1. Kansi tili na mwai wotyani?

NI MWAI ukulu ngako kunkhala mbali ya gulu ya Yehova. Tili m’paladaiso wauzimu mwamene muli ŵanthu amtendele koma soti osangalala. Kansi muli na mbali yotyani mumpingo?

2. Ko mtumwi Paulo eseŵenzesha cisanzo cotyani m’makalata ŵake ouzhyiliwa?

² Tingaphunzile zinyinji pa nkhani iyi kufumila pa cisanzo ceciseŵenzesha mtumwi Paulo m’makalata ŵake ouzhyiliwa. M’kalata iliyonse, Paulo elinganizhya mpingo na muŵili wa munthu. Yove elinganizhya soti munthu aliyense mumpingo na viwalo va muŵili.​—Aro. 12:4-8; 1 Akor. 12:12-27; Aef. 4:16

3. Kansi tilaŵizhyane mbali zitatu zotyani m’nkhani ino?

³ M’nkhani ino, tilaŵizhyane zinthu zitatu zatingaphunzile pa cisanzo ceciseŵenzesha Paulo. Coyamba, tiphunzile kuti aliyense ali na mbali * yofunika ngako mumpingo. Caciŵili, tilaŵizhyane zatingacite ngati tuvutika kuzindikila mbali yasu mumpingo. Cacitatu, tilaŵizhyane cifukwa cake tufunika kunkhala otangwanika kuti tikwanilishe mbali yasu mumpingo.

4. Kansi lemba ya Aroma 12:4, 5 yutiphunzisa cinji?

⁴ Mfundo yoyamba yatingaphunzile pa cisanzo ceciseŵenzesha Paulo ni yakuti, aliyense ali na mbali yofunika ngako mumpingo wa Yehova. Paulo eyamba cisanzo cake mwa kulaŵila kuti: “Monga ni mwaulili muŵili wamene uli na viwalo vinyinji ndipo viwalo ivi vukata lini nchito yolingana, nase olo kuti nise anyinji, nise muŵili umozi mwa Khristu, ndipo aliyense payeka ni ciwalo ca muyake.” (Aro. 12:4, 5) Kansi Paulo etanthauzanji? Etanthauza kuti, olo kuti tili na mbali zosiyanasiyana mumpingo, tonse nise ofunika ngako.

5. Kansi mphaso zawatwala Yehova ku mpingo zuyangizhyilapo ŵani?

⁵ Tikayamba kuganizila za ŵanthu amene ali na mbali mumpingo, kanyinji-kanyinji tuganizila za osogolela mumpingo. (1 Ates. 5:12; Aheb. 13:17) N’cendi kuti kupitila mwa Yesu, Yehova etwala “mphaso mwa analume” mumpingo Wake. (Aef. 4:8) “Mphaso mwa analume” zuyangizhyilapo a m’Bungwe Yolamulila, Oyavya a m’Bungwe Yolamulila, a m’komiti ya msambo, oyanganila a madela, alangizi a masukulu, akulu m’mipingo na atumiki oyavya. Akwasu amene aŵa osankhiwa na mzimu utuŵa kuti asamalile mbelele zamtengo wapatali za Yehova nolimbikisha mipingo.​—1 Pet. 5:2, 3.

6. Molingana na 1 Atesalonika 2:6-8, kansi akwasu osankhiwa na mzimu utuŵa oyesayesa kucita cinji?

⁶ Akwasu osankhiwa na mzimu utuŵa kuti asamalile maudindo osiyanasiyana. Viwalo va muŵili monga manja na mendo, vuseŵenzela pamozi popindulisha muŵili wonse. Molingana na izi, akwasu amene osankhiwa na mzimu utuŵa oseŵenza na mphamvu kuti apindulishe mpingo wonse. Akwasu amene aŵa ofuna lini kutamandiwa, m’malo mwake, oyesayesa kuyavya notang’isha akwasu na azilongosi. (Ŵelengani 1 Atesalonika 2:6-8.) Tuyamikila ngako Yehova potipasa akwasu oyenelela koma soti osazikonda kuti akotisogolela mumpingo.

