasu na azilongosi amene ni mbeta mumpingo.

10. Kansi tingaoneshe tyani kuti tulemekeza akwasu na azilongosi amene ni mbeta?

 ¹⁰ Kansi tingaoneshe tyani kuti tulemekeza akwasu na azilongosi amene ni mbeta? Tufunika kukumbukila kuti Akhristu ayakine ecitosankha kunkhala mbeta. Ayakine ofuna kuloŵa m’banja, koma akaliyopeza munthu woŵayenelela. Koma ayakine ni mbeta cifukwa muyao wa m’cikwati emwalila. Tetyo, cingankhale lini luweme kuŵakonsha cifukwa cake akali mbeta olo kuŵapezela munthu olungulana naye. N’cendi kuti Akhristu ayakine angakusengeni kuti muŵayavye kupeza munthu wolungulana naye. Ko muganiza kuti angamvwe tyani ngati mungacite izi cosakusengani? (1 Ates. 4:11; 1 Tim. 5:13) Lomba, tiyeni tilaŵizhyane zecilaŵila akwasu na azilongosi amene ni mbeta.

11-12. Kansi ni vinthu votyani vingafookeshe ŵanthu amene ni mbeta?

¹¹ Woyanganila dela muyakine wamene ni mbeta ndipo ocita luweme utumiki wake, oona kuti kunkhala mbeta kuli na mapindu anyinji. Koma elaŵila kuti cunkhala cofookesha ngati mkwasu kapena kalongosi wokhwima kuuzimu okukonsha kuti: “Ndaŵa yanji mukaliyolungula?” Mkwasu wamene ni mbeta ndipo otumikila pa ofesi ya msambo elaŵila kuti: “Nuona kuti nthawi ziyakine akwasu na azilongosi oganiza kuti ŵanthu amene ni mbeta ofunika kuŵamvwila cifundo. Izi zucitisha kuti umbeta ukooneka monga ni cinthu covuta m’malo mouona kuti ni daliso.”

¹² Kalongosi wamene ni mbeta ndipo otumikila pa Beteli, elaŵila kuti: “Ofalisa ayakine oganiza kuti ŵanthu onse amene ni mbeta osakila munthu wolungulana naye. Ove oganiza kuti ngati ŵanthu amene ni mbeta apezeka pa gulu, ouona kuti ni mpata wakuti apeze wolungulana naye. Nthawi iyakine netumiwa na ofesi ya msambo kudela iyakine. Petenzoluta ku misonkhano m’cingulo, kalongosi wenenzonkhala naye eniuzhya kuti mumpingo mwao muli akwasu aŵili amsinkhu wangu. Yove eniuzhya kuti enzofuna lini kunipezela munalume. Koma peteloŵa m’Ng’anda ya Ufumu, yove enitwala kwenze akwasu aŵili ŵeciniuzhyapo. Tonse atatu tesoŵa colaŵila ndipo tecimvwa nsoni ngako.”

13. Ni vocitika votyani velimbikisha kalongosi wamene ni mbeta?

¹³ Kalongosi muyakine wamene otumikila pa Beteli koma soti ni mbeta, eciti: “Pali apainiya akulu-akulu amene ni mbeta. Ove onkhala otang’a, ozitwala koma soti okhutila na utumiki wao ndipo onkhala ofunika ngako mumpingo. Onkhala na maganizo oyenela pa nkhani ya umbeta, oziona lini kuti ni apalulu ngako kupambana ayakine tyala cifukwa cakuti ni mbeta olo kuona kuti angasangalale ngati ali na muyao wa m’cikwati.” N’cosangalasa ngako kunkhala mumpingo wamene aliyense olemekeza muyake nokondana. Uziŵa soti kuti akwasu na azilongosi okumvwila lini cifundo, kukucitila nsanje, kukusula kapena kukuona kuti niwe wapalulu ngako kupambana ove. Koma uona tyala kuti okukonda.

14. Kansi tingaoneshe tyani kuti tulemekeza akwasu na azilongosi amene ni mbeta?

¹⁴ Akwasu na azilongosi amene ni mbeta angasangalale ngati tuŵakonda cifukwa ca minkhalidwe yao iweme osati cifukwa cakuti ni mbeta. M’malo moŵamvwila cifundo, tingacite luweme kuŵayamikila cifukwa ca  kukhulupilika kwao. Tikacita izi, akwasu na azilongosi amene ni mbeta akokumvwa lini monga tuŵauzhya kuti “Niliye namwe nchito.” (1 Akor. 12:21) Koma akoona kuti tuŵalemekeza ndipo tuŵaona kuti ni ofunika mumpingo.

15. Kansi akwasu na azilongosi ayakine acita zotyani pofuna kucita zinyinji potumikila Yehova?

¹⁵ M’vyaka valombapano, ofalisa anyinji ankhala na colinga cophunzila cilaŵilo ciyakine na colinga cakuti ayangizhyile utumiki wao. Kucita izi, kufuna kucinja vinthu viyakine mu umoyo. Akwasu na azilongosi aŵa osiya mipingo yuseŵenzesha cilaŵilo cao na colinga cakuyotumikila ku mipingo yuseŵenzesha cilaŵilo ciyakine kwamene kufunikila ofalisa anyinji. (Mac. 16:9) Akhristu opanga cosankha ici na colinga cofuna kucita vinyinji potumikila Yehova. Olo kuti pangapite vyaka kuti aciziŵe luweme cilaŵilo ciyakine, Akhristu aŵa oyavya mpingo m’njila zinyinji. Minkhalidwe yao iweme na cisanzo cao zutang’isha akwasu na azilongosi mumpingo. Tuŵakonda ngako akwasu na azilongosi ozitwala amene aŵa.

