Umboni uonesha kuti Yesu enkhala Mkulu wa Ansembe pecibatizika mu 29 C.E. Kansi tuziŵa tyani zamene izi? Pa ubatizo wake, Yesu etwala moyo wake pa guwa ya nsembe yophiphilisila, yamene yupanamila “cifunilo” ca Mulungu. (Agal. 1:4; Aheb. 10:5-10) Pofwana kuti guwa ya nsembe yophiphilisila yankhalapo kuyambila pa ubatizo wa Yesu, nao kacisi wauzimu wamene upanamila makonzedwe a kulambila kutuŵa ozikiwa pa dipo, cuoneka kuti weyamba pa nthawi yamene iyo. Guwa ya nsembe n’cinthu cofunika ngako pa kacisi wauzimu.—Mat. 3:16, 17; Aheb. 5:4-6.

Kacisi wauzimu wenzofunika kunkhala na mkulu wa ansembe. Pokwanilisha zamene izi, Yehova esankha Yesu kunkhala mkulu wa ansembe ‘poseŵenzesha mzimu utuŵa.’ (Mac. 10:37, 38; Mko. 1:9-11) Kansi tingasimizhye tyani kuti Yesu esankhiwa kunkhala Mkulu wa Ansembe akaliyomwalila na kuukishiwa? Cisanzo ca Aroni na akulu ansembe etumikila pavuli pake, citiyavye kuyankha konsho iyi.

M’cilamulo ca Mose, ni Mkulu wa Ansembe tyala enzofunika kuloŵa m’malo Atuŵa Ngako a cihema, ndipo pavuli pakuti amanga kacisi, enzoloŵa m’malo Atuŵa Ngako a kacisi. Pakati pa Malo Atuŵa na Malo Atuŵa Ngako penze ketani. Mkulu wa Ansembe enzoluta m’malo Atuŵa Ngako pa siku yophimba macimo. (Aheb. 9:1-3, 6, 7) Aroni na omuloŵa m’malo enzozozewa kunkhala akulu ansembe akaliyoloŵa m’malo Atuŵa Ngako. Tetyo, cuoneka kuti naye Yesu ezozewa kunkhala Mkulu wa Ansembe akaliyokufwa na kuukishiwa. Pavuli pake niye “pecipita pa ketani, yamene ni muŵili wake,” kuti akankhale na moyo kululu. (Aheb. 10:20) Pa cifukwa ici, mtumwi Paulo efotokoza za kuwela kwa Yesu “monga mkulu wa ansembe.” Pavuli pake “eloŵa m’cihema cikulu koma soti cangwilo camene ciliyopangiwe na manja ya ŵanthu,” ndipo ekwela “kululu.”—Aheb. 9:11, 24.

Paliye kusiyana kulikonse pakati pa nthawi yamene pangano yalomba yenkhazikishiwa na peyeyamba kukata nchito. Ndaŵa yanji talaŵila tetyo? Yesu peciluta kululu notwala mtengo wa nsembe yake yangwilo m’malo mwa seo, etola sitepu yoyamba pa masitepu atatu amene enzofunikila ponkhazikisha pangano yalomba. Masitepu amene aŵa niye ecitisha kuti pangano iyi iyambe kukata nchito. Kansi kuti acite zamene izi enzofunika kutola masitepu otyani?

Coyamba, Yesu eonekela kwa Yehova. Caciŵili, etwala mtengo wa nsembe yake kwa Yehova. Cacitatu, Yehova elondela milopa ya Yesu yekhesewa. Pangano yalomba yenzokata lini nchito mpaka pecikwanilisha masitepu atatu aŵa.

Baibo yutiuzhya lini nthawi yeneyene pamene Yehova elondela mtengo wa nsembe ya Yesu. Tetyo, tingalaŵile lini ndendende pamene pangano yalomba yenkhazikishiwa noyamba kukata nchito. Olo n’tetyo, tuziŵa kuti Yesu eluta kululu pekwesala masiku 10 kuti Pentekosite icitike. (Mac. 1:3) Pa nthawi itontho peciluta kululu, etwala mtengo wa nsembe yake kwa Yehova, ndipo Yehova eilondela. (Aheb. 9:12) Tuziŵa zamene izi cifukwa ca vinthu vecitika pa Pentekosite mu 33 C.E. (Mac. 2:1-4, 32, 33) Izi zuonesha kuti payakine pa nthawi yamene iyi niye peyeyamba kuseŵenza pangano yalomba.

Posilizhyila tingalaŵile kuti pangano yalomba yenkhazikishiwa noyamba kukata nchito pavuli pakuti Yehova walondela mtengo wa nsembe ya dipo ya Yesu. Pa nthawi yamene iyo pangano yeyamba kukata nchito ndipo Yesu enze mkulu wa ansembe koma soti m’nkhalapakati.—Aheb. 7:25; 8:1-3, 6; 9:13-15.