7. Kansi atumiki anthawi zonse olondela madaliso otyani?

⁷ Ayakine mumpingo otumikila monga amishonale, apainiya apadela kapena apainiya a nthawi zonse. Kulaŵila cendi, akwasu na azilongosi pacalo conse oseŵenzesha nthawi yao ikulu pa nchito yolalikila nopanga ophunzila. Cifukwa ca izi, okwanisha kuyavya ŵanthu anyinji kunkhala ophunzila a Khristu Yesu. Nangu kuti atumiki anthawi zonse ali na vinthu vitontho pa umoyo wao, Yehova oŵadalisa ngako. (Mko. 10:29, 30) Tuŵayamikila ngako akwasu na azilongosi amene aŵa ndipo ni mwai ukulu ngako kutumikila nao mumpingo.

8. Ndaŵa yanji wofalisa aliyense ni wofunika ngako kwa Yehova?

⁸ Kansi akwasu apaudindo na atumiki anthawi zonse niye ofunika ngako mumpingo? Yai. Wofalisa aliyense ni wofunika ngako kwa Mulungu na mumpingo. (Aro. 10:15; 1 Akor. 3:6-9) Zili tetyo cifukwa colinga cikulu ca mpingo ni kupanga ophunzila a Yesu Khristu. (Mat. 28:19, 20; 1 Tim. 2:4) Onse okatizhyana na mpingo, kaya ni ofalisa obatizika olo osabatizika, oyesayesa kuika pasogolo nchito yolalikila mu umoyo wao.​—Mat. 24:14.

9. Ndaŵa yanji tufunika kuyamikila anakazi Acikhristu?

⁹ Yehova oonesha kuti olemekeza azilongosi poŵapasa nchito yofunika ngako  mumpingo. Oŵakonda ngako anakazi olunguliwa, azimai, anakazi amasiye na mbeta amene omutumikila mokhulupilika. Baibo yufotokoza za anakazi anyinji amene ekondwelesha Mulungu. Anakazi amene aŵa eonesha cisanzo ciweme pa nzelu, cikhulupililo, cangu, kutang’a mtima, wanzi na nchito ziweme. (Luka 8:2, 3; Mac. 16:14, 15; Aro. 16:3, 6; Afil. 4:3; Aheb. 11:11, 31, 35) Tufunika kuyamikila ngako Yehova cifukwa cakuti tili na azilongosi Acikhristu m’mipingo yasu, amene nao oonesha minkhalidwe iweme yamene iyi.

10. Ndaŵa yanji tufunika kuyamikila akulukazi?

¹⁰ Nise osangalala ngako kuti tili na akulukazi mumpingo. M’mipingo iyakine muli akwasu na azilongosi akulukazi amene atumikila Yehova mokhulupilika kwa moyo wao wonse. Koma ayakine ephunzila cendi kwalombapano. Olo n’tetyo, onse ovutika na matenda owela cifukwa ca ukulukazi. Mavuto aŵa oŵakangisha kucita zinyinji mumpingo na pa nchito yolalikila. Tetyo, ocita zaangakwanishe mu ulaliki ndipo oseŵenzesha mphamvu zao zonse polimbikisha nophunzisa ayakine. Tupindula ngako na cisanzo cao. Kulaŵila cendi, ni ofunika ngako kwa Yehova na kuli seo.​—Miy. 16:31.

11-12. Tulimbikishiwa tyani na acilumbwana ali mumpingo mwasu?

¹¹ Ganizilani soti za acilumbwana. Okumana na mavuto anyinji paakukula m’calo colamuliliwa na Satana Maleŵania cifukwa ca viphunziso vake viipa. (1 Yoh. 5:19) Koma tulimbikishiwa ngako kuona acilumbwana oyankhapo pa misonkhano, olalikila na kuteteza cikhulupililo cao nthawi zonse. Kulaŵila cendi, acilumbwana nimwe ofunika ngako mumpingo wa Yehova.​—Sal. 8:2.

¹² Koma akwasu na azilongosi ayakine ozimvwa kuti ni osafunika mumpingo. Kansi n’cinji cingaŵayavye kuona kuti ni ofunika? Tiyeni tione.

13-14. Ndaŵa yanji ayakine angazione monga ni osafunika mumpingo?