16. Kansi akulu ofunika kuseŵenzesha cinji popenda mkwasu kuti ankhale mkulu olo mtumiki woyavya?

¹⁶ Bungwe ya akulu yufunika kuyamikila mkwasu kutumikila monga mkulu olo mtumiki woyavya nangu kuti oziŵa lini luweme cilaŵilo. Akulu ofunika kuseŵenzesha ziyeneleso za m’Malemba popenda mkwasu kuti atumikile monga mkulu olo mtumiki woyavya, osati cifukwa cakuti oziŵa lini cilaŵilo cuseŵenzeshewa na mpingo.​—1 Tim. 3:1-10, 12, 13; Tito 1:5-9.

17. Kansi banja yufunika kuzikonsha makonsho otyani ngati yakukila ku calo ciyakine?

¹⁷ Mabanja ayakine Acikhristu okukila ku calo ciyakine kuyosakila nchito. Ngati zankhala tetyo, ŵana ŵao angafunike kuphunzila cilaŵilo culaŵiliwa na ŵanthu a m’calo camene ico. Makolo nao angafunike kuphunzila cilaŵilo camene ico pofuna kuti apeze nchito. Nanga tyani ngati kwapezeka mpingo olo kagulu koseŵenzesha cilaŵilo cao? Kansi banja yufunika kuluta ku mpingo useŵenzesha cilaŵilo cotyani? Ko angafunike kuluta ku mpingo useŵenzesha cilaŵilo ca m’calo camene ico olo cilaŵilo cao?

18. Molingana na Agalatiya 6:5, tingaoneshe tyani kuti tulemekeza cosankha ca mutu wa banja?

¹⁸ Mutu wa banja niye ofunika kusankha mpingo kwati ikosonkhana banja. Cifukwa cakuti ni udindo wake, yove ofunika kuganizila zofuna za banja yake. (Ŵelengani Agalatiya 6:5.) Tufunika kulemekeza cosankha cake noona banja yake kunkhala yofunika mumpingo mwasu.​—Aro. 15:7.

19. Kansi mitu ya mabanja yufunika kusenga cinji?

 ¹⁹ Mabanja ayakine angotumikila mumpingo useŵenzesha cilaŵilo ca makolo, koma ŵana angociziŵa lini luweme cilaŵilo camene ico. Ngati mpingo uyo uli m’dela yulaŵila cilaŵilo ca m’calo camene ico, cingankhale covuta ku ŵana kuti akopindula na misonkhano m’cilaŵilo ca makolo ŵao ndipo angalute lini pasogolo mwauzimu. Ndaŵa yanji? Cifukwa ŵana akaluta kusukulu angoseŵenzesha cilaŵilo ca m’calo camene ico osati ca makolo ŵao. Zikankhala tetyo, mitu ya mabanja yufunika kusenga nzelu kuti aziwe zakufunika kucita kuti ayavye ŵana ŵao kunkhala pa ushamwali na Yehova, koma soti atumiki ŵake. Payakine angafunike kuyavya ŵana ŵao kuziŵa cilaŵilo cao olo angafunikile kukukila kumpingo useŵenzesha cilaŵilo cakuziŵa ŵana ŵao. Ciliconse caangasankhe mutu wabanja, mpingo waasankha kutumikilako ufunika kuŵaonesha cikondi noŵalemekeza.

20. Tingaoneshe tyani kuti tulemekeza akwasu na azilongosi amene ophunzila cilaŵilo calomba?

²⁰ Pa mfundo zonse zatalaŵizhyana, m’mipingo inyinji muli akwasu na azilongosi amene ovutika kuphunzila cilaŵilo calomba. Angovutika kufotokoza maganizo yao. Tetyo, ngati tuona mwakuyesesela kulaŵila cilaŵilo calomba, niye patingaone mwakukondela Yehova nakuti ofunishisha kumutumikila. Tikaona minkhalidwe yao iweme, tingayambe kuŵakonda noŵalemekeza ngako akwasu na azilongosi aŵa. Tetyo, tingalaŵile lini kuti “Niliye namwe nchito” cifukwa cakuti ociziŵa lini luweme cilaŵilo casu.

21-22. Kansi Yehova watipasa mwai wanji?

²¹ Yehova watipasa mwai wonkhala na mbali mumpingo wake. Kaya nise analume, anakazi, mbeta, olungula, ŵana, akulukazi, tulaŵila luweme cilaŵilo olo tuciziŵa lini ngako, tonse nise ofunika ngako kwa Yehova na kuli ayakine.​—Aro. 12:4, 5; Akol. 3:10, 11.

²² Tiyeni tipitilizhye kuseŵenzesha mfundo ziweme zataphunzila pa cisanzo ceciseŵenzesha Paulo ca muŵili wa munthu. Kucita izi kungatiyavye kuziŵa zatingacite kuti tilimbikishe akwasu na azilongosi. Kutiyavye soti kuti tikoŵakonda noŵalemekeza.