¹³ Tiyeni tione mfundo yaciŵili yatuphunzilapo pa cisanzo ceciseŵenzesha Paulo. Mfundo yaciŵili yuonesha vuto yali nayo atumiki a Mulungu anyinji masiku ŵano. Ove ovutika kuzindikila kuti ni ofunika ngako mumpingo. Paulo elemba kuti: “Ngati kwendo ingalaŵile kuti, ‘Cifukwa n’ne lini kwanja, nili lini mbali ya muŵili,’ izi zingacitishe lini kwendo kusankhala mbali ya muŵili. Ndipo ngati kwatu ingalaŵile kuti, ‘Cifukwa n’ne lini linso, nili lini mbali ya muŵili,’ izi zingacitishe lini kwatu kusankhala mbali ya muŵili.” (1 Akor. 12:15, 16) Kansi Paulo enzophunzisa mfundo yanji?

¹⁴ Ngati tuzilinganizhya na ayakine mumpingo, tingayambe kuziona kuti nise osafunika. Ayakine mumpingo angankhale na luso yophunzisa, yocita vinthu mwadongosolo olo luso yocita uciŵeta. Payakine mungazione kuti muliye maluso yaali nayo ayakine. Izi zuonesha kuti nimwe olicefya. (Afil. 2:3) Koma mufunika kusamala. Ngati nthawi zonse mukonda kuzilinganizhya na ayakine amene ali na maluso, mungayambe kuziona kuti nimwe atyalatyala. Mungayambe soti kuziona kuti muliye mbali mumpingo, monga nimwecifotokozela Paulo. Ko n’cinji cingakuyavyeni kugonjesa maganizo oteti?

15. Molingana na 1 Akorinto 12:4-11, kansi tufunika kuzindikila cinji cokhuza mphaso zatili nazo?

¹⁵ Ganizilani mfundo iyi: Yehova epasa Akhristu oyambilila mphaso yocita vodabwisa moyavyiwa na mzimu utuŵa, koma onse aliyolondele mphaso zolingana. (Ŵelengani 1 Akorinto 12:4-11.) Nangu kuti elondela mphaso na maluso osiyanasiyana, Mkhristu aliyense enze wofunika. Masiku ŵano tiliye mphaso yocita vodabwisa na mzimu utuŵa. Koma mfundo iyi ikalukata nchito. Olo kuti tili na maluso osiyana, tonse nise ofunika ngako kwa Yehova.

16. Kansi tufunika kukumbukila malangizo otyani a mtumwi Paulo?

 ¹⁶ M’malo mozilinganizhya na Akhristu ayakine, tufunika kukumbukila malangizo ouzhyiliwa a mtumwi Paulo akuti: “Koma aliyense payeka ayese nchito yake, pavuli pake ankhale na cifukwa cosangalalila na nchito yake, m’malo mozilinganizhya na munthu muyakine.”​—Agal. 6:4.

17. Kansi tingapindule tyani ngati tukonkha malangizo ya mtumwi Paulo?

¹⁷ Ngati tukonkha malangizo ouzhyiliwa a mtumwi Paulo noyesa nchito yasu, tingayambe kuona kuti tili na mphaso na maluso apadela. Mwacisanzo, mkulu angankhale aliye luso yophunzisa pa pulatifomu, koma angankhale na luso pa nchito yopanga ophunzila. Payakine aliye luso yocita vinthu mwadongosolo monga ni mwakucitila akulu ayakine mumpingo, koma angankhale ciŵeta wacikondi wamene ofalisa omasuka naye kusengako malangizo a m’Malemba. Olo angankhale na nkhalidwe iweme ya wanzi. (Aheb. 13:2, 16) Ngati tuzindikila maluso atilinao tinkhale na cifukwa cosangalalila na nchito yasu mumpingo. Ndipo tikocitila lini nsanje akwasu amene ali na maluso osiyana na yasu.

18. Kansi tingakulishe tyani luso yasu yophunzisa?

¹⁸ Mosasamala kanthu za mbali yatilinayo mumpingo, tonse tufunika kuyesayesa kuyangizhyila luso yasu mu utumiki koma soti maluso ayakine yatilinayo. Kuti tikwanishe kucita zamene izi Yehova otiphunzisa poseŵenzesha gulu yake. Mwacisanzo, pa misonkhano ya mkati mwa sondo, tulondela malangizo amene angatiyavye kuti tikokwanisha kuphunzisa luweme mu utumiki. Kansi muyesayesa kuseŵenzesha luweme malangizo yatuphunzila pa misonkhano iyi?

19. Kansi mungakwanilishe tyani colinga cakuyoloŵa Sukulu ya Alengezi a Ufumu?

¹⁹ Maphunzilo ayakine apadela yatulondela ni kupitila mu Sukulu ya Alengezi a Ufumu. Ali na mwai woloŵa sukulu iyi ni akwasu na azilongosi amene ali mu utumiki wanthawi zonse ndipo ali na vyaka va pakati pa 23 na 65. Nthawi ziyakine mungaone kuti mungakwanishe lini colinga ici. Koma m’malo moganizila za vinthu vingakukangisheni kuloŵa sukulu iyi, mukoganizila colinga camufunila kuyoloŵa sukulu iyi. Pavuli pake, lembani vinthu vingakuyavyeni kuti mukwanilishe ziyeneleso. Moyavyiwa na Yehova na kuyesayesa kucita mbali yanu, mungakwanishe kucita vinthu vamwenzoona kuti ni vosakwanishika.

20. Ko tingaphunzilenji pa lemba ya Aroma 12:6-8?

²⁰ Mfundo yacitatu yatingaphunzile pa cisanzo ceciseŵenzesha Paulo yupezeka pa Aroma 12:6-8. (Ŵelengani.) Pa lemba iyi, Paulo eonesha soti kuti ŵanthu mumpingo ali na maluso osiyanasiyana. Koma egogomezela kuti tufunika kuseŵenzesha luso yatilinayo poyavya mpingo kunkhala wotang’a.

21-22. Kansi tingaphunzile cinji pa cisanzo ca Robert na Felice?

²¹ Ganizilani cisanzo ca mkwasu Robert. Pavuli potumikila kucalo ciyakine, euzhyiwa kuti akatumikile pa ofesi ya msambo m’calo cao. Akwasu emusimikizhyila kuti kucinja kwa utumiki wake kwenze lini cifukwa cakuti elakwisa ciliconse. Nangu n’tetyo, yove elaŵila kuti: “Kwa miyezi inyinji, nenzozimvwa kuti n’ne wokangiwa. Nthawi  ziyakine nenzofuna kuleka utumiki wa pa Beteli.” Kansi ecitanji kuti ayambe soti kusangalala? Mkulu muyake emukumbusha kuti Yehova etiphunzisa pa utumiki wetecita kuvuli kuti atiseŵenzeshe pa utumiki walomba. Robert ezindikila kuti enzofunika lini kulolesha pa vinthu vakuvuli koma kuika maganizo pa vinthu vakucita lomba.

²² Mkwasu Felice Episcopo naye ekumana soti na vuto yoteti. Yove na mkazi wake esilizhya maphunzilo a Giliyadi mu 1956 ndipo pavuli pake etumikila monga woyanganila dela ku Bolivia. Mu 1964 enkhala na mwana. Mkwasu Felice elaŵila kuti: “Cenze covuta kusiya utumiki watenzokonda ngako. Kwa caka conse nenzozimvwa kuti n’ne wosafunika. Koma moyavyiwa na Yehova, necinja maganizo yangu nolondela udindo walomba monga kolo.” Kansi mukumvwa monga ni mwecimvwila Robert na Felice? Kansi muzimvwa kuti nimwe wosafunika cifukwa mucita lini utumiki wamwenzocita kale? Ngati n’tetyo, mungankhale osangalala ngati mungacinje maganizo yanu noika nzelu pa utumiki wamucita lomba potumikila Yehova na akwasu. Mukonkhala wotangwanika poseŵenzesha mphaso na maluso yanu poyavya ayakine. Mukacita tetyo, munkhale osangalala ndipo mutang’ishe mpingo.

23. Kansi tufunika kupatula nthawi yocita cinji, ndipo nkhani yokonkhapo ikayankhe makonsho otyani?

²³ Tonse nise ofunika ngako kwa Yehova ndipo ofuna kuti tikozimvwa kuti tili mbali ya banja yake. Ngati tupatula nthawi kusinkhasinkha pa zatingacite potang’isha akwasu na azilongosi, tikozimvwa kuti nise ofunika ngako mumpingo. Kansi tufunika kuŵaona tyani akwasu na azilongosi mumpingo? Tingaoneshe tyani kuti tuŵakonda noŵalemekeza? Nkhani yokonkhapo, ikayankhe makonsho amene aŵa.